Mannaggia ê cane ‘e canciello guagliú: n’ata delusione e ggrossa chella d’ajere ô juorno… Speraje e ccomme ca fosse fernuta a ttarallucce e vvino cu ‘nu bbellu doje a zzero p’ ‘o Napule, macare cu ‘nu paro ‘e purpette d’ ‘o zengariello Cavani) e ‘mmece poco mancaje ca nun fernesse a vvrenna e sciuscelle e c’êttemo accuntentà ‘e ‘nu saràfeco (squallido) zero a zero e ce attuccaje ‘e ringrazzià a De Sanctis si ogge nun stammo cummentanno ‘na scunfitta.
P’ ‘a verità ‘o Napule scennette ‘ncampo acciaccuso (agguerrito), e accumminciaje spanfiantamente (alla grande), custantamente all’attacco (seje a zzero pe nnuje ‘e cornerre d’ ‘o primmo tempo) cinche vote a cunchiurure truvanno sempe però ‘nu muro e ‘o purtiere Arcari ca fuje assaje allebbrecante (reattivo).Po succedette chello ca succedette cu ‘o Napule ca êtte ‘a jucà nun sulo contro ô Brescia, ma pure contro a ll’arbitro e ê cullabburature suĵe… Cu chesto nun voglio annasconnere ca ‘o Napule tène sicuramente ‘nu probblema a ccentrocampo e n’ato annante addó si nun ce sta ‘o Pocho, manca ‘na bbona e sseria spalla pe Cavani.Nun ‘o vvoglio annasconnere, dicevo; ma santu dDio d’amore chello è bbello ‘o prutusino, va ‘a gatta e ce piscia ‘a coppa…, e cioè ‘O Napule tène ‘e prubbleme suĵe e ‘o Palazzo ce mette ‘a jonta mannannoce n’arbitro comme a Mazzoleni, tifoso atalantino/juventino, prutagunista ‘e ll’ennesima direzzione arbitrale sfavurevole(nun ce dette dduje ricure sacrusante ca sulo isso nun vedette o vulette vedé: uno ‘ncuollo a Mmaggio, n’ato ‘ncuollo a Mascara ca addirittura fuje ammunito pe simulazzione, sventulaje sott’ô naso d’ ‘e napulitane ‘na sarma ‘e cartelline jalizze ca farranno squalificà a pparicchie d’ ‘e nuoste; ne cacciaje a Mazzarri ca prutestaje p’ ‘o ricore nun dato‘ncuollo a Mmaggio: ‘nzomma ‘e napulitane curnute e mazziate!); ll’arbitro fuje ‘o prutacunista ‘e ‘na direzzione ca cundannaje ‘e luvarde (azzurri) a ‘nu pareggio ‘nterno a rrete janche contro ê lumbarde. Mo ve faccio vedé ca ‘e duje ricure nun date e ‘a dicisione ‘e ll’arbitro ‘e nne caccià Mazzarri pe pruteste cu ‘o quarto ommo p’’o ricore nun dato addeventano argumento ‘e pulemica ca nun apprudarranno a nniente si nun a ffà dicere ê solite trumbune nordiste ca ‘o Napule fa ‘o chiagnazzaro dicenno ca è pettanato (perseguitato); cert’è ca Gattuso, dicette assaje assaje ‘e cchiú a ll’arbitro,ma nun è fuje cacciato: dduje ppise e ddoje mmesure… e tutto chesto nun è sserio! Nun ce scurdammo però po ‘e Mazzarri ca siconno me tène ddoje o tre mancanze (colpe) soje ‘mpurtante; e sso’ cchelle 1)‘e esserse fissato sempe cu ‘o stesso motulo ‘e juoco senza tené cunto d’ ‘e squatre affruntate; 2) ‘e nun vulé jucature ‘e qualità, ma sulo lavurante (operai)e ‘na chierchia (rosa) arresecata e ‘nzufficiente; 3) esserse annammurato ‘e Gargano,ca ultimamente nun se po’ guardà: dich’i’ si tu sî accussí ‘nnammurato, mmece ‘e farlo jucà sempe va a pparlà ‘ncasa cu ‘a mamma e cu ‘o pato accussí ve mettite ‘nzieme e â sera ve nne jate ô cinema o a ll’Edenlandia e ce facite stà cuiete a nnuje!
