ilNapolista

Callejon ce rijalaje tre ppunte sustanziuse, Koulibaly mettette ‘a musarola a Icardi

Inter-Napoli, le pagelle in lingua: Koulibaly, Callejon e Diawara i migliori, ma tutta la squadra offre una prestazione sontuosa.

Callejon ce rijalaje tre ppunte sustanziuse, Koulibaly mettette ‘a musarola a Icardi

Inter-Napoli 0-1, ‘a vedette accussì

Tengo ‘o core dint’ô zzuccaro guagliú e ‘ntribbuna divano stammo ancòra sbattenno ‘e mmane pecché finalmente ajeresssera a ssan Siro, contrê profuche ‘e chella faccia ‘e cestunia cu ‘a guallera ‘e pioli [‘na scuatra ca a mMilano chiammano Piscione, ma ca a ccunte fatte nunn’ è ca ‘nu pescetiello ‘e cannuccia, anze ‘nu verme sulitario cu ‘e riscenzielle!… ], ‘o Napule facette ‘o Napule e [pure si ‘o risultato fove busciardo, dàtose ca se vincette sulo p’uno a zzero addó ce fossemo mmeretato ‘e vencere cchiú llargo]nun perdette ll’accasione ‘e prufittà d’’o passo favezo d’’a roma e dd’ ‘o miezu passo favezo d’’a vecchia zoccola e sse purtaje â casa 3 punte assasíe (fondamentali) accustannose ô siconno posto d’’e pecurare rumanise ca oramaje sentono ‘o sciato nuosto ‘ncopp’ô cuollo lloro.

‘E guagliune ‘e Sarri cunquistajeno ‘na nichemata (vittoria) assaje ‘mpurtante cu ‘nu juoco straurdinario ca ‘ncantaje e ppe paricchiu tiempo nun facetteno tuccà palla ê ‘nteriste; forze s’êsse pututo fà coccosa ‘e cchiú sott’â porta d’Handonoviccio, ma ‘e cuane nun sufferetteno maje e mmaje, doppo d’essere passate ‘nvantaggio [43’] arresecajeno ‘e farese agguantà dê profuche ‘e pioli e cce purtajemo â casa tre ppunte valiuse (preziosi).

Passammo ê ppaggelle e vv’avviso ca, visto ca se vincette ‘na mubbara (partita) ‘mpurtante e ffunnamentale, sulo ô capitano aggiu miso meno ‘e sette!

Reina 7,5 – Sule dduje tacculle (interventi),uno ‘ncopp’a ‘nu tiro ‘e Perisiccio e n’ato pe ffermà ‘na cabbesera (colpo di testa) senza pretese ‘e Negatomo; però p’’o riesto o cu ‘e piere o cu ‘e mane quanno gestiunaje (gestì) ‘o pallone fove ‘nu spettaculo.Da mettere ‘ncurnice ‘o lanzo pe lLorenzigno zumpanno tutto ll’armidanno (centrocampo) ‘nteriste; ‘e cchiú se permettette ‘o lusso d’essere addirittura divertente sfuttenno e spernacchianno a Icardi quanno lle levaje ‘o pallone ‘a capa cu ‘na mana sola!

Hysaj 7 – Turnato ê mistaue (livelli) ‘e ll’anno passato fove periculuso quanno jette annante,mentre arreto fermaje tutto e ttutte, pure ll’aria e ccu ttutto ca Perisiccio tentaje ‘e fà coccosa, facette palla corta e nne vedette assaje poche!

Albiol 7,5 – Serata sí d’’o centrale cuano (azzurro) ca fove misummo (Impeccabile) ‘ncopp’ê pallune aute alti e ll’anfisarre (disimpegni),risultanno ll’ago d’’a valanza difenziva e dd’ ‘a tattica complessiva d’’a trecquarta vascia. Nun concedette spazzio a nnisciuno,se truvaje sempe ‘ncopp’â linia justa e ffacette arremmarrà (ripartire) ‘a scuatra urdinatamente.

Koulibaly  8 – Atalossa murriffa (Prestazione sontuosa) d’’o ggialante cuano (azzurro) ca mettette ‘a musarola a Icardi i ‘o cassaje dô campo e pp’ ‘o riesto nun sbagliaje niente!

Ghoulam 7 – Cchiú preoccupato ‘e cuntené a cCandreva ca a ffarese vedé annante, custringette a lLorenzigno a ffà ‘e straurdinarie.Ma forze ajeressera chello Sarri vulette dô guaglione algerino.

