Cannavaro nun ‘o supporto cchiú

Che delusione! E chi se ll’aspettava! Partita stregata,episodica e ghiastemmata! ‘Na cosa âmm’ ‘a dicere subbéto e cioè ca ll’arbitro d’ajeressera fuje ‘na chiaveca è fora discussione: nun vulette vedé ‘nu fallo ‘e mano ‘e Pellissé(r) ca facette ‘o passaggio p’ ‘o doje a uno d’ ‘o Chievo, nun dette dduje ricore ca tutte vedettero ‘a fora d’isso ‘na vota pe fallo ‘ncopp’ a Mmaggio, na vota pe fallo ‘ncopp’ a Lavezzi e nun vedette tutte ‘e mmazzate ca puntualmente pigliaje Maggio etc…., ma tutt’ ‘o Napule, a pparte ch’era passato ‘nvantaggio troppo ampressa (9’), ajeressera ‘mmece ‘e correre, cammenaje e nun fuje cacchio ‘e tirà ‘mporta cchiú ‘e ‘nu pare ‘e vote; a Ggenova ‘o Napule aveva fatto ‘o tricchitracco e ‘a bbotta a mmuro, ajeressera pareva ‘nu fitti-fitte ‘nfuso…
Comunque ‘o prubblema principale d’ ‘o Napule rummane chillu vuoto a pperdere ‘e Culo’echiummocannavaro e nun me dicite ca ce ll’aggio cu isso pe sfizzio d’ ‘o mio…. Si peffino ‘o prufessore Trombetti (ca ‘a sempe è ‘nnammurato d’ ‘o capitano d’ ‘o Napule) ll’à miso 4,5, significa ca ‘o prubblema è sserio!
Sí, pure ajere ssera jette a ffà ‘o nnacchennello annante e ll’è capitaje ‘e signà ‘nu golle comme a chille ca segna Chiellini e ca putesse signà pure io ca songo paralizzato ‘ncopp’ a ‘na seggia a rutelle…,sì signaje ‘o golle, ma po straniannose dâ lotta(‘a chillu vilacchióne ca è…), se perdette sistematicamente a Pellissié(r) ,e lassaje via libbera a ccentro a cchillo d’ ‘o Chievo ca signaje ‘o gollo
d’ ‘o vantaggio d’ ‘e veronesi e ppe fernì facette ‘na puttanata ca nun ferneva maje passanno ‘a cecata ‘a palla arreto e dannola a Pellissié(r) ca facette ‘o terzo! Quanno Mazzarri se deciderà a levarlo e a ffà jucà a Cribari, sarrà sempe tarde!
Passammo a ‘e vote:
De Sanctis: 5-. Poche responsabilità ‘ncopp’ê golle, ma troppo ‘ndiciso cu ‘e rilance e poco sicuro cu ‘e prese …
Grava: 5,5. Fino a quanno putette fà ‘o terzo a dritta, marcaje a dduvere a Granoche e ‘o traspurtaje luntano ‘a ll’area napulitana . Passanno a mancina perdette campo e quacche automatismo sia pe ll’ anticipo ca p’ ‘a marcatura.
Cannavaro: 2,5. Nun ‘o supporto cchiú…Chisto vedarrà ‘a morta mia!!! Aggiu già ditto ‘o penziero mio. Cca dico ca ‘o gollo fatto ll’à fruttato miezu punto ‘e cchiú… P’ ‘o riesto, ‘na serata nera cu Pellissiè(r) ca facette chello ca vulette…. Troppa vavia e sufficienza sia p’ ‘e retropassaggi, ca p’ ‘a marcatura: inutile e periculoso p’ ‘e nuoste, rischiaje ‘o cartellino russo (e fosse succieso: pe ‘nu paro ‘e jurnate ce ‘o fossemo levato ‘a tuorno… e ‘mmece ll’arbitro fuje ‘na chiaveca pure ‘nchesto e ce arruvinaje! Pe nun ripetere d’ ‘o regalo ‘e culo’echiummo p’ ‘o terzo gollo veronese!
