ilNapolista

Divisa bblu è jettatoria

I’ ancòra nun ce pozzo credere guagliú… Ca ajeressera se riuscette a ppariggià a rRoma contr’ô pappavallo ‘e Lotito purtannoce â casa ‘nu punticiello, io ancòra nun ce pozzo crederedoppo ca pe quase tutt’ ‘o fullé nun êva fatto quase niente e doppo ‘nu primmo aione senza zuco e senza sale ca facette scennere ‘o llatte ê denocchie a tutta ll’affullata tribuna divano e me facette mannà tante ‘e chelli ghiastemme a Wallerettino Mazzarri e a tutte ‘e priparature atletiche d’ ‘e cuane vedenno ‘a scuatra luvarda senza idee, ‘ndebbuluta, moscia ‘int’ê ccosse, senza forza, senza ggenio e senza cegna…, guagliune ch’êsseno avuto correre e ca ‘mmece cammenavano a ccurto ‘e sciato e de forze… tanto ca i’ penzaje: Vuo’ vedé ca chiste, pure pe chesta jettatoria divisa bblu ca s’ànnu miso ‘ncuollo, dimane me ‘ntossecano ‘e strangulaprievete ca m’à prumiso mia moglie?!
E che saciccio guagliú! Accussí nun po’ gghí; ‘na scuatra ca vencere chillu coso janco russo e vverde nun se po’ permettere ‘o lusso ‘e jettà ‘e primme quarantacinche minute ‘e ‘nu fullé… E mMazzarri can un ‘o vvo’ capí!Eppure s’à dda fa capace ca ce sta tanto ‘a curreggere nsi’ â fine d’ ‘a tempurata.Pe ffurtuna ca santu Campagnaro adderezzaje ‘o fullé…. , ma sinamparco (comunque) me rummanette ‘nu poco ‘amaro ‘mpont’ô musso pecché êvo sperato ca a rRoma se vincesse pe tené ‘o passo d’ ‘a rubbentus(sa) ca, pe pparta soje mmerz’ê sseje êva fatto uno muorzo d’ ‘a Fiorentina allunganno ‘ncopp’ô Ciuccio ca mo sta a meno cinche. Ma jette comme jette e cchiú ‘e ‘nu pareggio nun ne cacciajemo e cuntentammece: p’ ‘o mumento stammo tenenno ‘a pusizziona e… nun è ppoco. Passammo ê ppaggelle va’:
DE SANCTIS 4,5 Ô primmo aione cu dduje ‘ntervente salvaje ‘e suoje dâ siconna rredda; putette fa assaje poco ‘ncopp’ô tentativo ‘a vicino ‘e Floccari ca, lassato sulo sulo ‘a Cannavaro, avette tutto ll’aggio ‘e aggancià ‘a palla, mirà e piazzà ‘o colpo.S’ammeretaje ‘o quatto e mmiezo ca ll’aggiu miso pe ‘nu paro asciute a vvacante e p’ ‘e ssolite rimesse, cu ‘e mmane o cu ‘e piede a scampule ‘e cape ‘e sacicce…
CAMPAGNARO 7,5 Regalaje ê suoje ‘o pareggio cu ‘na granna ggirata ‘e primma. Ma nun facette sulo chesto; fuje prutagunista ‘e n’atalossa d’auta nivella. Sbrugliaje cchiú ‘e ‘na situazziona complicata;salvaje ‘ncopp’â linia doppo n’asciuta a vvacante ‘e De Sanctis e doppo ca ‘a Lazzio passaje ‘nvantaggio s’aizaje mettennose a ffà ll’esterno p’appressurà cu dicisione.
CANNAVARO 4,5 ‘Ncopp’â rredda ‘e Floccari se facette truvà fora pusizziona lassannolo cumpletamente libbero e ffranco ‘e fà chello ch’êsse vuluto! ‘A nun credere ‘a bacunza (il pasticcio) ca cunzentette a lLulic ‘e puterse lanzà verzo ‘a porta ‘e De Sanctis. se perdette ‘e vista a fFloccari pure ô finale e ‘o travesagno salvaje ‘o Napule dâ scunfitta.
GAMBERINI 5 Malamente soprattutto ô primmo aione quanno . ‘a Lazzio sfunnaje spisso dê pparte soje, mentre ‘ncopp’â rredda lazziale rummanette tagliato fora custretto a allargarse dàtose ca Zuniga s’era attardato ‘ncopp’â repartita (sulla ripartenza) a ccogliere margarite ‘e contratiempo.
MESTO 5 Arrivaje spisso a ffunno campo, ma senza maje riuscí a mmettere ‘mmiezo pallune decente; dint’ô stritto nun fuje capace ‘e truvà lóse (soluzioni) adatte e risultaje assaje molto ‘mpriciso. ( dô 54° EL KADDOURI 6 – ‘A perzunalità nun lle manca, e ‘o dimustraje appena trasuto cercanno ‘o mestizzo ( l’incrocio) d’’e pale. Quacche bbona cumbinaziona, ma poco ato però.)
BEHRAMI 6 Ô ssolito ce mettette cegna e sustanza, pure si sufferette particularmente ‘a pusizzion scamosa (ibrida) ‘e Hernanès(so) e spisso currette a vvacante. Pruvaje a mmeterse contro â straurdinaria pressione (pressing) avverzaria, ma s’êtt’ ‘a arrennere pe bbia ‘e n’accediente (per infortunio) e sperammo ca nun fósse ‘mpurtante!
