ilNapolista

Reina 8, Hamsik granne jucatore, Pavoletti aizaje porvera

P’’a verità chillo visto ajere nun fove ‘o stesso Napule lucente (brillante) visto ô Meazza, ma pacienza! ‘O nnicessario era ‘e vencere

Reina 8, Hamsik granne jucatore, Pavoletti aizaje porvera
Pavoletti in azione contro la Fiorentina in Coppa Italia. Ovviamente non brillante la sua prima partita (Cuomo)

Canta Napule

Canta Napule, guagliú i avimm’’a sbattere ‘e mmane pecché ajeressera ô san Paolo, ‘o Napule cu ttutto ca fove ancòra urfaniello ‘e Sarri custretto a vvederese n’ata mubbara (partita) dâ cajola ‘e cristallo ‘ncimm’ê bbimate (spalte) ) lassanno ‘a panca ô siconno suojo Calzona, cu ttutto ca scennette ‘ncampo vestuto a llutto e ssenza maglia furtunata [chella d’’a Maronna ‘e ll’Arco] paccheriaje [pure si sulo p’uno a zzero] ‘a Fiorentina, cuntinuanno   ‘o mumento maggico suojo e cunquistanno ‘a semifinale ‘e Coppa itaglia addó mo se ll’à dda vedé cu cchi vince ‘a tarra (sfida) ‘nfra ‘a vecchia zoccola i ‘a bbanda ‘e capa ‘e vacca e sperammo ca ‘a bbanda rossa e nnera facesse ‘nu pireto viulento e vvincesse, tanto a essa ‘a tenimmo fatta: quatto a ddoje ô san Paolo e ddoje a uno ô Meazza!

Peppe a ‘nguenta

Ll’irojo d’’a serata d’ajere fove Peppe a ‘nguenta, bravo a risolvere, cu ‘na preputente cabbesera (colpo di testa) [ca chijaje ‘e ddete ‘e Tatarusanu], ô 70’ [mmità ‘e ll’arrancua (ripresa)] ‘na tarra (sfida) ca steva piglianno sotto e cumplicannose ògne minuto ca passava. P’’a verità chillo visto ajere nun fove ‘o stesso Napule lucente (brillante) visto ô Meazza, ma pacienza! ‘O nnicessario era ‘e vencere e sse vincette pure si Sarri facette a mmeno d’’e parpaddíe (guizzi) ‘e Ciruzzo, dànno spazzio a pPavoletti, ca ‘mmece aizaje porvera; ‘e cuane però confermajeno ‘e stà criscenno pisiculoggicamente (mentalmente)sapenno sufferí quanno fove nicessario, ma ô mumento justo,sfruttanno ‘a granna qualità d’’e jucature,darrabbajeno (colpirono) e llevajeno ‘o ffraceto ‘a miezo! Pirciò guagliú âmm’’a essere cuntente i avimm’’a sbattere ‘e mmane visto ca ‘o Napule se sta cumpurtanno bbuono ‘into a ttutt’’e ttre mmunnafase (competizioni). E, nun voglio muzzecarme ‘a lengua…, tutto po’ succedere ancòra!

Passammo ê ppaggelle

REINA 8 Attiento e antídruso (reattivo) comme nun se vedeva ‘a tanto facette tre tadulle (interventi) uno meglio ‘e n’ato, ddoje vote fermanno ‘e ccunchiusione ‘e Chiesa e ‘na vota chella d’ Astori, salvanno ‘o risultato e mantenenno acrata (inviolata) ‘a porta.

HYSAJ 5,5 – Se facette, giustamente, jettà fora ô 90’ doppo n’atalossa (prestazione)cafilla (distratta) e troppo cariosa (fallosa).’Nzomma nun piacette nè a mme,nè ‘ntribbuna-divano ma è ggià ‘a paricchio ca dura ‘sta facenna; avesse ‘a risciatà?

