Napoli-Pescara, le pagelle in lingua: quasi tutti sufficienti, voti alti per Hamsik, Mertens e Zielinski. Male l’arbitro Gavillucci.
Napoli-Pescara ‘a vedette accussì
Primma ‘e ricresso (ritorno) ajere ô san Paolo ‘nnante a trentamila ‘e lloro…. e sse cunfermaje ‘o fatto ca ‘e pruberbie antiche nun fallesceno maje; cumminfatte comme se dice? Nun c’è ddoje senza tre!E accussí succedette: chella d’ajere [Coppa itaglia cumpresa] fove ‘a terza mubbara (partita) cunzecutiva jucata ô san Paolo cu ‘e pprimmi ddoje vinciute. Quindi perindi po s’êv’’a vencere pure ‘a terza! I ‘a nichemata (vittoria) nun mancaje pure si êsse pututa essere cchiú sustanziosa ‘e chella ca fove si arrivate ô 93’ ‘ncopp’ô tre a zzero pe nnuje Hysaj nun êsse fatto ‘na fessaria inutile rijalanno ‘nu ricore ô Piscara ca n’apprufittaje signanno ‘o stuco (gol) d’’a bbannera. Che peccato!
Me fósse piaciuto vencere mantenenno ‘a porta acrata (inviolata) visto ca pe ttutt’’o sibbacco (match) ‘o Piscara nunn’êva fatto niente pe rromperce ‘o pasticciotto accuntentannose ‘e cuntrullà ‘e nuoste pe ttutto ‘o primmo ajone (tempo)e ‘mpedennole ‘e tirà ‘nterra ‘o capo; arrivate però a ll’arrancua (ripresa) quanno ‘e scuatre s’allungajeno ‘ncampo ‘o Napule venette fora e ‘ncapo d’’o 47’ minuto, cu ssantu Tonelli sbluccaje ‘a mubbara (partita), ‘a mettette ô ssicuro ô 49’ cu Marekiaro, i accunciaje ‘o risultato a ll’ 86’ cu Ciruzzo, ma arrivate ô 93’ – comme v’aggiu ditto – Hysaj facette ‘na fessaria inutile rijalanno ‘nu ricore ô Piscara e accussí ‘a mubbara (partita) se nchiudette ‘ncopp’ô tre a uno facenno ‘ncazzà a sSarri e assaje a rReina ca ce avesse tenuto cchiú ‘e me a fferní ‘o sibbacco (match) senza piglià nisciuna addaffa (rete). Nun fove pussibbile! Pe gghionta ‘e ruotolo ‘a Roma cuntinuaje a vvencere e nnun ce permettette ‘e rusecarle manco ‘nu punto. “Però ne rusecajemo tre â vecchia zoccola ca fove paccariata a fFirenze! Meglio ‘e niente. Passammo ê ppaggelle:
Reina 6 – Nun tenette niente che ffà.
Hysaj 5,5 – Miezu zifo (voto) mancante pecché si fove attiento e ppulito[pe nunn’essere nutizziato (ammonito)] dint’a cchiú ‘e n’accasione,e sse facette vedé a ll’epata (fase) uffenziva,menaje ‘nterra a mMitrita inutilmente ‘int’â muntaca (area di rigore) nosta durante ô ricupero. E cche saciccio!
Albiol 6 – Priciso e sistimato quanno alluntanaje tutt’ ‘e pallune c’arrivajeno dê pparte soje.
Tonelli 7 – Urdinaria amministrazziona durante ô primmo ajone (primo tempo). Quanno però se rennette cunto ca ‘o Napule nun riusceva a sfunnà, ce penzaje isso a ffàrelo n’ata vota cumme a ccontro â Sampedoria, ma ajere ‘o ffacette cu ‘na sistimata cabbesera (incornata).[facenno sbattere apprimma ‘o pallone ‘nterra e ppo ‘mporta] sfruttanno ll’accasione ‘e ‘nu tiro ‘e timmurria (calcio di punizione) ca Ciruzzo se prucuraje e ca gGiorgigno pittaje.
Strinic 6 – Sagliette spisso cercanno ‘e cupulià (dialogare) cui ‘e cumpagne;p’’o riesto pochi sfregazze (sbavature), ma senza cunsequenzie. [da ll’86’ Maggio sv].