(dô 47° INSIGNE 7 Nun priciso p’ ‘e bbassurere (suggerimenti), ma riuscette a smovere ‘e suoje cu scatte ‘mpruvvise ca lassajeno ferme ‘e lazziale spisso custrette â falta (al fallo) oppure a guardarlo correre. Che peccato tenerlo ‘mpanca pe quarantacinche minute! Chisto à dda jucà dô pprincipio: ‘o Napule cu isso è n’ata cosa.)
INLER 6 ‘A chiena e ‘a vacante, croce e delizzia.Pe paricchiu tiempo nun se vedette e nun sentette, po, asciuto Behrami, addivintaje l’unico centrocampista ‘e ruolo ‘ncampo; s’ ‘a cavaje bbuono ‘nfase ‘e cuntrasto (d’interdizione) ma sbagliaje troppi bbassurere (suggerimenti).Quase signaje cu ‘nu tiro ‘a fora: Marchetti tuccaje chellu ppoco ca servette pe mannà ‘a palla ‘ncopp’ô travesagno.
ZUNIGA 5 Aizaje troppa porvera e durante ô primmo aione cuncedette spisso troppu campo a Konko comme quanno attardatose ‘ncopp’â repartita (sulla ripartenza) a ccogliere margarite ‘e contratiempo lle détte ll’aggio ‘e centrà ll’ajuda pe Floccari ca, lassato sulo dô capitano cuano, mettette ‘mporta.A ll’arranqua (nella ripresa) nun riuscette a ffà meglio. (dô 79° CALAIÒ sv)
HAMSIK 7 Fuje ll’unico ca riuscette a salvarse dâ ‘ncredibbile pressiona d’ ‘a scuatra lazziale e a fà dissarrullà (sviluppare) ‘a manovra. Quanno s’avasciaje ‘ncopp’â linia d’ ‘a mediana mettennose a ffianco ‘e Inlèr(ro) ‘a scuatra addiventaje cchiú urdinata riuscenno a stuppà ‘a Lazzio dint’â mità ccampo soja..
PANDEV 5,5 M’aspettavo ‘e meglio! Emuzziunato ajeressera spalle â porta nun riuscette a ffà saglí ‘a sccuatra fare il lavoro necessario per far salire la squadra e dissarrullà (sviluppare) ‘a manovra e tutte ne resentetteno.Sott’ô nuvantesimo se ‘ntennette meglio cu ‘e cumpagne, ma troppo tarde! Avette pure ‘a palla pe vvencere ma Marchetti s’allungaje e riuscette a alluntanà.Pe ghionta ‘e ruotolo Orsato lle necaje uno d’ ‘e duje ricore ca nun vulette vedé…
CAVANI 6 ‘E stima, ma nun fuje dicisivo comme speraje; ‘a Lazzio nun lle dètte ‘o spazzio nicessario, ma fuje pure sfurtunato quanno cu ‘na preputente capata cercaje ‘a porta, ma cugliette ‘o travesagno…
MAZZARRI 5 Sbagliaje a lleggere ‘o fullé e soprattutto ll’anfocua (l’approccio): ‘o Napule restaje a guardà p’allimmeno vinticinche minute e isso nun se ‘nventaje niente pe metterce ‘na pezza e ffuje bbona sciorta si ‘a Lazzio nun nchiudette ‘o primmo aione ‘ncopp’ô doje a zzero. ‘O fatt’è , comme aggiu ditto ô pprincipio ca ‘a scuatra scennette ‘ncampo senza cegna e quase rassignata doppo d’avé visto ‘a passiata d’ ‘a juventússa contr’â Fiorentina.Dinto â malasciorta fuje furtunato; custretto ‘a ll’accidente capitato a Behrami a ccagnà se decidette a ffà trasí a Insigne ca se fósse mmeretato ‘e jucà dô pprincipio. Quanno vedette ‘o caso cumprumesso se decidette a tentà ‘o tutto pe ttutto mettemmo a cCalaiò pe ‘nu finale a cquattro pónte – più Hamsik ed El Kaddouri – e comme ‘o Cielo vulette se riuscette a afferrà ‘o pareggio ca nun fuje acqua ca leva séte, ma sempe meglio ‘e ‘nu caucio ‘nculo è!Ma nun v’annasconno ca ajeressera ‘o juoco d’ ‘a scuatra fuje assaje scarzo e ccomme quanno se vence è ppure fodda (merito) d’ ‘o trainèr(ro) accussí quanno nun se vence è pure sfarma (demerito) suĵo!
Arbitro ORSATO 4, 5 Chesta meza cazetta teneva cchiú ‘e debbeto cu ‘o Napule e ajeressera mmece ‘e se ne levà quaccuno aumentaje ‘a ddosa soprattutto quanno nun vulette vedé dduje ricure a ffavore d’ ‘e cuane ‘na vota pe falta ‘ncuollo a pandev(vo) e súbbeto doppo, pe n’ata falta ‘ncuollo –me pare, si nun me sbaglio – a mMesto;carta canusciuta cuncedette ê cammurriste, delinquente lazziale ‘e vattere sistematicamente ê cuane senza mettere lengua e pprima ‘e tirà fora ‘nu cartellino jalizzo ce penzaje mez’ora e ppo… nun ‘o tiraje!
E nchiudimmola cca accuntentannoce ‘e ‘stu punticiello e ringrazziammo ô Cielo visto stammo ancóra ‘e casa ê piane avete visto ca âmmu tenuto luntano ‘a cuncurrenza e sperammo ca ogge chille ca ce stanno addereto nun gghiesseno assaje meglio ‘e nuje.
Bbona salute e – si dDi’ vo’ – ce sentimmo n’ata vota!
Staveti be’!
R.Bracale Brak

ilnapolista © riproduzione riservata