E accussí, comme ‘o Cielo à vuluto ce simmo viste n’ ato anno e mmo ve pozzo cuntà chello ca succedette ajeressera a ll’ora ‘e cenà quanno ‘o Napule jette a rReggio Emilia, ma dô statio Mapei turnaje cu ‘na vranca ‘e mosche ‘mmano avenno perduto contro â scuatra ‘e culo’echiummo ‘ncignanno ‘na chiaveca ‘a tempurata (stagione) i ‘o campiunato ‘e Sarri, nun riuscenno a ttené ‘o passo d’’a lazzio, ‘e ll’Interre d’ ‘a Sampedoria e de nun saccio quant’ate ca ajere vincetteno; pe ffurtuna ca ajere ll’Udinese jette a tTorino a ffà ‘o mazzo â juve, a bbuffonno i â cummara soja! e ddicere ca ‘ncapo ‘e tre mminute ‘o Napule steva vincenno, ma po resistette justo ‘nu quarto d’ora e ppo se ‘mbrugliajeno ll’acque, ‘o Napule nun cercaje cchiú ‘a porta d’’o Sassuolo ca ‘mmece pe ttutto ‘o primmo ajone (tempo) ce pigliaje a ppallunate e ‘o Napule êtte ‘a ringrazzià a rReina si nun capitulaje. Cosa ca succedette a ll’arrancua (nella ripresa) e nun ce stette cchiú ttiempo e fforza p’adderezzà ‘o risultato. Conchiusione: è ssulamente fenuta ‘a primma jurnata e ggià troppi scuatre stanno ‘a cuollo a nnuje. Aggio paura ca pure chesta ch’è accumminciata, vene a essere ‘na tempurata (stagione) ‘e sufferenzia. È overo ca si Atene [Napule] chiagne, Sparta [juve] nun ride,ma nun se po’ ccampà ‘ncopp’ê disgrazzie ‘e ll’ate! Passammo ê ppaggelle:
REINA 7,5 – Nun ce putette fà niente né ‘ncopp’a Floro Flores, né ‘ncopp’a Ssansone, ma fraditanto facette ddoje eccezziunali pparate ‘ncopp’ a Ddefrello e n’ata ‘ncopp’ a nun me ricordo a cchi ca dimustrajeno ca se tratta ‘e ‘nu granne purtiere cu ttutto ‘e duje stuche (gol) pigliate!
MAGGIO 4 Nun ce simmo! Annante nun ‘ncarraje ‘nu cruzzo (cross) e arreto arruvinaje ‘a facenna cu ddoje frittate quanno se facette scappà a fFloro Flores(so) ‘ncopp’ô primmo stuco (gol) e quanno ‘mmece ‘e stregner, se perdette a sSansone ‘ncopp’ô siconno stuco (gol)E cche saciccio!
ALBIOL 5 – ‘A chiena i ‘a vacante; alicante e dde mestiere quacche cchiusura, ma po poco dicisione ‘ncopp’a Bberardi ‘nnaccasione ‘e ll’uno a uno. Po’ e à dda mmigliurà!
CHIRICHES 5 Ancòra a ccurto ‘e priparazziona avette spisso ausà ‘e mmaniere forte facennose ammuní pe ‘na falta (fallo) a mmità campo‘ncopp’a Defrello; meglio ‘ncopp’ê ppalle aute quanno facette valé ‘e centimetre suoje, ma a ppalla ‘nterra Defrello e Bberardi ‘o facetteno penà. Tutto summato ‘nu passo arreto pe ll’ecchese d’ ‘o Tottenhammo.
HYSAJ 5,5 Aveva fatto sapé ‘e preferí ‘o lato ‘e dritta, ma ‘a cundizziona murminga (precaria) ‘e Striniccio custringette Sarri a metterlo a mmancina addó se facette nutà ‘nu paro ‘e vote ‘ncopp’a Bberardi e cquanno se facette truvà ‘ncopp’â flubbanna (traiettoria) ‘e ‘nu tiro ‘e Politano.
DAVID LÓPEZ 5 – Tutte ce aspettavemo ‘e vedé Allanno ma Sarri ce facette ‘a surpresa ‘e mettere ‘o spagnuolo ca ‘ncapo ‘e ‘na dicina ‘e minute, quanno ggià se vinceva p’uno a zzero ‘nciampecaje dinto a ‘na palla ca Consigli ll’êva rijalato e perdette ‘na bbona accasiona. P’ ‘o riesto atalossa (prestazione) scarza ‘e sale e de cunnimma!
VALDIFIORI 5 M’aspettavo ‘e cchiú pecché dê piere suoje partetteno pochi pallune serie e sistimate;pe gghionta ‘e ruotelo fove troppo liggiero dint’ê cuntraste, nè se facette apprezzà crijanno juoco.
