ilNapolista

Signurino De Laurentiis lente nere gghiettatorie

‘o signurino De Laurentis ‘mmece ‘e se mettere chelli gghiettatorie lente nere, facesse arrevacà attuorno ô terreno ‘e juoco ‘nu paro ‘e camionne ‘e sale duppio

Signurino De Laurentiis lente nere gghiettatorie
Napoli's President Aurelio De Laurentiis is seen in the stands during the Italian Serie A football match Frosinone vs Napoli at the Benito Stirpe stadium in Frosinone, on August 19, 2023. (Photo by Filippo MONTEFORTE / AFP)

Chella d’ajere è stata n’ ata partita malaurata e ammagata… Nisciuno me leva ‘a capo ca ‘ncopp’ ô Napule ‘e Mazzarri ce à cacato ‘o cane niro, quaccuno (e sacci’ i’ chi è, ma m’ ‘o tenco pe mme!…) ll’ à menato ‘o nniro ‘e seccia e ll’ à fatto ‘na fattucchiaría accussí putente ca si ajere ‘a partita ‘mmece ‘e nuvantaquatto minute fosse durata duicientovinticinche, sempe zero a zzero fosse fernuta… E ‘a Juventús sempe fosse zumpata ‘a cuollo a ‘o Napule, comme succedette ajere â fine d’ ‘a jurnata.

