‘o sanco amaro ma po se vincette e festiggiajemo

Ajere a ll’ora d’ ‘o spasso urdemu fullé ‘e ‘stu campiunato ô san Paolo e ccomme dDio vulette ajere ‘o Napule riuscette a vvencere pure si ‘o ffacette sott’ô lampione(allo scadere), doppo d’averce fatto fà a nnujeaute, ‘ntribbuna divano, ‘o sanco amaro pe tutt’ ‘o primmo ajone e ppe bbona parta ‘e ll’arranqua pe bbia ca wallerettino mazzarri êva miso ‘ncampo ‘na scuatra sballata facenno a mmeno ‘ncuntempuranea ‘e Marekiaro, Insigne e Pandèv(vo). Ma po se vincette e festiggiajemo ‘nu siconno posto ca si nun è cchello ca i’ vulesse, meglio ‘e niente è; primma d’ ‘o fullé de chiacchiaroniis, passianno pe tutt’ ‘o turreno ‘e juoco cu ‘nu microfono ‘mmano facette ‘o neo-patetico e ce abbuffaje ‘e zifere ‘e viento, dicenno ‘e vulé ‘nu Napule ancòra cchiú fforte, pure si fraditanto penza ‘e vennerse a cCavani e de cunfermà a Biguncino e a wwallerettino mazzarri. Turnanno ô fullé dicimmo ca ‘a festa pareva putesse essere guastata ‘nu poco ‘a mazzarri ca sbagliaje furmazzione, ma soprattutto dô Siena ca, cu ttutto fósse certo ‘e scennere ‘nseria B, jucaje cu ‘o sanco a ll’uocchie quase pe llevarse ‘o sfizzio ‘e ‘nu risultato ‘mpurtante. E cumminfatte ‘o Siena se purtaje ‘nvantaggio apprufittanno pure ‘e ‘na caterva [allimmeno quatto!] ‘e rredde ca Cavani s’era magnate; ma po a ll’arranqua wallerettino mazzarri mettette ‘a capa a ffà bbene, cagnaje chille ca s’êvano ‘a cagnà e finalmente, comme ‘o Cielo vulette, ‘o pallone trasette ddoje vote [primma cu Cavani e ppo cu Marekiaro ] e tutte fujemo felici e ccuntente. A cchistu punto- comm’è gghiuta e ccomme è vvenuta – penzo ca, a pparte ‘o piazzamento finale,ca po’ migliurà si Cavani rummane e arrivano ddoje o tre pedine bbone ( allimmeno ‘nu purtiere,’nu centrale comme a Astori e n’attaccante comme a Ibarbo) e soprattutto si se ne va wallerettino mazzarri… a pparte ‘o piazzamento finale putimmo dicere grazzie a ttutte ‘e jucature cuane ca ce ànno emuzziunato pure ‘sta tempurata! E putimmo assicurà ca chello ca succede, succede ‘o statio ce ‘o facimmo vedé sempe chino e tutte, ma proprio tutte, ce facimmo sentí mentre alluccammo: FORZA NAPOLI, CIUCCIO FA’ TU!. Riepilucanno: ‘Nvantaggio cu ‘na bbella rredda ‘e Grillo, ‘e tuscane mettètteno pavura ô Napule ca ggià steva cu ‘a capa penzanno â festa p’ ‘o siconno posto.’Nu poco ‘e sufferenza po [â bonora!] Cavani ce rijalaje ‘o pareggio doppo ‘nu travesagno cuóveto ‘a El Kaddauri e sott’ô lampione (allo scadere) Marekiaro mettette dinto ‘o pallone d’ ‘a vittoria, mentre primma d’ ‘o fullé ‘o presitente de chiacchiaroniis êva parlato ê tituse prumettenno ‘na scuatra ancòra cchiú fforte p’ ‘a tempurata ca vène… Ancòra e ssempe chiacchiere e ttabbacchere ‘e lignammo chelle ca ô Bbanco nun ne ‘mpignammo! ‘E tifuse êsseno vuluto sapé da de chiacchiaroniis che ‘ntenzione tène ‘mprímmose cu cCavani (s’ ‘o venne[sperammo ca no] o nun s’ ‘o venne?) e cu mMazzarri(nn’ ‘o caccia [sperammo ca sí] o nnun nn’ ‘o caccia?) e ppo cu quacch’ato…., êsseno vuluto sapé si e cchi accatta e ‘mmece ‘o magliaro à ditto parole ‘e circustanza senza zuco e ssenza cunnimma. Basta accussí! È mmeglio ca nun me faccio diebbete cu ‘a vocca.
