Urdema Jurnata, meglio ll’anno ca vène

P’’o Napule ‘a partita d’ajere fuje completamente inutile. Perza pe perza, i’ nun me fosse appresentato proprio. Se sapeva ca ‘o Palazzo aveva deciso ‘e mannà a ffà ‘a Champions â Sampedoria e nno ô Palermo e ‘o Napule aveva essere ‘o crapetto destinato a essere scannato!  Ajere a Genova  sponna Sampedoria ‘o Napule se jucaje ll’urdema partita ‘e chistu campionato vinciuto all’urdemo, all’urdemo ‘a ll’Intèrre ciovè  dâ squatra ‘e Mou ca ce ll’à fatto annuzzà ‘ncanna a chill’ antipaticone  ‘e Ranieri, a Rosella Sensi e a cchella carta ‘e tre ‘e Francesco Totti ca s’erano dato ‘nu punio ‘mpietto e se penzavano ‘e vencere ‘nu campiunato ca ll’Intèrre aveva cummannato dâ primma jurnata… Ma se songo ‘ntussecato e se stanno ancòra rusecanno ‘o limone… Nce aggio piacere! Allimmeno nun me songo ‘ntussecato sul’io ca ajere m’aggio avuto zucarme  ‘a caramella ‘e vedé perdere ‘o Napule ‘ncopp’ a ll’unicu tiro ca ‘a Sampedoria facette dint’ ô specchio d’ ‘a porta napulitana… e pe gghionta ‘e ruotolo ‘o golle ‘o facette Pazzini ca è ‘o classico jucatore ca avesse ‘a jucà cu ‘a juventús pecché comme a ttutte ‘e jucature d’ ‘a vecchia zoccola  è manfrinaro, simulatore, ‘mbruglione e se mena ‘nterra si sulo uno ‘o guarda stuorto! P’ ‘a verità ‘a partita era nata proprio storta: ‘o Napule o pe squalifica o pe ‘nu dicessette avette ‘a fà a mmeno ‘e Campagnaro, Gargano, Hamsik e Lavezzi… E nun se po’ ffà a mmeno ‘e tanta ggente quann’ uno nun tene a  cchi ‘e ppo’ sostituí a mmestiere! Pe nun dicere po ca Mazzarri ajere nun ne ‘ngarraje meza: 1)Mannaje ‘mmiez’ ô campo ‘na difesa a ttre cu Santacroce, Cannavaro e Grava: mo dich’i’ tu ‘o vvide (e ll’hê vedé pe fforza pecché ‘o vedesse pure ‘nu cecato…) ca ‘o guaglione ‘e Bahia nun s’è ripigliato ancòra bbuono…, nun metterlo a ffà cocchia cu ‘nu cataplasemo comme a Cannavaro, ca nun sape zumpà e nun po’ riuscí maje  a cuntrastà ‘e capa a Pazzini (ca comm’infatti: ‘o pigli’io o ‘o piglie tu, cu ‘na capata futtette a De Sanctis ca pe parta soja nun fa ‘nu miraculo manco si ‘accidono!). Si proprio vuó fa jucà a Santacroce fallo jucà ‘ncocchia cu Rinaudo e nno cu Cannavaro, pure pecché chillu povero ommo ‘e Grava nun po’ cantà (marcà a  Cassano) e purtà ‘a croce ( ajutà a ffermà a Pazzini); 2) Mettette a centrocampo a Cigarini ca aizaje póvera pe tutt’ ‘o tiempo e nun fuje capace né ‘e difennere, né ‘e costruí ‘o juoco lassanno tutt’ ‘a fatica cchiú sporca a Pazienza; 3) Se ‘nfessette a ffà jucà a Maggio  ca manco isso  s’è ripigliato ancòra bbuono e nun ‘ngarraje né  ‘nu cross nè ‘nu tiro e a difennere nun ce penzaje proprio! Tanto ce vuleva ggià dô primmo minuto a mettere a Zuniga ô posto ‘e Maggio e ffà jucà a Hoffer cu Denís e Quagliarella?
L’allenatore d’ ‘e napulitane ajere se truvaje ‘e fronte ll’ecchese squatra soja e aveva ditto: “Mi fa piacere tornare a Marassi, c’è un bel rapporto con tifosi ed ambiente. Per me sono stati due anni intensi e sono certo che all’inizio proverò un po’ di emozione. Ma appena comincerà la partita sarò concentrato solo a dare il massimo degli imput per il Napoli.Ma francamente nun ‘o vedette ‘e fa niente ‘e tutto chesto; e comme avesse pututo, si nun tenette ll’idee chiare?!… Aveva pricisato:  “Noi abbiamo conquistato il nostro obiettivo, è vero, ma a noi nessuno à regalato niente. A Genova mi conoscono e sanno benissimo qual è il mio spirito: bisogna affrontare ogni partita con la massima attenzione”.
“Un giudizio sulla stagione del Napoli? Sono contento e orgoglioso –  aveva spiegato Mazzarri – io e il mio staff siamo venuti qui e abbiamo trovato un ambiente piuttosto depresso. I ragazzi sono stati straordinari nel risalire la corrente. L’ò già detto: al tempo era impensabile parlare di Europa. Oggi abbiamo raggiunto l’obiettivo. I rimpianti ci sono solo nel fatto di aver conquistato nella nostra gestione piú punti della Sampdoria. Col senno di poi potremmo dire che oggi staremmo a parlare di uno scontro Champions domani a Marassi. Ma il calcio è fatto da tanti piccoli particolari. Io sono contento di aver raggiunto l’Europa League”. E menu male  ca nun fuje ‘nu scontro Champions, si no facévamo n’ata fijura marrò – comme a cchella d’ajere, si non cchiú ppeja!

