Che nervatura

Che nervatura e cche ccollera, guagliú! I’ nun ce pozzo credere! Pussibbile ca ‘o Napule nun riesce maje a sfruttà ‘na bbona accasione ca lle càpita? Possibbile ca dint’ô mmeglio vene sempe meno dint’ê mmecce e ffa comme ô cane d’’o cacciatore ca quanno à dda jí a stanà ‘a bbestia, tanno s’accova pe ccacà?Propeto chesto cca succedette ajere ca nun riuscettemo a sfruttà ‘accasiona ca ce capitaje ‘e vedé perdere ‘mparanza a cchilli pecurare d’’a Roma i ê profuche ‘e Montella i a cchille d’Inzaghi. E cquanno ce ricapita n’ata accasiona accussí, quanno? Capite ca allora, ajeressera nuje êssem’avut’’a sutterrà sotto a dduje metre d’addaffe (reti) ‘e frate cucine siciliane, ‘mmecce addó! Chi t’’o ddà?!

Nu scartellato pareggio

Ajeressera ô san Paolo, ‘nnante a cchiú o meno quarantamila perzone, ‘o Napule upposto ô Palermo addizziunaje ‘nu scartellato pareggio pe uno a uno e cce jette pure bbona pecché stevemo abbuscanno avenno ‘ncassato ô 6’ n’addaffa (rete)pe bbia ‘e ‘na fessaria dô terzino ‘e dritta nuosto fattose surpassà da ‘nu cruzzo (cross) ca permettette a nNestorovski [ca nun signava da otto mubbare(partite)] ‘e ce casticà e avettemo aspettà bbuono n’ora ‘e juoco pe vvedé ô 66’ ‘na papera e mmeza d’’o purtiere Posaveccio ca nn’avette pietà ‘e nuje e se facette scappà ‘a mano, facennoselo passà pe ‘mmiez’ê ccosce ‘nu tiro ‘a luntano ‘e Ciruzzo, cunzentennoce ‘e pariggià. Però da chillu mumento nsi’ ô mustalà (termine)sbattettemo ‘nfacci’ô muro ‘e ll’isulane e cchiú ‘e tanto nun fovemo cacchie ‘e cacciarne; ‘nzomma acqua ca nun leva itassa (sete) chillu punto ‘ncrassifica rusecato â Roma!

Passammo ê ppaggelle

REINA 6 Nun ce putette fa niente ‘ncopp’â cabbesera (colpo di testa) ‘e Nestorovcki ca ‘o futtette; p’’o riesto nun êtte ‘a fa niente o quase.

Difesa

HYSAJ 4 Facette ‘a solita fessaria ca ‘e chisti tiempe fa a ògne mubbara (partita); ajere trasette a vvacante ‘ncopp’a ‘nu cruzzo (cross) e llassaje via libbera ‘e capa a nNestorovski ca nun se facette prijà! Sta stanco e nnun ggià ‘a mo. I’ ll’êsse fatto arrepusà e avesse fatto jucà a mMaggio!

Raul ALBIOL 5,5 Miezu zifo (voto) mancante pecché si cumannaje bbuono ‘a sezziona (reparto), sbagliaje quanno lassaje ‘a muntaca (ll’area ‘e rigore) ‘mmano a Hysaj cosa ce ce custaje caro, visto ca pure Maksimoviccio ll’êva lassata ‘a muntaca jenno cercanno accunte fora.

MAKSIMOVIC 5,5 Miezu zifo (voto) mancante pure a isso pecché si fove alicante quanno ‘nchiusura fermaje a tTrajkovski, comme ô cumpagno ‘e sezziona (reparto) facette ‘a sciucchezza, isso ca è auto e ccapace ‘e capa, ‘e lassà scuperta ‘a muntaca(ll’area ‘e rigore) ascenno fora.

GHOULAM 5,5 Catimmo (reduce) dâ coppa affricana dètte ‘a ‘mpressione d’essere troppo a ccurto ‘e ràseca e ttàlaca (agilità e scioltezza) tant’è vvero ca tutt’’e iabbre (cross) suoje fóveno spisso itarraddate (intercettati) e nnun servetteno a nniente!

Centrocampo

ALLAN 5 N’atalossa majulla (prestazione anonima). Nun fove nè ccarne, nè ppesce e ppe cchiú ‘e cinquanta minute aizaje porvera; po finalmente Sarri capette ca nun era cosa e ffacette trasí a zZielinski e fósse stato meglio ca ‘o guaglione êsse jucato ggià dô primmo minuto senza rijalà quase n’ora â bbanda siciliana!