ALBIOL 6,5 – Attiento, priciso, mascullo (lucido),tuosto mettette ‘a musarola a cKaliniccio e ccummannaje ‘a tràsera (difesa)a mmestiere.

MAKSIMOVIĆ 6-  Sustentato dâ riggia d’ Albiollo jette bbuono ‘nchiusura, ma facette quacche prano (errore) a ll’epata ‘e reclaggía (in fase di impostazione).

STRINIĆ 6 Chiesa fove n’ uosso tuosto, ma sulo ‘nu paro ‘e vote lle sfujette; ‘o cruato cuano(azzurro) pruvaje a ppruponerse annante, ma nun riuscette a ppognere;avette ascí pe ‘nu scartellato additto (infortunio). [Dô 61′ MAGGIO 6 Ll’aità ce sta, ma isso attiento e ssenza affannà se servette d’’a ‘sperienzia ca tene].

Centrocampo

ZIELINSKI 6 – ‘E stima pecché ati vvote me piacette ‘e cchiú; ajere s’accuntentaje ‘e cuvernà ‘a camma (zona) soja senza truvà cheseme (varchi) pe ‘nsertarse (inserirsi).

DIAWARA 6,5 Pulitelico (prezioso) p’’o senzo ‘e pusizziona se facette apprezzà assaje ‘ncupertura ‘nu poco ‘e meno quanno urtizzaje (verticalizzò).

HAMSIK 7 Granne jucatore, ‘o capitano fove prutacunista ‘e ‘na granna atalossa (prestazione) cu ‘a perna ‘e chell’jusaida (assist) a zzuco ‘e caramella pe pPeppe ‘a ‘nguenta ca mettette a ffrutto ‘a jucata e cce cunzignaje ll’intisarra (vittoria). (Da ll’ 83′ ALLAN jucaje troppo poco pe ffarese cunziderà)

Attacco

CALLEJON[Peppe ‘a ‘nguenta] 7,5 – Tanta quantità comme ô ssolito.Cu ttutto ca currette pe ttre, riuscette sempe a rrennerse periculuso; ce pruvaje durante ô primmo ajone (tempo), ma sulo ô 70’ riuscette a mmetere dinto ‘a palla ‘e ll’addaffa (rete) dicisiva. Nun ce stanno parole pe ringrazziarlo!

PAVOLETTI 5,5 Aizaje porvera: spaisato, fora dê mucàttate (schemi), spisso acracco (impacciato), lle mancajeno presenza e mmuvimento. Chi sa si jucanno addiventa meglio; pe mmo penzo ce ànnu fatto ‘o pacco!

[Dô 64′ MERTENS [Ciruzzo] 6 – Nun lassaje ‘o ricordo suojo dint’ ô sibbacco (match), ma avastajeno ‘e muvimente i ‘e curtate (tagli) suoje   pe ffà avanzà ‘o Napule mettenno pavura ê profuche viola.]

INSIGNE [Lorenzigno] 7 N’ata bbona mubbara (partita) d’’o frattese; se vedette ca sta ‘ncundizziona e sse facette nutà ggià dô primmo ajone(cu) cu rricate (dribbling),cruzze (cross)andivinate, tire e ddoje afachíe (traverse).

SARRI 6,5 Facette arrepusà a cquaccheduno e nchiuso dint’â cajola ‘e cristallo appicciaje e stutaje sicarette gudennose ‘e suoje ca jucanno comme sanno lle dètteno n’ata suddisfazziona; certo ca si avesseno miso a ffrutto coccosa ‘e cchiú ce fóssemo sparagnate quacche ppatema.

Arbitro DOVERI 6 Niente ‘a dicere; ‘na vota tanto facette quase tutte ‘e duvere suoje.

E ffermammoce cca. Se torna ô campiunato e ssi dDi’ vo’, ce sentimmo llunnerí ca vène doppo d’ ‘o sibbacco(match) contr’ô Palermo. Staveti bbe’!

ilnapolista © riproduzione riservata