Mazzarri, comme aggiu ditto,  aveva avuto fà a mmeno  ‘e Lavezzi squalificato e de  Gargano, Hamsik e Campagnaro ‘nfurtunate.  ‘Ndifesa se piazzarono  Santacroce, Cannavaro e Grava. A centrocampo Cigarini ‘ncocchia cu Pazienza, Maggio a destra e Dossena cunfermato a sinistra. In attacco Quagliarella e addirittura Zuniga(!)   pe ddà ‘na mana  a Denís. Accussí cuncertate  che ne puteva ascí?

E mmo parlammo ‘nu poco d’ ‘e jucature, ‘e ll’allenatore e de ll’arbitro, speranno ca ‘sta vota cu ‘e punte mieje nun me ‘mparulejo cu chille d’ ‘o prufessore Trombetta…., ma nun crero!

<strong> De Sanctis,5- </strong>Comme ô ssolito durmette cu ‘a zizza<strong> </strong>‘mmocca;nun se spurcaje manco ‘e guante e nun fuje cacchio, ô ccuntrario d’ ‘o cullega ‘e rimpetto) ‘e fà ‘nu miraculo ‘ncoppa a ll’unico colpo ‘e capa ‘e Pazzini diretto ‘mporta!
<strong>Santacroce,5- </strong>Nun s’è ripigliato ancòra e se vedette: ‘ndeciso e senza perzonalità,  nun fuje capace ‘e difennere bbuono …, ma nun è ccolpa soja si Mazzarri ‘o facette jucà pe fforza ‘nccocchia cu Cannavaro e nno cu Rinaudo…
<strong>Cannavaro, 4 </strong>Avesse avuto ‘a marcà a Pazzini, ma ‘o gghiette truvanno ‘a Santacroce; senza ca nisciuno ll’avesse priato spisso spisso  jette a ddà ‘mpiccio a ll’attaccante napulitane: lle capitaje ‘nu pallone d’oro e isso tiraje ‘na chiantella a vvienetenne mannanno ‘o pallone ‘mmiez’ â chiazza for’ô campo. C’è ppoco ‘a fa:‘o pallone nun è mestiere sujo e se vede! Sperammo ca ll’anno ca vene ce ‘o levassero ‘a tuorno… Ma ll’ann’ ‘a sulo recalà pecché è ‘mpussibbile ca quaccuno se ll’accatta!
<strong>Grava, 6 </strong> avette cantà e purtà ‘a croce; ô primmo tempo mettette ‘a musarola a Cassano, ô siconno visto ca Santacroce e Cannavaro nun ce ‘a facevano, dopp’ ô golle pigliaje ‘ncunzegna a Pazzini e cercaje ‘e ‘mpararle a ffà ll’ommo!
<strong>Maggio 5–</strong> Nun s’è ripigliato ancòra e se vedette:nun concludette niente, né annante, né arreto.
<strong>(18′ st Hoffer 5 + </strong>A pparte ca ascette continuamente  a chi sî ttu e chi so’ io cu Gastaldello, cercaje ‘nu paro ‘e vota ‘e fa coccosa… e â siconna vota  lle fosse attuccato pure ‘nu ricore pe ‘nu fucuzzone ‘ncanna ca le dette ‘o difenzore, ma ll’arbitro nun vedette o meglio  nun ‘o vulette vedé ),
<strong>Pazienza 5,5 </strong>avette farse tutt’ ‘a fatica cchiú ‘nfama: chella ca se scanzaje Cigarini.
<strong>Cigarini 4,5 </strong> aizaje póvera pe tutt’ ‘o tiempo e nun fuje capace né ‘e difennere, né ‘e costruí ‘o juoco lassanno
tutt’ ‘a fatica cchiú sporca a Pazienza
<strong>(20’ st Maiello s.v. </strong>jucaje troppo pocu tiempo e nun se po’ darle ‘nu voto!<strong>)
</strong><strong>Dossena,6 </strong>Accumminciaje malamente  ‘nfase offensiva, nun tanto pe mancanze soje quanto pecché ‘e cumpagne nun ‘o pezzecajeno maje a ttiempo e cu ‘e passagge juste…  Ô primmo tempo se facette nutà  pe ‘nu paro ‘e bbone chiusure difenzive. Ô siconno  tempo però  se facette trovà cchiú spisso lla nnante, cu ‘e  cumpagne ca ll’accurdajeno cchiú assaje ‘o juoco…., ma nun seccedette niente. Ô finale    però facette ‘na bbella cosa cu ‘na bbotta a vvolo, ma fuje sfurtunato pecché Storari(ca del resto steva lla pe parà…) facette ‘o miraculo e lle  negaje ‘o golle d’ ‘o  pareggio!
<strong>Zuniga</strong> <strong>5,5 </strong>Mazzarri ‘o vulette ‘mposizzione assaje  avanzata ( me pare  ca ‘o vedette ‘e jucà accussí pure cu ‘a nazzionale soja        ll’ autunno passato…), cercaje ‘e se ‘nventà  quacche  situazziona periculosa annante  pe sustènere ‘e ddoje ponte, ma maje cu cuntinuità, sempe cu ‘a chiena e ‘a vacante,  alternanno  idee e gghiucate  ‘e preggio cu ate ‘nconcludenti.
<strong>(24′ st Bogliacino</strong> <strong>5,5 </strong>Se vedette poco o niente e me dispiacette: pareva ca comme ê cumpagne e paricchi avversarii stesse ggià cu ‘o custumetto ‘e bbagno e  ‘a capa dinto a quacche villaggio turistico! ‘Nzomma ajere cu ‘o sinistro sujo Mariano  nun ‘ncantaje a nnisciuno!)
<strong>Denis,</strong> <strong>5,5</strong> Comme ô ssolito se sacrificaje p’ ‘a squatra; chesta vota però venette spisso tagliato fora dâ scafata e tosta   difesa d’ ‘a Sampedoria . Ô primmo tempo,nun saccio manch’ i’ comme facette…, ma   se strafucaje ‘nu golle quase fatto.<strong> </strong>

