Tengo ‘o core dint’ô zzuccaro guagliú! Ajere ssera vedette ‘nu bellu Napule cuncreto, cuncentrato,ô mmassimo d’ ‘a forma atletica, cu ‘nu cul’echiummo-cannavaro miraculato ca se permettette ‘e fà (isso ca soprattutto quanno lassa ‘a difesa e scenne a ddà ‘mpiccio ê cumpagne attaccante, fa normalmente ‘a fijura d’ ‘o càntaro mmiez’â cchiesia….), ajere se permettette ‘e fà ‘na cosa ca nurmalmente nun sape manco ‘a do’ s’accummincia…,cu ‘nu Maggio finalmente ritruvato capace ‘e nciarmà nummere ‘a jucatore ‘e nazziunale, cu Michelino Pazienza ‘o reggista nuosto ca êtte ‘a fà poco pe spàrtere ‘o juoco visto ca ajere ssera facettero tutte ‘e reggiste, (ma sí… mettimmoce pure a De Santisso!)
Erano tutte (misterro cumpreso!…) accussí stimulate (motivati) a vvencere ca crero ajere ssera êssero vattuto pure ‘o Milanno, figurateve si nun vattevano ‘na furmazzione ‘e sbruffune viulente e ‘mbrugliune, ‘e spaccune, ‘e sbafante, grannezzuse e favune cu ‘nu capitano ca mo ‘mmece d’ ‘o pullicione se starrà zucanno quacche ato franfellicco…(capisce a mme!). Doppo d’ajere ssera, pe ccomme ‘a veco i’ si ‘o spogliatoio rummane cumpatto e aunito allora sí ca putessemo fà ‘nu penziero riguardo a cchella cosa….. ca è mmeglio nun annummenà, pecché dicette ‘o si’ prevete: I’ nun ce crero,ma ‘a suttana se ne care!….e ‘o Napule tène troppe uocchie ‘ncuollo, accumminciano ‘a Simona Ventura & cumpagnia cantante!
Primma ‘e passà ê ppaggelle dico ‘nchiusura ca si nuje tifuse ce stammo sunnanno chella cosa lla, siconno me ‘e guagliune ‘mmiez’ô campo nce credono cchiú ‘e nuje…. visto comme jocano e cumminfatte assodato ca ‘e diviete sacre (i tabú) c’esistono sulo p’ essere smentite, ‘e guagliune doppo d’avé sguminato ll’una e ll’ata sponna ‘e Genova, ajere pittajeno ‘e culore azzurro n’atu campo (sponna rumanista), uno ‘e chille ca â viggilia pareva uno d’ ‘e cchiú ttuoste, ‘nu campo ermeticamente ‘nchiuso, tanto è vvero ca erano diciott’anne ca ‘o Napule nun ce ‘a spuntava….’Mmece ajere ssera ‘e ddoje purpette ‘mbuttunate ‘e passe e ppignuole servute dô zengariello nuosto â Roma, cchiú ’nlla (oltre) ‘e ddarme ‘a granna suddisfazzione ‘e vedé ‘e suffrí a Rraniere ca â fine d’ ‘a partita teneva ‘na faccia ‘e vecchia cestunia ch’êsse magnate cape ‘e sarde fràcete…, cchiú ’nlla ‘e ddarme ‘sta suddisfazzione ‘e vedé ‘e suffrí a Rraniere ca è uno ch’ i’ tengo ‘ncopp’ê pparte cchiú dellicate pecché nun solo è rumano cioè preputente e favone, è uno ca addestra ‘e squatre soje a essere ‘mbruglione, viulente e disuneste (chi è secono vuje ca cunziglia ê guagliune suĵe a sputà ‘nfaccia a ll’avverzarie, o ‘e pigliarle a guvetate?…) e ffàveze (‘o ffaceva ggià cu ‘a juventussa…,figurarse cu ‘a squatra d’’a città ssoja), cchiú ’nlla ‘e tutto chesto ‘e ddoje purpette ‘e Cavani signajeno ca s’era avutato ‘o Vangelo, e c’era stata ‘a cunsacrazzione a squatrona d’ ‘a squatra ‘e Walter Mazzarri, se maje fossero ancòra servute cunferme. ‘O Napule a ffine partita se piazzaje lla , a ttre punte ’a ‘nu Milanno ca dint’â partita cu ‘o Parma era paruto troppo spannuso (dilagante) e quase ‘nnarrivabbile (irraggiungibile).Addó?! Dinto a poch’ore ‘e tratte (le distanze) fujeno livellate e, dâ sfida ‘a luntano, ne ascettemo sicuramente meglio nuje , avenno sgarrupato (espugnato) ‘na furtificazzione comme a cchella rumanese…
