È ‘na jastemma menata guagliú, ‘na jastemma! Ajeressera êva ‘a essere ‘a primma ‘e quatto partite ca ‘o Napule êsse avuto ‘a vencere pe ttentà ‘e recuperà quacche pusizzione ‘ncrassifica…. Ma chi t’ ‘o dda?!’O Napule perdette n’ata uccasione e â fine c’êttem’ ‘a cuntentà ‘e ‘nu punticiello ch’è overo ca è ssempe meglio ‘e ‘nu caucio ‘nculo, ma nun è cchello ca ce fósse servuto! C’è ppoco ‘a fà:cu Ppioli ce à cacato ‘o cane niro e Mazzarri ce mettette ‘a terza ‘ncapunennose cu ccierti jucature e cu ll’unico schema ‘e juoco ca cunosce!Cu ‘na scuatra comme a cchella d’ ‘e murtatelle rosso-bblú venuta a ffà ‘o catenaccio e ‘o cuntrattacco (contropiede) ce fósse vuluto n’ata difesa e n’atu centrocampo… e ‘mmece ‘a difesa fuje ridicola, ‘o centrocampo ‘ncunzistente e ll’attacco ‘nsufferenzia. Dicimmo ‘nzomma ca fuje ‘na partita ‘ngagnata (deludente), tanto pe parlà pulito,pecché pe pparlà chiaramente s’êsse ‘a dicere ca fuje ‘na vera chiaveca cu ‘na difesa ‘mbarazzante e cu centrocampo senza idee addó, specie ô primmo tempo Inler(ro) sparacchiaje pallunate a vienetenne senza neanche vedé ‘e cumpagne addó stevano e cu Dossena ca nun se putette guardà e ca nun fuje cca**o ‘e fà ‘nu cruzzo decente, e me piacesse ‘e sapé ‘mbase a cquali criteri Mazzarri ‘o scigliette ô posto ‘e Zuniga, ca sta jucanno bbuono pure a mmancina… pe nun dicere ‘e Marekiaro ca – me dispiace d’ ‘o ddicere – tenette ‘e ccosce mosce e se jette annascunnenno e cquanno nun s’annascunnette sbagliaje ‘e ccose cchiù ffacile magnannose ‘na rredda ch’êsse cagnata ‘a faccia d’ ‘a partita! ‘O guaglione sta stanco e s’êsse arrepusà. Ajeressera jucaje malamente, ma nun fuje ll’unico: Campagnaro e Mmaggio me paretteno assaje affaticate…, comme nun me piacette Inler(ro) d’ ‘o primmo tempo; è overo ca ricuperaje ô siconno…, ma chesto nun leva ca a ccentrocampo ajeressera ll’unico a ffaticà fuje moto-perpetuo Gargano!Pe ccomme ‘a veco jí ajeressera ô posto ‘e Marekiaro se fósse pututo mettere Dzemailí ch’êsse pututo dà ‘na mano â difesa e ô centrocampo.Nun me piacette troppo (ricore a pparte) manco Cavani, troppo spaisato dint’â morza ‘e cinche difenzure.
E passammo ê ppaggelle:
DE SANCTIS 6- Nurmale amministrazzione pe ttutt’ ‘a partita.Si ô mumento d’ ‘a rredda d’Acquafresca fósse asciuto ‘nu poco cchiú assaje e cchiú ampressa forze êsse pututo fà coccosa ‘e cchiú…, ma se sape ca ‘o Pirata nun ghiesce manco si lle dànno ‘o sfratto e se sape ca si ‘o nonno teneva ‘o trollo era ‘nu tramme!
ARONICA 6 Sbagliaje ‘nu paro ‘e sustentazzione facile facile, ma tutto summato fuje ‘o meglio d’ ‘a difesa.
CANNAVARO 4,5 Spisso troppo avanzato, braduso palla ô pede, lassaje sulo sulo a Acquafresca quanno chisto apprufittaje d’ ‘a pisciata ‘e Campagnaro.
