Che nervatura guagliú! Me songo ‘ntussecato… Ma me ll’aspettavo, mannaggia chello che nun se po’ ddicere! Ajere ssera s’aunettero cchiú ‘e ‘na funicella corta e cchiú de ‘nu strummolo tiriteppo, aliasse ‘o Napule e Mazzarri ca sbagliajeno ll’accercamiento (l’approccio) â partita, ‘a sosta ca nun ce à maje purtato bbuono, ‘o penziero p’’a prossima partita cu ‘o Bayern(o) e soprattutto l’arbitraggio ‘e Mazzoleni bergamasco e juventino, mannato dô Palazzo pe spezzà ‘e passe ô Napule e pe farle scuntà ‘a vittoria ‘e Milano contro a ll’Inter(re) ‘e Ranieri ‘o chiagnazzaro! Comme jette e ccomme venette cert’è ca me ‘ntussecaje pecché vencere cu ‘e squadrune e perdere cu Chievo e Pparma, e pareggià cu ‘a Fiorentina me fa arraggià assaje facennome ggirà malamente ‘e pennaglie soprattutto vedenno ‘o Napule d’ ‘o primmo tempo abbulico e senza idee contro a ‘na squadretta ‘nchiusa a rriccio; pe gghionta ‘e ruotolo po ll’albitro, me ripeto, condiziunaje ‘a partita nun ammunenno maje ‘e ducale quanno cazzemmusamente fermavano ‘e contropiede napulitane cu sistematici falte tattiche e negannoce ‘o ricore ‘ncuollo a Lavezzi ch’êsse pututo cagnà faccia â partita! Ma è gghiuta; mo facimmo tesoro ‘e ‘sta scunfitta casalinga e ghiammo annante. Passammo ê ppaggelle:
DE SANCTIS 5,5 – Nun tenette corpe ‘ncopp’ô primmo redda, ma ‘ncopp’â siconna êsse pututo fà coccosa ‘e cchiú specie ‘ncopp’ô cruzzo ‘e Giovinco. Pe tutt’ ‘o riesto urdinaria amministrazzione.
CAMPAGNARO 5,5 – Cercaje ‘e fà ‘o trecquartista trascuranno ‘a difesa.
CANNAVARO 5 – Tène ‘ncopp’â cuscienza ‘e ddoje redde ducale: ‘ncopp’â primma s’addurmette cu ‘a zizza ‘mmocca cunzentenno a ll’ecchese lazziale ‘o colpo ‘e tacco ca smarcaje a Ggobbi! Ncopp’â siconna sbagliaje cumpletamente ‘o movimento ‘e chiusura.Durante â ripresa suffrette abballanno cu Floccari o cu Giovinco.
ARONICA 5 – Affunnaje assieme ô riesto d’ ‘a difesa luvarda.’Nu paro ‘e rinvie agasante (sbilenchi).
(dô 65°MASCARA 6 – Sfruttaje a mmestiere ‘na granna aiuda d’ ‘o Pocho signanno ‘o mumentaneo pareggio doppo poco ch’era trasuto ‘ncampo; po affunnaje cu ‘o riesto d’ ‘a squatra.)
MAGGIO 5,5 – Nun appressuraje (spinse) comme avesse pututo, ma ce mettette tanta generosità e sacrifiggio.
INLER 5,5 – Poche ‘e gghiucate ca lle riuscettero e ca facettero capí quanto fósse ‘mpurtante tenerlo sempe ‘nforma e ‘e ggenio!( da ll’85° LUCARELLI s.v.)
GARGANO 5 – Nun sulo ‘a pressione (il pressing) nun fuje custante, ma tornaje a sbaglià ‘na marea ‘e passagge.
DOSSENA 5,5 – Accummenciaje nun c’è mmale, peccato però ca se stutaje troppo ampressa. (Dô 74° ZUNIGA sv)
HAMSIK 5 – Assente ingiustificato d’ ‘a partita.
LAVEZZI 6,5 – Se fósse mmeretato ‘nu ricore a ffavore durante ô primmo tempo, ma Mazzoleni (ca ‘o pozzan’accidere!) nun ce ‘o détte, anze ô siconno tempo ll’ammunette ‘ngiustamente pe simulazzione! Cose ‘e pazze! Fuje ll’unico ca tenette cagno ‘e ritmo dint’ê ggamme. Straurdinaria ll’aiúda (l’assist) pe Mascara.