Passammo ê paggelle:
ROSATI 5,5 ‘Ncopp’â rredda ‘e Grillo nun putette fà niente pe bbia ca se truvaje fora pusizzione, ma ‘o tuscano [cosa ‘a nun credere] fove (fu) lasciato libbero e ffranco ‘e piglià ‘a mira sott’ô travesagno e ffotterlo! P’ ‘o riesto ‘a riserva d’ ‘o Pirata se dimustraje nun troppo sicuro soprattutto quanno se trattaje d’applazzà (rinviare).
GRAVA 6 ‘E stima. Scennette ‘ncampo cu ‘a fascia ‘e capitano e, surdatiello nfi’ a ll’urdemo, guvernaje ‘a camma (zona) soja cu bbona perzunalità; smarrunaje ‘na sola vota nun chiudenno ‘ncuollo a gGrillo cosa ca ce custaje ‘a rredda d’ ‘o svantaggio! ‘O suĵo fove (fu) ll’urdemu fullé cu ‘a maglia luvarda e quanno ascette se chiammaje ll’applavuso ‘e tutt’ ‘o san Paolo. (dô 56° INSIGNE 6,5 Trasette súbbeto ‘nfullé cu granna perzunalità, riuscenno spisso dâ mancina a cupulià (duettare) ‘int’ô stritto o a dà ‘nteressante bbassurere (suggerimenti) a ccentro.)
CANNAVARO 6– Smarrunaje soprattutto ô pprincipio quanno faticaje a ppiglià ‘e mmesure a ll’attaccante tuscane; menu male ca po chianu chiano se facette curaggio e ô finale riuscette a vvencere quacche sfita ‘ndividuale.’Ncopp’ a ll’azziona d’ ‘a rredda tuscana, jette sí ‘ncopp’â linia ‘e porta, ma po [pe bbia d’ ‘o culo ‘e chiummo] nun riuscette a zzumpà e a allungarse pe ssalvà! ROLANDO 6 Êtt’ a cche ffà cu Emeghara o Agra, ca tenetteno n’atu passo; Armero nun ll’ajutaje a redubblà (raddoppiare), ma isso riuscette a cavàrzela sbannanno ‘nu poco sulamente quanno ‘o Napule steva tutto all’attacco.P’ ‘o riesto fove (fu) quase alicante quanno ascette palla ô pede, dimustranno granna perzunalità ca se chiammaje ll’applavuso d’ ‘o san Paolo e d’ ‘a tribbuna-divano, ajere cu quacche assenza.
MESTO 6,5 Durante ô primmo ajone appressuraje (spinse) paricchio mettenno a ccentro pallune ‘nteressante comme a cchillo ca Cavani ‘e capa mannaje fora ‘e poco. Asciuto Grava arretraje ‘ncopp’â linia d’ ‘e difenzore.Jette ‘nu poco ‘int’ê chiavette sulo ô finale quanno pavaje ‘o troppo tiempo passato a scarfà ‘a panca.
INLER 6- Súbbeto ‘nfullé, jucaje cu ccegna (grinta) e camaría (orgoglio) dispenzanno tanti pallune pure si nun accumpagnaje ll’azzione comme êsse saputo e ppututo fà; nun fove priciso cu ll’urdemu passaggio, ma jette meglio a ppietto d’ ‘a parte centrale d’ ‘o campiunato.Pare ca ‘o vo’ ‘o Milan(no) ma i’ nun m’ ‘o levasse.
DZEMAILI 6,5 Oramaje è ‘nu punto fremmo ‘e chistu Napule; pure ajere currette senza fermarse maje accumpagnanno ll’azziona cu qualità e mettette sempe pavura cu ‘o tiro suĵo ‘a luntano!
