Sto’ smarrezzato (avvilito) guagliú. Ve cunfesso ca mm’ero frusciato e ca dâ partita d’ajeressera a Bergamo me fósse aspettato tre ppunte e ‘mmece fernette ca dint’â notte d’ ‘e streche ‘o Napule facette ‘a fijura d’ ‘a cucozza e ce ne turnajemo scunfitte, ‘mpurpate d’acqua e ccarreche ‘e maraviglia e nun fujemo crestiane dint’â bbellezza ‘e 74 minute ‘e ricuperà ‘na fetenzia ‘e rredda signata ‘a n’atalantese ca piscaje ‘a matta cu ‘nu tiro ‘a fora â camma ‘e ricore!Ma ggià, nuje c’êvamo appresentate a bBergamo senza Cavani e ssenza ô Matadòr ‘o Napule perde ‘o nuvantaseje pe cciento d’ ‘e pussibbilità ‘e fà risultato. A ll’abblativo (In conclusione) penzo ca doppo chello ca vedettemo ajere pure ‘o cchiú sfecatato annemístero (tifoso) se ll’è levato ‘a capa ‘o spiggisemo (l’illusione) ca ‘o Napule senza Cavani, cu Dossena, cu De Sanctis, cu Cannavaro, cu Vargas(so) e soprattutto … cu Uallerettino Erode Mazzarri po’ vvencere ‘o scutetto o arrivà allimmeno ô siconno posto! Addó?! Accussí comme stammo mise, cca nun putimmo arrivà a nnisciuna parta, manco a Muntevergene; ô cchiú, ô cchiú putimmo arrivà a pPumpeje o ô Carmene pe ffarce benedicere ‘a ‘nu moneco ricchione! E pprimma ‘o ffacimmo, meglio è!
Passammo ê ppaggelle, va’:
DE SANCTIS 4,5 E che saciccio! L’Atalanta tiraje ‘mporta una vota e isso nun fuje cacchio ‘e metterce ‘na pezza!È overo ca Carmona piscaje ‘a matta cu ‘nu tiro pistuto (incredibile), ma – santu dDio! – uno ca è ‘o siconno purtiere d’ ‘a nazziunala, ‘na vota tanta à dda essere capace ‘e fà ‘nu miezu miraculo… Ma chi t’ ‘o ddà?Pigliata ‘a rredda restaje a guardarse ‘o fullé e perdette ‘e staffe (facennose ammuní) quanno ‘nu pallamenníno (raccattapalle) nun lle dette súbbeto ‘o pallone asciuto fora!
CAMPAGNARO 6 Riuscette a cuntènere a Maxi Moralez(zo) e appressuraje (spinse) cuntinuamente, ma ‘e bassurere suĵe (i suoi suggerimenti) truvajeno sempe pronta ‘a difesa bergamasca nzerrata a rriccio.
CANNAVARO 5 ‘O fatto ‘e stà ‘nsotto ‘e ‘na rredda custrignette ‘o Napule a appressurà concedenno tanti repartite (ripartenze) ê nirazzurre e ‘o capitano napulitano jette dint’ê chiavette…, ma senza grossi puttanate pure si, p’ ‘a verità, chella grossa ll’êva fatta ô 19° nun riuscenno a nzerrà ‘ncuollo a Carmona ô lemmeto d’ ‘a camma ‘e ricore! Fósse ora ca Uallerettino durante ll’allenamente lle spiecasse comme se fa a nzerrà ‘ncuollo ô centrocampista ca tira ‘a fora.È cchiú ‘e ‘na vota ca ‘o Napule piglia ‘na rredda accussí e fósse ora ca nun ne pigliassemo cchiú!
GAMBERINI 6 Nun cuncedette niente dint’â camma soja e dinto a cchiú n’ accasione fuje puieto (autore) ‘e cratisti (ottime) diacunale difenzive ca sbrugliajeno situazzione ‘ncarbugliate.
(dô 70° MESTO 5,5 – Tenette nun c’è mmale ‘a camma soja, ma ‘nfase d’appujo (supporto) all’aziona nun se vedette.)
MAGGIO 4,5 Forze tène prubbleme cu ‘o bibberòn, ‘o zezzillo e ‘e pannuline…Stupetiato, nun riuscette maje a sfunnà ‘ncoppâ curzia ‘e dritta. Sprecaje ‘e capa ddoje retissante (clamorose) accasione pe pariggià.
