Cribari ‘O cane ‘e presa
Cavani ‘O meglio!

Ajere, doppo d’ ‘o sciuliamazzo pigliato gioverí passato cu ‘o Liverpullo ce aspettàvamo tutte quante ca ‘o Napule se fosse levato subbeto ‘e pacchere ‘a faccia; e pe ggrazzia d’ ‘o Cielo accussí fuje è c’è jette dint’ a n’uosso soprattutto pecché â fine d’ ‘a partita ‘o Napule riuscette a nun farse surpassà e a mantené ‘o passo d’ ‘a juventussa ca pe pparta soja s’arrubbaje ‘e tre ppunte cu ‘o Cesena(3 a 1) adderezzanno (cu ‘nu ricore favezo e arrubbato) ‘na partita ca s’era misa malamente… Mo però cercammo ‘e guardà bbuono ‘e fatte comme stanno riflettenno ‘mprufunnità e nno ‘a coppa ‘a coppa comm’è ‘o ssolito nuosto… E ‘a riflessione è cchesta:stammo ô quarto posto,accucchiate cu ‘a juventússa ca cuntinuarrà a arrubbà partite e ppunte…, a ‘nu punto a ll’Interre,stammo annante a squatre forze cchiú attrezzate ‘e nuje (Roma, Genoa, Palermo), cu gghiucature-chiave o stanche o fora forma (Dossena, Gargano,Hamsik, Maggio) e a pparte po ca ce mancano comme riserve ‘nu bbuonu centrale ‘e difesa e n’ attaccante ‘e cunzistenza! Addimannammoce pure comme stammo mise cu ‘o monte-ingaggi; p’ ‘o mumento stammo annante a squatre ca pàvano ‘ngagge ‘o ddoppio d’ ‘e nuoste;ma quanto putimmo durà?
‘O signurino De Laurentis se decidesse: o rinforza ‘a rosa e aumenta ‘e ‘ngagge o ascimmo subbeto ‘a ll’ Europa League e sperammo ca nun ce mazzulejano ‘ncampiunato… Ma ce penzate ca si se fanno male Cavani e/o Lavezzi,o songo squalificate,nun tenimmo a cchi fa jucà! Dumitru?Asseccammo ‘o mare cu ‘a cucciulella!… Ditto chesto, passammo ê ppaggelle:

