Tengo ‘o vveleno, pe mme s’êss’avuto ‘a vencere

E che ne parlammo a ffà, guagliú?! Nun saccio vuje, ma i’ tengo ‘o vveleno ‘mpont’ô musso e sto’ ‘ncazzato niro doppo d’ ‘o fullé d’ajere, ca pe mme s’êss’avuto ‘a vencere e s’êsse pututo pure vencere e ‘mmece fenette cu ‘nu pareggio, cu ‘nu punticiello ca nun è d’oro comme dicetteno paricchi pennarule, ma rappresentaje sulamente ‘a sciacqualattucaría (incapacità) ‘e Mazzarri e d’ ‘a scuatra soja ‘e fà ‘na guapparia e de farece sunnà. E che saciccio! Ô siconno aione ‘o Milàn(no) a ccurto ‘e sciato, arridutto ‘ndiece, facette atto ‘e presenza e ‘o Napule ‘mmece ‘e nn’apprufittà, s’accuntentaje ‘e ll’uno a uno. È overo ca [po ve dico] Rocchi ce mettette ‘o ssujo, ma ‘o Napule êss’avuto ‘a fà cchiú assaje cu ccegna e ddicisione. E nnun ‘o ffacette! Passammo ê ppaggelle e nun me dicite niente si nun songo largo ‘e maneca!
DE SANCTIS 5,5 Doppo quacche atalossa (prestazione) accussí, accussí(incerte), ajeressera nun me facette magnà ‘o fecato; bella ‘a parata ô pprincipio d’ ‘o fullé doppo ‘na deviazzione inutile e periculosa ‘e Cannavaro; priciso quanno ascette, êsse pututo menarse primma, facenno quaccosa ‘e cchiú ‘ncopp’ô tiro ‘e Flamini. Diffitato, s’abbuscaje, cosa ca nun êss’ a succerere a uno ‘e ll’aità ssoja, ‘nu sacrusato cartellino jalizzo pe perdita ‘e tiempo e mmo à dda zumpà ‘o prossimo fullé.
CAMPAGNARO 6 Nisciunu sfregazzo (sbavatura) ‘nfase difenziva, se facette valé ‘e capa e de piere e quanno fuje pussibbile dètte pure ‘na mano a mMaggio.
CANNAVARO 5 Doppo ‘na deviazziona inutile e periculosa ô pprincipio d’ ‘o fullé,accumminciaje a gghiucà sparacchianno pallune luntano cu ll’uocchie nchiuse. Centrale difenzivo,êss’avuto ascí isso a nchiudere a fFlaminì e nnun ‘o ffacette.
BRITOS 5,5 gGià dê primmi minute êtt’ ‘a fà a spurtellate, a ccazzotte, a mmuorze e a ppizzeche cu pPazzini e riuscette a metterle ‘a musarola, tentanno spisso ll’anticipo.Però ‘a ‘na palla perduta doppo ‘nu tentativo d’anticipo – prubbabbilmente troppo arresecato – nascette ‘a rredda ‘e Flamini.
MAGGIO 5 Facette poco ‘e chello ca sape e putesse fà; attiento ‘nfase difenziva, raramente appressuraje nun riuscenno quase maje a serví pallune ‘nteressante. (da ll’81° CALAIÒ 5,5 Trasette troppo tarde e ô finale avette ‘nu pallone ca puteva darce ‘e tre ppunte, ma ‘o menaje fora!)
HAMSIK 6,5 ‘Nu zuccaro ll’ajuda – e ffujeno [a ccunte fatte] quattuordice! – che purtaje a pPandèv(vo) a ffà ‘a rredda d’ ‘o pareggio:cosa ca sulo ‘e granne campiune sanno e ppònno fà. Accumminciaje a gghiucà troppo tarde, ma quanno ‘o facette risultaje funnamentale p’ ‘o sviluppo d’ ‘a manovra e p’ ‘o raccordo ‘nfra centrocampo e attacco. Se sacrificaje pure ‘nfase ‘e nun pussesso e perdette ‘e lucentezza. (dô 75° ARMERO 6,5 Trasette troppo tarde, ma trasette súbbeto ‘int’ô juoco: accumminciaje ‘a mezz’ala po se spustaje ‘ncopp’â curzia e ‘nchietta cu Insigne criaje sempe ll’ uperossa (superiorità) nummerica).
BEHRAMI 7 Cratista (ottima) atalossa ‘e Valòn(no) ca fuje pulitelico (prezioso) quanno se piazzaje annant’â difesa libberanno a dDzemaili ca appressuraje ‘e cchiú. Currette pe ttre o pe cquatto, dànno ‘na mano a cchi capitaje capitaje e addirittura a ll’arranqua se ritruvaje a gghiucà comme difenzore agghiuntato.
DZEMAILI 6,5 Ricuperaje diverzi pallune ca servettono ê repartite (ripartenze) luvarde e frasiggiaje (dialogó) cuntinuamente ô lemmeto d’ ‘a camma currenno nfi’ a ll’urdemu minuto e nun calanno maje ‘e pressione.
