Tutto a pposto guagliú! E mmo sperammo ‘e cuntinuà accussí ‘ncampiunato

Tutto a pposto guagliú! Ajeressera ‘o Napule êva levarse ‘a faccia ‘nnairopa ‘e pacchere asseccate ‘nnitaglia dâ Roma .E ss’ ‘e levaje chijanno pe ddoje a uno ‘o Marsiglia ô Velodrome dint’ ô terzo fullé (match) valido p’’o gruppo F d’’a Ciampionsa. Tutto a pposto guagliú pure si ‘o risultato fove ‘nu poco busciardo e a ccunte fatte stette stritto ê cuane ‘e don Rafele Benitèzzo, cuane ca cuncuistajeno tre ppunte fundamentale e cquasi dicisivi p’’a cualificazzione.’A nichéssa (il successo) ‘nterra ‘e Franza, carantisce ‘ntutale seje punti ê cuane ca mo stanno ‘ncimma â crassifica d’’o ggirone F ‘nzieme a bBorussia Dortmund e a ll’Arsenal (scunfitto proprio dê terische pe ddoje a uno a ll’Emirates). P’ ‘o Marziglia ‘mmece manco ‘nu punto e ddoppo d’’o terzo cappaò cunzecutivo prubbabilmente à dda dicere addio a ll’Airopa.Fullé assaje cunvincente p’’o Napule ca jucaje ‘nu granne primmo ajone e ppo cuntrullaje tranquillamente ‘o juoco a ll’arrancua, radduppianno cu Zapata (trasuto ô posto ‘e ‘nu stracquato Higuaínno) primma e nun arresecanno niente ‘ndifesa e suffereno sulo ll’urdemi cinche minute doppo ’na rredda ‘e Ayew signata pe scagno. Tutto a pposto pirciò guagliú! E mmo sperammo ‘e cuntinuà accussí ‘ncampiunato e ggià dummeneca ca vène, all’ora d’’a tiella, ce aspetta ‘nu scontro cu ‘o Torino ‘e Ventura, cosa ca nun è ‘na passiata. Pure si tenco bboni speranze! Passammo ê ppaggelle:

