Che tensione, guagliú chella partita d’ajere! Fernette a ttarallucce e vvino e ne simmo tutte cuntente, ma pe troppu tiempo, ‘ntribbuna divano, fujemo custrette a magnarce ‘o fecato vedenno cierti fessarie retissante d’ ‘a difesa e cchelle ‘e quaccuno sotto porta cuntraria. Fernette ca vincettemo e nne simmo tutte cuntente, ma nun è pussibbile rijalà sistematicamente quacche rredda â scuatra avverzaria e ppo essere custrette ‘a fà ‘e ccapriole pe venirne a ccapo. Quaccosa s’ à dda fà,cchiú ‘e quaccosa s’à dda cagnà nun sulo lla ddereto, ma ‘ncopp’ê curzie laterale e ‘mpanca accummincianno ‘a Wallerettino Erode Mazzarri ca sta ‘nguajanno cchiú ‘e ‘nu jucatore, sbaglianno a ll’allenà, giacché nun pozzo crerere ca tutte ‘nzieme e tutt’ aunite tre bbuoni jucature comme Campagnaro, Pandev(vo) e mMaggio addeventano tre lloffe! ‘A colpa è tutta ‘e Wallerettino Erode Mazzarri e i’ nun me pozzo magnà ‘o fecato pe ccausa soja;nun fumo cchiú ‘a otto/nove anne e nun voglio, pe ccausa soja, accattarme n’ata vota ‘e sicarrette pe ffà svapurà ‘a tensiona ca me prucurano cierti fullé! Pe furtuna fernette bbuono e i’ sulo sulo fistiggiaje cu ddoje dete ‘e Strega…E ce vuleva! Passammo ê ppaggelle va’:
DE SANCTIS 5,5 Nun tenette corpe ‘ncopp’â primma rredda d’ ‘e grifune; se facette truvà pronto sott’â mezora quanno a ppunie nchiuse fermaje ‘na bbotta ‘e Immobile; fuje provvidenziale quanno cu ll’ajuto d’ ‘a travesagna evitaje ‘o pussibbile dubblato (raddoppio),’ncopp’â bbomma ‘e Bertolacci ca ll’abbrusciaje ‘e pponte d’ ‘e ddete. Po però se ne scennette ‘e posa e ‘ncopp’â rredda d’ ‘o 2-1 genuano êsse pututo fà quaccosa ‘e cchiú; nun ascette praticamente maje dê pale mustrannose ‘nzicuro allimmeno n’atu paro ‘e vote. È ‘nu purtiere ca nun me dà cchiú cunfianza!
CAMPAGNARO 5 ‘O vedette ‘nterra cu ‘e rrote: nun fuje ‘o solito Toro. Rummanette sempe arreto e nun se prupunette maje ‘ncopp’â fascia addó Maggio aizaje pórvera. Tenétteno ‘ncopp’â cuscienza, isso e cCannavaro, ‘a rredda d’ ‘o vantaggio ‘e Immobile : isso pecché repuzaje (respinse) centralmente ‘e capa ‘nu pallone arrivato dint’â camma ‘e ricore,ricalannolo a ‘nu grifone ca tiraje truvanno ‘o scianco ‘e Cannavaro ca cunzignaje làpeto làpeto ‘o pallone a Immobile; ma nun fuje ll’unicu jerro (errore) d’ ‘o Toro ‘ncappato – purtroppo – dinto a ‘na jurnata storta. Ascette ô pprincipio ‘e ll’arranqua quanno Mazzarri se decidette a ffà passà ‘o Napule a cquatto arreto. (Dô 51° MESTO 6,5Mazzarri ‘o lanzaje dint’â ‘mbrugliata ‘ncopp’â trecquarta quanno cagnaje motulo cu ‘na funa ‘ncanna e ll’ècchese grifone rispunnette súbbeto:”Prisente!” signanno ‘a rredda d’ ‘o primmo pareggio cu ‘na cannunata ô mestizzo (all’incrocio) doppo ‘na spettaculosa ajuda (assist) ‘e Lorenzigno Insigne. Cavani lle dètte pure ‘a palla d’ ‘o pussibbile dubblato (raddoppio), ma ‘a sprecaje sparacchianno aveto; ‘ncumpenso andivinaje ‘o cruzzo pe Marekiaro ca signaje ‘a rredda d’ ‘o tre a ddoje.)Pe cchello ca se vedette ajere penzo ca Maggio pe quacche fullé o rummane ‘mpanca o rummane â casa a ddà ‘o bbibberòn(no) ô criaturo…
CANNAVARO 4,5 ‘Mpacciato cchiú dd’ ‘o ssolito tenètte ‘ncopp’â cuscienza ‘e ddoje rredde genuane: ‘a primma pecché ‘mmece ‘e ascí a nchiudere ‘e faccia, ‘o ffacette ‘e culo(futtuto ‘e paura ‘e pigliarese ‘na pallunata ‘nfaccia) e ‘a siconna pecché lassaje sulo sulo ‘o genuvano a ccentro ‘e camma marcannolo ê spalle ‘mmece ca annante o ‘e lato comme sape fà qualunque difenzore, ‘a fora ‘e ‘stu culo’echiummo ; cercaje ‘e farese perdunà aroppa, ma ‘e genuane lle detteno troppu filo ‘a torcere e isso s’arrangiaje spisso cu ‘e triste, sparacchianno luntano pallune inutile e scunclusiunate.