Passammo ê ppaggelle:
DESANCTIS 7. Bluccaje a ddoje mane ‘na bbotta pesante ‘e Vuciniccio scanzanno ca Simplicio n’apprufittasse facile facile….P’ ‘o riesto è overo ca ’a porta soja nun currette assaje pericule, ma isso se facette truvà priparato dinto a ll’asciute, pure ‘ncopp’â linia d’aria. Neutralizzaje mannannolo ‘ncornerro ‘nu tiro ‘a fora ‘e Menezzo. Nun sbagliaje manco ‘e rimesse
ARONICA 6,5 Arroico (eroico) ll’intervento suĵo â disperata ‘ncuollo a Simplicio a ppartita ‘o poco accumminciata doppo ca culo’echiummo (54° secondo) êva fatto ‘na meza puttanata…. Quanno po ‘a Roma s’arrevacaje ê lemmete ‘e ll’aria cacciaje fora cazzimma e mestiere…
CANNAVARO 7-. Aveva accumminciato cu ‘na meza puttanata…, po (sarranno state ‘e preghiere meje) fuje miraculato e si Borriello riuscette a avé quacche ppallone (primma d’arrennerse e ‘nzerrà ‘a puteca) sulo allargannose o a ddritta o a mancina, dipennette tutto dâ pignularía ‘e culo’echiummo ca ‘o secutaje continuamente. Quanno ‘a Roma tentaje d’accellerà nun perdette ‘a carma.Ma ‘o fatto ca ajere culo’echiummo fuje miraculato è dimustrato ca riuscette a ‘ncarrà (isso ca nun sape manco comm’è ffatto ‘nu pallone…) n’ assisto a zzuco ‘e caramella p’ ‘a siconna purpetta ‘e Cavani!
CAMPAGNARO 7 Ce mettette ‘nu poco a ppiglià ‘e mmesure ‘e ‘nu cliente sbèteco comme a Vuciniccio, ma doppo d’ ‘e primme vinticinche minute fuje isso ca tenette ‘mmano ‘e rrétene ‘e ll’intera difesa e cunfezzionaje p’ ‘o ‘mpicciuso rumanista, ‘na sciammeria fatta a mmestiere tagliata e cusuta cumpleta ‘e fodera, buttune e pertose. Cercaje e trovaje anticipe pure periculuse,ma sempe risolutive e mettette ‘na pezza tutte ‘e vvote ca Menezzo riuscette a crià ll’ ommo ‘e cchiú vicino a ll’aria napulitana. Miezu punto mancante pe nun avé sfruttata n’uccasione capitatale sott’ â porta rumanesa.
DOSSENA 6-. Cu Taddei ‘a mettette (forze pe nun passà pe ffesso cu ‘e guappetielle rumanise…), ‘a mettette cchiú ‘ncopp’â cumbattività (agonismo) ca ‘ncopp’ô piano atletico. Scelta curiosa visto ca p’ ‘a velocità à spuntaje sempe isso ‘ncopp’ô brasiliano. ‘Nu paro ‘e vote arresecaje ‘e piglià ‘nu cartellino russo e ‘o misterro se ll’êtt’ ‘a chiammà ‘mpanca pe levà ‘a taverna ‘a nante a Pulecenella .
(dô 13° s.t. ZUNIGA 6- Risultaje utile, anze priggevole sulamente pe tené ‘o pallone luntano a ll’aria napulitana…Ma è ffesta e ‘nzerrammo ll’uocchie ‘ncopp’êcrosse sbagliate…
GARGANO 6,5. Se facette ‘nu core tanto accatastanno lignammo a centrocampo, p’ apparà ‘e fuosse ‘e cchiú d’uno. Qualche passaggio sbagliato nun le facette perdere ‘a fiducia e ‘a tramuntana e ‘mpegnaje Julio Sergio cu ‘na punizzione ‘nduvinata,ma no periculosa e ‘a fora aria.