Capitolo Suggità:’O presitente ce à ripurtato ‘nzerie A ma mo nun se po’ ffermà a ‘stu tracuardo, mo à dda guardà annante.Chiunche pigliava ‘o Napoli avesse avuto, comme minimo,purtarlo ‘nzerie A.’Nzomma nfino a mmo Dela à fatto ‘o cchiú poco ‘e chello ch’êv’ ‘a fà; rifrettenno chist’anno ‘o Napule à avuto n’occasione cchiú unica ca rara; se trova addó se trova e addirittura se trova luttà p’ ‘o scutetto pe mmiraculo,ma ‘sta squatra,a pparere mio,è cchiú scarza ‘e chella ‘e ll’ anno passato; cumminfatte ‘a fora ‘e Cavani,ca sta facenno ‘e straurdinarie p’ ‘o riesto ce simmo poco!Dela, Biguncino e Mazzarri avessero ‘a fà ‘na bbona mmesca ‘e guagliune prumettente cu campiune chiare e patentate, si no cca se fa ‘a fine d’ ‘o Palermo,d’ ‘a Lazzio ecc.E nce simmo quase, visto ca doppo d’ ‘a partita d’ajere stammo sentenno ‘ncopp’ô cuollo ‘o sciato ‘e ll’Udinese, d’ ‘a stessa Lazzio e d’ ‘a Roma ca ‘a stanno ajutanno p’ ‘a scesa… ‘A verità overa è ca purtroppo nun tenimmo ‘na squatra ‘e terzo posto,ma tenimmo ‘a furtuna ‘e jucà dinto a ‘nu campiunato tutto summato scarzulillo (mediocre) (cunziderammo ‘e ttaliane ‘nnAiropa) e – p’ ‘o mumento – chi puteva starce annante (Roma e/o juventussa),pe rraggione diverze,stanno addereto e sperammo ce restassero! Turnammo â partita e vedimmo ‘e ppaggelle:
DE SANCTIS 8 – ‘O meglio. Ô primmo tempo fuje chiammato sulo a ffà ‘nu paro d’asciute aute. Ô siconno tempo smatriaje (neutralizzò) ‘na capata moscia e ccentrale ‘e Caracciolo, ma ‘o bbello arrivaje ô finale quanno dint’ ô ricupero salvaje ‘o risultato neganno cu ‘o pede ll’abbaja (beffa) ‘e Caracciolo, mettenno ‘na pezza all’ennesima puttanata ‘e Gargano e levanno a Campagnaro ‘o titulo d’ ‘o meglio d’ ‘e luvarde.
CAMPAGNARO 7,5. Nfente e dribblinghe pure ‘ncopp’â trecquarta napulitana fujeno ‘o cuntorno a ‘nu bell’assisto pe Marechiaro, ma Arcari se superaje. Ô siconno tempo comme a RenzaRenza ce pigliaje gusto e nun sulo difennette auto cu risultate majateche, ma criaje addirittura ‘a superiorità ‘e nummero, cercanno pure ‘a bbotta d’ ‘a vittoria.
CANNAVARO 5+. Accumminciaje cu ‘a bbona vuluntà e pretennette pure ‘e fà ll’alicante, cercanno ‘o corpo ‘e tacco. Po comme ô ssolito, s’ammusciaje chianu chiano nfino a perdere sicurezza ô finale ‘e partita mancanno cchiú ‘e ‘na vota ll’anticipo dint’ê zzone cchiú periculose d’’o campo; pe ffurtuna Campagnaro lle dètte ‘na bbona mano! Nun se vo’ proprio levà ‘o solito vizzio ‘e jí a rrompere inutilmente ‘o ca**o ê cumpagne dinto a ll’aria avverzaria…sguarnenno ‘a difesa nosta.