ARMERO 6- ‘Nfase difenziva ô pprincipio lassaje spisso a rRolando sulo contro Emeghara o Agra, ca tenetteno n’atu passo, ma ‘nfase uffenziva riuscette a ffà ‘a differenza.
EL KADDOURI 5,5 A ppietto ê primme mise dimustraje ‘e tené bbona perzunalità, ma fove ancòra troppo smignato (abulico) e soprattutto vedette poco ‘a porta. Peccato, pecché ‘o guaglione ‘o ttene e à dda sulo migliurà ‘a resa. Tentaje spisso quacche ghiucata comme ‘e ffa Marekiaro, ma nun sempe lle riuscette. Ascette ‘nfra ll’applavuse ‘e ‘ncuraggiamento d’ ‘o san Paolo. (dô 78° PANDEV 6,5 Sempe dicisivo, comme inte a ll’accasione d’ ‘a rredda ‘e Marekiaro, quanno – senza tuccà ‘o pallone – ll’ufferette ‘nu granne vuallo (velo)ca fove
sfruttato a mmestiere).
CAVANI 6,5 Ma sulo pecché mettette dinto ‘a palla d’ ‘o pareggio; cumminfatte, primma ca succedesse, ‘a jurnata soja me parette jastemmata ‘a quacche ghiettatore visto ca ‘nu paro ‘e cunchiusione soje a bbotta sicura se sfrantummajeno ‘nfacci’ô palo o ô travesagno. Menu male però ca se facette truvà pronto e nun sbagliaje quanno, doppo n’atu travesagno cuoveto ‘a El Kaddouri, ‘e capa ripurtaje ‘e suĵe ‘ncopp’a ll’uno a uno. ‘A chillu mumento se mettette a ffà ‘o trummettuiere sunanno ‘a càrreca e cagnanno spisso passo.
CALAIÒ 6 Nun tenette granni accasione pe ssignà, ma cupuliaje (dialogò) bbuono cu cCavani servennole spisso quacche pallone ‘nteressante. Pruvaje pure ‘na catabballa (rovesciata) però senza bbona sciorta. (dô 63° HAMSIK 7+ Nun se ne po’ ffà a mmeno! Serve comm’ô ppane p’ ‘o juoco luvardo! Cumminfatte, cumfromme trasette, ‘e cuane cagnajeno faccia e mmarcia e riuscettono a ritruvarse mo ‘ncopp’a ll’esterne, mo p’ ‘e vvie centrale. ‘Nu capolavoro ‘o colpo ‘nsotto ca ce détte ‘a vittoria e ‘a festa d’’o san Paolo).
Mazzarri 5,5 Sbagliaje ‘a furmazziona ‘e partenza cu ‘o risultato ca pe ttutto ‘o primmo ajone ‘o juoco luvardo fove (fu) braduso (lento) e ssenza surprese; sulo uno comme a wallerettino puteva sperà ‘e vencere levanno ‘mparanza Marekiaro, Insigne e pPandèv(vo); overo ca se trattaje ‘e ll’urdemu fullé casalinco d’ ‘o campiunato e isso vulette dà suddisfazzione pure ê siconne e tterze linie,ma êss’ ‘a avuto capí ca apprimma s’êv’ ‘a vencere ‘o fullé cu ‘e titulare e ppo se puteva fa trasí chi êv’avuto menu spazzio. Ma ‘sti ccose ‘e ccapisceno ‘e tifuse e nno uno comme a wallerettino ca mo sperammo se ne jesse a ffelicità quaccun’ato e ce facesse stà cuiete!
arbitro GIACOMELLI 5 Esurdiente cu ‘o Napule ‘stu triestino ‘e trentacinche anne me dètte ‘a ‘mpressione d’essere emuzziunato e de farsela sotto.Teneva comme gnora-vavella (balia) a mMazzoleni… e ò détto tutto!
E cu chesto ve ringrazzio ‘e ll’attenziona, ve saluto e si dDi’ vo’ ce sentimmo llunnerí ca vène pe cummentà ll’urdemu fullé d’ ‘o campiunato ca ‘e cuane vanno a ffà a rRoma contro ‘a scuatra d’ ‘o Pupone. Stàveti bbe’
R.Bracale Brak

ilnapolista © riproduzione riservata