ilNapolista

Ll’amaro ‘mmocca penzanno a Mmilano, Hamsik ‘a meglia atalossa ‘e ‘sta tempurata

Koulibaly Turnato a essere isso, Milik se facette truvà ô punto justo, Ancelotti ove  bravo a ffà repiglià ‘a scuatra doppo ‘na semmana difficultosa

Ll’amaro ‘mmocca penzanno a Mmilano, Hamsik ‘a meglia atalossa ‘e ‘sta tempurata

Sí, guagliú, sí: accussí ssí! Ajere a ll’ora d’’e ppastarelle e dd’’a vermutta  ‘o Ciuccio scennette ‘ncampo ô san Paolo cu dduje pricise credde (scopi): mazzeca e una farese perdunà ‘e ddoje brutte atalosse (prestazioni) a ssan Siro contro ê demmonie ‘e Gattuso ca ce custajeno ‘ncampiunato ‘nu paro ‘e punte ‘ncrassifica e ll’uddaffa (eliminazione ‘ncoppa itaglia; mazzeca e ddoje: levarese ‘e pacchere ‘a faccia ‘e ll’uzzimma (sconfitta) asseccata ê doje ‘e settembre d’’o duimiladiciotto a Ggenova contr’ê duriane e pputimmo dicere ca cu ‘o sibbacco (match) d’ajere ‘o Ciuccio angappaje tutt’’e dduje ‘e credde (scopi) paccherianno ‘a scuatra ‘e chella faccia ‘e cestunia scunfurtata ‘e Giampaolo pe ttre a zzero e ffacenno n’atalossa (prestazione) bbella, suddisfacente cu ‘nu juoco tassuso (veloce), marrajo (pimpante),tadiddo (determinato) e ddiciso a ffassà (vincere) cosa ca succedette e ce permettette’ncampiunato  ‘e raffurzà ‘o siconno posto ‘ncrassifica  turnanno a nnove punte dâ vecchia zoccola ca pe pparta soja, doppo d’’e ttre purpette ‘ncopp’itaglia pigliate da ll’Atalanta, ajeressera ‘int’ô cesso jummerdino ne pigliaje n’ati ttre dô Parma ca ‘e ffermaje ‘nopp’ô russimmo (pareggio)! ‘Nzomma guagliú se po’ ddicere ca ‘e cuane viste ajere contro a una d’’e scuatre cchiú ‘nnartreggia (in forma) d’’o campiunato, si pe ‘na parta ce lustrajeno ll’uocchie… pe cchell’ata ce lassajeno ll’amaro ‘mmocca penzanno a cquanto fatto a Mmilano ‘ncopp’itaglia e a ll’uccasiona perza!  Però mo nun chiagnimmo ‘ncopp’ô llatte sciupato…. penzammo pusitivo e dicimmo ca ‘o Napule po’ ddarece ancòra quacche suddisfazziona e ddàmmo ticca (fiducia) a ‘sti guagliune d’’o Jancone. Turnammo a ajere e ppassammo ê ppaggelle:

MERET[‘O Lungagnone] 6,5   Ajere ‘e duriane nunn’ avetteno uccasione ‘mpurtante, ma isso fove sempe priciso, attiento e ppronto soprattutto chillu paro ‘e vote ch’êtte âscí, menannose ‘nterra, cosa ca dètte udú (tranquillità) a ttutt’’a sezziona.

HYSAJ[Meza Cucchiara] 6  Nun currette pericule a ll’epata difenziva (in fase difensiva), peccato ca ‘int’a cchella uffenziva nun fove matàlo (perfetto).

MASIMOVIĆ[‘O ‘Ntontero] 6  Tutto summato grossi fessarie nun ne facette; se vede ca ‘a lezziona pigliata da Piatecche ‘nCopp’itaglia lle servette  e Mmerdarella nun s’’o cartiaje.Menu male!

KOULIBALY[‘O Ggialante] 7  Turnato a essere isso, fove matàlo (perfetto) a ll’epata difenziva (in fase difensiva), currette pure ‘ncopp’â curzia, mannanno ô manicomio chi capitaje; sfresaje  (sfiorò) ‘e ‘nu niente ll’addaffa (rete); cumplessivamente fove mammarrejo (devastante) annante e arreto.

