De Laurentis conta
comme ô doje a briscola

Liggenno tutto chello ca s’è scritto ‘ncopp’ô fatto ‘e Quagliarella ca s’è abbuscato tre gghiurnate ‘e squalifica p’avé mannato a ffà ‘nculo a ll’arbitro, e vedenno ca tutte quante se stanno meraviglianno e rizzelanno pe bbia ca ‘o ggiudice à usato dduje pise e ddoje mesure trattanno bbuono a Totti pe tre vaffa e ‘na chiaveca a Quagliarella pe ssí e nno ‘nu paro ‘e vaffa…; liggenno e sentenno tutto chesto, me pare ca tutte   quante stanno mo ascenno ‘a sott’ ô mantesino… A mme ‘sta cosa ca ‘a gente se meraviglia e rizzela, me fa ridere!
Ma ched’è nun se sape ca ‘o Napule è  ‘o si’ nisciuno d’’o campiunato e ca ‘o presidente De Laurentis dint’ ô palazzo conta comme ô doje a briscola e l’ics dinto a ll’affabbeto? Ma ched’è nun se sape ca dint’ ô palazzo ànnu deciso ‘e aiutà ‘a juventús a discapito d’ ‘o Napule e ca tutte ‘e strate so’ bbone?… Pecché se ne fanno meraviglia? Fino a quanno  ‘o presidente De Laurentis dint’ ô palazzo nun se farrà sèntere chiajetannose ‘o rispetto p’ ‘o Napule e p’ ‘e  nun tanti sorde ca ‘nfino a mmo à cacciato, e fino a quanno nun scigliarrà ‘nu direttore generale ca conta e sape masterià,   comme Allodi o Moggi,  ‘o Napule sarrà sempe trattato comme a  ‘na mappina p’ ‘e piere e ce mannarranno sempe arbitre indecente comme a chille ‘e dummeneca, anze ‘e sapato  passato!
E chisto è ‘o cunto a gghí; ma mo facimmo pure  chillo a vvení:
È overo ca ‘o palazzo ce tratta ‘na latrina, ma ‘o Napule nun ce à dda mettere ‘o ssujo e cioè:
1) ll’allenatore à dda fà capí ê jucature suoje ca ‘ncampo ànno fà ll’uommene, no ‘e criature… e ànn’ ‘a rispettà ‘e regule,  stannose zitte senza prutestà pure si ll’arbitro fa ‘o strunzo: tanto a prutestà nun se ne ricava niente!
2)  ll’allenatore à dda  capí quanno è ‘o mumento ‘e cagnà ‘o jucatore ca nun ce  sta cchiú  cu ‘a capa e corre ‘o rischio ‘e se fà jettà â via ‘e fora…(fosse pure Maradona!).
E chesto vale sia pe Quagliarella ca pe Cannavaro,  ca pe quaccuno ato!
‘Nchiusura voglio però agghiuntà ‘na cosa: si ‘o Napule vo’ addeventà quaccuno e nun essere sempe o si’ nisciuno d’’o campiunato è nicessario ca ‘o presidente De Laurentis cacciasse ‘na cosa ‘e sorde p’accattà dduje o tre ghiucature bbuone (‘nu difensore, ‘nu centrocampista e n’attaccante), ma overamente bbuone! Senza denare nun se cantano messe e cu ‘na squatra ‘e tridece, quattuordice perzone nun se va manco a Muntevergene o â Maronna ‘e ll’ Arco, figurateve si se po’ gghí in Europa!
Raffaele Bracale (linguista napoletano)

ilnapolista © riproduzione riservata