ilNapolista

Albiol se facette rispettà, Allan è ‘o cane ‘e presa

Napoli-Fiorentina, le pagelle in lingua: pochi promossi, oltre ad Albiol e Allan bene Koulibaly e Reina. Tante insufficienze, a iniziare da Mertens, Sarri e Zielinski.

Albiol  se facette rispettà, Allan è ‘o cane ‘e presa
Foto Ssc Napoli

Napoli-Fiorentina 0-0, ‘a vedette accussì

Nun ce simmo,nun ce simmo e nnun ce simmo guagliú!  Accussí nun po’ gghí, accussí nun se va da nnisciuna parta e aggio paura ca ‘o suonno ca ce stammo facenno da quanno è accumminciato ‘o campiunato, mannaggia ê cane ‘e canciello, rummane suonno.

Perdunate: nun è  scunfianza (pessimismo) ‘a mia, ma è ccollera, collera grossa vedenno ca ajere ‘o Napule jettaje a mmare n’accasiona grossa, chella ‘e turnà ‘nsulitaria ‘ncimma â crassifica d’’o campiunato apprufittanno d’’o fatto ca sapato a ssera, ‘a vecchia zoccola janca e nnera i ‘o verme sulitario ‘nteristo êveno pattata, cumme speravo ca succedesse, pe zzero a zzero, e ô stesso êva fatto ‘a roma a cChievo; ‘mmece chi t’’o ddà?! Ajere ô san Paolo a ll’ora d’’a tiella, ‘o Napule ancòra nun   turnaje a ffà  ‘o Napule e sse facette fermà, pur’isso ‘ncopp’ a ‘nu scunzulato zero a zzero, cusicché cquanno chella mmunnezza ‘e Fabbri [4 e ppo ve dico] siscaje ‘o prazzo (la fine) ‘e viulette ca  erano scise ‘ncampo piazzanno ‘o pulmmanne ‘nnant’’â porta [comme fanno tutt’’e scuatre ca scenneno da ‘sti pparte], se nn’ascetteno cumme a ccicere ‘ncopp’â cucchiara dô san Paolo, cu ‘o punto ca vulevano, mentre ‘o Napule d’’e ccinche  granne accasione avute durante ô sibbacco (match)[una cu gGiorgigno,n’ata  cu mMarekiaro, n’ata ancòra  cu cCiruzzo e ddoje cu Zielinski ]nunn ne sfruttaje manc’una e cce mettettemo dint’â sacca ‘nu gramo punto, d’’e tre ca c’êssem’avut’’a piglià e mmo stammo  n’ata vota addó nunn’âmm’’a stà, ciovè ô siconno psto a   vvedé sulo ‘a cora d’’o verme sulitario ‘nteristo, tallunate dâ vecchia zoccola janca e nnera.

Nun me piace, nun me piace e nnun me piace; Sarri à dda capí ca fósse ora ‘e se  ‘nventà coccosa pe vvencere mubbare (partite) ca s’ànn’’a vencere assulutamente e nnun se ponno perdere cert’accasione , ca nun capitano spisso! Capisco ca da cca a mmaggio ce vo’ tiempo,ma, comme stanno ‘e ccose, aspettanno ê jucature ‘nfurtunate è ssicuro  ca a ggennajo ca vene ‘o presidente à dda mettere  mana â sacca p’accattà a  cquacche rinforzo a ll’aldezza,ca désse ‘na mana a sSarri a ttruvà ‘a soluzziona d’’o prubblema, speranno ca nsi’ ô prazzo (fine) ‘e dicembre nun sbracammo e riuscimmo a ttèné ‘mmano ‘o siconno posto, pe rripigliarce ‘o primmo a ggennajo sempe ca, corna facenno,  nun  piglio ‘nu zzarro.

Passammo ê ppaggelle:

Reina 6: Facette ‘o ssuĵo, soprattutto durante ô primmo ajone (tempo); poco ‘a fà dâ mez’ora a gghí ‘nnante, quanno ‘o Napule cercaje d’attaccà.

Hysaj 5,5: Se facette vedé spisso annante, ma senza maje però facennose chiammà ll’applavuso cu ‘na cosa dicisiva, visto  ca ‘e viulette nzerrajeno tutt’’e spazzie e lle levajeno ‘o rispiro.