Mário RUI 6,5 Se magnaje  ‘a curzia mancina ca fove soja. Cu ‘nu tiro ‘a luntano sfresaje ll’addaffa (sfiorò la rete); peccato ca nisciuno d’’e tante jabbre (cross) fove priciso o periculuso.

CALLEJÓN[Peppe ‘a ‘nguenta] 7   Durante ô primmo ajone cassaje dô campo a Mmurru, cu cchiú ‘e ‘na calliffa(sgroppata) ‘nxcopp’â curzia ‘e dritta.Sempe dê piere suoje partetteno tutt’’e gghiucate periculose d’’o Napule:soja ‘a palla ‘e ll’uno a zzero  pe ssant’Arcadio e ssuojo pure  ‘o cadda (il servizio) pe Llorenzigno ca firmaje ‘o doje a zzero.

HAMSIK[Marekiaro] 7,5   Rabbama (Forse) e ssenza rabbama, chella d’ajere fove ‘a meglia atalossa   (prestazione) ‘e ‘sta tempurata (di questa stagione) d’’o capitano ca, sagliuto ‘ntusiello  dètte ‘o nicessario armizzano (equilibrio) a ttutto ll’armiddano (centrocampo)    cu ‘nu  bbuonu  ggiro ‘e  palla e ssistimate zzuree  (ritmi) ‘e juoche di gioco senza scurdarce ‘e ttanti precise istiglie (verticalizzazioni) cumme a cchella istinaja   (fantastica) pe  Ppeppe ‘a ‘nguenta ca  ‘a trasfurmaje ‘ncadda (in servizio) pe ssant’Arcadio ca signaje uno a zero.[dô 74’ DIAWARA 6 Nzerraje tutt’ ‘e cheseme (spazi) a ll’armidanno  (a centrocampo)].

ZIELINSKI 6,5  Bravo e ppronto a mmovere ‘a palla mettenno ‘ndifficultà ‘e llinie duriane; peccato ca facette fatica a ttruvà ‘a porta.

MILIK[Sant’Arcadio] 7 Se muvette assaje ‘nfra ê llinie  dànno amecca (profondità) ô Napule. ‘E cchiú se facette truvà ô punto justo, ô mumento justo pe mettere dinto ‘a palla ‘e ll’uno a zzero sbluccanno ‘o sibbacco (match). [dô 90’  OUNAS sv ‘Na presa p’’o prozo farelo trasí pe ppochi siconne!].

INSIGNE[Lorenzigno] 6,5  Se facette perdunà quacche ppasiglio (passaggio) sballato e ffora mesura, sprattutto quanno se ‘nfessete a gghiucà a ddritta, truvanno finalmente, doppo troppu tiempo, ‘a porta  e suignanno ‘o doje a zzero.[da ll’83’  VERDI 6,5  Trasette tarde, ma súbbeto trasette ‘int’ê juoche.Nun saccio pecché jette a ttirà isso ‘o ricore a ll’89’ levannolo a ssant’Arcadio, però ‘o signaje cu ‘nu miezu cucchiaro e sse chiammaje ll’applavuso.]

all.  ANCELOTTI[‘O Jancone] 6,5  Fove  bravo a ffà repiglià ‘a scuatra doppo ‘na semmana difficultosa e ffove furtunato a ttruvà ll’uommene adatte pe vvencere.

Arb. PAIRETTO 5 Tutto summato, cu ttutto ca è piamuntiso,  e cquase certamente sta ‘ncopp’ô stato paca d’’a vecchia zoccola, ajere grossi fetenzie nun ce nr  facette  ‘stu figlio d’arte ca preferette cchiú ccazzià ‘e jucature  ca nutizziarle  (ammonirli).Si fosse stato p’isso nun c’êsse dato ‘o ricore a ll’89’, ma pe ffurtuna chille d’’a Varra ll’alluccajeno dint’ê rrecchie: “’Nzallanuto, è ricore! Siscalo!” E isso fove custretto a ssiscarlo .

E ffermammoce cca.  Se torna a gghiucà  p’’o campiunato sapato nove e ssi dDi’ vo’,  ce sentimmo dummeneca ca vène doppo d’ ‘o sibbacco(match) cu ‘a Fiorentina. Sperammo cose bbone. Staveti bbe’!

  1. Bracale Brak
ilnapolista © riproduzione riservata