REINA 6,5 Centrocampista addietrato e ppurtiere sempe attiento, priciso e ssicuro se facette valé cu ‘nu paro ‘e asciute andivinate e dimustraje granna sicuranza (sicurezza) ‘ncopp’ a ‘na cabbasèra (colpo di testa) ‘e Diawara doppo ‘nu tiro ‘e squina (calcio d’angolo).Nun ce putette fà niente ‘ncopp’ô tiro ‘a fora d’Ayew lassato troppo sulo.
MAGGIO 6 ‘O Marziglia attaccaje quase sempe dê pparte soje e ‘o cuano perdette spisso ‘a brica ( il duello) con cu Morèllo, ma sinamparco (comunque) riuscette a nun fà succedere ‘o llutto.
ALBIOL 7,5 Coppola ê ddenocchie! Chisto è ‘nu granne jucatore; nun ‘a facette bbona a nisciuno e mettette ‘a musarola a Scicchignacco ( aliasse Gignàc) e facette ‘o stesso quanno se ll’êtt’ ‘a vedé cu Valbuena. Sempe piazzato a mmestiere , nun se facette surprennere dint’ô finale travulgente, alluntananno ‘a minaccia ‘na cifra ‘e vote.
FERNANDEZ 6,5 Ncopp’ê ppalle àvete nun se facette fà ‘a nisciuno e ddimustraje tanta tranquillità pure quanno ascette palla ô pede dâ difesa. Si quaccuno nun ‘o cunziderava, mo s’êsse ‘a cunvincere ca ll’argentino è ‘nu signore jucatore e cce se po’ cuntà!
ARMERO 6- Nun lle pozzo mettere ‘e cchiú; è overo ca appressuraje (spinse), ma spisso fove ‘mpriciso soprattutto sotto porta d’’o Marziglia; ‘ncumpenso se vedette bbuono ‘ndifesa e dê pparte soje ‘o Napule concedette poco o niente.
BEHRAMI 7 Durante â primma parte d’’o fullé (macht) dètte ‘na bbona mana ‘ncopp’â curzia ‘e dritta pe cuntènere ‘a vitezza (vivacità) ‘e Valbuena.Dopo di che se piazzaje annente â difesa addó recubbraje (recuperò) tanti e ttanti pallune senza maje perdere ‘a calma ‘nfase ‘e plantamiento (impostazione).
INLER 7 Luttaje cumme a ‘nu lione nsi’ ô prazzo (fino alla fine) ‘ncopp’a ttutte ‘e pallune; tutte ll’ azzioni partettono o passajeno dê piere suoje e ô finale difennette palla cu ‘o core e cu ‘e diente facenno scorrere minute puliteliche (preziosi).
MERTENS 8 Nun ‘o putetteno piglià manco mettennole ‘o ssale ‘ncopp’â coda:n’anguilla tassosa (veloce).Cu ‘na granna punizziona agghizzaje (sfiorò) ‘a rredda e fove prutacunista ‘e bbelli gghiucate ‘ncopp’â curzia ‘e mancina. Bravo a mettere ‘mporta a Higuaínno ca però – maledizziona! – non ne apprufittaje. Servette addirittura cu ‘na finezza ‘e tacco ll’ajuda (assist) a zZapata (dô 76° MESTO sv)
HAMSIK 6 Non pozzo dicere ca ‘a soja fove l’atalossa (prestazione) ca m’aspettavo ‘a Marekiaro, ma tutto summato jette meglio ‘e ll’urdemi vvote e soprattutto a ll’arrancua mentre ‘nfase passiva se piazzaje ‘nlinia cu Inlèrro e ccu bBehrami, guvernaje bbuono paricchi repartite (ripartenze), comme ‘naccasione d’’a rredda d’’o doje a zzero. (da ll’83° INSIGNE sv)
CALLEJON 8 Avette ‘nu granne pestutíco (merito), chillo ‘e sbluccà, cu ‘na jucata ‘e classe, ’o fullé ô prazzo d’ ‘o primmo ajone ( alla fine delprimo tempo) quanno ‘o Napule cummannava ‘a quatriglia, ma nun era capace ‘e dà ‘a cuncretezza nicessaria! Atalossa (Prestazione) cumpleta ‘e tutto:cupertura, plantamiento (impostazione) e attacco ‘mprufunno (in profondità).
HIGUAIN 6- Presentannose ‘ncampo e cu ‘o ggenio ‘e fà dètte ‘na risposta a cchi ggià abbiava a musechià ( pennarule ‘ncumpetente e ttifuse malelengue…) Avette ‘na granna accasiona (a ttu ppe ttu cu ‘o purtiere) pe sbluccà ‘o fullé, ma vulenno fà ‘a cosa cchiú ddifficile e frubba, cosa ‘a nun credere, mannaje ‘a palla fora! Pe furtuna se facette quase perdunà lanzanno a Cagliecònno pe ll’uno a zzero. (dô 60° ZAPATA 7 ‘O guaglione culumbiano dètte pur’isso ‘na bbella risposta a cchi nun ‘o cunzidera; trasette súbbeto ‘nfullé (in partita) mantenenno palla e facennose apprezzà p’ ‘a tassezza (velocità) conzideranno ‘a stazza ‘e stipammuro ca tène.’Na pennellata artistica po ‘a rredda
soja ca nchiudette ‘e juoche!)
BENITEZ 7 Ggià dê primme minute ‘o Napule cummannaje ‘o fullé, ma faticaje a sbluccarla. ‘O vantaggio ‘e uno a zzero a ll’intervallo stette pure stritto pe cchello ca ‘a scuatra êva fatto. A ll’arrancua ‘a scuatra mettette ô ssicuro ‘o risultato cu ‘o doje a zzero e ppo cuntrullaje ‘o fullé suffereno sulo ll’urdemi cinche minute doppo d’’a rredda pe scagno ‘e Ayew.Ll’ idea ‘e mannà ‘ncampo a mMertens fove veramente azzeccata , cunzideranno ll’atalossa (prestazione) ‘e ll’ècchese PSV. Bbone pure ‘e rrisposte avute da Armero ‘nfase difenziva e da Fernandèzzo a ccentro d’ ‘a difesa.
ll’arbitro turco Nun ne saccio ‘o nomme 6 Niente ‘a cuntestarle.
E cu cchesto ve saluto e ve dongo appuntamento, si dDi’ vo’, a llunnerí quanno spero ‘e cuntarve ca dummeneca ca vene contro a Ccerci e ssocie ‘o Napule ‘a fatto ‘nu granne fullé e à vinciuto, sperammo largo!
Staveti bbe’!
R Bracale Brak

ilnapolista © riproduzione riservata