Klose, forte, putente, curaggiuso, da Napule

Inghilterra – Germania. È fernuta comme sapimmo cu ‘e terische c’annu mannato â casa (cu tutt’ ‘a joja mia) a Capello e a ‘e suoje , e tutte ‘e pennarule (pure ‘e napulitane) se so’ fermate a pparlà d’ ‘a puttanata ‘e ll’arbitro uruguaiano e ce ne fosse stato uno ca avesse parlato ‘e ato e cioè quale,d’ ‘e jucature viste,  putesse serví ô Napule… A mme  d’ ‘a puttanata ‘e ll’arbitro uruguaiano nun m’è ppassato manco p’ ‘a capa, anze m’à fatto piacere pecché tengo ‘ncopp’â ponta d’ ‘o vernecale a Capello (ex juventino) e m’à fatto piacere ca nn’è stato jettato â via ‘e fora! Vuje putite dicere: ingiustamente! Tanto meglio, dico io! Tutte ‘e juventine (passate, presente e future) ànn’ ‘a perdere,pure ingiustamente; anze ce sta cchiú ggusto a vederle perdere ingiustamente (pe contrappasso ‘e tutto chello ca se songo arrubbate dinto a tant’anne!…) Ma turnammo a Inghilterra – Germania ca i’ m’aggio aggustato  scicquannome ll’uocchie guardanno a<strong> </strong>Miroslav Klose,’stu guaglione (1978) pulacco naturalizzato terisco, forte, putente, curaggiuso, tuosto, valoroso,intrepido ed indomito cu ‘e piede bbuone, ca è capace ‘e tirà ‘e ricore e ‘e punizzione e   ca ‘ncarriera soja  dinto a quattuciento e ssette partite à signato ‘a bbellezza ‘e 182 golle cu ‘na media ‘e 0,45 golle a ppartita ato ca Gilardino,Zalayeta, Amauri,Lucarelli e Quagliarella! Pe mme fosse ‘o centravante bbuono p’ ‘o Napule a ffianco ‘e Denis e Lavezzi cu Hamsik e Inler arreto e pe ll’accattà me vennesse subbéto a Quagliarella (a ll’estero pe ventitrè o vintiquatte meliune) e allora sí ca se ne cadesse ‘o san Paolo: Klose (e nun ‘o ddico ‘a mo) e Denís facessero ‘na cocchia ‘e cchiú ‘e trenta golle!
Sperammo ca Bigòn e ‘o signurino De Laurentiis me stessero a ssèntere e purtassero a Klose ‘a chesta via e nno a quacche residuato ‘e guerra o a quacche ex – juventino ca è ppuppú, ppuppú e nun s’ à dda  tuccà!

Brak

ilnapolista © riproduzione riservata