DE SANCTIS: 7. Una parata, ma che vvale ‘nu gollo! Crespo, ca jette a bbotta sicura, rummanette stupetiato p’ ‘e riflessi ‘e Morgànno. P’ ‘o riesto avesse pututo pure farse purtà ‘na seggia e metterse commeto.
GRAVA: 7,5 Annullaje a Giovinco custringenno a Mmarino (chillo d’ ‘o Parma) a cagnarlo cu Crespo. Cucciuto e scamuso (scorbutico),fuje ‘a sanguetta ‘e Marquesso ca fernette pe ‘ncazzarse e p’ ‘o calmà ‘o surdatiello ll’êtt’ ‘a mettere ‘e mmane ‘nfaccia (pigliannose n’ammunizzione!). Purtaje cu ‘a nicessaria sciurdezza (disinvoltura) ‘a fascia ‘e capitano.
CRIBARI:8 ‘O signore cane ‘e presa d’ ‘o Napule,tirato a llucido, sicuro, attiento e priciso nun ne sbagliaje una specialmente ‘e capa quase vulenno fà capí a culo’echiummo-cannavaro comme s’ à dda fà ‘o centrale. Penzo ca ‘o frato d’ ‘o guappo d’ ‘a Luggetta è mmeglio si se ne va pur’isso a Dubbaje… Tanto è ddifficile ca Mazzarri ‘o fa turnà a ffà ‘o titolare visto ca Cribari fuje gruosso assaje tenenno sempe d’uocchio,esattamente, chiunque si aggiraje dê pparte soje e fuje bravo pure a ffà ‘o reggista
d’ ‘a difesa lancianno cu precisione e avviano ripartenze levantine (veloci).
CAMPAGNARO: 7,5 Nun sbagliaje quase niente e nun suffrette maje né ô sale e ppepe ( il brizzolato) Crespo nè ô ggiuvinotto turzuto Boginoffo; scavallaje (spinse) comme a ‘na furia ‘ncopp’ê curzie e pe vvie centrali e dètte sicurezza e pulizzia‘ncopp’ê cerniere laterale. Perfetto quanno se trattaje ‘e scalà, e pruvvidenziale ‘ncopp’â linea d’ ‘a porta.S’ ‘a ‘ntennette cu sette parme (benissimo) cu Cribari.
ZUNIGA: 7+ Riuscette finalmente a truvà armunia (ritmo) e semplicità ‘e juoco senza esaggerà cu ‘e dribblinghe. Muturino a stantuffo ‘ncopp’a ttutta ‘a fascia, assicuraje cupertura e puntuali ripartenze. Perfetto p’ ‘o tiempo sciveto (scelto) pe ll’assisto a zzuco ‘e caramella ca mannaje Cavani a signà ‘o primmo gollo!
PAZIENZA: 7 Fuje ‘na vera diga ‘mmiez’ô campo e comme fuje nicessario addusaje acqua e uoglio d’ ‘o mutore napulitano. ‘A ‘ntesa cu Yebdà fuje priggiata. Nun se cuntajeno ‘e bbrecche lla ‘mmieze;assenziale (semplici)e senza sbavature ‘e servizzie p ‘ ‘e cumpagne.
YEBDA: 7,5 Tene salute ‘a vennere e nun se fa prijà;facette sentí ‘o sciato sujo ‘ncopp’ô cuollo d’ ‘e jucature d’ ‘o Parma: Stette a ttutte parte,’nchiuvanno e ribbattenno (tambureggiante) tuosto,priciso e urdinato. Arrubbaje e gghiucaje decine e decine ‘e pallune mo facenno ‘o difenzore, mo ‘o trecquartista agghiuntato a siconna d’ ‘e case…; Antonelli, si proprio vulessemo cercà ‘o pilo dinto a ll’uovo, le sfujette ‘na vota sola!
VITALE: 7. Primma partita ‘a titulare ‘ncampiunato, dimustraje ca aveva faticato bbuono dinto a ll’allenamento. Anzi, benissimo. Intensa la spinta, buoni i cross, granitica la fase di non possesso. Intelligente e di esperienza il fallo tattico che annulla un contropiede parmense.
dô 70° ARONICA: 7.Miraje ô custrutto (badò al sodo) Totò dedicannose â cupertura senza sbalanzarse (sbilanciarsi) cchiú ‘e tanto!
HAMSIK: 6-. Ancòra troppo stanco e se vedette dô fatto ca servette cuntinuamente ‘a palla a gghí arreto ‘mmece ‘e allungarla annante pe fà saglí ‘o juoco… Ne salvo appena quacche tentativo dinto a ll’area, ma senza custrutto e cumplessivamente fuje tante e tante ll’arrefeneture sballate e mancajeno ll’accasioni (spunti) all’aldezza d’ ‘annummenata (fama) soja!
dô 64° GARGANO: 6.Dètte ancòra cchiú sustanza ô muro ‘e gomma aizato lla ‘mmiezo ‘a Mazzarri e dètte ‘nu bbuonu un buon cuntribbuto cu gghiucate semplici e urdinate.
SOSA: 6,5. ‘Ncopp’â strata justa: scarattato (ispirato), cuncentrato, assaje cchiú pronto sia ‘e riflesse ca a mmettere ‘mpratica ‘o penziero, a ppietto a ll’urdimi vvote (rispetto alle ultime apparizioni).Assicuraje ordine e pricisione cu riga e cumpasso (geometrie) e ffuje ‘nu vero peccato quanno Cavani non assecondaje n’inserimento centrale d’ ‘o sujo ‘ncontropiede.
ô 64° LAVEZZI: 6. È isso ‘o liderro d’ ‘o Napule,e nun stongo scuprenno ‘America… Quanno trasette ll’applavuse d’ ‘o San Paolo se sprecajeno! Zumpaje ll’ommo, trovaje prufunnità e l’assisto justo p’ ‘o raddoppio ‘e Cavani… Beneditto guaglione! À dda fà quacche ripetizzione ‘e tiro ‘mporta…e s’à dda ‘mparà a tirà ‘e punizzione pure ‘a luntano!
CAVANI: 9,5 – ‘O meglio! Assemplare (esemplare),’mpeccabbile, cu ‘e contrasciocche. ‘A primma accucchiata (doppietta) ô San Paolo fuje n’accrocco (un misto) ‘e putenza, ‘e pricisione, sacrifiggio tattico e spettaculo; ‘o siconno gollo s’ammereta d’essere miso ‘ncurnice e ffatto sturià dint’ê scole ‘e pallone pe ffà capí comme se fanno ‘e ccose ‘mpussibbile. ‘O guaglione à dda essere parente lasco ‘e quacche ssanto ca ll’à ‘mparato comme se fa pe sta cuntemporaneamente a ddoje parte; cumminfatte ajere mentre provaje a ssignà, se facette truvà dinto a ll’area napulitana a zumpà pe cuntrastà ‘e capa o ‘e pere a Zaccardo, che mi piacesse vedé a Nnapule. Fuje cazzemio(egoista) quanno nun dètte ‘o pallone a Sosa ca steva sulo sulo dint’ a ll’area ‘e chille d’ ‘o Parma; ma è ll’unicu nievo. Si no ll’êsse miso diece!
MAZZARRI: 6,5. ‘O turn-ovèrro fuje sustanziuso, ma ‘o Napule,cose ‘e pazze! – trovaje palleggio, sustanza, ordine e sbrennore (brillantezza) ‘e juoco sempe cu muvimente pricise e ppulite. Yebdà, Sosa e Vitale si so’ sempe chilli d’ajere so’ pedine ‘mpurtante ‘a tené a disposizzione e puterce cuntà ògne vvota o cuntinuatamente senza aspettà ‘e ggrazzie ‘e Cesare o ‘e truvarse dint’ô stritto… Mo s’ à dda sulo capí che cancaro fà cu ll’… l’Europa League, pecché è cchiaro ca ‘ncampiunato ‘o Napule po’ ffà bbuono, pure pe merito ‘e Mazzarri.

