Una vittoria dedicata a Cellino

Pratica Cagliari  risolta guagliú e squarciunianno! Vittoria ca ce à permiso doppo paricchiu tiempo ‘e farle agliottere a Cellino chillu  Bastarde! ca ce cunzignaje a nnuje napulitane…, vittoria ca p’ ‘o mumento ce cunzente ‘e stà – ‘nclassifica – a ppare punte cu ll’Udinese e   a dduje punte da chillu terzo posto ca i’ penzo se po’ ‘ngappà; vittoria ca ce à permiso ‘e mannà ‘na bbona carta ‘e viseta ô Chelsea… Stanno accussí ‘e ccose avesse ‘a essere cuntento e ‘mmece no, ma no pecché so ‘ncuntentabbile… quanto pe bbia ca nun se ne scenne proprio ca ajere ssera ‘o Napule cuncedette ô profuche isulane ‘e signà ‘a bbellezza ‘e tre rredde… e tutte ‘e capa… E che saciccio! È inutile fà ‘a sbrasata ‘e signà seje  rredde quanno po ‘a difesa ne piglia tre!  Cchiú ‘ngenerale a cche mme ggiova tené n’attacco ca dinto a ventisette partite à fatto 50 rredde quanno po ‘a difesa nn’à pigliato ‘a bbellezza ‘e 28? Tante ll’une,sí ma troppe ll’ate! E che saciccio! Mazzarri ce à dda faticà ‘e cchiú…Cca s’à dda vedé che s’ à dda fà pecché ‘o prubblema nun è de pochi mumente! Comunque ‘a rencontra è stata ‘nu bbuono allenamento ‘nvista ‘e chillo ca s’à dda jí a ffà a Llondra e atleticamente me pare ca ‘a scuatra sta misa bbona e cchesto è ‘mpurtante. Forza Napule, ca ‘o  munno te guarda!

Passammo ê ppaggelle:

DE SANCTIS 5,5: Ô ssolito p’ ‘o fà ascí lle s’à dda dà ‘o sfratto.’Ncopp’ê ttre rredde nun tentaje nemmeno ‘e moverse e arresecaje ‘e fà ‘na papera ’ncopp’ô tiro ‘e Thiago Ribeiro.

CAMPAGNARO 5.5: Nun me piacette troppo e pure pe corpa soja se cumplicaje ‘nu poco  ‘na partita ch’êsse pututa prucedere  senza pericule:  s’ addurmette ‘ncopp’â siconna rredda e ‘mparte ‘ncopp’â terza dànno ‘na mano a Cannavaro ca – pe parta soja – facette fà ‘o cruzzo  a ll’isulano libberamente e senza stupparlo. Me dispiace p’ ‘o Toro ma peccaje ‘e jattanza (sufficienza) e nun le pozzo mettere ‘e cchiú!

CANNAVARO 5.5 (media ‘e 6,5 + 4) :6,5 p’ ‘a rredda ca truvaje e 4 p’esserse perduto a Larrivey ‘ncopp’â primma rredda e p’ ‘o peccato ‘e jattanza fatto lassanno troppo spazzio a Ibarbo.

ARONICA 6: Tutto summato ‘o meglio d’ ‘a difesa pure si se limitaje a ll’urdinaria amministrazzione cu ‘e soliti cratiste ‘ntervente senza troppi cumplimente ma sempe dúnate (efficaci).

ZUNIGA 5.5: Se facette vedé pe ‘nu paro ‘e “dribblings” cumpletamente inutile; nun ghiucaje malamente, ma ce steva abbituanno a quaccosa ‘e cchiú!

GARGANO 7: Siconna rredda ‘ncampiunato e ffuje overo bbella; moto-perpetuo dimustraje qualità ‘int’ a  ‘na rencontra ‘e granna  quantità.

(dô 73° VARGAS s.v.:Avesse vuluto vederlo ‘ncampo cchiú pprimma, cumunque se facette nutà cu ‘nu paro ‘e ‘scarpadure e ‘nu bbuonu pallone dato a Pandev(vo).

INLER 6,5: Dètte a Marekiaro, ‘ncopp’â rredda ‘e trasetura ‘nu bbellu pallone  e ppo se facette apprezzà ‘mmiez’ô campo p’ ‘o fisico e ll’applicazzione custante.