GAMBERINI 6 Se truvaje a ccumpetere spisso ‘ncopp’â curzia cu Bertolacci e s’ ‘a cavaje cu mmestiere e sicuranza. Fuje ll’unico ‘ndifesa a nun diludere; ammunito ô finale. MAGGIO 5 È ‘nu jucatore ca sta jenno acito e mme dispiace; cuntinua a correre sí, ma aiza pórvera e nun dà frutte. A ll’11° ‘e capa sotto mesura, a ttu ppe ttu cu ‘a porta spalancata, se magnaje ‘na rredda retissanta mannanno ‘o pallone a llato. Assaje ‘ndifficultà quanno Antonelli appressurava ‘ncopp’â mancina, s’ ‘o perdette ‘int’âccasione e ll’ajuda pe Bertolacci ca dette ‘o 2-1 ô Genoa. Sta cu ‘e ggomme ‘nterra e se vedette.Eppure Cesare Brandelli ll’à cunvucato pe ll’amichevole Italia-Francia ‘mprugramma miercurí a pParma; forze isso e De Sanctis lle servono pe ppurtà ‘e borze ‘e ll’ate!
BEHRAMI 5,5 Apprezzabbile p’ ‘a cegna, facette chello ca aveva ‘a fà, ma quanno se truvaje a ffà isso sulo ‘a bbarràcema (diga) jette dint’ê chiavette perdenno ‘a tramuntana; ammunito, senza ca s’ ‘o mmeretasse, sàpato ca vene è custretto a zzumpà ‘o fullé contro ô Milàn(no). (Dô 73° INLER 6,5 Difficile metterle cchiú ppoco. Êva ‘a ricuperà pallune e ‘o ffacette. Êva ‘a dà sicuranza (sicurezza) ê suoje e cchiú o meno ‘o ffacette! E ppacienza si nun è troppo tassuso!)
DZEMAILI 5 – Venette sciveto ô posto ‘e Inler(ro) pe ddà cchiú vitezza (dinamismo) a ccentrocampo ma se vedette poco: tanta corza, ma assaje fummo.Nun po’ essere ‘o sostituto d’ ‘o turco-napulitano; ‘o vedesse meglio dinto â parte ‘e Marekiaro. Se perdette a Bertolacci dint’âccasione d’ ‘o 2-1 e sbagliaje ‘a rredda d’ ‘o pussibbile pareggio sparacchianno fora cu ‘na bbotta ‘e putenza ‘a bbona pusizzione!
HAMSIK 7,5 – E menu male ca a ‘nu certo punto decidette ‘e metterse a gghiucà e ce penzaje isso a ‘sturmà(creare) cchiú ‘e ‘na bbona accasiona, zumpettianno a mmestiere ‘nfra ê linie e servenno pallune overe ‘ndiaferune (interessanti), ma ê vvote se perdette a ffà cierti puntaggiorno ca nn’êsse pututo fà a mmeno. Nun sempe truvaje ‘o ritmo justo ma mettette ‘o pede suĵo dinto a cchiú n’accasione d’ ‘e rredde napulitane; ‘mparticulare allummaje ‘a scena cu ll’ajuda retissanta d’ ‘o 2-2 ‘e Cavani e ô 90° ce mettette ‘ntuffo ‘a cresta purtanno ‘a scuatra dô priatorio d’ ‘o pareggio ô paraviso d’ ‘a vittoria cumfermata ‘nchiusura ‘a Lorenzigno!