<strong>Quagliarella 6- </strong>A vvote parette ca ‘o fatto nun fosse d’ ‘o suojo e  s’estraniaje dô juoco, ma – tiranno ‘e ssomme –  restaje l’attaccante cchiú  pericoloso d’ ‘e napulitane  e surtanto ‘nu granne purtiere (nun ce scurdammo ca tutt’ ‘e purtiere – pure ‘e cchiú scarze – contr’ ô Napule cacciano ‘a scienza! Figurarse Storari ca nun è scarzo!) cchiú ‘e ‘na  vvota ‘o fermaje!

All.<strong> MAZZARRI 5 </strong>Pe tutt’ ‘e mutive c’aggiu ggià ditto!

L’arbitro<strong><em> RIZZOLI 4 e l’aggiu  trattato bbuono!</em></strong> Vulette a fforza fà ‘o prutagunista  cu cchella  aria ‘e rre cummannascoppole!; comme ‘a vecchia  abbitudine soja d’arbitro casalingo e ca s’ ‘a tira cu ‘e squatre nurdistiche,  fuje apertamente    ‘nsuggezzione murale rispetto â Sampedoria (destinata dô Palazzo, (‘mmece d’ ‘o Palermo)   a gghí a ffà ‘a Champions visto ca ‘a juventús cu ttutte ll’aiute avute nun ce ll’aveva fatta…) E allora ô posto d’ ‘a juventús, meglio ‘a Sampedoria, squatra d’ ‘o nordo ca ‘o Palermo squatra d’ ‘o suddo!… E  pirciò Rizzoli trasette  ‘ncampo deciso a non vedé ’o modo ‘e fà pruvucatorio e viulento d’ ‘e genuvise   e siscaje  sistematicamente e pe partito pigliato  contro ê napulitane, favurenno soprattutto a Pazzini ca sistematicamente, ‘a chillu granne figlio ‘e ‘ndrocchia ch’è, faceva ‘e sceneggiate   se menava ‘nterra ô minimo cuntrasto o si appena appena uno  lle diceva:”che bbell’uocchie ca tiene!”  Quanno po (ô finale ‘e partita) Gastaldello (o n’ato mo nun me ricordo!) dètte ‘nu ddio ‘e fucuzzone ‘ncanna a Hoffer, isso pe nun vedé s’avutaje ‘a chell’ata parte e facette signo ‘e continuà neganno ‘o ricore ô Napule ca avesse pututo pariggià futtenno â Sampedoria (squatra d’ ‘o nordo!)e mannanno ‘nChampions ô Palermo (squatra d’ ‘o suddo!).

Comunque comme è gghiuta e ccomme è vvenuta ‘stu campionato è ffernuto e ‘o Napule s’è piazzato (pe comm’era accumminciato) abbastanza bbuono ô sesto posto; sperammo ca jesse meglio ll’anno ca vène! Cu ‘na bbona salute!

ilnapolista © riproduzione riservata