Mannaggia, mannaggia e mannaggia guagliú! Cca ‘o fatto è sserio overo! Si DeLa nun se decide a ffà benedicere tutta ‘a scuatra ‘a ‘nu monaco o ‘a ‘nuprevete ricchione e si nun piglia ‘a dicisione storica ‘e nun fà trasí cchiú ô san Paolo a cchillu cestariello d’ ‘o sinnaco Giggino uocchiestuorte cca ‘a facenna nun ll’accunciammo cchiú! Nun è pussibbile, nun è proprio pussibbile perdere pe tre a uno cu ‘na scuatra comme ‘a Roma, ca nun è nnisciuna! Eppure ajeressera succedette e ancòra nun ce crero! Me sta passanno ‘a pellicula d’ ‘a partita annante a ll’uocchie e me chiagne ‘o core penzanno a cchello ca succedette: ddoje autoredde, ddoje redde annullate (ma ‘a primma chella fatta ‘a Cavani, era bbona e reculare…), ‘na redda magnata a cquatto centimetre d’ ‘a porta spalancata… ‘nu palo etc.Nooo! Chist’anno p’ ‘o Napule ‘ncampiunato ce à cacato ‘o cane niro! Vuò vedé ca chello ca ‘a furtuna ce dètte ll’anno passato, chist’anno s’ ‘o sta piglianno cu ‘o ‘nteresse? È urgente a ‘stu punto ca DeLa facesse benedicere tutta ‘a scuatra e ‘o san Paolo ‘a ‘nu monaco o prevete ricchione, nun facesse cchiù trasí ‘o sinnaco jettatore e dicesse a De Sanctis ‘e nun metterse cchiú chella jettatoria divisa blu-savoia. Passammo ‘e ppaggelle:
DE SANCTIS 4 Tenette ‘ncopp’â cuscienza ddoje (‘a primma e ‘a siconna) d’ ‘e ttre rredde d’ ‘a Roma; p’ ‘a primma se trattaje ‘e ‘na papera ca doppo appena dduje minute segnaje malamente ‘a partita. ‘Ncopp’â siconna redda è overo ca Campagnaro nun riuscette a marcà ‘o rumanista, ma ‘o Pirata rummanette ‘ncopp’â linia d’ ‘a porta senza movere ‘nu passo annante pe pigliarse ‘o pallone! E cchesto ‘nu bbuonu purtiere nun ‘o ffa!
ARONICA 5,5 Ajeressera, tutto summato fuje ‘o “meglio” d’ ‘a difesa ca cumplessivamente nun funziunaje…
CANNAVARO 4 Tante, troppe lanze a bienetenne e bradúse (lenti) Continuamente ‘nconfusione e appesantuto ggià primma d’ ‘e ffeste, trasette ‘nritardo ‘ncuollo a Simplicio devianno dint’ â porta nosta ‘o tiro d’ ‘o rumanista e ce levaje ‘a speranza ‘e pariggià.
CAMPAGNARO 4 Nun me piacette pe nniente; serata no d’ ‘o Toro ca fecette ‘a peggia partita d’ ‘a tempurata suffrenno Lamela e ati ‘nzerimente d’ ‘e centrocampiste rumaniste
( dô 67°DOSSENA s.v.)
ZUNIGA 6,5 È overo, ê vvote esaggeraje cu ‘a ricata (dribbling) e ‘o tiro ‘mporta nun fuje articulo suĵo, ma cu Llavezzi fuje ll’unico capace ‘e zumpà ll’ommo mettenno scumpiglio dint’â retrocuardia d’ ‘a Roma.
INLER 5 Sufferette terribbilmente ‘a cunfusione d’ ‘a mediana d’ ‘o campo; quacche apertura ‘mprevista e ‘ncuncrudente; ‘nzomma ‘o turco napulitano ajeressera fuje telutente!
GARGANO 5,5 ‘Nu poco meglio d’ ‘o cumpagno ‘e reparto, pure si sbagliaje ‘nu paro ‘e sustentazzione (un paio di appoggi), ma arrepezzaje ‘o juoco e n’ apertura soja a mmestiere, sciupata ‘a Lavezzi mancaje poco ca rialasse ‘o pareggio ô Napule.(dô 65° MASCARA 6 Granna appricazzione cu ttutto ca Mazzarri ‘int’â tempurata ll’à fatto jucà poco e nniente!)
MAGGIO 4,5 Currette assaje,ma a vvacante e ttène ‘ncopp’â cuscienza ddoje ggrossi smarrunate dint’â ll’aria ‘e ricore!
HAMSIK 5 Media ‘e 7 + 3: 7 p’ avé jucato ‘na partita autoritaria e cunvincente (cunnita dâ redda), 3 p’esserse magnato a cquatto centimetre d’ ‘a linia ‘e porta spalancata ‘na redda fatta ch’êsse pututo cagnà tutt’ ‘a partita.
LAVEZZI 6- È ll’anema ‘e chesta scuatra, centraje ‘nu palo retissante e pisciaje malamente n’apertura ‘e Gargano, ma se dannaje comme a ssempe. Comme me sentevo ‘e scennere pe deret’ê rine, visto ca Celi nun ll’êva ammunito o jettato fora isso, vedette ‘e prucurarse n’accidente musculare ca ‘o mettette fora causa p’ ‘o riesto d’ ‘a partita e ‘o fa passà ‘e ffeste ‘e Natale ô paese suĵo a … curarse! (dô 56°PANDEV 5,5 Accumminciaje bunariello cu ttre bbelli ghiucate flattanno (illudendo) ‘e tifose luvarde; po chianu chiano sparette dâ scena.)
CAVANI 5 – Pe tutt’ ‘o primmo tempo se guardaje ‘a partita; dint’â ripresa pruvaje a ‘nventà coccosa; signaje pure ‘na redda ca ‘o ssanno Celi ‘nterra e ‘o Signore ‘ncielo pecché nun fuje cunvalitata…, ma tutto summato ‘a prestazzione soja fuje blafarda e senza zuco.
MAZZARRI 4,5 – ‘O Napule fuje overo assaje sfurtunato, ma pure cunfusiunario e casinista. Pe ttutto ‘o primmo tempo nun riuscette a suggerí â scuatra soja ‘e mesure adatte pe cuntrastà ll’affullamento d’ ‘o centrocampo e, doppo ‘nu bunariello principio ‘e siconno tempo ‘a scuatra s’ammusciaje e isso nun fuje cacchio ‘e farla repiglià.
l’arbitro CELI 5 Troppo pignuolo e punto e virgula; ce annullaje ddoje redde, ma p’ ‘a primma (chella ‘e Cavani bbona e reculare) ‘o ppecché ‘o ssapette sul’isso…e forze ‘o Signore ‘ncielo!
Mo sperammo ca miercurí cu ‘o Genoa jesse meglio e nun ce ‘ntussecassemo capitune, ‘nzalata ‘e rinforzo, mussillo ‘e bbaccalà, scioccele, raffiuole e struffole!
Ce sentimmo. Staveti bbe’!
R.Bracale Brak
