Mazzarri quattro: 6 ‘o primmo tempo, poi merita 2

Che peccato guagliú, che peccato! Ajere ‘na partita ca pe tre cquarte era stata quase cu ‘e sciocche (perfetta),fuje arruvinata da cchiú ‘e ‘na puttanata ‘e ‘nu jucatore ca bbello e bbuono perdette ‘a scienza… e da ccierti dicisione ‘e ll’arbitro, ca po ve dico! Che peccato guagliú, che peccato… pecché,’o Napule doppo ca era riuscito a mmetterse ‘nvantaggio, si ô primmo tempo appena appena avesse avuto ‘nu poco ‘e curaggio ‘e cchiú forze avesse pututo pure radduppià…e ‘nchiudere ‘a facenna. E ‘mmece doppo ‘nu bbuonu primmo tempo ‘o Napule s’ammusciaje, Mazzarri ce mettette ‘a terza ritardanno ‘o sbaglianno ‘e cagne,e comme ve dicevo ll’arbitro ce mettette ‘o ssujo: chillu ricore dato ê russe d’ ‘o Liverpullo,cca ‘int’ô Stivale nun ll’avessero maje dato (o ll’avessero dato sulo si se fosse trattato ‘e ffà ‘nu favore â juventussa) e anze fosse stato ammunito pe simulazzione chillu jucatore d’ ‘o Liverpullo,ca appena appena guardato stuorto ‘a Aronica se menaje ‘nterra manco si avesse avuto ‘na curtellata sott’â panza! Pe nun dicere ‘e tutte ‘e mmazzate e ‘e vuttate cunzistente ‘e ll’attaccante d’ ‘o Liverpullo a rrammaggio (danno) d’ ‘e difenzure napulitane…’O fatto è ca ‘e jucature ttaliane (nutoriamente ‘mbrugliune…) nun piaceno ê francise; figurammoce si lle ponno maje piacé ‘e napulitane ca portano ‘a mala annummenata d’essere ‘e cchiú fetiente ‘nfra ‘e taliane!
Peffino ‘o telecrunista taliano ‘e Retequattro (a cquanno se dice, ‘a televisione d’ ‘e festine..) nun me parette ca facesse ‘o tifo p’ ‘o Napule…, anze!
Turnanno ô Napule pozzo dicere ca songo tutte, trainerro e ghiucature, ancòra troppo guagliune ca mo stanno ascenno ‘a sott’ ô mantesino e ca ànn’ ‘a crescere e ànno ‘a caccià ‘e pecune…pe ccuje p’ ‘o mumento ce âmm’ ‘a zucarce ‘a caramella! Sperammo ‘e levarce ‘e pacchere ‘a faccia dummeneca cu ‘o Parma: ‘o campiunato è cchiú ‘mpurtante d’’a facenna europea! E venimmo â paggella:

DE SANCTIS: 5,5 Me parette ‘nzerata; facette quase tutto ‘o pussibbile…, ma ‘o fatt’ è ca a nnuje ce serve chi fa ‘e miracule e isso ne facette sí e nno miezo ‘ncopp’ a ‘nu tiro appressato (ravvicinato) ‘e Ngoggo; avesse pututo fà coccosa ‘e cchiú ‘ncopp’ ô passaggio arreto ‘e Dossena, ascenno cu ‘e mmane(beneditto guaglione faje ‘o purtiere o no?)e ‘mmece se futtette ‘e paura pure pecché Gerrardo trasette alla sango’echit’èmmuortot’aggi’’ascassàtuttochellocatienesano! Comme pure De Sanctis (ca è mmeglio si se leva ‘a cuollo e nun se mette cchiú chella jettatoria divisa blu-savoia e se mette chella verde-speranza) avesse pututo fà coccosa ‘e cchiú ‘ncopp’ ô pallunetto d’ ‘o tre a uno e si avesse tenuto ‘nu poco ‘e bbona sciorta avesse pututo pure fermà ‘o ricore d’ ‘o doje a uno sempe ‘e chillu demmonio ‘e Gerrardo. Si,si,si…, troppi si (se) e a nnuje ce serve ‘nu purtiere ca dà certezze, no ‘nu guardaporta ca scopa ‘androne e appiccia ‘e citofone!