L’arbitro MAZZOLENI 2,5 ‘Na meza cazetta comme a ttutte ‘e culleghe suoje capitate ‘ncopp’ â strata d’’o Napule. Chi sa’ addó truvaje ‘nu recolamento d’’o juoco d’ ‘o pallone addó fosse previsto ca ‘a squatra ca nun è cchella ‘e casa , specie si è ‘na pruvinciale – contro a ‘na squatra ‘mpurtante – à dda avé cchiú sisce a ffavore. Divertente, si nun facesse ‘ncazzà, po ‘o fatto ca tutte ‘e difenzore janche a ccroce avettero dô sischetto bergamasco ‘na specie ‘e licenza ‘e 007: fecuzzune, mazzate e cauce a gogò.Nun s’accurgette, o meglio nun se vulette accorgere ca dinto a ‘na mischia dinto a ll’area d’ ‘o Parma, mentre Cavani puntava dritto verzoô golle fuje cauciato e arrunzato ‘a uno d’ ‘e difenzore…, ma isso facette continuà a gghiucà! Pe carità:forze si avesse siscato ‘o ricore,’o difenzore ce rummaneva male e rummaneva ‘mpressiunato pe tutt’ ‘o riesto d’’a partita e cchesto nun s’ à dda fa cu cchi sarrà tesserato dâ juventússa! ‘E juventini, presente e future nun se toccano. Tutto, perfettamente cu ‘a massima aunestà! Ma nisciuno me lleva ‘a capo ca essenno ‘e Bergamo, Mazzoleni è tifoso ‘e ll’Atalanta (squatra ca se sape è abbaccata cu ‘a juventússa) o direttamente tifoso d’ ‘a juventússa!Ma è certamente n’arbitro ca nun serve.
Forze pure in perfetta… aunestà (buonafede).
Pecché cu ‘e ricore ‘ndecisi o cu ‘e fuorigiuoco ‘e millimetri, ce po’ ppure stà ll’errore specie cu ‘na decisione ‘a piglià dinto a ‘na frazzione ‘e siconno… Ma si, senza tené nisciuno annate, nun vide ‘nu difenzore ca affronta cu ‘o sanco a ll’uocchie ll’attaccante ca corre verz’â porta e ‘o cauceja premeditatamente, si ti scappa sempe e cumunque ‘o juoco viulento e assassino, si nun vide ‘e pruvucazzione cuntinuate e cu ttutto ca ‘o signalinea te ll’ allucca dint’ â cuffia,faje avvedé ca ‘o fatto nun è ‘o tujo e sische ‘e falle ô ccuntrario…, allora vo’ dicere proprio ca sî n’arbitro scarzo, pure perfettamente aunesto!…
Cunchiudenno aggi’ ‘a dicere ‘na cosa e ciovè ca nun ce pozzo crerere ca ajere finalmente Mazzarri se decidette, almeno pe ‘nu poco, a mmettere ‘a squatra a cquatto ‘ndifesa! Dalle ddalle, ‘o cucuzziello addeventa tallo; èrano tre mmise ca ‘o gghievo dicenno!Jammo bbelle guagliú ca chi se mette appaura nun se cocca cu ‘e ffemmene belle! E sulo jucanno a cquatto arreto nun se pigliano golle fesse, comme è capitato spisso! E chiudimmo cu ‘na raccumannazzione ô signurino De Laurentiis: Don Aurelió, pe ffavore accattatece ‘e jucature ca ce servono, pecché ‘o campiunato è lluongo, ‘e ‘mpegne so’ assaje e si se fanno male dduje o tre d’ ‘e cchiú fforte comme ‘a mettimmo a nnomme?Jammo a fferní dint’ê chiavette e nun sia maje ppo’ succedere ‘a disturbata, presidè!
Basta accussí ce sentimmo ggiovedí ca vène doppo d’ ‘a partita ‘e Cagliari e facimmo corna!
Stateve bbuone!

Raffaele Bracale

ilnapolista © riproduzione riservata