Ora mo siccomme è ‘a paricchio ca ‘o Napule costruisce, costrisce, ma nun è ccacchio ‘e signà, e ‘e ppartite se venceno signanno, cca ss’ à dda truvà ‘na suluzzione pe risolvere ‘o prubblema d’ ‘a jella ca perseguita ‘e napulitane! Pe comme ‘a veco i’ ddoje sonco ‘e soluzzione pussibbile: mazzeca e una: a ògne partita, spicialmente chelle in casa, ‘o signurino De Laurentis ‘mmece ‘e se mettere chelli gghiettatorie lente nere, facesse arrevacà attuorno ô terreno ‘e juoco ‘nu paro ‘e camionne ‘e sale duppio; mazzeca e ddoje: arunasse jucature, allenatore,miedece e massaggiature e ‘e purtasse a ppère a Pumpeje o a Muntevergene o ammeno ammeno ‘e facesse benericere ‘a ‘nu prevete o ‘a ‘nu monaco ricchione.
Ca si no ‘o fatto nun se risolve! Turnammo a ajere e dicimmo ca s’era capito subbeto ca nun era jurnata: doppo appena vinticinche o vintisei minute, Lavezzi se bluccaje e se n’avette ‘a ascí. Pe gghionta ‘e ruotolo ‘o Cagliari era venuto pe se purtà â casa ‘o zzero a zzero e nno pe se jucà ‘a partita; e ce riuscette cu ‘na difesa stile “Forte Apasce” stutanno pe ssempe ‘e suonne ‘e Champions d’ ‘o Napule ca pe parta soja fuje scumbinato, scunclusiunato, apprussimativo, epperò capace ‘e mettere assieme ammeno ‘na meza duzzina ‘e uccasione chiare e pulite senza però sfruttarne manco una! P’ ‘a verità si ‘e rossobblú d’ ‘o Cagliari fujeno bbuone ‘e turnà cu ‘nu punto dô San Paolo (quase cinquantamila spettatori! Azze!),’o fatto dipendette ‘nu poco ‘a ll’infortunio ‘e Lavezzi e paricchio dô straurdinario portiere cagliaritano (ca ggià pare ll’anno ca vène sarrà d’ ‘a juventús) Federico Marchetti, ca stimulato da ‘o mundiale sudafricano ca s’avvicina, caccaje ‘a scienza e facette ‘na prestazzione ‘a fine d’ ‘o munno, ‘nchiuvanno ‘o Napule ‘ncopp’ ô 0-0. ‘O riesto d’ ‘a squatra sardagnola, schierata a riccio, penzaje a difennersi cu ll’ógne e cu ‘e diente e cu ògne mezzo, senza riuscí a concludere verzo â porta ‘e De Sanctis neanche ‘na vota. ‘O fatto se ‘ncarugnette cchiú assaje poco doppo â mezora d’ ‘o siconno tempo, quanno Cossu se facette jettà â via ‘e fora pe bbia ‘e ‘nu fucuzzone dato a Grava, lascianno ‘ndiece ’a squatra soja.Tutto chesto mentre pe tutt’ ‘o primmo tempo e p’ ‘o siconno ‘o Napule attaccava comme a ‘na vufera ‘ncazzata, senza raggiunà e senza apprufittà d’ ‘o fatto ca l’allenatore Melis s’era bbuono cummigliato ‘mprovvisanno ‘nu 4-4-2 con Dessena, Conti, Biondini e Lazzari in mediana, e sole ddoje pónte, Larrivey e Matri,annante. Addereto po, Canini terzino ‘e destra, avette ‘a tené d’ucchio Lavezzi, ca però fuje fatto fora, doppo vintiseje minuti, ‘a ‘nu prubblema muscolare e fuje sostituito no ‘a ‘na ponta (Hoffer) ma ‘a Bogliacino, ca – si nun me ricordo malamente – ô vintesimo d’ ‘o siconno tempo s’ abbuscaje pure ‘nu ricore (pe n’intervento ‘e Marchetti ca sulo ll’arbitro e ‘o signalinea nun vulettero vedé. ‘E duje centrale, Ariaudo e Astori frattanto se spellicciavano pe bluccà a Denís, ca ô primmo tempo jette assaje vicino ô golle ammeno tre voote! Agostini s’ occupaje ‘e Zuniga e ê primme quarantacinche minuti non se facette maje superà, lassanno a ll’esterno ‘e centrocampo d’ ‘o Napule sulo ‘nu strippo (sterile) palliggià ‘ncopp’â trecquarte. Zuniga po ô siconno tempo stanco ‘e aizà póvera, tenette ‘o stommaco ‘e magnarse ‘nu golle ggià bbello e ffatto!