PAZIENZA 7,5 Ch’aspettano a rinnuvarle ‘o cuntratto?Facette tutto e ‘e cchiú: ‘ncopp’ â mediana facette capriole ‘ncopp’ ‘o pallone p’annasconnerlo ê rumanise, arrubbaje palla, riavviaje ‘a manovra,facenno ‘ntelligenti e priggevoli aperture ‘e campo.
MAGGIO 7. È quase isso n’ ata vota!Cunfermaje ‘e attraverzà ‘nu stato ‘e forma veramente straurdinario.Quanno partette ‘ncopp’â curzia soja fuje ‘nu treno e nun ‘o fermajeno manco mettennole ‘o ssale ‘ncopp’â córa. Riise nun ce capette ‘o riesto ‘e niente dô primmo a ll’urdimu minuto.
HAMSIK 6,5. ‘A partita jucata cu ‘a nazzionale stette ancòra dint’ê ccosce ‘e Marechiaro ca pe ttutto ‘o primmo tempo fuje spàlleto e smattuto (smorto e scialbo); forze se sparagnaje p’ ‘o scatto decisivo appena accumminciato ‘o siconno tempo jennose a prucurà ‘o ricore ‘e ll’uno a zzero ‘e Cavani ( 4° minuto s.t.) Pigliaje fiducia, ma Mazzarri fuje custretto a rinfurzà ‘o centrocampo e ‘o sostituette.
(dô 28° s.t. YEBDA 6. ‘O centrocampo necessitaje ‘e uno comme a isso. Nun se sparagnaje maje e ce mettette sempe salute e cumbattività, seguenno ll’azzione d’ ‘e caputamiente (ripartenze).
LAVEZZI 6 -.Nun riuscette a duminà ll’accucchiata Rosi-Cassetti e se ‘nnervusette nzino a pigliarse ‘nu cartellino jalizzo. N’acuto d’’e suoje ‘o facette ê primme minuti d’ ‘a ripresa taglianno dritto pe dritto (in verticale) ‘a difesa rumanesa e mettette Hamsik ‘mporta cu ll’azzione ca valette ‘o ricore. Se magnaje ‘nu gollo sulo sulo annante a Julio Sergio, ma se riscattaje servenno ‘ntelligentemente ‘e capa a culo’echiummo-Cannavaro p’ ‘o doje a zzero ‘e Cavani.
CAVANI 8. Pure ajere ssera ‘o Matador/zengariello nuosto facette ‘o sant’antonio facennose vedé a ttutte parte: annante, areto, ‘e sguincio e de trecquarte: nun se facette a ttiempo a renderte conto ca aveva ricuperato ‘nu pallone a centrocampo ca ggià se facette vedé a ricevere palla ‘ncopp’â linia ‘e funno. Nun ll’avastaje signà ‘nu ricore ‘nu poco furtunato (‘o pallone tuzzanno ‘e duje pale passaje tutt’ ‘a linia d’ ‘o gollo, ma quanno ce vo’ ce vo!…) , ma superaje addirittura (comme avevo sperato) ‘o recòrdo ‘e Careca mettenno ‘a firma sotto ‘a ventesima purpetta staggiunale ammenestata cu ‘o stinco!
( dô 40’ s.t. MASCARA s.v.)
Mazzarri 7,5. Si riesce a vencere a ll’Olimpico sfatanno l’ennesimo dievieto sacro (tabú) staggiunale vo’ dicere ca s’ammereta tutte ll’ alludamiente c’ ave. Ê primme vinte minute ‘a squatra ‘nu poco suffrette, po ascette fora triunfalmente pecché ‘a partita era stata priparata bbuono. Pure quanno trasette Menezzo nun succedette ‘o riesto ‘e niente ‘a fora ‘e ‘nu tiro ‘a fora aria. Bravo a stutà a Ddossena ca steva jenno a ffuoco. Doppo essere passata ‘nvantaggio ‘a squatra napulitana nun êtte ‘a fà ato ca sfruttà ‘e prerogative soĵe: aspettà e ppartí n’ata vota nzino a appiccià n’ata vota o paglione rumanese.
l’arbitro BERGONZI 5 E nun ne voglio parlà pe nun ascí a chi sî ttu e cchi so’ i’ cu cchilli scieme ‘e QUELLI CHE ASPETTANO… d’ ‘a R.A.I.!
Ce sentimmo e sperammo ca stasera Interre e juventussa fernesse zzero a zzero e si po uno à dda vencere, meglio ca vence ll’Interre!
Raffaele Bracale Brak