E ppure chesta êv’ ‘a vedé: ‘a sderrata (sconfitta) casalinca d’ ‘o Napule. E purtroppo ‘a vedette… ajeressera! E te futte, te futte si ‘o Napule êsse perzo cu ‘na scuatra blasunata e ‘mpurtante e ‘mmece cu chi jette a pperdere? Cu ‘a scuatra bulognese ca primma d’ ajeressera luttava pe nun retrocetere e ca, ànno voglio ‘e dicere, pe mme nun va seje sorde â parte ‘o ggruosso. E è proprio chisto ‘o scuorno cchiú fforte: ll’avé perzo cu ‘na scuatra ‘e seje sorde addó ca vincenno (e s’êsse pututo vencere!) êssemo pututo zumpà ‘a cuollo a ll’Interre e pigliarce chillu famoso siconno posto ca mo comme a mmo è ‘o mmassimo ca ‘o Napule se po’ permettere… e ‘mmece, ‘mmece addirittura perdettemo sciulianno ô terzo posto ‘nzieme ô pappavallo ‘e Lotito e nun se sape ‘e quanto âmm’ ‘a sciulià ancòra cchiú sotto.
Ma comme fuje pussibbile ca succedette chello ca succedette ajere ô san Paolo? E chi ‘o ssape! Forze ‘o ssanno Wallerettino Erode Mazzarri e De Chiacchiaroniis… I’ saccio sulo ca vedette ‘nu Napule cu ‘na difesa ca abballaje malamente, cu dduje esterne ca è mmeglio nun parlarne, cu ‘nu centrocampo addó Marekiaro fuje latitante pe tutt’ ‘o fullé e cu n’attacco ca sprecaje cchiú ‘e ‘na cosa! ‘Nzomma ‘nu Napule ca me ‘ntussecaje ‘a serata cu ‘nu primmo aione e ‘nu finale ‘e rencontra ca è ddifficile truvarne n’ato pejo. I’ dico ca, cu ‘o Napule visto ajeressera, Biguncino, Mazzarri e De Chiacchiaroniis, a gennajo êssen’ ‘a correre cu ‘e vrache ‘mmano a vvedé ‘e accattà tre o quatto jucature, pe vedé ‘e adderezzà ‘a varca ‘e ‘sta tempurata… e ‘mmece, ‘mmece chiste pare ca vonno vennere e nno accattà. Cosa ‘e pazze! E sse sape! De Chiacchiaroniis cu ‘o fatto ca à dda apparà ‘e ‘mpicce e ‘e diebbete d’ ‘a Filmauro e Mazzarri cu ‘a scusa ca accattanno ggente nova se rompe ll’equilibbrio d’ ‘o spugliatojo nce vonno fà magnà ‘o pesce fritto cu ll’acqua e se ne fottono ‘e chello ca se rompe a nnuje!
Passammo ê ppaggelle e v’ avviso ca è inutile ca dicite ca so’ stritto ‘e pietto…pecché nun m’ ‘a sento proprio d’essere largo ‘e maneca!Sto’ troppo ‘ntussecato.
DE SANCTIS 4,5 Forze tenette a ggalla ‘e suoje verzo â fine d’ ‘o primmo aione quanno Diamanti nun ‘a piazzaje angulata a mmestiere;p ‘’o riesto ‘e solite difiette suĵe: chillo ‘e nun ascí (comme capitaje ô mumento d’ ‘a primma rredda d’ ‘e murtadelle), chillo ‘e nun sapé cuntrullà ‘a camma piccerella,e cchillo ‘e nun sapé puggià (rilanciare) cu ‘e piere.
GAMBERINI 6+ Pecché signaje e pecche fuje diciso quanno avett’ ‘a cuntrastà, attiento ‘nfase ‘e puggia. Però pure isso risentette ‘nu poco d’ ‘o sbannamento d’ ‘e suoje ô primmo aione; ô principio ‘e ll’arranqua signaje comme a n’artigliero ‘e camma; êtt’ ‘a ascirsene pe n’accidente (infortunio) ( dô 66° CAMPAGNARO 5 forze so’ avastate chilli poche fullé ca è rummaso a gguardà, pe nun se ‘ntennere cchiú cu Cannavaro ‘nfase ‘e marcatura; o ggià sta cu ‘a capa a n’ata parta, visto ca quase certamente ô prazzo (fine) d’ ‘a tempurata ‘o perdimmo).