‘O primmo tempo,cumunque , se ‘nchiudette ‘ncopp’ô 0-0 sulo pecché Marchetti, turnato ê sfarzuse(grandissimi) livelle ‘e ll’anno passato,facette ammeno quatto parate ‘a campione ( facitece caso: quanno venono a Nnapule tutte quante ‘e purtiere cacciano ‘a scienza….V’ ‘o ricurdate a Battara (purtiere d’ ‘a Sampedoria ) ca quanno veneva a Nnapule parava assettannose ‘ncopp’ ô pallone?!) Tutte quante ‘e purtiere, bbuone o scarze, quanno venono a Nnapule cacciano ‘a scienza; figurateve mo uno bravo comme a Mmarchetti!). Si parlammo d’ ‘o juoco ,in effetti ‘o Napule,senza ‘ncantà (nè puteva fà diversamente, privo ‘e Lavezzi e cu dduje scugliere ‘mmiez’ ô campo: Gargano e Pazienza, e senza uno ca costruesse ‘o juoco), dominaje pe pussesso ‘e palla ca , â fine, producette ammeno sette uccasione. ‘O Cagliari, ‘ncapace ‘e ripartí e cu ‘e ddoje pónte abbandunate dint’ â morza d’ ‘e tre difenzori centrali ‘e Mazzarri, prugressivamente fuje scamazzato a gghí arreto. ‘E ppalle-golle nun se cuntajeno cu Denís prutagunista ‘e ‘nu duello a tu e io cu Marchetti. Proprio ‘o centravanti argentino arapette ‘o bballo doppo appena tre minute cu ‘na capata pericolosa assaje ca Marchetti mettette fora ‘ncalcio d’angulo. A seguí: silurata ‘e Hamisk, piattone destro auto ‘e Denis, asciuta a ttuffo ‘e Marchetti sempe ‘ncopp’ a Denis cu palla misa ‘ncalcio d’angulo, miraculo d’ ‘o purtiere rossobblú‘ncopp’ a n’ ata capatona ‘e Denis, parata ‘ncopp’ a ‘nu destro ‘e Bogliacino e ati parate assurtite. Abbastano chisti quatto parole pe farve ‘ntennere ‘a supremazzia d’ ‘o Napule? Penzo ‘e sí E ‘o Cagliari? Niente! Primma speranzuso ‘e fà ‘o miraculo, po sempe cchiú ‘mpaurato fuje sí e nno capace ‘e dà fastidio a De Sanctis (ca si no avesse pututo pure farse ‘nu paro ‘e sulitarie…) sulo ‘na volta,fuje capace ‘e dà fastidio a De Sanctis, cu ‘na deviazzione auta, ‘a vicino, ‘e Lazzari.
Ô siconno tempo, doppo vinte minute ‘e niente, ma proprio niente, ‘o Napule se scetaje, costringenno Marchetti a ffà ‘nu doppio miraculo primma ‘ncopp’ a Hamsik e ppo ‘ncopp’ a Denis, dinto â stessa azzione.Subbeto doppo nce fuje n’asciuta a kamikaze ‘e Marchetti, ‘mmiezo ê ggamme ‘e paricchi jucature per sventà ‘nu crosso tagliente ‘e Hamisk e fuje tanno (si nun me sbaglio, ma po’ essere pure ca capitaje ‘into a n’atu mumento…., ma capitaje!), fuje tanno ca Marchetti arrunzaje a Bogliacino e n’ato arbitro avesse dato ‘o ricore!
Fuje ‘o signale d’ ‘o lutenaro(arrembaggio),pure si ‘e napulitane a mmamo a mmano erano sempe cchiú stracche e abbelute (sfiduciati),pure pecché sia Maggio e ancòra ‘e cchiú Dossena ca erano trasute rispettivamente pe sostituí Pazienza e Aronica, aizavano póvera sulamente,… pure si ‘e napulitane nun fujeno bbuone ‘e arrivà a essere periculuse comme ô primmo tiempo. Sulo ‘na volta, â via d’ ‘o trentasettesimo cu Zuniga, ‘o Napoli dette ‘a ‘mpressione ‘e puté superà “Batman” Marchetti, ma ‘o pallone se perdette‘ncopp’ ô funno! A chistu punto ricurdato ‘o fucuzzone ca Cossu dette ‘nfaccia ô surdatiello Grava e pe cchesto ne fuje cacciato â via ‘e fora ‘a ll’arbitro ca manco se n’era accurgiuto, o se nn’era vuluto accorgere ma ca fuje avvisato da ‘o signalinea, ditto chesto nun rummane ‘a cuntà nient’ ato e allora dico coccosa d’ ‘e jucature d’ ‘o Napule, ‘e ll’allenatore, arbitro e signalinee e me tiro ‘a porta.
De Sanctis 6: Nun tenette quase niente ‘a fà.
Campagnaro 6,5: Ô ssolito tuosto, diciso,scetato e friccecariello, sia ‘ndifesa, ca galuppanno a destra.
Cannavaro 6: Nun avette ‘mpicce e – pe furtuna nosta – nun ce cumbinaje guaje.
Grava 6,5: Quacche ‘ntervento priciso, ‘nu fucuzzone ‘nfaccia e poco ato.
Zuniga 6-:’A chiena e ‘a vacante: cose bbone e fessarie. Ô finale addirittura sbagliaje ‘nu golle praticamente fatto! Chi ‘o po’ purdunà?
Pazienza 6,5: Luttaje comme a ‘nu lione cu tutto ca nun steva ô mmeglio.
(32’ s.t.) Maggio 5,5: rientraje doppo l’infortunio e ll’operazzione ô menisco , e se vedette ca nun era ancòra pronto!
Gargano : 6-: pur’ isso ’a chiena e ‘a vacante: cose bbone e fessarie. ‘E soliti troppi errore ,ma tanta voglia ‘e secutà gli avversari.
