Che sufferenza guagliú, che sufferenza e tutto summato ajere notte c’êsse pututo jí meglio, ma pure jí peggio e pirciò accuntentammoce ‘e comme è ffernuta e cioè cu ‘nu pareggio e ‘o Napule â fine d’ ‘o ggirone d’annata se po’ ritené suddisfatto, piazzatose pe mmo ô siconno posto e prupunennose a essere ‘a scarda ‘mpazzuta d’ ‘o ggirone a scapito ‘e squatrune cchiú blasunate e abbituati a affruntà ‘stu genere ‘e cumpetizzione. Ajere fuje ‘a notte d’ ‘a ribbalda ‘nternazzionale cu Nnapule travestuta ‘a Capitale d’Airopa,’na città ca (si nun cunziderammo tre o quatte fetiente ca spurcajeno ‘a faccia d’ ‘a città) se facette apprezzà ‘a duiciento pennarle accreditate, ‘a trentuno televisione ,mettenno ‘nmostra ‘a bbellezza ‘e sissantamiladuicentoquaranta bigliette vennute e ‘a granna passiona ‘e tutt’e tifuse. Ajere fuje ‘na notte funnamentale p’ ‘a crescenza calcistica ‘e ‘sta città , p’ ‘a pusizzione Uefa, e pe tutte chille ca seguono ‘o Napule appassiunatamente!
‘O Napule facette ‘nu primmo tempo ‘e sufferenza granne , subbenno ‘o juoco semplice, ma efficiente d’ ‘e terische ca facettero ggirà cuntinuamente ‘a palla annascunnennola; ‘o Napule, pronti via,manco dduje minute e ghiette ‘nsotto ‘e ‘na redda prupizziata ‘a ‘na mancata cerniera ‘e Inler e Gargano e da ‘o fatto ca centralmente Cannavaro durmette cu ‘a zizza ‘mmocca; a ccuntinuà ‘a squatra luvarda fuje ‘mpacciata dint’ê ripartenze e dint’â custruzzione d’ ‘a manovra, danno sempe ‘a sensazzione d’essere futtuta ‘e paura,sbaglianno soprattutto ‘ndifesa e troppo scamazzata arreto e mmaje capace ‘e saglí pe cosere ‘o taglio a mmità ccampo addó Inler stette sempe ‘ndifficultà risultanno a ffine partita assente ‘ngiustificato ‘a qualunqua azziona; pe pparta soja Zuinga ( preferito a Dossena ‘ncopp’â curzia ‘e mancina ) non scennette maje ‘nfase prupusitiva.Pe ffurtuna ca verzo ô quarantesimo Maggio facette ‘nu parpatío (un guizzo) d’ ‘e suĵe, spaventaje ‘e terische ca se facettero redda dint’â porta lloro, mettenno ‘mparità ‘a partita Appena accumminciata ‘a ripresa ‘o Bayern(o) avette rialato ‘nu ricore ( inesistente) per falta ‘e guveto in area ‘e Cannavaro,ca ‘mmece ‘e affruntà ll’avverzario ‘e faccia, ll’affruntaje ‘e culo, cacato sotto ‘e piglià ‘na pallunata ‘nfaccia; pe ffurtuna ca santu De Santis se decidette a ffà m’o miraculo e addeventaje ll’eroe d’ ‘a serata paranno e bloccanno ‘o tiro ‘e Gomez(zo);’a chillu mumento a gghí annante po nfi’ â fine tanta, ma tanta sufferenza ‘ntervellata ‘a quacche mumento ggeniale d’ ‘o Pocho.
Passammo ê ppaggelle:
DE SANCTIS 7,5 – Dètte comme sempe granne sicurezza a ‘nu reparto difenzivo ca ajere notte sufferette assaje . Ll’ arrivajeno cumunque pochi tiri, ma ‘o ricore parato vale quanto ‘na redda signata.
CAMPAGNARO 6+ – ‘Nu paro d’ jerre (d’errori) ‘e pusizziunamento, ma comme sempe ‘o Toro palla ô père è ‘mparàvelo (inarrestabile) e ddoje o tre vvote levaje ‘e ccastagne dô ffuoco!
CANNAVARO 5 – Nuttata negativa pe furtuna senza cunzeguenze ‘mpurtante. ‘A redda d’ ‘o Bayern(o) ‘a tène ‘ncopp’â cuscienza comme avesse tenuto ‘ncopp’â cuscienza ‘a redda d’ ‘o ricore mancato ‘a Gomez(zo); nun dètte nisciuna amalgama â difesa e spisso liggette malamente tutte ll’azzione uffenzive d’ ‘e terische. Ammunito zompa ‘a prossima partita addó sperammo ‘e vedé a Fernandez(zo) primma ca va acito.
ARONICA 6 – ‘Nu paro ‘e ‘scarpadure (discese) sballate putevano custà caro, ma tutto summato ‘a partita soja fuje senza particulari sfregazze (sbavature).
MAGGIO 7 – Lahm(mo) e Ribery fujeno dduje accunte scommete (due clienti scomodi). ‘O guaglione cuano partette malamente, ma po se repigliaje prupizzianno (cu ‘na ‘scarpadura ca spaventaje ‘e difenzore terische) ‘a redda d’ ‘o pareggio.
GARGANO 6- – Troppi sfregazze ‘nfase ‘e ‘mpustazzione, ma dint’â pressione (nel pressing) e ‘ncupertura se dimustraje jucatore ca nun se ne po’ ffà a mmeno.
INLER 5 – Faccio salva sulamente ‘a verticalizzazzione pe Mmaggio. P’ ‘o riesto lento, ‘mpriciso e surpassato dê vizzigne (sovrastato dai dirimpettai) terische.
ZUNIGA 6 – Venette preferito a Dossena pecché cchiú dinamico e capace ‘e tené palla; ma nun se facette quase maje vedé ‘nfase prupusitiva
HAMSIK 5 – Avesse avuto ‘a puntà ‘e cchiú ‘a porta, ma comme ô ssolito spisso se jette annascunnenno. Addirittura ‘e primme vinte minute ‘e Marekiaro fujeno ‘nu vero e proprio cuscemarro (incubo).
LAVEZZI 6,5 – Nun stette a ll’arribba (al top), ma fuje ll’unico ca riuscette a ffà preoccupà ‘a difesa terésca. Peccato pe chillo aggangio sbagliato dinto a ll’ area.
CAVANI 5 – Pur’ isso nun stette a ll’arribba e se vedette ca ‘a corza nun è fluida e ‘a freddezza sotto porta sulo ‘nu luntano ricordo.S’êsse’ a arrepusà e repigliarse!
MAZZARRI 6,5 – Pronti via e ‘a squatra jette ‘nsotto… Nun scopro ll’America si dico ca ‘o Bayern(o) è ‘na squatra assaje forte e ‘o dimustraje. Ô siconno tempo se vedette ‘nu Napule cchiú attiento e cumpassato.’O fatt’ è ca ‘o mòtulo ‘e Mazzarri ê vvote nun convince: ‘o Napoli soffre maledettamente ‘e jucature ‘nfra ‘ e linie.Quacche ccagno inutile o fatto tarde. ‘O pareggio rummane ‘nu bbuonu risultato.
LL’ARBITRO PORTOGHESE 4 E che ne parlammo a ffà?
Ce negaje ‘nu ricore ca sul’isso nun vedette e ne dètte uno ô Bayern(o) ca s’anventaje ‘e sana pianta…
A dDio piacenno ce sentimmo â prossima vota.
Staveti bbe’!
R.Bracale Brak
