No, guagliú cca s’à dda vedé che s’ à dda fà! Accussí nun po’ gghí! Cierti partite ca se ponno vencere pe quatto a zzero, s’ ànn’ ‘a vencere pe quatto a zzero e nno p’uno a zzero facennoce vení ‘e pparpetazzione ‘e core ll’urdemu quarto d’ora, prijanno ‘o Cielo ca ll’arbitro siscasse ampressa ‘a fine d’ ‘o fullé (macht). Cumunque chella d’ajeressera guagliú fuje ‘na prova veramente ‘mpurtante p ‘ ‘e guagliune cuane e ppe Mazzarri ca doppo ddoje mazzate pigliate un a ‘ncampiunato e n’ata cu ‘a scuatra ucraína, avevan’ ‘a vencere e – ppe ggrazzia d’ ‘o Cielo – ‘e guagliune ce riuscettero pure tenenno ‘e faccia ‘na scuatra tosta e ca dinto a ll’urdeme dduje, tre anne ce aveva dato cchiú ‘e ‘nu buffettone.Ma si se po’ vvencere largo, s’à dda vencere largo e nno resecato, comme ‘mmece succedette ajeressera! Passammo ê ppaggelle va’:
DE SANCTIS 5,5 Maje ‘mpignato seriamente.Se guardaje ‘a rencontra senza pavà ‘o biglietto; quacche asciuta vascia e poco ato e ‘e solite subbaste (rilanci) a scampule ‘e cape ‘e sacicce!
CAMPAGNARO 7 ‘O Chievo se facette vedé spisso dê pparte soje, ma facette marenna a sarachiello: ‘o Toro mettette ‘a musarola a lLuciano cuntenènnolo senza prubbleme e accompagnaje l’azziona cu cuntinuità.
CANNAVARO 6 Poca fatica.Nun tenette assaje ‘a fà; cuncedette a tThereau sulo ‘na struffa (girata) volante, ma p’ ‘o riesto ‘o bluccaje, spisso cu ‘e ttriste!
GAMBERINI 6,5 ‘Ndifesa s’ ‘a vedette ‘e bbella;risulvette cchiú ‘e ‘na situazziona cu granne mestiere e ‘sperienzia e spisso fuje isso ca ascette palla ô pede pe sustàtere (impostare) ll’azziona.
MAGGIO 4,5 E nun sulo p’esserse magnata ‘na rredda fatta, ma soprattutto pecché nun ‘ncarraje ‘nu cruzzo, pure sfunnanno sistematicamente ‘ncopp’â dritta. Nun saccio comm’è, ma ‘stu jucatore ‘o veco sempe cchiú trevulato (afflitto) ‘a ‘na granna ‘mplucaia (involuzione). Peccato.
BEHRAMI 7+ ‘O cane ‘e presa! Quanno se dice ‘o cauffo (acquisto) andivinato! Addó nun ‘o semmenaste lla ‘o truvaste! Azzannaje ‘e feliette ‘e chiunque annate e arreto e ricuperaje pallune ‘mpurtante. A ‘stu mumento è uno ca nun se ne po’ ffà a mmeno!
INLER 7 Vincette tutte ‘e sfite cu ‘o centrocampo avverzario. Fuje sfurtunato mancanno ‘e poco pe ddoje vote ‘a rredda: durante ô primmo aione, cu ‘na granna bbotta ‘a fora cugliette ‘o palo e ppo ‘o pallone carambulaje ‘ncuollo a Sorrentino e restaje ‘ncopp’â linia senza trasí! Dinto a n’ata accasione ‘o stesso purtiere aizaje ‘o pallone ‘ncopp’ô travesagno, cuncedenno sulo ‘nu tiro ‘e squina.
HAMSIK 7.5 A ll’arranqua decidette ‘e saglí ‘ncarelca (cattedra) e finalmente ‘o Napule passaje. Dettaje ‘o passaggio a zZuniga e ffuttette a sSorrentino ‘ncopp’ô palo luntano. Propizziaje tanti repartite (ripartenze) ca però nun fujeno sfruttate a mmestiere.
