Tenco ‘o core dint’ô zzuccaro, guagliú! Finalmente, finalmente! Ajere a nnotte vedette finalmente ‘o Napule ca me ppiace a mme: curaggiuso, cumbattivo,cegnuso (grintoso) e ca nce crere. E m’âte ‘a credere ne tenco ll’uocchie lustre! E che suddisfazzione mannarne â casa chiena ‘e meraviglia ‘a scuatra d’ ‘e sceicche, mannarne â casa a Mancini musechianno ca nun s’ammeretavano ‘e perdere! Giesú chisto è scemo!! Ajere a nnotte ‘o Napule s’êsse mmeretato ‘e véncere cu tre o quatte redde ‘e scarto e nun s’êsse arrubbato niente… Ecco si proprio nce sta ‘na cosa ca ajere a nnotte nun me piacette d’ ‘o Napule fuje proprio ‘o fatto ca sbagliajeno tre majatecheuccasione grosse comme a ‘na casa! ‘Ncumpenso ‘o Napule me facette cunzulà jucanno â caribbaldina ‘e crianno ‘a bbellezza (‘e ccuntaje…) ‘e sette palle-redda contro ‘a scuatra destinata a vvencere ‘o campiunato ‘ngrese….E ve pare poco? Ve pare poco vedé ca ‘a tifesa ‘ngresa ca ‘mpatria à pigliato meno redde, ajere a nnotte abballaje pe uttantacinche minute? Ve pare poco vedé ca chiste ca â casa lloro segnano ‘mmedia tre rredde a partita custruenno diece palle-redda…, ajere a nnotte s’ànno avuto accuntentà ‘e ‘na redda sola ca ce ànnu rialato Aronica (sbaglianno ‘a respinta), Cannavaro(ca lassaje sulo sulo a Balotelli) e De Sanctis (sbaglianno ‘a respinta) e p’ ‘o riesto nun ànnu pututo fà niente a fora ‘e doje accasione avute a dduje minute dâ fine! Cunchiudenno a ‘stu mumento me sento ‘e dicere sulo ddoje parole : GRAZZIE NAPULE!
‘Nu grazzie soprattutto a Mazzarri e a ttutte chille ca scennettero ‘ncampo, ma cu ‘nu particulare abbraccio a Ccavani pecché si nun ‘a miette dinto, tutto è inutile; e n’ato abbraccio majateco ô Pirata De Sanctis, pecché si nun riesce a nun farla mettere dinto, tutto è inutile. GRAZZIE NAPULE!
E p’ ‘o mumento gudimmoce ‘sta granna vittoria…, po ‘a sàpato ca vene penzammo pure ô campiunato! ‘A nosta è stata ‘na vittoria mmeretata e gudimmancella visto ca se vincette contro a ‘na scuatra ca, si nun è nobbele, sta certamente ‘mpurpata ‘e denare e vene cunziderata ‘nnAiropa ‘nu ggialante Gulía, mentre ‘o Napule sí e nno è ‘nu Davide cu ‘a scionna ‘mmano!
Passammo ê ppaggelle:
DE SANCTIS 7,5 Miezu voto mancante pecché doppo d’ ‘a puttanata d’Aronica êsse pututo fà coccosa ‘e cchiú ‘ncopp’ô diacunale ‘e Silva e ‘mmece accunciaje ‘a palla a Balotelli p’ ‘o mumentaneo uno a uno. Però doppo, pe bbona sciorta d’ ‘o Napule, ô finale facette ‘nu miezu miraculo ‘ncopp’a Balotelli e n’ata majeteca (grandissima) parata ‘ncopp’a Aguero!
CAMPAGNARO 7,5 ‘Mpeccabile ‘ndifesa e bbravo quanno êtt’ ‘a fà ripartí l’azzione.’Na vota se facette tutt’ ‘o campo cu ‘a palla ‘mmiez’ê piede e ‘a dètte a Ccavani ca ‘a fravecaje fora ‘nfacci’â rezza laterale d’ ‘a porta…Me dispiace, ma quase certamente ll’assistente ‘e Sabella ‘ntribbuna s’annutaje tutto cosa e penzo ca quase certamente ‘o chiammano p’ ‘a nazziunale argentina. Speranno ca nun turnasse affaticato o accitentato (infortunato)!