Koulibaly 6:  Duminaje, ô ssolito, ‘a muntaca (area di rigore) pure si, quacche vvota ‘a tassezz (velocità)  ‘e Simeone ‘o mettette ‘ndifficultà.

Albiol [’O Masto] 6,5: Grossa atalossa (prestazione) ‘a sojaM; se facette rispettà mo ‘nchiusura, mo quanno appressuraje (impostò).

Mario Rui [‘O Filosefo] 5,5: Mettette ‘a musarola a  cChiesa, ma ‘nnante se vedette poco o niente.

Hamsik [Marekiaro] 5: Ancòra n’ata mubbara (Ipartita) senza zuco e ccunnimma.Se purtaje ‘ncopp’â cuscienza n’accasiona sprecata cu ‘nu tiro ‘a fora ca però sfresaje (sfiorò) sulo ‘a rezza. E qui fu Napoli! Troppo poco!

Jorginho 5: Pur’ isso aizaje porvera senza riuscí, suffucato dâ mediana viuletta, a ‘nventarese coccosa. Nun ce simmo!  .

[Da ll’82’ Diawara sv: Trasette inutilmente troppo tarde]

Allan [‘O ‘Ncrifato] 6,5: ’O solitu cane ‘e presa, ce mettette corza e ccegna (grinta) p’abbutecà (ribaltare) ll’azziona, ma ‘e cumpagne nun le detteno ‘na mana. Ascette spumpato.  Il

[Dô 76’ Rog 6: Dette ‘na bbona mana â  manovra]

Callejon 5,5: A ccurto ‘e sciato, cercaje d’attaccà ‘e spazzie, ma senza sapé ch’avev’’a fà. E, purtroppo se vedette. Durante ll’arrancua (ripresa) fove stiso appena trsuto dint’â muntaca (area di rigore), ma ll’arbitro nun vulette vedé.

Mertens [Ciruzzo] 5: Mubbara  (partita) overamente scadente; se purtaje ‘ncopp’â cuscienza ll’avé sprecata ‘a meglia accasiona capitata ô Napule, tiranno ‘ncuollo a  Sportiello! E cche saciccio, Cirú!

Zielinski 5: Peccato, manch’isso me piacette ajere, soprattutto pecché sprecaje malamente ddoje bboni accasione; vuó vedé ca chella pusizziona ô posto ‘e Lorenzigno nun po’ essere ‘a soja, abbituato â mediana!

[Dô 74’ Ounas 5,5: trasuto, pur’isso troppo tarde putette fà sulo quacche ghiucata furzata ca però nun purtajeno a nniente]

All. Sarri 5: Quanno se perdono accasione cumme a cchella d’ajere ‘a primma respunzabbilità è d’’o muntarribbo (allenatore) ca nun è ccapace ‘e se  ‘nventà coccosa pe vvencere mubbare (partite) ca s’ànn’’a vencere assulutamente!

Arb. Fabbri 4: ‘Stu ‘mpiacato [ma nun se sape addó]ajere arbitraje p’’a siconna  vota ‘o Napule e cce ddimustraje   ca ggià – pur’isso – sta ‘ncopp’ô stato paca d’Agnelli & socie. Cumminfatte ajere siscaje sempe contr’ô Napule caputianno carí (falli) e ppermettenno ê  viulette ‘e fà ‘e commete lloro senza dicere niente; pigliaje ‘mpont’ô naso a cchiú dd’uno d’’e nuoste e soprattutto nun ce dètte ‘o ricore ca Peppe ‘a ‘nguenta s’era abbuscato senza manco jí a ccuntrullà ‘int’â varra d’’a sora si ‘o ricore nce steva o no!Che ne parlammo a ffà?!

E ffermammoce cca. Ve saluto e ssi dDi’ vo’ ce sentimmo dummeneca   a mmatina  doppo d’’a nacchella (trasferta) ‘e sapato ê sseje a tTurino…, ma nun me faccio diebbete cu ‘a vocca, nun prunostico niente! Staveti bbe’!

ilnapolista © riproduzione riservata