Lazio-Napoli, le pagelle in lingua: promossi a pieni voti Reina, Insigne, Mertens e Albiol. Sette pieno per Maurizio Sarri.
Lazio-Napoli 0-3, ‘a vedette accussì
Canta Napule, Napule a ggogó, guagliú! Stammo ancòra sbattenno ‘e mmane ‘ntribbuna divano ‘nnante ô 43 vuse (pollici) nuovo ‘e trinca, pe fistiggià ‘a nichemata (vittoria) ‘mpurtante d’ajeressera cunquistata dô Napule ll’Ulimpico rumano, mantenenno ‘o passo d’’a vecchia zoccola e d’’a roma ‘e Spalletti ch’êveno fatte ‘e guappe rispettivamente cu cChievo e bBulogna e cunzulidanno ‘o terzo posto ‘ncrassifica; e ttutto chesto cu ttutto ca ‘e cuane (azzurri) foveno custrette a scennere ‘ncampo vestute a llutto, senza ‘a muntazzimma (divisa) justa: chella d’’a Maronna ‘e ll’Arco, contr’â bbanda d’’o pappavallo ‘e Lotito vestuta p’’a primma cummeniona; ma se vincette ô stesso e sse vincette largo duminanno chella ca ‘ncopp’â carta risultava essere ‘a nacchèlla jmiramma (trasferta cruciale) pe ‘stu niajo (finale) ‘e tempurata (stagione).
Granna mubbara (partita) d’’e cuane (azzurri) ca lassajeno â Lazzio ‘na sola accasiona periculosa sulamente a gghiuoche fatte quanno ggià se vinceva pe ddoje a zzeroe Inzaghi êva fatto trasí a cKeità ô posto ‘e Murgía.
Passammo ê ppaggelle
Reina 6,5 – Paraje tutto chello ch’avev’’a parà; sempe attiento,mantenette ‘a porta acrata (inviolata) ‘ncopp’a ‘nu campo ca nunn’è ’úculo (facile).E ffove furtunato ‘o nnicessario quanno Lorenzigno salvaje ‘a porta quann’isso nun ce putette arrivà.
Hysaj 6 – Mo sí, mo no, penzaje cchiú a ddifennere ca a sse piglià ‘a curzia.
Albiol 6,5 – ‘O meglio d’’a sezziona (reparto) ô pprincipio sí sufferette ‘nu poco a fFelipe Andersònno, ma po, pigliate ‘e mmesure, ‘o bluccaje e ccu ‘a ‘sperienzia soja risulvette ògne situazziona.
Koulibaly 6 – Nun facette fessarie; nun ce facette vení parpitazzione ‘e core, vincette ògne brica (duello) cu Immobile faccenno ‘o duvere suojo.
Strinic 6,5 – Facette bbuono Sarri a sceglierlo ô posto ‘e Ghoulamme; ‘o guaglione dimustraje ‘e stà ‘ncundizziona e vvincette ‘a tarra (confronto) cu bBasta pure senza fà cape d’angiulo!
Allan 7 – Atalossa muttana (prestazione positiva),curaggiuso e rrisuluto, s’’a vedette ‘e bbello e addirittura risultaje pulitelico(prezioso)cu cchillu bburarasso (campanile) pe lLorenzigno ca ce fruttaje ‘o doje a zzero.
Jorginho 7 – Se piazzaje a mmità ccampo e ffacette ‘o prufessore, appaciucanno (propiziando) ‘o primmo stuco (gol),nauanno (smistando)e ddettanno ‘e uatte ‘e juoco da ll’armidanno (centrocampo).