CAMPAGNARO: 6-. A dritta d’ ‘e tre d’ ‘a difesa se sentette a pposto e riuscette a difennere a smesturà (spingere) comme sape. Addimannaje n’ammunizzione pe ll’avversario e ll’avette, ma – cose ‘e ll’atu munno! – se ll’abbuscaje pur’isso p’averla dimannata!
CANNAVARO: 5,5.Durante ô primmo tempo s’ ‘a cavaje bastantamente custringenno a Ngoggo a ccagnà strata pe scanzarlo. Peccato ca sbracaje durante ô siconno tempo, turnanno a essere ‘o solito culo’echiummo ca sapimmo, sbaglianno ll’intera reggia d’ ‘a difesa tanto è vvero ca quanno Dossena steva jenno dint’ê chiavette cu cchillu pallone ‘mmiez’ê piede, ll’avesse avuto ‘a alluccà: Jettalo â via ‘e fora, ‘ncalcio d’ancolo o ‘nfallo laterale ‘mmece culo’echiummo se facette ‘e fatte suje e chillo, Dossena passaje arreto ‘o pallone e Gerrardo n’apprufittaje e facette uno a uno. Ancòra culo’echiummo nun ‘ncarraje ‘nu rilance verzo ll’esterne sbalanzannole tutte quante!
ARONICA: 6- Fino a cquanno ô siconno tempo nun succedette ‘o ‘mpiccio d’ ‘o ricore recalato ‘a ll’arbitro ô Liverpullo, fuje comme a ‘nu vasolo ‘nzapunato addó sciuliajeno ‘e ‘ngrese custrette a ffà marcia arreto. Tene però ‘a colpa ca a ll’età soja nun capette addó puntavano tutt’ ‘e manfrine d’ ‘o Liverpullo e se facette cartià ‘a Jonsonno e ‘a ll’arbitro comme a ‘nu nuvellino!
MAGGIO: 5-.Meglio comme difenzore cu ccierte azzeccate e pricise diagunale e capate pe libberà l’area.Nun riuscette maje però a rradduppià ‘ndifesa e annante nun se vedette quase maje! Nun è ancòra isso!S’à dda vedé che s’à dda fà cu chisto!
PAZIENZA: 7.Nun saccio che ato avesse avut’ ‘a fà Michelino: passione e fermezza e quante, quanti pallune ricuperate. Fino a cche nun trasette chillu diavulo ‘e Gerrardo,spezzaje qualunqua ‘ntàpeca (trama) avverzaria e ‘mbastette ‘e primme punte d’ ‘e ripartenze.
GARGANO: 5. Abbastanza bbuono ô primmo tempo; currette luttaje senza sbaglià troppi passagge; sbracaje ô siconno tempo, cercanno pure ‘e fermà o limità a Gerrardo. Ma nun fuje arta soja! Pe bbluccà a chillu diavulo ‘e Gerrardo,ajere ssera, nce fosse vuluto ‘nu cane ‘e presa comme ‘a bonanema ‘e Girardo. Ma ‘o Napule tène sulo a Grava e pe gghionta ‘e ruotolo Mazzarri s’ ‘o sparagnaje!
DOSSENA: 4 Abbastanza bbuono ô primmo tempo: urdinato senza strafà e sempe puntuale seguitanno ll’azzione d’ ‘e cumpagne,ma ‘e crosse ca facette fujeno acqua turriacale e nun servettero! Ô siconno tempo po facette ddoje puttanate esaggerate:’nu passaggio arreto ‘a metterlo ddoje dete ‘ncanna ca ce custaje ll’uno a uno e n’ata fessaria cchiú grossa perdette ‘na palla periculosa e recalannola a Gerrardo ca ‘un se facette prià e p’ ‘a terza vota futtette a De Sanctísso!