Zielinski 6.5 – ‘O guaglione fove uno d’’e meglio ‘ncampo: abbijaje spisso ‘o muvimento a ll’armidanno (a centrocampo), cercanno ‘e lanzà ‘e cumpagne e de ‘nzertarese (inserirsi) dint’ê pochi spazzie dispunibbile.
[dô 65’ Allan 6 – trasette sùbbeto ‘int’â mubbara (partita); bbella ll’ajuda (l’assist) soja p’’a cunchiusione ‘e Marekiaro ca ce dètte ‘a terza addaffa (rete)].
Jorginho 6,5 – Miezu zifo (voto) ‘e cchiú pecché si è overo ca facette fatica a sustàtere (impostare) ‘o muvimento ‘mmiez’ô campo, ô pprincipio ‘e ll’arrancuà (ripresa), comme v’aggiu anticipato, disignaje ‘nu granne tiro ‘e timmurria (punizione) piscanno a tTonelli ‘ncopp’ô siconno palo; nun cuntento cu ‘nu tiro ‘a fora, ‘ncopp’ô doje a zzero cugliette ll’afachía.
Hamsik [Marekiaro] 7 – ‘O capitano CUANO (azzurro) se pigliaje spisso ‘a mana adderitta accumincianno ll’azziona e cercanno ‘e carriarse appriesso ‘e suoje; truvaje ‘o premio d’’e ffatiche soje cu ll’ addaffa (rete) ca valette ‘o dubblato (raddoppio) nuosto.
Callejon [Peppe ‘a ‘nguenta] 5,5 – Me piacette poco pecché se facette sistimaticamente nchiudere dâ trasera (difesa) abbruzzese e ffaticaje a ttruvà spazzio e cquanno lle capitajeno ddoje bboni accasione ‘e sciupaje tutt’ ‘e ddoje, ‘na vota sparacchianno sulo sulo ‘ncuollo a bBizzarri, i ‘a siconna vota mannanno fora! E cche saciccio!
Mertens [Ciruzzo] 7 – Durante ô primmo ajone (primo tempo)fove praticamente ‘o nassía (attaccante) ca se dètte cchiú ‘a fà pruvanno spisso ll’azziona perzunale cuntrullato dâ trasera (difesa) abbruzzese ca cchiú ‘e ‘na vota ‘o menajeno ‘nterra comme a cquanno facenno ‘nu muvimento ‘e veru marcazzo (autentico centravanti) se prucuraje ‘a timmurria (punizione) ca ce fruttaje ‘o primmo stuco (gol); p’’o riesto se magnaje ll’addaffa (rete) d’’o tre a zzero a pporta vacante, ma poco doppo se rifacette cu ‘o ‘nteresse quanno anticipanno a ttutte quante ricuperaje palla e ssignaje.
Insigne 5,5 – Miezu zifo (voto) mancante pecché si tentaje ‘e sbruglià ‘a matassa a mmancina, pe ttutto‘o primmo ajone (primo tempo) praticamente aizaje porvera signanno pure ‘nu stuco (gol) inutile pecché steva chiaremente ‘nnattasallulo (fuorigioco) i ‘o ssapeva.A ll’arrancua (ripresa) migliuraje ‘nu poco, ma senza cunnimma! (dall’80 Giaccherini sv).
All. Sarri 6 – Sulo pecché se vincette, ma a ccunte fatte ce avesse mettere cchiú ppoco pecché pe ttutto‘o primmo ajone (primo tempo) ‘a scuatra fove bradosa e muiccadda (lenta e macchinosa) e isso aspettaje ll’arrancua (ripresa) pe ppiglià p’’e rrecchie ‘e jucature e ‘nventarese coccosa..
arbitro Gavillucci 5 – E nno pecché ce dètte ‘o ricore contro, ca ce steva, ma pecché siscaje a bbienetenne e preferenno ‘e siscà contro a nnuje e nnun se capette ‘o ppecché!
E ccu cchesto ve saluto e ssi dDi’ vo’ ce sentimmo dummeneca ca vène doppo d’’a nacchèlla (trasferta) ‘e sapato a ssera a mMilano contro ê diavule ‘e Muntella, speranno ca ve pozzo cuntà cose bbone! Staveti bbe’.