CANNAVARO 4 Ironia d’ ‘o destino: se truvaje ‘e fronte a Portanova,turnato p’ ‘a primma vota ‘ncapo doppo d’ ‘a scualifica pe calcioscummesse, scualifica ca quase certamente mo ll’arriva pure a isso; ‘o capitano d’ ‘e cuane se perdette chillu bulugnese ‘o mumento d’ ‘a terza rredda d’ ‘e murtadelle, chella ca mettette ‘a lapide ‘ncopp’â fossa cuana;p’ ‘o riesto nun détte ‘na mana nè a dritta, nè a mmancina e puggiaje pallune a vienetenne; troppo scuraggiato ‘e chello ca lle sta pe ‘ntravení nun êsse avuto proprio jucà dànno spazzio a Fernandez(o), ma Mazzarri ‘a ‘sta recchia nun ce sente!
BRITOS 5 Braduso,nun riuscette a recuperà doppo ca era avanzato ‘nfase uffenziva pe dà mana forte â manovra e pirciò nun fuje capace ‘e cuntrastà a gGabbiadini ô mumento d’ ‘a primma rredda d’ ‘e murtadelle (46° PANDEV 6Accumminciaje ‘na bbona arranqua,e forze fuje ‘nu caso, ma ‘o Napule truvaje súbbeto ‘o pareggio: currette, difennette palla e ‘nventaje; ma soprattutto dètte ‘na mana a saccudià (scuotere) ‘e suoje; peccato ca nun avastaje ).
MAGGIO 4,5 Nun m’ ‘o facite vedé cchiú! Oramaje pur’ isso è n’ècchese jucatore; corre sulo, ma nun è crestiano né ‘e ‘ncarrà ‘nu cruzzo decente, né ‘e farese truvà a ll’appuntamento pe metterla dinto; nun parlammo po ‘e difennere, cumpletamente nijato; ‘o cruzzo d’ ‘o vantaggio bulugnese arrivaje dâ curzia ‘e cumpetenza soja; a ll’arranqua, passate cu ‘a difesa a cquatte, se tiraje ‘a pizza sotto e nun dètte cchiú manco tanto ‘e mana!
BEHRAMI 6+ Cu ‘stu punteggio faccio n’accezzione p’ ‘o svizzero e me scordo ca ô finale nun cuntrastaje a mmestiere a Kone ca facette ‘nu miraculo ca però ce vulesse stà ancòra quanno ‘o fa n’ata vota!… Ll’accezzione fatta è pe premiarlo d’ ‘a solita generosità a tutto campo, pure si ‘a troppa cegna lle facette abbuscà ‘nu cartellino jalizzo ca s’êsse pututo sparagnà!
INLER 5,5 – Se truvaje a avé a cche ffà cu ‘na scuatra cumpattata,’ntruppecosa comme a ‘a cozzeca ‘e Taranto, difficile ‘a scuzzecà,‘na scuatra cumpattata ca nun cuncedette ô turco-napulitano ‘o spazzio nicessario pe ddà ê cumpagne suje pallune ‘nteressante;s’êtte ‘a accuntentà ‘e dà ‘na mana a bBehrami a ffà ‘o cane ‘e presa, tentanno cca e lla quacche ttiro ‘mporta, ma fora mesura.
ZUNIGA 5 ‘E ssolite inutili garabbate ‘ncopp’â fascia ‘e mancina, ma tutto senza zuco e senza sale. Ll’unica cosa bbona ca facette fuje ‘na rimessa laterale tassosa ca mettette ‘mmuvimento a Insigne.
HAMSIK 4,5 Oramaje me songo abbituato a vederlo ‘e jucà sí e nno ‘nu quarto d’ ora a ffullé,e quacche vvota risolvere ‘a facenna cu chillu quarto d’ora; ma ajeressera avette voglia d’aspettarlo! Marekiaro nun ce stette; cu ttutto ca fuje libbero ‘e moverse ‘nfra ê llinie nun fuje crestiano ‘e verticalizzà o dà tassezza (velocità) â azziona e addirittura cchiú ‘e ‘na vota fallette ll’urdemu facile pasiglio(passaggio) e nun capitalizzaje a dduvere ‘a pussibbilità d’’o pareggio ô 20° d’’o primmo aione!Mazzarri ll’êss’ ‘a tirà ‘e rrecchie!