DOSSENA 4,5 E ll’êsse miso pure cchiú ppoco si nun fósse stato pe cchell’unica cosa bbona fatta ‘nchiusura ‘e fullé cuntranno ‘ncuoll’ a Seymour(ro) ca steva tiranno ‘mporta a bbotta sicura… Ma p’ ‘o riesto che ne parlammo a ffà? Chist’ ècchese jucatore è oramaje ‘na palla ô pede d’ ‘o Napule: nun appressuraje,nun facette ‘nu cruzzo decente e sistematicamente perdette tutt’ ‘e sfite ‘ncopp’â curzia ‘e mancina.Ll’accidente capitato a Zuzú ll’êva dato ‘o posto ‘e titulare, ma nun sapette, nè putette apprufittà d’accassione avuta:nun ‘o ttène cchiú, sempe ca p’ ‘o ppassatoll’à tenuto!
PANDEV 5 Mazzarri ll’accurdaje ancòra cunfianza (fiducia), ma ‘o macedone sta cu ‘e ggomme ‘nterra e nun dètte chello ca ce s’aspettava a uno comme a isso;appicciaje‘a lampatina mo sí, mo no e cuncedette cu ‘o contagocce sulo quacche bbona ajuda, po se perdette rallentanno ll’aziona e ‘nchiudette ambressa ll’atalossa soja facennose male e abbuscannose ‘na paramurfosa (distorsione)a ll’astràcalo (alla caviglia).Ll’âmm’ ‘a aspettà ancòra!
( Dô 37° INSIGNE 7,5 E si ll’êsse fatto jucà dô pprincipio fósse stato pure meglio!N’ata cosa a ppietto cu ‘o Pandev(vo) d’ajere: comme trasette se facette nutà lassanno ‘o miérco suĵo dint’âccasione d’ ‘a rredda ‘e ll’ uno a uno, cu ‘na magaria aèria e ajuda pe mMesto. Poco doppo bella jucata ‘ncopp’â mancina cu ‘nu tiro ca Frey deviaje cu bbona pruntezza e nun cuntento ‘o purtiere francese sott’â mez’ora lle mannaje ‘ncopp’ô travesagno ‘na granna bbotta ‘a fora; Lorenzigno però se levaje ‘e pprete dê scarpe signanno ‘ncontropiete ‘a rredda d’ ‘o definitivo 4-2)!
CAVANI 7 Era uno sulo, eppure ‘o truvaje a ttutte parte, pure ‘ndifesa a ricuperà pallune, ma forze pe ‘na jastemma menata parette ca nun era ‘a jurnata soja…, ma isso nun se fermaje maje e se pruvaje a ffà ‘e tutto cumpreso ‘o riggista/suggeritore dànno ‘na granna palla a mMaggio ca però ‘a sciupaje malamente; ce pruvaje cu ‘na rovesciata vulante ‘mmocc’â linia ‘e porta, ma Sampirisi ll’ affussaje tirannolo ‘nterra p’ ‘a maglia, ma nè chillu sicchio ‘e lóta ‘e Rizzoli, nè ll’arbitro ‘e porta se ne vuletteno accorgere. ‘Na palla atatta ce ‘a détte Marekiaro ‘nchiusura ‘e primmo aione; isso se ‘mpezzaje ‘a campione dint’â camma, ma ‘ncucciaje ‘nu fuosso, pigliaje ‘na sbutecata e sbagliaje a ttirà.Ce ripruvaje cu ‘na punizziona e ttiraje ‘na mbomma ca però Frey riuscette a ffremmà; nun puteva mancà però ‘a firma soja sotto a ‘na rredda e ce ‘a mettette sotto a cchella p’ ‘o mumentaneo ddoje a ddoje, sfruttanno a mmestiere ‘nu pasiglio (passaggio) ‘e Marekiaro.
MAZZARRI 5,5 Media ‘e 7 cchiú 4: 7 p’avé andivinato ‘a mossa Mesto cagnanno motulo e ‘nventannose ‘na difesa a cquatto cu ttre ghiucature arreto a cCavani e riprupunenno ‘o Napule cumbattente e allero d’ ‘e specie antiche ca vincette rimuntanno appassiunatamente; ma 4 p’avé ô pprincipio sbagliato furmazziona e soprattutto pecché sta nguajanno bbuoni jucaturi comme Campagnaro, Pandev(vo e mMaggio,ca nun è ccacchio d’allenà bbuono e ppo pecché nun tène ‘o curaggio ‘e jí a ppiscà dint’â Primmavera nfessennose cu cate ‘e colla comme a dDossena!
l’arbitro RIZZOLI 3 ‘Ncumpetente, ‘nmalafede e malamente attènnuto (assistito) nun vulette vedé dduje pussibbili ricure ‘ncuollo a cCavani (‘o primmo addirittura retissante) e se divertette a sventaglià cartelline jalizze sott’ô naso d’ ‘e cuane pe ffà ‘nmodo ca sàpato ca vène quaccuno à dda essere custretto a zzumpà ‘o fullé contro ô Milàn(no).
