Ajeressera guagliú, vincenno cu ‘a scuatra d’ ‘e ppazzielle Preziosi, se facette ‘nu ‘mpurtante passo annante e nnne simmo tutte cuntente pure si ajere ‘o Napoli fuje custretto a ringrazià â Fiorentina p’ ‘a retissanta rimonta d’ ‘a scuatra viola contro ô Milàn(no) fermato ‘ncopp’ô doje addoje cosa ca cunzentette ô Napule cu ‘a vittoria d’ajere ‘e purtarse‘nvataggio ‘e quatto punte ‘a cuoll’â scuatra ‘e Galliani, cosa ca mo permette ê cuane ‘e jí a sfità â casa lloro ‘e diavule russe-e-nnire, a ssette jurnate dâ fine d’ ‘o campiunato cu ‘nu granne vantaggio psiculoggico mettenno quase ‘ncassaforte ‘a siconna pusizziona‘ncrassifica, visto ca doppo Milano me pare ca ‘a strata è tutta ‘ndiscesa. Passammo êppaggelle:
DE SANCTIS 6 Ma sulamente pecché a ll’urdemu mumento, p’apparà ‘na puttanata ‘e culo’echiummo, salvaje ‘a porta cu bbella pruntezza; p’ ‘o riesto nun fuje chiammato a ffà parate ‘mpurtante, ma se guadagnaje ‘a zuppa ‘ncopp’ a quacche cunchiusione ‘a fora, pure si, ô ssolito, nun sempe fuje priciso specialmente ‘int’â presa.
CAMPAGNARO 6,5 – Priciso ‘into a ògne ‘ntervento, nun cuncedette, dê pparte soje, quase niente a nnisciuno e spisso se sganciaje appressuranno e ffacenno ‘na bbona catena ‘e dritta ‘nzieme a mMaggio. A ll’arranqua se levaje‘o sfizzio ‘e ‘na spettacolare serpentina ‘nfra tre avverzarie.
CANNAVARO 5,5 Serata tranquilla: nun fuje chiammato a ffà ‘ostraordinario, anze lle riuscetteno dduje o tre bboni anticipazione ‘ncopp’ aImmobile, ma proprio ô finale se facette surprennere custrignenno a dDe Sanctisa ssalvà.
BRITOS 5 Ancòra nun ce simmo;ll’ècchese bulugnese fuje ‘a sola nota stunata d’ ‘a serata; braduso e appesantuto smarrunaje troppo ‘nfase ‘e ‘mpustazziona cunzentenno cchiú ‘e ‘narepartita(ripartenza) ô Genoa.
MAGGIO 6- Mo sí, mo no turnaje a ffarese apprezzà ‘ncopp’â curzia ‘e dritta, specialmente quanno riuscette a llibberarse dint’ô stritto. Ma à dda ancòra migliurà!
BEHRAMI 6,5 Atalossa tutta chizziglia( foga) ‘a soja senza maje piglià sciato. Cu ttutto ca fósse diffidato nun se facette cundizziunà e ce dètte dinto cu ccegna e ccazzimma ricuperanno pallune e ppallune e facenno‘o difenzore agghiuntato quanno ‘o Genoa pruvaje a ebbainà (ripartire). (dô 75° INLER 5,5 Tantu muvimento sí, ma pure quacche palla perduta)
DZEMAILI 7,5 Oramaje chi s’azzarda a tuccarlo? lLa mmiezo nun se ne po’ ffà a mmeno e ave voglia ‘e dicere ‘o ccuntrario Wallerettino Mazzarri, custretto( e nun le… piace) a cunziderarlo titulare!’O sguizzero s’ ‘a sbricaje a mmestiere ‘nfase ‘e trancara (contenimento) e dètte qualità ‘nfase ‘e plantamiento (impostazione). Accumpagnaje spisso ll’azzione e ne dètte ‘a cunferma cu ‘a rredda d’ ‘a sicurezza!
ARMERO 7 Appressuraje dô primmo a ll’urdemu minuto arrivanno sistematicamente ‘ncopp’â linia ‘e funno. Ora mo ‘ncopp’â curzia ‘e mancina cu ‘a ‘ntesa d’Armero cu mMarekiaro ca spisso lle détte ‘a justa picalopsa (sovrapposizione)‘o Napule po’ ddurmí suonne paciuse.
HAMSIK 7 Quanno decidette ‘e accumincià a gghiucà risultaje funnamentale p’ ‘o sviluppo d’ ‘a manovra. ‘Nfase ‘e plantamiento quase tutte ‘e pallune passajeno p’ ‘e piere suoje e fuje spettaculare didumanno (duettando)dint’ ô stritto cu Pandèv(vo). Rializzaje ‘a triricesima ajuda staggiunale e se procuraje ‘o sacrusanto ricore ca po Cavani sbagliaje. A chistu punto visto ca pure Marekiaro êva sbagliato ‘o ricore d’ ‘o fullé passato fósse ‘o caso ‘e vedé ‘e farle tirà a cquaccun’ ato!