CANNAVARO 5.5 Ddoje fessarie: ‘a primma quanno lassaje sulo sulo a Bolotelli ô mumento d’ ‘o mumentaneo pareggio; ‘a siconna fessaria, ca però ce puteva custà cara, quanno fallette ll’entrata auta ‘ncuollo a Balotelli; p’ ‘o riesto niente ‘a dicere e ringrazziammo ôCielo! ARONICA 5,5 ‘A puttanata ca facette rjalanno ‘o mumentaneo pareggio ê ‘ngrese, nun se vede manco ‘mprumozzione… Pe furtuna po se repigliaje e facette n’onesta partita La sua è stata comunque una buona prova, ammacchiata ‘a chillu marrone majateco e crossié (grossolano).
MAGGIO 7 Miezu voto mancante p’esserse addurmuto ‘ncopp’ a cchillu pallone ca s’êsse avuto mettere ‘mporta! Vincette ‘a sfita cu Kolarov(vo).
INLER 6,5 Meglio a ccunfronto cu ll’urdeme asciute; lle serve ancòra n’ a’ ppoco ‘e ritmo. Quanno ascette accitentato steva juocanno bbuono!
( dô 58°DZEMAILI 5,5 – ‘A tecnica c’è sta,ce sta; chello ca lle manca è ’a perzunalità e a ccierti mumente pure ‘o curaggio. Quanto fa pe cuntrastà ‘o juoco avverzario non è ancòra all’ardezza d’ ‘a fatica ca Mazzarri pretenne dê centrocampiste.)
GARGANO 6 ‘E solite jerre (errori) ‘nfase ‘e sustentazzione ( appoggio), ma tanta fatica pulitelica (lavoro prezioso) ‘mpressione (in pressing).So’ cunvinto ca cu ‘e piede è gghiuto a peggiurà ‘a quanno arrivaje a Nnapule e ancòra nun s’è truvato ‘o masterascio pe ce ll’adderezzà! DOSSENA 6,5 Finalmente ‘na prova cunvincete d’ ‘o laterale cuano. Appressuraje a mmestiere e risultaje pulitelico pure ‘ncupertura. Valiosa (pregevole) ll’ajúda pe Ccavani.
(da ll’88° FERNANDEZ 6+ ‘e stima)
HAMSIK 6,5 Miezu voto mancante p’avé mannato ‘ncopp’ô palo ‘nuu pallone ca s’êsse avuto mettere ‘mporta! Finalmente però dètte prova ‘e perzunalità dimustranno d’essere ‘nu guaglione ca nun se mette paura ‘e vulà! ‘E mezze ‘e ttene, ‘e ttene!
LAVEZZI 8 – Lle mancaje overamente sulo ‘a redda e pe cchesto ‘o tirasse ‘e rrecchie. Ma p’ ‘o riesto dimustraje ancòra ‘na vota d’essere isso ‘a vera anema ‘e chistu Napule; p’ ‘o fermà ll’êtter’ ‘a mettere ‘o ssale ‘ncopp’â coda o ll’êtter’ ‘a mazzulià.
CAVANI 8,5 – ‘O Pocho Lavezzi se fósse mmeretato comme a isso ‘o titolo d’ ‘o meglio ‘ncampo, ma aunestamente ‘o donco a isso pecché ddoje redde d’ ‘o Matadòr(ro), ddoje redde accussí ‘mpurtante dinto a ‘nu mumento difficultuso d’ ‘a tempurata soja, songo oro culato!
(da ll’83° PANDEV s.v.)
ALL. MAZZARRI 8 – Partita acàbata (perfetta). Dispaíto (nonostante) quacche jerro e ‘a paura ‘e nchiurere ‘a partita, ‘a scuatra fuje misa ‘ncampo a mmestiere!
LL’ARBITRO 5,5 Ma nun ne parlo pe cuntentà ll’amico Federico(ca dicette ch’êva arbitrato bbuono), ma pe mme sbagliaje assaje a nun menà â via ‘e fora a Kolarov(vo) (ch’êva ê spalle arrunzato nun me ricordo a cchi) e lle mustraje sulo ‘nu cartellino jalizzo!
E cu cchesto ve ringrazzio ‘e ll’attenzione, ve saluto e – si vo’ dDio – ce sentimmo dummeneca!
R.Bracale Brak