E ppacienza guagliú! Êv’’a succerere primma o doppo ca ‘o Ciuccio pigliasse ‘nu sciuliamazzo e abbuscasse
NAPOLI SPARTAK MOSCA [E.L.30/9/21] 2 A 3 ‘A VEDETTE ACCUSSÍ
E ppacienza guagliú! Êv’’a succerere primma o doppo ca ‘o Ciuccio pigliasse ‘nu sciuliamazzo e abbuscasse…E cchesto succedette ajeressera quanno ô Maradona Napoli-Spartàk(che)sibbacco (match) d’’a siconna jurnata, pandiglia (gruppo) C d’’a Cuppetta iurupea, se cunchiudette ‘ncopp’ô doje a ttre p’’e russe; cheste ll’addaffe (reti): doppo 11’’ ‘O Turco, po ô 54′ Promes(so), a ll’80′ Ignatov(ve), ô 90′ ancòra Promes(so) i ô 94′ Caromecosta. ‘Nzomma ‘o Napule cadette pecché nun ce credette, fallette ddoje tre bboni accasione pe mmetterse ‘ncopp’ ô doje a zzero e asasa (soprattutto) pecché sott’â mez’ora ‘o Napule rummanette ‘ndiece pe bbia ca ll’ucummo (l’arbitro) Kruzliak(che)[4 e ppo ve dico] jettaje fora a Mario Rui.pe ‘na sciuliata forze cariosa (fallosa)’ncopp’ê piere ‘e Moses(so), ‘mmiez’ ô campo luntano dâ porta nosta. Ô 92’ l’ucummo ne facette n’ata assignanno ‘nu ricore, ca nun ce steva ô Spartak(che) e c’êtte penzà ‘a Var(ra) pe farelo turnà ‘ncopp’ê passe suoje…Pe bbona parta d’’o sibbacco ‘e nuoste custrignetteno ‘a scuatra russa a gguardarese ‘a castagna senza farela munuvarà (manovrare) ‘E fatte cagnajeno sulo quanno rummanettemo ‘ndiece i ‘e russe pigliajeno ‘o pappaviento mettennoce sotto. E ppacienza! Ora mo Spalletti dice ca nun ‘mporta e nniente è ccumprumiso, ma a mme me piacesse ca fósse ‘o ccuntrario e ce mettesse ‘ncopp’â cuppeta iurupea ‘nu bbellu crucione pe ppenzà sulo ô campiunato, accumincianno ggià da dummeneca a Ffirenze contr’ê viola ca so’ accunte (clienti) difficurtuse!
Passammo ê ppaggelle:
MERET [‘O Lungagnone] 5: ‘Mporta ll’arrivajeno justo quatto pallune, uno ‘o pigliaje, ma ll’ati ttre ll’êtt’’a recogliere ‘nfunno ô sacco; sulo ‘ncopp’ô terzo nun tenette itimme (colpe), ma ‘ncopp’a ll’ati dduje durmette cu ‘a zizza ‘mmocca e sse menaje sulo quanno ‘e pallune erano ggià trasute! Che fessaria farelo jucà ô posto ‘e Pastacrisciuta!
DI LORENZO 7: Atalossa (prestazione) rraiò (superba); spettaculare ‘a palla data a Ccaromecosta ô 94’.
MANOLAS [Chitelassa] 6: Facette cchiú d’’o duvere suĵo cu ‘e bbone e ccu ‘e ttriste… peccato ca ll’addaffa (rete) ca signaje nun fove cunvalidata!
KOULIBALY [‘O Ggialante] 5,5: Quacche vvota jette ‘int’ê chiavette doppo ca Mario Rui fove jettato fora e ll’avverzarie accumminciajeno a dd’ arrivà ‘mparanza. Peccato.
Mario RUI 5: Êva accumminciato bbuono ‘a mubbara (partita) jabbranno (crossando) dô lato mancino, ma po chillu taccullo (intervento) ‘ncopp’ê piere ‘e Mosès(se) i ‘o cartellino russo ca s’abbuscaje ce cumpricaje ‘nu sibbacco (match)ca se steva affuzzanno (vincendo) e ss’êsse pututo affuzzà (vincere)!
ELMAS [‘O Turco] 7: signaje n’addaffa (rete) lampo, po fove custretto,da Spalletti, doppo d’’a mez’ora a ppassà arreto’ncopp’â ferza mancina e ss’êtt’’a sacrificà pe ttutto ‘o sibbacco (match).
[Da ll’83’ OUNAS: s.z.]
RUIZ [Anemalonga] 5,5: Facette poco e ssulo pochi vvote se facette nutà dint’â mità ccampo nosta. Peccato!
ZIELINSKI 5: Atalossa (prestazione) scadente; nunn’era isso e sse vedette quanno se magnaje ‘o stuco (gol) d’’o doje a zzero; Spalletti s’’o chiammaje ‘mpanca troppo tarde.
[Dô 46′ ZAMBO ANGUISSA[‘O ‘Ntussecuso] 5: Trasette pe ffà aculla (diga)’ncopp’â mediana, ma troppo sulo, nun ce ‘a facette.
POLITANO 6: Mettette quacche bbuonu pallone p’’e cumpagne ‘e sezziona (reparto), ma mancaje ‘e vuduja (lucidità) ‘nnante â porta.
[Dô 73′ LOZANO 6: Purtaje frischezza lla ‘nnante cupulianno (duettando) bbuono cu Ccaromecosta.]
PETAGNA 5: Spisso se facette repiglià ô munento d’’o tiro cunfermannose troppo bbatejo (lento). [Dô 46′ OSIMHEN [Caromecosta] 7: Cegna (grinta),tanta corza, tantu carattere e ppure ‘nu stuco (gol) ca però servette a ppoco. Peccato!
INSIGNE 6,5: Dette luce â delàntera cuana (attacco partenopeo)Ascette ô 41’ p’’a nicessità ‘e pruteggere ‘a trasera (difesa). Che peccato!
[Dô 41′ MALUCIT 6: Facette ‘o duvere suĵo a mmancina ‘int’ê ddoje epate (fasi).]
all. SPALLETTI 5: Nun priparaje bbuono ‘o sibbacco (match) sbaglianno furmazziona senza essere capace ‘e metterce ‘na pezza cagnanno quacche pedina. Sperammo ca nu succede a Ffirenze!
arb. KRUZLIAK 4 Nun ne ncarraje una, troppo ardurabbjo (fiscale) cu ‘e nuoste e ttroppo ‘e maneca larga cu ‘e russe, asasa (soprattutto)cu Umyarov(vo) ca se n’ascette cu ‘nu cartellino jalizzo (giallo), ‘mmece d’’o russo ca se mmeretava pe ccomme ô 48’ aizaje ‘a terra Caremecosta lanzato verzo â porta.
E fermammoce cca. È gghiuta cumm’è gghiuta e ppacienza…. Lassammo stà ‘a cuppetta iurupea e tturnammo a ppenzà ô campiunato dannoce appuntamento, si ‘o Cielo ‘o vvo’ llunnerì ca vene doppo d’’a nacchella (trasferta) ‘e dummeneca a Ffirenze. ‘E cchiú, ‘e cchiú, ‘e cchiú Ciuccio fa’ tu!
Staveti bbe’