Pandev 7,5 Comme scenneteno ‘ncampo i’ ‘o dicette súbbeto a ll’amice ‘e tribbuna –divano ca fósse stata ‘a serata soja: ‘o vedette ‘a comme se muveva ca ‘o vvuleva fà. Cumminfatte mettette dinto ‘o pallone ca sbluccaje ‘o risultato, ma ‘mpressiunaje soprattutto pe ccomme pruteggette ‘a palla ascennosene sempe ‘a padrone ‘mmiez’ô bburdello d’ ‘o traffico d’ ‘a trecquarte.Lanzaje ‘e cumpagne cu ‘nvenzione e gghiuoche ‘e pristiggio e ffacette addecrià quanno didummaje cu mMarekiare o cu cCavani. (dô 78° INSIGNE 6 Trasette súbbeto bbuono ‘int’ô juoco riuscenno a didummà cu ttutte ‘e cumpagne e lanzanno a cCavani cchiú ‘e ‘na vota.)
Cavani 5,5 Nun pozzo metterlo ‘ecchiú e me dispiace pe ll’amico Federico, ma nun lle pozzo perdunà ‘e avé sbagliato ‘o ricore e quacche ata accasione; ajeressera sotto porta nun fuje ‘a serata soja… Se facette cundizziunà dô ricore sbagliato, se facette piglià dê nierve e nun riuscette a scrivere ‘o nomme suĵo dint’ ô tabbellino vicino a cchille ‘e Pandev e Dzemaili. Peccato! Sperammo ca s’ è astipato quaccosa p’ ‘o fullé contro ô Milàn(no) pe ffà‘ntussecà a gGalliani e a Allegri.
Mazzarri 6,5 Pronti, via e ‘o Napule fuje padrone d’ ‘o campo; dint’â primma mez’ora ‘e fullé gara Pandèv(vo) e Marekiaro fujeno ‘e n’atu munno, mannanno ô manicomio‘a difesa d’ ‘e ppazzielle Preziosi. Comme dico ca me piacette ‘a dicisione azzeccata ‘e fà jucà a Armero accussí penso ca è sfarma soja si ‘o Napule nun po’ cuntà ‘ncopp’ a uno ca menasse certamente dinto ‘nu ricore; Ormaje s’è ccapito ca è isso, è Mazzarri ca nun ‘e ffa allenà a ttirarle nè ô zencariello, nè a mMarekiaro, ca pure ‘e sbaglia; ora mo visto ca nun ce ll’à ditto ‘o miereco ca ll’ànn’ ‘a tirà Cavani o Marekiaro,fósse ora caMazzarri facesse pruvà a quaccun’ato, quaccuno capace ‘e tirà ‘na cagliosa pesante, centrale e a mmez’aldezza accussì comme, quann’èrâmo guagliune, ce dicevano ca s’êva ‘a tirà‘o ricore, pecché si se sbaglia ‘o ricore quanno se sta vincenno pe ddoje azzero nun ‘mporta, ma si se sbaglia ‘ncopp’ô zzero a zzero o si se sta perdenno… allora so’ sacicce male arravugliate, so’ franfellicche pe ggente cu ‘o diabbete… I’ ‘e facesse tirà a pPandèv(vo) ca tecnicamente è ‘o meglio d’‘o mazzo!
arbitro BANTI 5 Vecchia cunuscenza e antica fetenzia, comme ô 99,9 pe cciento ‘e ll’arbitre taliane, ggià ati vvote ‘ncruciata dô Napule; ajeressera però nun ce facette gruosse tuorte tranne ‘nuparo: ‘na vota quanno ammunette pe ssimulazzione a cCampagnaro addó ca ‘o Toro era stato overamente stiso ‘nterra dint’â camma ‘e ricore mo nun mericordo ‘a qua’ delinquente d’ ‘e crifune, n’ata vota quanno sparagnaje ‘o siconno cartellino jalizzo a cchillu cesso ‘e Immobbile (scola juventina ‘e mariuliggio) ca pezzecato ‘na primma vota ‘nsimulazziona e ammunnito, tentaje‘na siconna vota e bBanti nzerraje ll’uocchie pe nnun ammunirlo ancòra e gghiettarlo fora!
E‘nchiudimmola cca ringrazzianno ‘sti guagliune p’ avé vinciuto n’atu fullé ‘mpurtante! Forza Napule, Ciuccio fa’ tu e ghienno a Milano,facce sunnà! Ce sentimmo.
R.BracaleBrak