HAMSIK 6 Pur’ isso êsse avut’ ‘a fà ‘e cchiú; turnato dint’â pusizziona soja doppo tre mminute se facette truvà ô posto justo i ô mumento justo pe mettere dinto ‘o pallone ca ce purtaje ‘nvantaggio. Custretto pure a ddifennere, s’arrangiaje, ma cumplessivamente nun dètte chello ch’êsse pututo dà.
INSIGNE 5,5 Chello ca po’ ffà a ll’epata uffunziva (in fase offensiva) ‘o ssapimmo, ma à dda migliurà ll’epata difenziva (la fase difensiva); sinamparco (comunque) dô pere suojo partette ll’azziona d’’o vantaggio; ma po sparette a ppoco â vota e nun dètte cchiú nniente. (dô 73° EL KADDOURI 5,5 – Poca rrobba: ‘na ventina ‘e minute a ffà ‘o trecquartista,ma cacciaje pocu zuco: ‘nu pallone, largo, pe gGabbiadini e n’ato ‘nu poco meglio pe Caglieconno; troppo poco!)
MERTENS 4,5 – Facette poco e cquase nun se vedette pe bbona parta ‘e ll’antraffa (partita) e cullezziunaje sulo ‘nu tiro ‘e timmurría (punizione) ca sfresaje (sfiorò) ‘o sette. Jette ‘nu poco meglio a ll’arrancua (nella ripresa), ma nun cunchiudette niente; Sarri ‘o cagnaje troppo tarde e êsse fatto meglio a ffà ascí a isso ca ô Pipita! (da ll’80° CALLEJON 5,5 – N’ aggancio difficile ca se fósse mmeretata cchiú bbona sciorta, accussí comme ‘ diacunale ô finale d’antraffa(partita).Trasuto troppo tarde ‘e cchiú nun putette fà. )
HIGUAIN 5,5 – Forze nun tene ancòra ‘e nuvanta minute dint’ê ccosce, ma ‘o Napule nn ne po’ ffà a mmeno: dô pere suojo ‘e dritta partette ‘o tiro deviato ‘a Culo’echiummo ‘ncopp’ô pere ‘e Marekiaro ca signaje; doppo diece minute êsse pututo redubblà (raddoppiare) ma Consigli ce mettette ‘na pezza. Si sbattette assaje comme a ssempe e s’’a pigliaje cu arbitro e ttereno ‘e juoco. A ll’arrancua (nella ripresa), pruvaje a fà tutt’ isso, ma nun truvanno sponne adatte nun lle riuscette. (dô 63° GABBIADINI 5 – Sulo ‘nu pallone tirato d’epitumía (d’istinto) e ffenuto ‘mparaviso; troppo poco pe ddà ‘na scossa!)
Sarri 5 – Scuatra ancòra ‘ncantiere e sse vedette. Nun se capette pecché preferette a dDavid Lópezzo ô posto d’Allanno comme nun se capette ‘a sustituzzione d’’o Pipita e nno ‘e Mertenso ; me piacette ‘a difesa auta, ‘a scuatra corta,’a cegna (l’aggressività) i ‘o primmo quarto d’ora ‘e ll’antraffa (partita), ma po me deludette quanno ‘o ritmo s’avasciaje i ‘a manovra addivintaje cunfusa tanto ca â primma accasione ‘a scuatra facette pariggià a ll’avverzarie e ffenette quase pe nun ghiucà cchiú ‘o pallone e êtte ‘a ringrazzià a rReina si ggià ô primmo ajone (tempo) nun ghiette ‘nsotto! Cosa ca, comme v’aggiu ditto sfurtunatamente succedette a ll’arrancua (nella ripresa). Ora mo putimmo sulo dicere ca ‘a scuatra ave nicessità ‘e tiempo, ‘e cunfianza (di fiducia) e ‘e tanta, tanta fatica. Accussí sperammo.
ll’arbitro DOVERI 4,5 ‘E stima, trattannose ‘e carta canusciuta abbituato ‘ncampiunato o ‘ncoppa itaglia a trattà ‘na chiaveca ‘e scuatre meridiunale. E soprattutto pe nun avé vuluto vedé ‘nu ricore ‘ncuollo a Mmarekiaro ca ce avesse pututo mettere ‘ncopp’ô doje a zzero! Ma m’aspettavo pure ‘e pejo ‘a ‘stu guaglione, ‘mpiacato [nun se sape ‘e che] vulterrano ‘e trentaseje anne ca ajere siscaje a vvienetenne e doppo ca ll’emigliane facetteno cose ‘e curtellate senza ca isso vedesse, dicesse o facesse coccosa, tenette ‘a faccia ‘e cuorno ‘e caccià‘o primmo cartellino jalizzo (giallo) ‘nfaccia a ‘nu cuano! Cose ‘e pazze!
E ccu chesto ve saluto e cce sentimmo, si dDi’ vo’, llunnerí ca véne doppo d’’o debbutto casalinco contro â Sampedoria, speranno ca ‘e cuane se mettesseno ‘a maglia luvarda (azzurra) e nno ‘a divisa rossa d’ajere. E abbiammo a ffà corne!
R. Bracale Brak