CAVANI 5,5 – Sfurtunato assaje dint’ a ll’urdema uccasione, quanno doppo d’ ‘o Miraculo ‘e Mirante ‘ncopp’ a Mmaggio, cugliette ‘o palo. Cercato poco,precedentemente nun êva cumbinato quase niente!
All. MAZZARRI 5 – Chello ca ajeressera me preoccupaje, specie ô primmo tempo fuje ll’atteggiamento mentale d’ ‘a squatra apàtica e senza idee, ‘mpreda ‘e ‘na squadretta ‘e seje sorde..; ô Napule mancajeno ‘a cattiveria e soprattutto ll’urdemo passaggio. ‘A difesa abballaje troppo e dinto a ll’urdime vinte minuti ‘a squadra era spaccata a mmità. Nun me cunvincettero neppure ‘e mumente scigliute p’ ‘e cagne assaje tardive. ‘Nzomma ‘na serataccia.Sperammo ca ‘a lezziona d’ajere ssera le fósse servuta! L’arbitro MAZZOLENI 2,5 ‘Na meza cazetta comme a ttutte ‘e culleghe suoje capitate ‘ncopp’ â strata d’’o Napule. Chi sa’ addó truvaje ‘nu recolamento d’’o juoco d’ ‘o pallone addó fosse previsto ca ‘a squatra ca nun è cchella ‘e casa , specie si è ‘na pruvinciale – contro a ‘na squatra ‘mpurtante – à dda avé cchiú sisce a ffavore. Divertente, si nun facesse ‘ncazzà, po ‘o fatto ca tutte ‘e difenzore e centrocampiste ducale avettero dô sischetto bergamasco ‘na specie ‘e licenza ‘e 007: fecuzzune, mazzate e cauce a gogò, cuntinue falte tattiche senza ca isso facesse ‘na chieja e ammunesse a coccune…Nun s’accurgette, o meglio nun se vulette accorgere ca ‘o Pocho era stato cauciato e stiso ‘nterra proprio appena trasuto dint’a ll’angulillo ‘e ll’area ducale; facette nfenta ‘e niente e facette continuà a gghiucà! Pe carità:forze si avesse siscato ‘o ricore,’o difenzore ce rummaneva male e rummaneva ‘mpressiunato pe tutt’ ‘o riesto d’’a partita e cchesto nun s’ à dda fà! Tutto, perfettamente cu ‘a massima aunestà! Ma nisciuno me lleva ‘a capo ca essenno ‘e Bergamo, Mazzoleni è tifoso ‘e ll’Atalanta (squatra ca se sape è abbaccata cu ‘a juventússa) o è direttamente tifoso d’ ‘a juventússa!
Ma è certamente n’arbitro ca nun serve.
Forze pure in perfetta… aunestà (buonafede).
Pecché cu ‘e ricore ‘ndecise o cu ‘e fuorigiuoco ‘e millimetre, ce po’ ppure stà ll’errore…, specie cu ‘na decisione ‘a piglià dinto a ‘na frazzione ‘e siconno… Ma si, senza tené nisciuno annate, nun vide ‘nu difenzore ca affronta cu ‘o sanco a ll’uocchie ll’attaccante ca corre verz’â porta e ‘o cauceja premeditatamente, si ti scappa sempe e cumunque ‘o juoco viulento e assassino, si nun vide ‘e pruvucazzione cuntinuate e cu ttutto ca ‘o signalinea te ll’ allucca dint’ â cuffia,faje avvedé ca ‘o fatto nun è ‘o tujo e sische ‘e falle ô ccuntrario…ammunenno pe simulazzione chi è cauciato allora vo’ dicere proprio ca sî n’arbitro scarzo, e forze nun tanto aunesto e certamente staje a sservizzio d’ ‘o Palazzo pe ccierti prateche sconceche comme a cchelle ‘e spezzà ‘e passe ô Napule!…
E nchiudimmola cca speranno ca ‘a lezzione è sservuta e facenno ‘na raccumannazzione ô signurino De Laurentiis: Don Aurelió, pe ffavore facíteve sèntere dint’ô Palazzo; aizate ‘a voce e sbattite ‘e punie ‘ncopp’ê scrivanie… ca chi se fa pecura, ‘o lupo s’ ‘a magna! Basta accussí ce sentimmo, si ‘o Signore ce ‘o fa vedé, miercurí ca vène doppo d’ ‘a partita’e Ciampionsa.
E facimmo corna!
Stateve bbuone!
R.Bracale Brak