Campagnaro: 5- Fuje custretto pe ddà ‘na mana a culo’echiummo a smaglià ‘a difesa a mancina sulla accentrannose comme aveva fatto a Genova, ma Pellissiè(r) nun fuje scarzo comme a Cassano e, lassato sulo trovaje ‘o pareggio; Mazzarri allora ‘o spedette a dritta, ma aumentajeno sulo ‘e difficultà ‘e Grava. Hugo ajere ssera nun era isso e perdette cchiú ‘e ‘nu duello.Sperammo ca se repiglia subbeto!
Maggio: 4,5. Accumminciaje bunariello, ma subbeto se perdette e sparette dô campo e nun fuje cchiú capace nè ‘e cuntené, nè spingere ‘nnante: bastaje ‘o guagliunciello Constant ca cu ‘e bbone o cu ‘e triste ‘o custringette a rummané vascio. basso. In area se vedette raramente e maje pericolosamente e nun riuscette a essere maje nè incisivo, nè decisivo!(Perdette ‘a meglia occasione pecché ‘o menajeno ‘nterra e ll’arbitro nun vulette vedé…). Cagnato troppo tarde!
(‘a ll’82°) Dumitru: sv. Diece minute e cu ‘a preoccupazzione ‘e recuperà so’ ppoche pe dà ‘na valutazzione, ma m’ è parzo ca ‘o guaglione tene ‘o ppoco ‘e perzonalità
Dossena: 6-. Riuscette spisso e volentieri a truvà ‘a linea ‘e funno campo e mmannaje ‘mmiezo pericolosi e taglienti crosse, maje sfruttate a dduvere. Riuscette pure a ffà bbelli diagonale difenzive.’Nzomma uno tra ‘e poche a salvarse ‘into a ‘na serata da scurdarse primma ‘e subbeto!!!
Pazienza: 6-. ‘Na prestazzione generosa, apprezzabbile e de carattere curredata ‘a entrate pulite e sicure e da aperture ‘e juoco precise. Bbuone pure ‘e movimenti senza palla dinto a ll’area avversaria. Quanno ‘o Chievo pigliaje completamente ‘o sopravvento, purtroppo se bloccaje pure isso!
Gargano: 5+. Stanco, stanchissimo. Poca benzina dint’ ê ccosce, s’êsse mmeretato ‘nu poco ‘e riposo. Ê primme minute sfoderaje quacche bbona rifinitura,po se ‘nzallanette e abbiaje a sbaglià ‘nu passaggio arreto a ll’ato spisso favorenno ‘o contropiede gialloblù.
(dô 62°) Sosa: 5-.Trasette ca avesse avut’ ‘a dà frischezza e quacche bbona idea â manovra, ma se mantenette quase pe ssempe fora dô juoco. P’’o mumento è n’uggetto mesteriuso… Nun ‘ncarraje né ‘na penzata, nè ‘nu suggerimento e pe ghionta ‘e ruotolo troppo spisso stette cu ‘e spalle â porta; nun dette manco ‘nu poco ‘e cullaborazzione quanno ‘o Napule ripiegaje.
Hamsik: 5,5. Se avesse ‘ncarrato ‘o gollo, ‘mmece ‘e scugnà ‘a traverza, ‘a chella posizzione ‘mpussibbile se ne fosse caduto ‘o San Paolo e nnuje stessemo parlanno ‘e ‘na granne jucata ‘e ‘nu campione e forze parlassemo ‘e ‘na vittoria!Sempe a ccentro d’ ‘a manovra dette spisso ‘a luce nicessaria e se menaje pure annate e ‘o purtiere Sorrentino avette ‘a fà ‘o miraculo pe fermà ‘o pallone ‘e ‘nu colpo ‘e testa suojo ca puteva darce ‘o doje a ddoje e adderezzà ‘a partita! Sarrà pe n’ata vota!Sperammo ‘e puté ‘e dicere ampressa: Jamme-Sicche e turnammo chiatte ‘e felicità!
