ilNapolista

N’ata meza delusione ajeressera a Udine

N’ata meza delusione guagliú ajeressera a Udine… Me penzavo ca ‘e guagliune cuane fossero jute a vvencere facennoce scurdà ll’amarezza d’essere sta jttate fora dâ Ciampionsa…. e ‘mmece chi t’ ‘o ddà! Ajeressera a Udine poco mancaje ca nun ce scummassero ‘e sanco e â fine, doppo d’essere jute sotto ‘e ddoje rredde, fuje granna furtuna si ‘e guagliune riuscetteno a adderezzà ‘a varca  e riuscetteno a purtarse â casa ‘nu punto ca nun fuje d’oro, ma – comme dicette ll’amico ‘e tribbuna-divano Federico –  ‘e platino, ‘nu punto ca â fine ‘e jurnata ce cunzentette d’arrivà a 47 punte a ‘nu punto sulo dô terzo posto d’ ‘a scuatra d’’o pappavallo ‘e Reja e Lotito d’ ‘a scuatra ca ajere ce facette ‘o favore ‘e farse piglià a ccarocchie dô Catania ca dummeneca ca vène sbarca ô san Paolo. Aggiu ditto ‘e n’ata meza delusione, ma – facenno ‘e cunte sott’ô lampione – ‘e guagliune cuane s’ ànn’ ‘a ringrazzià pecché doppo Londra e doppo d’essere state sotto ‘e ddoje rredde e cu ‘nu ricore sbagliato…, nun sbracajeno, e purvuajeno  (fornirono) ‘na prova ‘e carattere mettennoce cegna e   ccore e – cu tutte ‘e bborne (limiti) d’ ‘e soliti scadente (Cannavaro, Dossena) e de chi fuje stanco e bradúso (Campagnaro) –  tutto summato ‘o Napule  avesse mmerato cchiú ‘e chello ca se purtaje…. e nun ce scurdammo po ‘nu fatto ‘mpurtante e cioè ca êttemo fà a mmeno cuntemporaneamente ‘e Maggio e d’ ‘o Pocho ca assicurano velocità â scuatra  e quaccuno po m’avesse ‘a spiecà ‘a nicessità ‘e chella maglia uovo sbattuto ca porta ‘na jella futtuta.Voglio sempe  ‘a maglia nosta luvarda! Ca a nnisciuno lle pruressero ‘e ccorna ‘e mettere ‘a maglia ggialla  p’ ‘a trasferta contro â  rubbentus(sa). “I’ nun ce crero, ma ‘a suttana se ne cade!”dicette ‘o si’ prevete. Passammo ‘e ppaggelle:

DE SANCTIS 5  ‘O solito difetto: p’ ‘o fà  ascí ll’ànn’ ‘a dà ‘o sfratto! E  nun è ssicuro ca jesce… ‘Ncopp’â primma rredda si fósse asciuto avesse pututo piglià isso ‘o pallone…; se dimustraje   ‘nsicuro dinto a  ‘nu paro ‘e situazzione; nun fósse ‘na jastemma farlo arrepusà ‘nu poco!

BRITOS 5,5 Tutto summato ‘o meno peggio d’ ‘a difesa, pure si  l’Udinese jucanno  spisso palla ‘nterra ne restrignette (limitò) ‘o rennimento; a pparte po   ca ‘e muvimente ca  isso facette so’ cchiú adatte a ‘na difesa a cquatto e Mazzarri se nfessisce cu ‘a difesa a ttre!

(Dô 64°VARGAS 5,5  Lle s’ à dda dà ‘nu poco ‘e tiempo pe  assummilià (assimilare) ‘o juoco nuosto; prubbabbilmente êsse ‘a jucà ‘nu poco ‘e cchiú.)

CANNAVARO 4,5 Tenette ‘ncopp’â cuscienza ‘a primma rredda p’avé rijalato ‘e capa ‘nu pallone commeto a Di Natale; e tene ‘ncopp’â cuscienza pure ‘a siconna rredda p’esserse perduto sempe  a Di Natale. Jette a ccercà furtuna scennenno cchiú ‘e ‘na vota, addó ch’êsse fatto meglio a restà arreto lassanno spazzio a Britos ca ‘e capa ce sape fa.

Ma ch’aspetta Mazzarri a ffà jucà a Fernandez(zo)!?

CAMPAGNARO 5 ‘O Toro è stanco e se vedette specie durante ‘o primmo tiempo; ‘nu poco meglio ô siconno…, ma s’êsse ‘a arrepusà.Ggià miercurí facesse jucà a Grava.

DOSSENA 4-  Ridiculo e inutile; braduso e appesantuto nun ne ‘ncarraje meza! Nun facette ‘nu cruzzo decente.

GARGANO 5,5  Nun pressaje comme sape fà e ‘a riggia fuje bradosa e prevedibbile. Sulo ‘nu bbellu tiro ô primmo tiempo e poco ato. (Dô 54°HAMSIK 6,5  Nun è ca facette  cose straurdinarie, ma ‘o pussesso palla suĵo permettette ô  Napule ‘e spustà annante  ‘o baricentro d’ ‘o juoco).

INLER 6  A differenza d’ ‘e cumpagne suoje s’ammusciaje cammin facenno; ô primmo tiempo  smistaje a dduvere ‘a palla  e facette sèntere ‘a presenza fisica; po s’emuzziunaje ‘nu poco e  ô siconno  tiempo calaje a vvista sbaglianno quacche passaggio elementare.

ZUNIGA 5,5 Suffrette assaje cu Pasquale e dimustraje stranamente de trruvarse oramaje meglio ‘ncopp’â mancina addó ll’anno passato era ‘na jastemma! Peccato ca Handanovic sfuderaje ‘na granna parata ‘ncopp’a cagliosa d’ ‘o culumbiano!

DZEMAILI 6,5  Purtaje paricchi pallune annante, sopratutto ô  mumento d’ ‘a massima  pressione. Soja ll’ajuda  p’ ‘o pareggio ‘e  Cavani; peccato p’ ‘e ppunizzione tirate a scampulo ‘e sacicce!

PANDEV 5  Ll’ombra d’ ‘o jucatore ca putesse essere.’Ntutto ‘nu paro ‘e passagge sustanziuse; svugliato  e ffora  cundizzione.

CAVANI 7,5  Emuzziunato  sbagliaje ‘nu ricore tirannolo ‘na fetenzia e se fósse mmeretato 4,5, ma po súbbeto se rifacette signanne ddoje rredde troppo bbelle purtanno  ‘o Napule a cunquistà ‘nu pareggio ca ce mantene a ggalla e s’anmmeretaje 10. ‘A media è cquanto ll’aggiu dato.

MAZZARRI 5,5  N’ata uccasiona perduta ca lassa ll’amaro ‘mmocca;è overo ca fuje custretto a ffà a mmeno cuntemporaneamente ‘e Maggio e Lavezzi, ma ‘a scuatra ô primmo tiempo  me parette troppo bradosa e cu ‘na difesa sguarnita.Nun sapette leggere ca Cavani steva emuzziunato e nun avesse tirato bbuono ‘o ricore!

l’arbitro ROCCHI  5 ‘e stima. Poco ‘a dicere.

E fermammoce cca. Si ‘o Signore ce ‘o fa vedé ce sentimmo ggiovedí ca vène, speranno ca miercurí ssera ‘o Napule torna a vvencere!

Bbona salute!

R.Bracale Brak

ilnapolista © riproduzione riservata