DOSSENA 5.5:  Aizaje pórvera; ê primme minute se facette vedé annante, ma senza zuco  e p’ ‘o riesto d’ ‘a rencontra facette ‘e fuosse ‘nterra ‘ncopp’â curzia…

HAMSIK 6,5: Arapette ‘a quatriglia cu ‘nu tiro d’ ‘e suĵe forte e priciso; se  cunfermaje ‘nfromma e pare sempe cchiú maturato;oramaje à truvato ‘a pusizziona soja e ffa chello ca à dda fà cu classe e qualità. ‘Na manera cratista  pe fistiggià ‘a rinnuvazzione d’ ‘o cuntratto. (dô 62°  MAGGIO 6.5: Finalmente ritrovaje ‘a rredda cu  ‘nu pulitelico (prezioso) pallone avuto ‘a Pandev(vo). Jucaje poco, ma se facette sèntere.)

LAVEZZI 8: ‘O granne  periodo ‘e fromma ca  sta attraverzanno  sta facenno sunnà  Napule.’Panghellaje (offrí) ll’ajuda a Cannavaro e appemunaje (propiziò)ll’utobbutto (l’autogoal) di Astori. Trovaje ‘na bbella rredda ‘ncopp’ a ‘nu sacrusanto  ricore. (dô 58° CAVANI 6.5: Cu ‘o primmo pallone ca tuccaje  creaje  súbbeto periculo, cu ‘o  siconno détte ‘na granna ajuda  (assist) pe Gargano.

PANDEV 6.5: Nun è maje stato ‘nu fruvolo ‘e púlema  (un fulmine di guerra) e miso a  cunfronto cu Lavezzi ce fa overo ‘na brutta fijura,ma ce ne stanno poche comme a isso   pe comme difenne ‘a palla e pe  ccomme s’avota cu vitezza ‘mpressiunante. Ajere ssera fuje sempe presente dint’ô juoco  e facette ‘nu capolavoro cu chillu pallone dato a Maggio.

MAZZARRI 6.5: Quanno se fanno seje rredde  è praticamente ‘mpussibile nun darne quacche assía (merito) a ll’allenatore e i’ pure ce ‘o dongo ma nun le pozzo perdunà ‘e nfessirse a nun mettere ‘ndifesa uno bbuono a ghiucà ‘e capa, tenenno Cannavaro a ccentro d’ ‘a difesa e  lassanno ‘mpanca Fernandez(zo) ca ‘e capa ‘e piglia tutt’ isso…, cu ‘o risultato – comme capitaje –  ‘e piglià tre rredde ‘e capa; nè lle perdono ‘e nun avé fatto trasí apprimma a  Vargas(so), sprecanno  ‘na bbona uccasione per farle jucà quacche mminuto ‘e cchiú e vedé ‘o guaglione addó po’ arrivà.

Arbitro BRIGHI 4,5: Pare ca ll’anno ca vène ‘o levano ‘a miezo e nun ‘o fanno arbitrà cchiú, visto ca a quarant’anne nun è stato capace ‘e addiventà ‘nternazziunale… E tte crero! Si à sempe arbitrato comme ajeressera ca siscaje ‘e falte  quase sempe ô ccuntrario, comme puteva sperà ‘e addiventà ‘nternazziunale?… Troppo ‘e maneca larga e pirmissivo cu ll’isulane: êttamo aspettà ‘o 42° pe sentirlo ‘e siscà ‘na punizzione a ffavore d’ ‘o Pocho sistematicamente pigliato a mazzate dê mule sardagnuole dô primmo minuto. Ce détte sí ‘nu ricore sacrusanto, ma pure allora sbagliaje nun sventulanno  ‘o siconno  cartellino jalizzo ca avesse cumpurtato ‘o cartellino russo pe  ll’isulano Canini ca aveva stiso ‘o Pocho.P’ ‘o riesto  me parette poco priparato atleticamente. E comme vo’ addeventà ‘nternazziunale? Si segnalaje  â fine d’ ‘a rencontra quanno rijalaje a Larrivey ‘o pallone p’ ‘e ttre rredde ca ll’argentino êva fatto.

E cu chesto ve saluto e, si vo’ dDio ce sentimmo ‘a prossima vota.

R.Bracale Brak

ilnapolista © riproduzione riservata