HAMSIK: 4,5.Nun cucludette ‘o riesto ‘e niente!Nun se po’ fà jucà a uno aspettanno ca dinto a nuvanta minute te ‘ncarra una jucata bbona o ca te segna ‘nu ricore (si t’ ‘o danno e cquanno t’ ‘o danno!)! E ajere nun facette o succedette manco chesto! ‘O vedette sulamente ca aizava póvera e nun le riuscette maje ‘e serví ‘e cumpagne ‘mprufunnità o ‘e farse truvà pronto pe cuncludere! Si quaccuno d’ ‘o Manchesterro ‘o venette a vedé ajere, penzo proprio ca nun se ll’accattano cchiú. E ddicere ca Reja aveva ditto ca Marekiaro era ‘a controfijura ‘e Gerrardo! Seh! N’atu vullo e ppo se coce!
Da ll’83° YEBDA: sv. Pochissime minuti, ma senza zuco e sale!
LAVEZZI: 7,5. Fuje ll’unicu punto ‘e riferimento d’ ‘o Napule pe tutt’ ‘a partita. Forze esaggeraje a ccierti mumente a purtà ‘a palla, ma fuje l’unicu vero uosso tuosto p’ ‘a difesa d’ ‘o Liverpullo.Se capette â perfezzione cu Cavani ô mumento d’ ‘o gollo d’ ‘o vantaggio ca illudette e facette sunnà ‘e tifuse napulitane!
CAVANI: 5,5. M’aspettavo ‘e cchiú. Se piazzaje assaje largo a mancina quase a lassà ‘o Pocho a ggiustrà comme primma ponta. fine risultaje sí utile tatticamente,ma cumpletamente assente ‘nzona-gollo!
MAZZARRI: 4 (media ‘e 6 + 2).Fuje pure merito sujo ‘a grossa perzunalità d’’o Napule d’ ‘o primmo tempo ‘ncasa d’ ‘o blasunato Liverpullo, e pirciò 6: ‘e guagliune suje affruntarono cumminfatte ‘e faccia e senza paure ‘e Russe e resistettero sino a quanno nun trasette chillu demmonio scatenato ‘e Gerrardo. D’accordo, ‘e golle pigliate dô Napule sarranno state pure circustanze sfurtunate,ma isso aveva capí subbeto ca ô siconno tempo fosse cagnata ‘a museca e ca trasenno Gerrardo ll’êva piazzà ‘nu francobbollo ‘ncuollo sulo pe isso, facenno subbeto quacche sustituzzione (Maggio, Marekiaro e Dossena) e menanno subbeto dinto a Ggrava, a Sosa e a Yebdà, senza aspettà ll’urdimi minute quanno ggià era stata fatta ‘a frittata e nun ce stevano cchiú fose ‘a appennere!E pe ttutto chesto s’ammereta 2; e ‘a media ca risulta (me dispiace pe isso!) è cquatto! Pe gghí a vvencere ‘ncopp’ a ‘nu campo comme a cchillo d’ ‘o Liverpullo ce vo’ pratteca, ‘sperienzia e cumpetenza e ce vo’ tiempo giacché tutte ‘e napulitane, trainerro e ghiucature songo ancòra troppo acievere!

l’arbitro FAUTREL 4 Guappo, capuzziello e capallerta facette ‘a carta ‘e tre cu ‘e napulitane scutulianno cartelline ialenizze (gialle) e stanno chiaramente ‘nzuggezzione murale cu ‘e russe d’ ‘o Liverpullo lle facette fà ‘o commeto lloro e nun le parette overo ‘e puté siscà ‘o ricore contro ô Napule quanno Aronica guardaje stuorto a Jonsonno ca se menaje ‘nterra facenno ‘a sceneggiata, e so’ ssicuro ca si – pe ccaso – Gerrardo ll’êsse sbagliato,isso ce ll’êsse fatto ripetere! Comm’è gghiuta, è gghiuta! Chi à avuto à avuto, chi à dato à dato, scurdammoce ‘o ppassato e penzammo ô Parma e – caso maje – a distanzià ‘a juventussa,
ca ll’ànn’ ‘a accidere!

ilnapolista © riproduzione riservata