Ajere notte a ll’Allianz(a) Arena fernette malamente guagliú: ‘o Napule perdette, ma nun sfiguraje e cchesto penzo ch’è ‘o fatto ‘mpurtante; è overo ca mo s’è cumplicato ‘o discorzo qualificazione, ma ‘na vota tanto so’ d’accordo cu Mazzarri ca fuje suddisfatto d’ ‘a prestazzione d’ ‘a squatra soja e pozzo dicere cu isso:
«Siamo contenti, dispiace solo che abbiamo perso, ma abbiamo imposto per lunghi tratti il nostro gioco ad una squadra di fenomeni, perché il Bayern Monaco e il Barcellona sono le squadre piú forti d’Europa. Sono contento della prestazione che ànno fatto i miei giocatori, dal primo all’ultimo minuto. Abbiamo commesso qualche ingenuità e l’abbiamo pagata súbito » e pozzo agghiuntà: po ce s’è mmiso pure ll’arbitro e è ffernuta a vvrenna! Ma ‘o Napule dico ca s’ è dimustrata‘na squadra ‘e cumbattente tutte cegna e carattere! Poco mancaje ca nun riuscesse a recuperà ‘nu tre a zzero ô Bayern! E scusate se è ppoco. Grazzie,grazzie ggiuvinotte cuane, grazzie assaje. Ma mo lassammo stà ‘a Ciampionsa e cuncentrammoce ‘ncopp’ô campiunato… Ce aspetta ‘a rubentus(sa) e ll’âmm’ ‘a fà ‘nu mazzo tanto! Facitemmillo ‘stu favore!
Venimmo ê ppaggelle:
DE SANCTIS 6,5 – Nun putette fà niente ‘ncopp’ a nnisciuna d’ ‘e rredde. Dinto a ll’ati circustanze se dimustraje sempe sicuro. Fuje ll’urdemo a arrennerse e ‘o ddimustraje cu ‘na corza ‘e uttanta metre p’evità ‘na redda ca pareva ggià fatta!
CAMPAGNARO 5,5 – Pure mostranno ‘a solita cegna perdette spisso a Gomez(zo), soprattutto ô primmo tempo.
FERNANDEZ 7 – Quacche ‘ncertezza cu ‘a difesa a ttre, ma priciso e puntuale cu cchella a cquatto. Cratisto ‘ncopp’ê ddoje rredde ‘e capa. Fósse stato a Mazzarri a ll’urdimi minute ll’êsse lassato comme centravanti agghiuntato.
ARONICA 6 – Ô primmo tempo abballaje ‘nu poco ‘nzieme a ttutta ‘a difesa,po se repigliaje ‘nfi’ a cche ‘na botta tosta dint’ a ‘nu scianco ‘o mettette noccauto!
(dô 41° DOSSENA 5,5 – Partette bunariello, po se ‘ncartaje dimostrannose pesante e senza dinamismo).
MAGGIO 6 – Partette assaje bbuono, po sparette a mmano a mmano nun riuscenno maje appressurà(spingere)comme sape.
INLER 5,5 – Serata necativa; troppo sulo fuje suvrastato dê centrocampisti terisce.Âmmo ancòra aspettà ‘o jucatore ca jucaje a Udine.
DZEMAILI 4,5 – Nè visto, nè sentuto.
(Da ll’83° PANDEV piezzo e ppejo).
ZUNIGA 4,5 – Nun cuprette a dduvere e facette tutto fummo e niente arrusto quanno attaccaje. Ll’arbitro ‘o puntaje e ll’assignaje duje cartelline jalizze ca nun stevano nè ‘ncielo, nè ‘nterra!
HAMSIK 4,5 – Partette bunariello, ma po scumparette comme purtroppo lle càpita spisso!
LAVEZZI 5,5 – Peccato pe cchelli ddoje ajude sballate ê primme minute. Apprezzabbile p’ ‘e tentative ma poco dúnato(efficace).
CAVANI 4,5 – Onestamente chillo visto a Mmonaco nun è ‘o jucatore ca sapimmo. Âmmo aspettà, ma so’ ccerto ca primma o doppo (sperammo cchiú pprimma ca doppo) torna a essere chillu matadòr(ro) ‘e ll’anno passato.
MAZZARRI 4,5 – Purtroppo nun ‘o vvo’ capí ca ‘o motulo cu ‘a difesa a ttre è troppo fraggile (vulnerabile) contro ê squatre forte e se soffre sempe cu ‘na squatra ca dispone ‘e jucature capace ‘e ‘nzinuarse ‘nfra ‘e linie. Êsse ‘a capí quanno è ‘o mumento ‘e lassà perdere cierti fissazzione ca nun portano a nnisciuna parte!
LL’ARBITRO ULANDESE 4 Permettette tutto ‘e tutto ê terische: ddoje redde (siconna e tterza) ‘nfuorigioco e ‘a falta sistematica e spisso platiale, ògni vvota ca n’azziona cuana addivintaje periculosa.
Ê napulitane ‘na serie ‘nfinita ‘e cartelline jalizze ‘nfi’ ô russo pe Zzuniga, ca nn’êva fatto niente. Tutto n’atu trattamento ê terische; Ll’ esazzione (espulsione) di Badstuber (sturabidè) ô finale nun salvaje ‘a faccia ‘e ‘stu tirettore ulandese.
Ce sentimmo lunnerí ca vène speranno ca ‘ncampiunato fossemo cchiú furtunate e ca dummeneca ne mannassemo a Ttorino ‘a rebbentus(sa) carreca ‘e meraviglia e, si è ppussibbile, de redde!
Staveti bbe’!
R.Bracale Brak