INSIGNE 6+ Ô primmo aione Lorenzigno fuje ll’unico ca facette vedé quaccosa ‘e bbuono, pure si dô guagliunciello m’aspetto sempe quaccosa ‘e cchiú specie tiranno ‘mporta; a ll’arranqua fuje ancòra isso ca cercaje ‘e levà ‘e ccastagne dô ffuoco apprimma ‘nventannose ‘o pasiglio esatto pe mannà a rredda a gGamberini e ppo pittanno ‘o cruzzo p’ ‘a capa ‘e Cavani ca ce facette vedé ‘a luna dint’ô puzzo cu ‘a rredda d’ ‘o ddoje a uno! Mazzari fuje custretto a farlo ascí pechhé ‘o guaglione zuppechiava. Peccato. ( dô71° DZEMAILI sv).
CAVANI 6 Ma sulo pecché signaje, ma forze nun se ll’ammeretasse ‘o seje pecché pure ajere, comme a ‘nu paro ‘e fullé a ‘sta parta, pare ca nun è cchiú isso… Forze è pecché dô Matadòr, ògne vvota ca tocca palla uno s’aspetta sempe tricchitracche e bbotte a mmuro, cosa ca ajere le riuscette ‘na grama vota, quanno piglianno ‘o tiempo a cCherubin(no) riuscette a ‘ncurnà ‘o pallone d’ ‘a rredda d’ ‘o ddoje a uno. Ati vvote o sprecaje ‘o tiro cercanno ‘a suluzziona spettaculare o se facette ipnutizzà da Agliardi. MAZZARRI 4 N’ato allenatore meno ufano (presuntuoso) forze êsse pututo aspettarese ‘e difficultà ca certamente lle criave ‘a scuatra ‘e Pioli e êsse sturiate quacche contromossa bbona pe nun farese bbluccà addó nasce ‘o juoco e êsse miso ‘ncampo ggià dô principio ‘na difesa a cquatto sciglienno ‘e jucà cu ‘nu quatto tre e ttre; ma chi t’ ‘o dà? Avettem’ ‘a suffrí pe tutto n’aione primma ca se decidesse a cagnà quaccosa cu ‘a difesa a cquatto e chiammanno ‘ncampo pure a Pandev(vo) cosa ca servette a ffà cagnà súbbeto faccia â scuatra cuana ca però facette vedé ‘e solite prubbleme ‘ncopp’ê ppalle fremme e cchiú ‘ngenerale ‘na mullezza, ‘na mancanza ‘e ggenio e de cegna, pe nun dicere ‘e ll’afelitezza (ingenuità) ‘ndifesa e sotto porta lloro.Dicimmo pure ca fuje crezzo (merito) d’ ‘o bBologna ca nun mullaje maje, ma dammo pure a Mazzarri ‘e sfarme(colpe) ca tène isso pecché rencontre comme a cchelle d’ajeressera nun se jettano comme ‘mmece facettono ‘e cuane cu Mazzarri ‘ntesta ca nun saccio pecché se ‘nfessisce cu motule sballate e cu ggente spumpata o fenuta.Cumplimente però pecché s’era accattato ‘nu ruilorgio nuiovo e ògne ttante ‘o faccete vedé… Certo si è ca pure ajere âmmu perduto n’ata accasione e n’ata litturina ca nun nun penzo ca passa cchiú!
l’arbitro VALERI 4 Nun me piace!Niente ‘e particulare, ma ‘stu libbero prufessiunista (ma nun se sape ‘e che…) rumano ca siscaje sempe, pe partito pigliato, contro ô Napule caputianno ‘e ffalte (i falli) nun ce porta bbuono, pure si ajere (forze pe farse perdunà quacche fetenzia ca ce facette p’ ‘o ppassato) annullaje ‘na rredda reculare ‘e Gilardino! Ma a nnuje ‘sti favure nun ce servono e nun ‘e vulimmo!
E fermammoce cca; è mmeglio ca me stongo zitto, ca si mme scappano ‘e cavalle alliscio quacche ttre pesante. Si dDi’ vo’ ce sentimmo ggioverí ca vene p’ ‘o fullé d’’a C.I. e sperammo po ca dummeneca se turnasse ‘a Siena cu ‘e tre punnte dint’â sacca… ca fósse pure ora ca ‘o Napule turnasse a vvencere! Staveti bbe’.
R.Bracale Brak