Lavezzi: 6- Fuje l’unico lla ‘nnante a pruvà ‘o sprinto e ‘a jucata vincente. ‘Nvelocità nun se po’ fermà, ma ‘nsulitaria è difficile fà ‘na ‘mpresa:à dda ancòra capí ca ‘o juoco d’ ‘o pallone è ‘nu juoco cullettivo e ‘a palla s’ à dda passà! Comunque fuje d’ ‘o suojo ll’assisto p’ ‘o mumentaneo vantaggio napulitano, arrivato purtroppo troppo ampressa! Se procuraje pure ‘nu ricore cu ‘nu scatto fulminante; ll’arbitro leccese (me joco ‘e rrecchie ca comme tutte ‘e puglise è tifoso d’ ‘a juventús) facette avvedé ca nun aveva visto e facette continuà!
Cavani: 5,5. Accuminciaje a sèntere ‘a fatica: pe uno comme a isso ca nun se sparagna maje, è ttosta assaje jucà sempe 90’ rendenno sempe ô ciento pe cciento! L’intesa cu Lavezzi sí migliora ‘e partita ‘npartita, ma ajere ssera mancajeno ‘a frischezza e ‘a sciurdezza ‘e muvimento.Che peccato! Sperammo jesse meglio a Cesena…
Mazzarri: 4,5. Sbagliaje formazzione e lettura d’ ‘a partita. Nun se po’ ghiucà sempe cu ‘e stessi unnice perzone: Culo’echiummocannavaro centrale oramaje è ‘na jastemma menata: ajere ssera abbastaje sulamente Pellissiè(r), (‘ncopp’â carta ll’ommo ‘e Culo’echiummocannavaro) a mannà ‘ntilte n’intera difesa; po Campagnaro terzo a mancina, mo comme a mmo è ‘na furzatura: l’argentino (ca forze fisicamente nun sta ô mmassimo) nun renne comme sape e cu tutta ‘a bbona vulontà ajere ssera perdette spisso ‘o senso d’ ‘a posizzione. Quanno ajere ssera ‘o spustaje a dritta fuje Grava a gghí ‘nconfusione.Ô posto ‘e Mazzarri ajere ssera avesse miso a dritta Grava, a ccentro Cribari e Aronica a mancina… Si ‘o Napule sta fisicamente bbuono, ma bbuono, bbuono, buono po’ essere, comme a poche ati squatre ‘o tricchitracche e ‘a bbotta a mmuro ca servono e ca tutte vulessemo vedé, ma quanno manca ll’ussiggeno e ‘e ccosce so’ mosce venono fora paricchi mierche e mancanza d’ idee e accussí succede (comme ajere ssera) ca ‘o tricchitracche addiventa ‘nu fitti-fitte ‘nfuso…
ll’arbitro Giannocchero 2 Pessimo!Chiaramente ‘nmalafede, ‘stu sischietto ‘e Le Veglie (Lecce)ca – me ripeto – quase certamente (comme a ttutte ‘e puglise è tifoso d’ ‘a juventús) – nun vulette vedé dduje ricore uno cchiú gruosso ‘e n’ato uno ‘ncopp’ a Mmaggio e l’ato‘ncopp’ a Lavezzi,comme pure artatamente nun se rendette conto ca ‘o gollo ‘eFernandèsso era fasullo pe bbia ‘e ‘nu fallo ‘e mano ‘e Pellissiè(r) ca passaje ‘a palla ô stesso Fernandèsso ca signaje. Me dispiace d’ ‘o dicere, ma âmmo accumminciato troppo ampressa cu chist’arbitre scurnacchiate ca maltrattano ‘o Napule! ‘O signurino Aurelione, si nun conta quanto a ll’icchese dinto a ll’affabbeto, se facesse sèntere subbeto si no p’ ‘o Napule sarranno cacchie! Ce sentimmo!
<strong>Raffaele Bracale</strong>