CAMPAGNARO 4,5 Purtroppo ‘a granna puttanata fatta mancanno ‘a palla d’ ‘a rredda d’ Acquafresca signaje tutt’ ‘a partita soja. (Dô 56° ZUNIGA 6 e se ll’ammereta p’ ‘o salvataggio fatto a dduje minute dâ fine ‘ncuollo a Di Vaio)
DOSSENA 4 Nun se putette guardà, nchiattuto e braduso nun ‘ncarraje ‘nu cruzzo decente.M’addimanno pecché Mazzarri se ‘nfessisce a ffarlo jucà…Niente niente se fóssero fidanzate ‘ncasa e dummeneca dànno parola pe spusarse?
INLER 5,5 Doppo ‘e Palermo penzavo ca fósse turnato a essere isso, ma me sbagliaje; ajeressera pe ttutt’ ‘o primmo tempo sparacchiaje pallune a vvacante e senza zuco; ‘nu poco meglio ô siconno tempo, ma ‘a isso m’aspetto sempe ‘e cchiú! (Da ll’89° LUCARELLI s.v.)
GARGANO 6 Ô ssolito paricchi fullune, ma ‘ncumpenso tanta corza e luteniamiento (caparbietà).
MAGGIO 4,5 Praticamente nun lle riuscette niente; sbagliaje puntualmente sustentazzione e cruzze!(Da ll’83° VARGAS 6 ‘e ‘ncuraggiamento)
HAMSIK 4,5 ‘O fullone d’ ‘o primmo tempo ‘o cundizziunaje pe tutt’ ‘a partita e spisso se jette annascunnenno. Forze, cu ttutto ca joca diece minute a ppartita, è stanco e s’êsse arrepusà. A Ssiena nun ‘o facesse jucà!
PANDEV 6,5 Fuje ll’unico ca pruvaje a ffà cagnà faccia a ‘na partita difficile.Peccato ca ô siconno tempo se magnaje ‘na rredda cu n’jerro retissanto (errore clamoro) , ma si ‘a scuatra facette coccosa lla ‘nnante fuje tutta fodda (merito) soĵa.
CAVANI 6 E se ll’ammereta sulamente p’ ‘a freddezza e ‘a pricisione d’ ‘o ricore pecché p’ ‘o riesto risultaje cunfuso e spaisato dint’â morza d’’a difesa a ccinche d’ ‘e mmurtatelle!
MAZZARRI 4 Tène ‘ncopp’â cuscienza ‘o schieramento presentato cu ccierti jucature stanche e appesantute; e ttène ‘ncopp’â cuscienza ‘o fatto ‘e ncapunirse cu Dossena e cu ll’unico schema ‘e juoco ca cunosce! S’à dda rennere conto ca oramaje ‘ndifesa se fanno troppi puttanate e à dda faticà pe truvà quacche remmerio. È chiaro ca ‘a scuatra oramaje affanna e à perduto aggressione e lucentezza(aggressività e brillantezza).Ajeressera ô san Paolo fuje sprecata n’uccasione ‘mpurtante. Sperammo ca ‘a scuatra se repiglia ggià ‘a dummeneca ca vène e vva a vvencere a Ssiena!
LL’ARBITRO BRIGHI 4,5 Pare ca ll’anno ca vène ‘o levano ‘a miezo e nun ‘o fanno arbitrà cchiú, visto ca a quarant’anne nun è stato capace ‘e addiventà ‘nternazziunale… E tte crero! Si à sempe arbitrato comme ajeressera ca siscaje ‘e falte quase sempe ô ccuntrario, comme puteva sperà ‘e addiventà ‘nternazziunale?… ‘Mparticulare ajeressera facette vedé ‘e nun accorgerse ca Pulzetti êva dato ‘na manata ‘nfaccia a Ccavani e nun dètte ê cuane ‘na ‘squina (un angolo),chiara comme ô sole. Pe ffurtuna ca ‘o guardialinie lle signalaje ‘a falta ‘e mano ‘e Perez e isso assignaje ‘o ricore ô Napule!
E cu chesto ve saluto e, si vo’ dDio ce sentimmo ‘a prossima vota.
R.Bracale Brak