Hamsik [Marekiaro] 7,5 – ‘O capitano fove, comme à dda essere ll’anema d’’o Napule; presente ‘int’a cquase tutte ll’azzione ajere nun se sparagnaje: rijalaje [25’] a pPeppe ‘a ‘nguenta ‘na palla da mettere sulo dinto e accussí jette; ce pruvaje pure cchiú ttarde, ma ‘sta vota ‘o cumpagno nun ce arrivaje. Peccato. Ascette oramaje a ccurto ‘e sciato. [dô 79’ Rog 6 ‘e stima – Trasette tarde, ma súbbeto se dette ‘a fà tentanno pure ‘o tiro ‘a fora.]
Callejon [Peppe ‘a ‘nguenta] 6,5 – Fistiggiaje ‘e dduiciente presenzie cu n’addaffa (rete)accumparenno ô posto justo pe recogliere ‘o rijalo d’’o capitano suojo. Ascette stracquo doppo d’avé curruto assaje.
[dô 74’ Zielinski 6,5 – Trasette pe ddà rispiro â scuatra, ma ‘o mmeglio ‘o ffacette cunfezziunanno cu sant’Arcadio ll’ jusaida (assist) p’’o tre a zzero ‘e Lorenzigno].
Mertens [Ciruzzo] 6,5 – Nun signaje, ma se facette apprezzà visto ca ‘a munauara (manovra) uffenziva passaje quase sempe p’isso. Ô niajo (finale) ‘e primmo ajone (tempo) dètte a lLorenzigno ‘na palla bbona p’’o doje a zzero,ma ‘o frattese ‘a sciupaje, rimannanno tutto a sseje sette minute cchiú ttarde.
[da ll’83’ Milik [sant’Arcadio] 6+ – Trasette assaje tarde, ma truvaje ‘o istema ‘e farese apprezzà cunfezziunanno cu Zielinski ll’ jusaida (assist) p’’o tre a zzero. ]
Insigne [Lorenzigno] 8 – Sbagliaje a nniajo (finale) ‘e primmo ajone n’addaffa (rete) retissanta (clamorosa) e dètte ‘a ‘mpressione ‘e nun ce stà cu ‘a capa; quanno maje?! Tuccanno ‘e sola ‘nu bburarasso (campanile) d’Allanno signaje [51’] o doje a zzero, po salvaje [60’] ‘nu stuco (gol) fatto ‘e Patricco e arrivate ô 92’ piazzaje ê spalle ‘e Stracoscia ‘a terza brasciola ca pe isso fove ‘a quatturicesima ‘ncampiunato!
All. Sarri 7 – Quanno se vence e sse vence bbuono è ppriemiato pure ‘o mutarribbo (allenatore) e ajere Sarri s’’o mmeretaje pecché ‘ncarraje tutto sciglienno ‘e ppedine adatte pe ccunquistà ‘na nichemata jmiramma (vittoria cruciale cu ‘o Napule suojo ca p’’o juoco se dimustraje aillao (superiore) dô primmo a ll’urdemu minuto.
Arb. Irrati i ‘a chenca soja 4,5 – Chisto è scemo, ma ce porta bbuono! Cu cchisto nun âmmu maje perzo e cquase sempe vinciuto; ajeressera, tanto pe nnun cagnà siscaje ad capocchiam, caputiaje cchiú ‘e ‘nu carí (fallo), rumpette ‘o saciccio mettennose pe ‘mmiez’ê piede d’’e nuoste, nun nutizziaje (ammoní) cchiú ‘e ‘nu chianchiere d’’a bbanda d’Inzaghi, ca facetteno ‘e capuzielle, lassaje ca ‘o cchiú scemo d’’e duje signalinie rumpesse ‘o pasticciotto a Striniccio, senza dicerle niente, però grossi fetenzie nun ce ne facette!
E ffermammoce cca, dànnoce appuntamento, si dDi’ vo’ p’’a dummeneca ‘e Pasca, pe farce ll’avucurie e ccummentà ‘o sibbacco (macht)casalinco ‘e sapatu santo contro a ll’Udinese, speranno ‘e averne fatto carna pe purpette!
Staveti bbe’!