BEHRAMI 6 Ricuperaje tanti pallune e currette assaje; po cu ll’Atalanta ‘nvantaggio fuje sacrificato e tirato fora, forze speranno ‘e avé cchiú qualità.(dô 54° DZEMAILI 5,5 Trasuto pe ddà cchiú qualità rispetto a bBehrami nun ce riuscette, sustellannose (limitandosi) a scarrecà pallone e respunzabbilità ‘ncuollo a Inlèr(ro) e a mMarekiaro…)
INLER 6- ‘Nu passo arreto a ppietto cu ‘o fullé contr’ô Chievo: perdette quacche bbruttu pallone pure si ne jucaje tante e ttante;spisso se ne lavaje ‘e mmane dànno ‘a respunzabbilità a mMarekiaro; ati vvote s’ ‘a pigliaje a respunzabbilità ‘e ll’urdemu passaggio, ma cu risultate scadente.
HAMSIK 6,5 Ll’unico a salvarse overamente. Jucaje dô pprincipio nfi’ a ll’urdemo e tutte ll’ azzione periculose passajeno tutte p’ ‘e piere suĵe.Ô lemmeto d’ ‘a camma cercaje d’arapí ‘e mmaglie d’ ‘a difesa bergamasca; riuscette ‘na vota a ‘ncunearse bbuono, ma Consigli ‘o stuppaje cu ‘na granna asciuta vascia.
DOSSENA 4 Nun è ‘a mo ca ‘o vvaco dicenno: cca se tratta ‘e n’ecchese jucatore e ppure ajeressera fuje ‘o cchiú scadente d’ ‘e suoje:’ndifesa sufferette cchiú d’ ‘o cunzentito e annante nun riuscette maje a farese vedé sbaglianno no uno, ma tutt’ ‘e bassurere (suggerimenti) (dô 75° VARGAS sv – Si chesto è ‘o llignammo, strommole nun ne putimmo caccià: quacche muvimento, ‘na palla cuntrullata dint’â camma e nient’ato; pocu fummo e nniente arrusto!)
INSIGNE 5,5 ‘A chiena e ‘a vacante:poco cuntinuo s’ appicciaje mo sí e mmo no, quase nun credennoê ppussibbilità soje. Durante ô primmo aione Consigli lle necaje ‘a rredda cu n’ azzagna (prodezza), po mettette a mMarekiaro ‘e faccia a cConsigli. Piazzato cchiú largo, nun riuscette maje a ssuperà ll’avverzario ‘e cumpetenza.
PANDEV 5 ‘O giuvinotto è fora forma e ppo penzo ca p’ ‘o juoco ca fa ‘o Napule, nun po’ essere isso ‘o sostituto ‘e Cavani! Passaje ‘nu bburutto primmo aione.A ll’arranqua participaje a pparicchi azzione uffenzive cu trocche tassose (scambi rapidi) dint’ô stritto, ma sprecaje cumunque cchiú ‘e ‘nu pallone.
MAZZARRI 4 Tenette cchiú ‘e ‘na corpa: ‘mprimmese esserse accuntentato ‘e ‘na panca corta senza ‘nu vero sustituto ‘e Cavani, sustituto ca putesse pure essere chillu guaglione (Novotny) anemalonga e ttuosto, ma isso nun ce crede e nun ‘o vede proprio. Ajere ce fósse servuto comm’ ô ppane Denis(so) ca – pure pe corpa ‘e Uallerettino – steva ‘a chell’ata parte. Iammo annante: sbagliaje a ‘mpustà ‘o fullé mettenno ‘ncampo ‘na scuadra ca puntaje a culpí ‘ncontropiete e ca jette dint’ê chiavette ggià doppo vinte minute quanno ll’Atalanta passata ‘nvantaggio se nzerraje a rriccio e nun cuncedette cchiú manco tanto ‘e spazzio. Custretta a ccagnà mentalità ‘a scuatra cuana tentaje ‘e jucà ma a cchillu punto ll’atalantise se putetteno difennere ‘mblocco (putenno cuntà pure ‘ncopp’a ‘nu bbellu purtiere) e arremarrà (ripartire) pe ffurtuna poco periculosamente.
Arbitro ORSATO 4,5 ‘E stima Carta cunusciuta cuncedette ê bergamasche ‘e vattere sistematicamente ê napulitane senza mettere lengua.
P’‘o riesto direzzione senza troppi prubbleme.Cumunque nun ce porta bbuono: ‘ncopp’a unnece fullé arbitrate cu chello d’ajere, sole ddoje vittorie; po o s’è pperzo (quatto vote) o s’è ppariggiato (cinche vote)!
E fermammoce cca. Bbona salute e ce sentimmo si dDi’ vo’ â prossima vota, speranno ca dummeneca finalmente rientrasse Cavani e se turnasse a vvencere pe rrummané ‘a copp’ a lLazzio, Roma e fFiorentina e mmenu male ca ll’Inter(re) è tturnata a ffarese sèntere e ppo’ dà filo ‘a torcere â rubbentus(sa) ca o pecché ajutata o pecché tène ‘o mazzo rutto o pecché accussí à dda jí à vinciuto n’ata vota!
R.Bracale Brak