ZUNIGA 5 Miezu punto mancante pecché accumminciaje overo malamente nun riuscenno nemmeno a téne bbotta ‘ndifesa. Mazzarri fuje custretto a minacciarlo ‘e cagnarlo e isso se dètte ‘na mossa prupizzianno finalmente ‘ncopp’â curzia ‘e mancina quacche bbona azziona comme a cchella ca purtaje Marekiaro a andivinà ll’ajuda pe Pandèv(vo). PANDEV 7 Atalossa assaje pusitiva d’ ‘o giuvinotto ca quanno è dint’â jurnata soja crea sempe prubbleme a cchiunche; ajeressera svariaje ‘ncopp’ a ttutto ‘o fronte uffenzivo e quanno frasiggiaje (dialogó) cu Marekiaro ‘o facette sempe troppo bbello comme quanno risulvette ll’ajuda d’ ‘o slovacco signanno ‘a rredda d’ ‘o pareggio senza farese ‘mpressiunà ‘a chillu mammone ‘e Abbiati!
(dô 69° INSIGNE 5,5 S’allargaje spisso ‘ncopp’â mancina crianno sempe ll’uperossa (superiorità) nummerica, ma senza risultate zucuse!)
CAVANI 6,5 Nun fuje ‘na serata facile p’ ‘o zencariello,custretto a sbarià ‘ncopp’a ttutto ‘o fronte uffenzivo, facenno saglí ‘e suoje e sacrificannose a ripiecà, sempe atturniato ‘a duje ‘o tre milaniste; lle capitaje ‘na bbona accasiona quanno se truvaje a ttu ppe ttu cu Abbiati doppo n’aggancio eccezziunale,ma se facette ‘mpressiunà dâ stazza d’ ‘o purtiere e lle permettette ‘e parà ‘nu pallunetto troppo braduso.
MAZZARRI 5 Doppo se n’allamentaje, ma fuje isso a gghí a mMilano p’ ‘o quarto ‘e bullito d’ ‘o pareggio, mannanno ‘ncampo ‘na scuatra senza Armero, ‘na scuatra ca nun s’apprucciaje bbuono ô fullé e ca accumminciaje a ffà quaccosa sulo doppo d’ avé ‘ncassata ‘a rredda ‘e Flamini e ca po, ô siconno aione, addirittura nun se dètte da fà accuntentannose a ll’urdemo ‘e ‘nu pareggio ca forze cunsente ‘e bblindà ‘o siconno posto, ma ca me lassaje ll’amaro ‘mmocca!Niente ‘a fà! Cu Mazzarri è inutile fàrese zimàire (illusioni) inutile! Cu chisto ‘o scutetto nun se po’ vvencere, oramaje è cchiaro… Tenevo ‘a speranza ca ll’anno ca vene se nne fósse juto a ffelicità a quaccun’ato. Ma pare ca ce à penzato ‘a coppa. Resta ancòra cu nnuje. Mannaggia, mannaggia e mmannaggia; me pare ‘o figlio d’ ‘a sié Cunsiglia… tutte ‘o vonno e nisciuno s’ ‘o piglia!
arbitro ROCCHI 4 ‘Sta meza cazetta, cummerciante (ma nun se sape ‘e che…) fiurentino ca ati vvote (me ricordo ‘e n’ atu san Zziro, sempe cu ‘o Milan(no))aveva ggià spezzato ‘e passe luvarde, ajere cercaje ‘e mezze ‘e aumentà ‘a ddosa d’ ‘o ‘o debbeto ca tene cu nnuje nun siscanno ‘nu sacrusanto ricore a ffavore d’ ‘e cuane e cunzentenno, senza sanziunarlo a dduvere, ê milaniste [ca se penzajeno ‘e stà jucanno a rugby] ‘nu juoco viulento e ammagagnato, caputianno ‘e falte e sventaglianno sotto ô naso d’ ‘e cuane cartelline jalizze e pigliannosela soprattutto cu ‘e difenzure nuoste e lassanno correre quase tutte ‘e ccarugnate d’ ‘e milaniste, cacciannone fora uno sulo addó ca tre o quatto cu Pazzini ‘ntesta, fujeno overo delinquente !
Rocchi ‘nzomma ajere facette paricchi fullune sempe ‘ndanno d’ ‘e cuane, dimustrannose arbitro senza attenziona e nun me meravigliasse ‘e saperlo ‘ncopp’ô stato paca d’Agnelli.Ma cu cchi t’ ‘a piglie? Cu cchi?
E fermammoce cca. Si ‘o Signore ce ‘o ffa vedé ce sentimmo lunnerí ca vène, speranno ‘e puterve dicere ca ‘o Napule à vinciuto!
Bbona salute!
R.Bracale Brak

ilnapolista © riproduzione riservata