Zielinski 7,5 – Tagliaje a ffelle ‘a muasta (mediana) ‘nterista ritruvannose a sische cu pPeppe ‘a ‘nguenta; fove capace ‘e zumpà ll’ommo comme e cquanno vulette, turnanno quanno fove nicessario. Sciarmante (Geniale) ll’jusaida (l’assist) ca mettette a cCiruzzo sulo ‘nnante a Handanoviccio; sulo quanno (61’) ‘o vedette a ccurto ‘e sciato Sarri ‘o sustituette.

[Dô 62’ Rog [‘a Belva] 7 – Straurdinario ll’accercamiento (l’approccio) â mubbara (alla partita)! Luttaje súbbeto ‘ncopp’a ògne ppalla, difennenno,attaccanno e ggestiunanno (gestendo) cu ccegna (grinta) e pperzunalità ‘a palla.]

Diawara 8 – Valiuso (prezioso) p’’o Napule, mettette a ssunna (regolò), cuvernaje e ccummannaje ‘a muasta cuana (mediana azzurra) magnannose a gGagliardini.

Hamsik 6,5 – Me dispiace, ma ‘e cchiú nun pozzo metterle; Nun sta attraverzanno ‘nu mumento bbuono e ppure ajeressera se vedette visto ca fove ll’unico d’’e nuoste a nnun tené cuntinuià ‘e juoco i a sbaglià cchiú ‘e ‘nu daimmo (appoggio), però Sarri nun tene ‘o curaggio ‘e farene a mmeno!

[Dô 72’ Allan  7 – Sarri ‘o mettette dinto quanno penzaje ca ‘e ‘nteriste putesseno dà ‘nu poco ‘e ‘mpiccio e isso rispunnette prisente tampunanno ‘mpressione (in pressing) a cchi capitaje capitaje.]

Callejon [Peppe ‘a ‘nguenta] 8 – Nun truvaje arricietto facenno ll’úmmolo (stantuffo) annante i arreto; scafato comme a ppoche, ce crerette sempe e ffove accussí ca casticaje a Handanoviccio, accumparenno ê spalle ‘e chella meza cazetta ‘e Nagatomo e mmettenno pqalla ‘nfra palo e ppurtiere e ssignanno ll’addaffa (rete) ca pe isso è ‘a nummero unnece ‘ncampiunato, ce rijalaje tre ppunte sustanziuse!

Mertens [Ciruzzo] 7 – Forze nun s’’o mmeretasse, pecché sprecaje troppo: ‘na vota cunzignaje palla a Handanoviccio, n’ata vota arrivaje tarde a ll’appuntamento ‘ncopp’a ‘nu jabbro (cross) ‘e Peppe ‘a ‘nguenta e ppo scardaje ‘o palo vascio ‘ncopp’ a ‘na granna jusaida (assist) ‘e Zielinski. Nun me ll’aspettavo.

[Da ll’80’ Milik 7 – ‘e stima]

Insigne [Lorenzigno] 7,5 – Granna mubbara (partita) d’’o guaglione ‘e Fratta ca facette tutt’ isso jucanno a ttutto campo mo attaccanno, mo ricuperanno comme a ‘nu terzino; lle mancaje sulo ‘o stuco (gol), ma facette ‘a varva ô palo cu ‘nu sfurtunato tiro ‘e dritto.

All. Sarri 7,5 – ‘O Napule suojo jucaje a mmemmoria dànno n’auta lezziona ‘‘e pallone ‘int’â Scala ‘e ll’arcadamma (football) e sse purtaje a ‘nu passo dâ roma doppo n’antraffa (incontro) duminato dô primmo a ll’urdemu minuto.

arbitro Rocchi 4.5 – Fove mannato pe spezzà ‘e passe ô Napule, ma s’êtt’’a fa cchiú ddinto ‘e dint’ô prozo, pecché ‘o Napule vincette cu ttutto ca isso nchiudette ll’uocchie ‘ncopp’a ttutt’’e ffetenzie d’’e profuche ‘e Pioli gestiunanno (gestendo) ‘o sibbacco (match) a senzo unico! Se vennicaje nutizzianno (ammonendo) pe sfreggio a cKoulibaly ca scunfiato (diffidato) à dda zumpà ‘o Cagliari. Pacienza!

E fermammoce cca cuntente ‘e l’atalossa (prestazione) d’’a scuatra cuana (azzurra) dànnoce appuntamente, si dDi’ vo’ a ddummeneca ca vene pe ccummentareve ’o risultato d’’o scontro casalinco ‘e sapato seje contr’ô Cagliari e ddicimmo ca quase certamente ll’asfardammo. Allimmeno accussí sperammo! Staveti bbe’

ilnapolista © riproduzione riservata