Aronica 6- : Pe quase tutta ‘a partita rummanette bluccato a sinistra; è stanco e de cchiú nun se po’ pretennere.
(9’s.t.) Dossena 5:strippo (sterile), ma soprattutto ‘mpreciso. Pe mmo accussí nun serve e è quase ‘nu pacco. Sperammo ca ll’anno ca vène fa quaccosa ‘e cchiú!
Hamsik 6,5: Pe ‘nu poco riuscette a trascenà ‘a squatra doppo ca Lavezzi se n’era asciuto . Quacche bbuonu passaggio d’ ‘o sujo nun venette sfruttato a dduvere dê cumpagne.
Denis 6+:Pe ll’impegno ca ce mettette ma no pe cchello ca nne ricavaje; avette cchiú ‘e ‘nu bbuonu pallone, ma Marchetti ‘o fermaje sempe!Scarugnato!
Lavezzi s.v. Scarugnato overamente assaje! Vintiseje minuti so’ overamente poche pe gghiudicà ‘a partita soja. Sperammo ‘e vederlo ‘ncampo già dummeneca ca vène: ‘o Napule nun po’ farne a mmeno!
(26’ p.t.) Bogliacino 6 -: Si ‘mpignaje subbeto e assaje ma nun riuscette a pognere comme avesse pututo, nun se ‘ntricaje bbuono dint’ ê scheme ‘e juoco. Ma è nnormale pe chi, comme a isso, joca poco. S’abbuscaje pure ‘nu ricore ca sulo ll’arbitro e ‘o segnalinea nun vulettero vedé!
All.Mazzarri 6: Puveriello! À dda frijere ‘o pesce cu ll’acqua! Nun m’ ‘a sento pirciò ‘e lle dà quacche ccolpa: ‘a squatra joca, ma si nun segna non è mancanza soja, cunzideranno pure ca ajere lle mancaje Quagliarella, e ca Hoffer oramaje aspetta sulo ‘a fine d’ ‘o campiunato pe ffà ‘e balice!
L’arbitro Mazzoleni 2,5 ‘Na meza cazetta comme a ttutte ‘e culleghi suoje capitate ‘ncopp’ â strata d’’o Napule. Chi sa’ addó truvaje ‘nu recolamento d’’o juoco d’ ‘o pallone addó è previsto ca ‘a squatra ca nun è cchella ‘e casa , specie si è ‘e pruvincia – contro a ‘na squatra ‘mpurtante – à dda avé cchiú sisce a ffavore. Divertente, si nun facesse ‘ncazzà, po ‘o fatto ca tutte ‘e difenzori rossobblú avettero dô sischetto bergamasco ‘na specie ‘e licenza ‘e 007: fecuzzune, sgambette e cauce a gogò.Nun s’accurgette, o meglio nun se vulette accorgere ca dinto a ‘na mischia Marchetti aveva arrunzato a Bogliacino e facette continuà a gghiucà, ‘mmece ‘e dà ‘o ricore a ffavore d’ ‘o Napule Pe carità, tutto aunestamente:forze si avesse siscato ‘o ricore, Marchetti ce rummaneva male e rummaneva ‘mpressiunato pe tutt’ ‘o riesto d’’a partita e cchesto nun s’ à dda fa cu cchi sarrà ‘o prossimo purtiere d’ ‘a juventús! ‘E juventini, d’ ‘o pprisente e d’ ‘o future nun se toccano. Tutto, perfettamente cu ‘a massima aunestà! Ma nisciuno me lleva ‘a capo ca essenno ‘e Bergamo, Mazzoleni è tifoso ‘e ll’Atalanta (squatra abbaccata cu ‘a Juventús) o è direttamente tifoso d’ ‘a Juventús! È certamente n’arbitro ca nun serve. Forze pure ‘mperfetta… aunestà.
Pecché cu ‘e ricore ‘ndecise o cu ‘e fuorigiuoco ‘e millimetri, ce po’ stà ll’errore specie cu ‘na decisione ‘a piglià dinto a ‘na frazzione ‘e siconne… Ma si, senza tené nisciuno annate, nun vide ‘nu purtiere ca jesce alla sanco ‘e chi t’ è vvivo, t’aggi’ ‘a rompere tutto chello ca tiene sane cu ‘e piere annanze e arronza ‘nu jucatore, si ti scappa sempe e cumunque ‘o juoco viulento e assassino, si nun vide ‘nu fucuzzone ‘nfaccia e ‘o signalinea te ll’à dda alluccà dint’ â cuffia, vo’ dicere proprio ca sî n’arbitro scarzo, ma perfettamente aunesto!…
E chiurimmola cca; ajere doppo ‘a mala nova d’ ‘o pareggio d’ ‘o Napule e cchella d’ ‘a vittoria d’ ‘a juventús, ll’unica nutizzia bbona ca avette fuje chella ‘e sapé ca ‘a Sampedoria aveva ‘nturzato ‘e mmole â Roma ‘e Ranieri (ca me sta ‘ncopp’ â vocca d’ ‘o stommaco); mo ce restano appena tre partite pe vedé ‘e ferní ‘o campiunato annante â Juventús… e cchesto è ‘o mmassimo ca ‘o Napule po’ ffà. Ll’anno ca vène po se ne parla, speranno ca ‘o signurino De Lurentis arapesse ‘o vurzillo!

Stateve bbuone!

 

ilnapolista © riproduzione riservata