ARONICA 6. ‘A chella parte ‘e rundinelle nun vulajeno.Adderitte ‘e muvimenti d’ emergenza, soprattutto ‘ndiagunale. N’ata manata ‘o custringe a nun puté jucà a Pparma.
(dô 37°s.t. YEBDA s.v.)
MAGGIO 6. Cercaje spisso cchiú ‘e trasí dinto a ll’aria ca ‘e cercà ‘a linia ‘e funno campo e spisso se rennette periculuso. Accardi ‘o stennette dinto a ll’aria, ma Mazzoleni lassaje correre scatenanno ‘a ‘ncazzatura ‘e Mazzarri ca fuje jettato fora. Ô siconno tempo smestaje (spinse) assaje ‘ncopp’â curzía (fascia), ma ‘a trecquarte d’ ‘o Brescia fuje sempe affullata troppo e spisso ‘e crosse suĵe sbattettero ‘ncuoll’ê rundinelle asserraggliate a catenaccio.
GARGANO 3 –‘O pejo. Jette nun c’è mmale nfino a cche se trattaje ‘e ‘mpedí ll’azziona,ma ‘nfase ‘e ‘mpustazzione nun ne facette una justa! S’ ustinaje ancòra ‘na vota a pruporre n’articulo ca nun è ‘o suĵo, cioè a ttirà ‘e ppunizzione sbagliannone sempe ‘a mesura e ‘o San Paolo ‘o subbissaje justamente ‘e sische. Perdette ‘na palla a centrocampo ca mettette Caracciolo sulo annante a ‘nu De Sanctis, pe furtuna, miraculuso!
PAZIENZA 6. Urdinaria amministrazione pe Michelino, ca tagliaje e cusette a centrocampo comme ô ssolito suĵo.Rinnuvatelo ‘o cuntratto o truvatene n’ato bbuono comme a isso!
(dô 27°s.t. LUCARELLI 5. Trasette e s’arrangiaje a ffà ‘a torre; ll’ennesima ‘ntravenuta (intervento) ‘e Arcari ‘ncoppa a Cavani lle cunzignaje ‘ncopp’ê piede ‘o pallone d’ ‘a partita , ma perdette ll’attimo e Berardi salvaje).
DOSSENA 5. Se prupunette puntualmente ‘ncopp’â mancina, ma ‘e traverzune suĵe risultajeno sempe ‘mpricise.Stammo ancòra aspettanno ‘o Dossena ca corre, zompa ll’ommo e crossa decentemente…
(dô 14°s.t. MASCARA 5,5. Priggevule ‘a diagonale difenziva ca nun cunsentette a Berardi ‘e tirà ‘mporta ‘e capa ‘ncopp’ô siconno palo. Quanno attaccaje cercaje spisso sulo ‘o cuntatto cu ll’avverzario dinto a ll’aria, dànno l’impressione d’essere ancòra ‘nu pesce ‘e sciummo spaisato. S’êsse cumunque mmeretato ‘nu ricore p’essere stato stiso ‘a uno ca mo nun me ricordo ‘o nomme,ma Mazzoleni ‘a sta recchia nun ce vulette sentí e ll’ammunette pe simulazzione: curnuto e mazziato!)
ZUNIGA 6 +. Nun dètte punte ‘e purtamiento (riferimento) ê difenzure brisciane. Nun è Lavezzi e se vedette, ma avanzaje palla ô pere, ‘a pruteggette, dribblaje,passaje quacche ppallone e tiraje pure partenno ‘a qualunqua parte d’ ‘o campo.Cu ‘na capata ‘ntelliggente mettette ‘nseria difficultà a Arcari.Ô siconno tempo trasenno Mascara primma e Lucarelli doppo, venette pe fforza ‘e cose dislucato e addeventaje carta canusciuta…
HAMSIK 6 +. Ô primmo tempo fuje ‘o miullo (il mozzo centrale) d’ ‘a squatra ca ggiraje attuorno a ll’alicanti jucate soje. Sulo Arcari nun rummanette affatturato. Ô siconno tempo p’ ‘a pressa ‘e truvà ‘o risultato ‘a manovra cumplessiva se scuncecaje e Marekiaro ne risentette cchiú ‘e tutte.