ZUNIGA 6,5 ‘Sta vota Zuzú me cunvincette e vincenno ‘a sfita cu Frey, mettette tanti pallune a ccentro senza però ca trovasseno furtuna. ‘Na pennellata ‘e Pitloo ll’ ajúda fatta a mMarekiaro p’ ‘a rredda risulutiva. Ascette pe proffulazza (precauzione) doppo ca, scattanno, avvertette ‘nu ‘mpiccio musculare. (dô 71° DOSSENA 5,5 – Se guardaje bbuono ‘a camma soja, ma ‘nfase uffenziva se tiraje ‘a pizza sotto, senza pigliarse respunzabbilità!)
PANDEV 5,5 Durante ô primmo aione sbagliaje spisso ll’urdemu passaggio e ppe ffà ‘na jucata ‘e fino sotto â porta fallette ‘na rredda. Pe tutt’ ‘o fullé se sacrificaje assaje avasciannose a ccentrocampo, ma nun riuscette a essere cuncreto! Ascette stracquo assaje! (dô 75° VARGAS sv)
INSIGNE 7 Tutte ll’azzione cchiú periculose nascetteno dê piere suĵe. Superaje ‘úcolo,’úcolo (facile, facile) ll’avverzario crejanno sempe ll’ommo ‘e cchiú. Êss’ ‘a riggistrà però meglio ‘o tiro ‘mporta ca nun è cchiú cchillo ‘e quanno jucava a pPescara! (da ll’85° DZEMAILI sv)
MAZZARRI 5,5 Chi vence ave raggione e ‘o Napule vincette duminanno ‘o fullé ma facette troppa fatica pe sbluccà ‘o risultato. Troppa ‘mprecisione d’ ‘e cuane , ma anche tanta sfurtuna comme a ddinto ‘accasione d’ ‘o palo ‘e Inler(ro).Pe cunziglio mio De Chiacchiaroniis, Biguncino e Ualterino êssen’ ‘a piglià tutta ‘a scuatra e purtarla o a mMuntevergene o a pPumpeje o a ‘o Carmene p’ ‘e ffà bbenedicere ‘mparanza! Pesaje l’assenza sotto â porta ‘e Cavani, acciaccato e ca prubbabbilmente ‘o livurnese vulette sparagnà p’ ‘a trasferta scamosa ‘e miercurí ca vène. D’accordo,ma contro a ddoje aneme longhe comme a cchille d’ ‘o Chievo nun puó ausà Pandev(vo) o Vargas(so)! Tiene a cchillu guaglione ungherese (ca mo nun me ricordo comme ca**o se chiamma) ch’è lluongo e ttuosto?… E ausalo; nun farlo nfracetà comme hê fatto cu tant’ati guagliune! Stamme a ssèntere ‘na grama vota!
l’arbitro CELI 4 Scadente comme ô nuvantanove pe cciento ‘e ll’arbitre taliane,êsse vuluto fà ‘o pignuolo e ‘o pricisino, ma sbagliaje quase tutto,e ppe furtuna ‘o ffacette a ffavore d’ ‘o Napule; spisso ‘ntralciaje pure ‘a manovra, mettennose ‘mmiezo senza scanzarse! Miezu scemo, pare ‘o frate cucino d’ ‘o cummannate Schettino e nun sulo fisicamente…
E cu cchesto ve saluto.
Faccio ll’auguri a cCavani ca, doppo d’esserse arrepusato ajeressera,turnanno ‘ncampo miercurí a Bergamo ce dà ‘a suddisfazzione ‘e struppià ‘a scuatra travante (satellite) d’ ‘a rubbentus(sa), cunzentennoce ‘e mantenere ‘o siconno posto ‘ncrassifica ca, pe ‘sta tempurata, è ttutto chello ca putimmo sperà, visto ca ‘a rubbentus(sa) ‘a stanno accumpagnanno p’ ‘a mana a vvencere n’atu scutetto!
Ce sentimmo si vo’ dDio â prossima vota. Staveti bbe’!
R.Bracale Brak