CAVANI 6,5. ‘Nu tacco spettaculare ‘a ‘na pusizzione ‘mpussibbile e ‘na bbotta majateca ‘a fora aria fujeno sventate ‘a n’accorto Arcari. Ce pruvaje ancòra ‘ngrifato ô siconno tempo , ma ‘o pipeletto lumbardo ajere decidette ‘e fà ‘o fenomeno. Ancòra ‘na vota se dimustraje tenace arretranno a ffà ‘o terzino ô mumento d’ ‘a nicessità.
MAZZARRI 5. Doppo d’ ‘e primme diece minuti s’assistette a na sferricchiata luvarda (assedio azzurro). Dossena e Mmaggio,prufittanno d’ ‘e ghiucate ‘e Marekiaro e de Zuniga, custringettero arreto ll’ esterne d’ ‘e rundinelle.’O purtiere Arcari se mettette a ffà ‘o fenomeno e annijaje (negò) cchiú ‘e ‘na vota ‘o vantaggio ê suĵe. Varie dicisioni ‘e ll’arbitro ‘o facettero spacienzià e scuppiaje doppo d’ ‘o ricore nun dato a Maggio e fuje custretto a lassà ‘o campo jennosene dinto a ‘na cajola ‘e cristallo… ‘mparaviso (‘ncimma a ttutto ô san Paolo). Ô siconno tempo ‘a pressa ‘o cunzigliaje malamente. ‘A manovra fernette p’addivintà dicisamente disurdinata e zzumpajeno tutt’ ‘e scheme. S’êsse ‘a decidere a studià quacche atu modulo pe fruntiggià catenaccio e cuntropiede; ajere ‘a frettella straveria d’ ‘e suoje (l’eccessiva foga dei suoi) arresecaje ‘e fà perdere pure chillu scarzo punticiello (ca p’ ‘o mumento ce mantene ancòra ô terzo posto,ma ce fa sentere ‘o sciato d’ ‘a LKazzio e de ll’Udinese ‘ncopp’ô cuollo…) mentre ‘a squatra steva ‘ndifficultà; s’ arresecaje addirittura ‘o disastro ciascuso (beffardo) ô 49° quanno cu ‘a porta vacante, cu De Sanctis zumpato, Caracciolo sulo annante â porta sbagliaje o tiro pe frécula (per impazienza)
‘E luvarde napulitane s’ alluntajeno dâ cimma d’ ‘a classifica: seje juorne fa ‘o Napule steva a 3 punte dô Milanno, ogge sta a 8 punto e cchello ca è cchiú ppejo tene ‘a Lazzio a dduje punte,ll’Udinese a ttre e ‘a Roma (ca ‘a stanno purtanno p’ ‘a mano) a sette!
l’arbitro MAZZOLENI e ‘e cullabburature suoje 2,5 Pe ttutte ‘e raggione c’aggiu ggià ditto e nun ripeto. Se tratta ‘e ‘na meza cazetta, disunesto, allezziunato e ammagagnato comme a quase tutte ‘e culleghe suoje capitate ‘nnant’ê piede d’ ‘o Napule; nun vide ‘nu ricore e dicimmo ca staje luntano e nun hê visto, ma si nun ne vide dduje e ce miette ‘e gghionte ‘na vota ‘e ll’espulzione pe pruteste, na vota ‘e ll’ammunizzione pe simulazzione, significa ca ‘o ffaje apposta, ca sî vvenuto cu ‘a lezzione appruntata…
E mmo ve lasso. Cu ‘na bbona salute e sperammo ca llunnerí ca vène pozzo cummentà ‘na vittoria d’ ‘o Napule cunnita ‘e parmiggiano… Staveti bbe’!
R.Bracale Brak