[dô 54’ ZIELINSKI 6,5 Quanno- finalmente! – trasette cagnaje ‘a ggiostra i ‘o   Napule dètte ‘a ‘mpressione ‘e cagnà màsira (marcia).Isso allimmeno ce pruvaje dô lemmeto e dô père suojo nascette ll’azziona d’’o pareggio!]

JORGINHO 4 Serata no, anze serata ‘a pigliarlo a ppacchere: n’êsse ‘ncarrato una! Troppi pasiglie (passaggi) sbagliate e cquanti llanze fora mesura!

[dô 63’ PAVOLETTI 5 Arfadanatto (ingolfato) e ttrasuto a ffacenna cumprumessa nun fove crestiano d’agghiuntà niente a ll’attacco cuano (azzurro). Chi sa’ si avesse jucato dô primmo minuto che succedeva! Forze êsse pigliato ‘e mmesure adatte e avesse fatto coccosa! Chi ‘o ppo’ ddicere?]

HAMSIK 6 Tutto summato ‘o capitano fove ll’unico ‘e ll’armidanno cuano (centrocampo azzurro)a ddà ‘na mana â munàvara (manovra) uffenziva pure si ‘e bbassurere (suggerimenti) suoje foveno sempe lanze luonghe pe Peppe ‘a ‘nguenta e pp’’o riesto nun cercaje o nun riuscette maje a ttruvà ‘a porta!.

Attacco

CALLEJON [Peppe ‘a ‘nguenta] 5 ‘nu zifo (voto) mancante pecché sotto porta cchiú ‘e ‘na vota sbagliaje a scegliere o dimustrannose troppo ananío (egoista) o nun truvanno ‘a squina (l’angolo); súbbeto doppo ll’uno a zzero lle capitaje ‘nu pallone d’oro e isso ‘o mannaje nun se sapette addó!

MERTENS [Ciruzzo] 7 Dètte ll’anema, pruvanno d’ògne mmanera a sfravecà ‘o muro ‘e ll’isulane, ma ce riuscette sulamente doppo cchiú ‘e n’ora ‘ncullabburazziona cu ‘na papera e mmeza ‘e Posaveccio doppo d’averelo ‘mpignato cchiú ‘e ‘na vota.

INSIGNE 5 ‘Nu zifo (voto) mancante pure a isso ca ajeressera nun me piacette p’’e bbia d’’e troppi prane (errori) fatte nun sulo ‘int’â tammía (sviluppo) d’’a munàvara (manovra), ma pure p’’e curtate (tagli) da mancina a ddritta senza pricisione e soprattutto p’esserse magnato ll’addaffa (rete) durante ‘o scarzo aintisso (recupero) da ‘nu pizzo addó è ‘mpussibbile sbaglià! E cche saciccio!

Sarri

All. Sarri 3 Me dispiace, ma quanno ce vo, ce vo e ‘sta vota ‘o mutarribbo (allenatore) cuano (azzurro) nun s’ammereta cchiú ‘e tanto… i è ppure assaje; chella d’ajere ggià se sapeva ca fósse stata ‘na mubbara addó cuntava ‘a forza e ll’armaddia (fisico) e isso ‘a liggette malamente sbaglianno cumpletamente furmazziona; ‘ncampo, dô primmo minuto nce fosse vuluto ggente comme a dDiawarà, Zelinski e ppure Pavoletti, pe ppo spaccà ‘a mubbara (partita) facenno trasí a cCiruzzo e ssenza sciupà ll’intero primmo ajone (tempo) cu gGiorggigno ca, comme v’aggiu ditto, nun ne ‘ncarraje una!

Arreto po ô posto d’ Hysai ca, comme se vedette, sta stanco e ffa allimmeno ‘na fessaria a mmubbara (partita) nce fósse vuluto Maggio. Senza scurdarce po ca tocca a isso e nno a mme spiecà e ffà capí ê madàffie (difensori) ca, quanno attacca ‘a scuatra avverzaria, dint’â muntaca (ll’area ‘e rigore) ce à dda rummané allimmeno uno ‘e lloro, uno ca fósse auto pe ccuntrastà a cchi trase ‘e capa! È overo ca ‘sta cosa ll’êssen’’a capí a ppe lloro, ma si nun ‘o ccapisceno è ‘o mutarribbo (allenatore) ca ce ll’à dda fa capí,nun aggi’’a essere i’!

arb. CELI 4 Tanto s’ammereta ‘o frate scemo ‘e Schettino  pe nnunn’ avé nutizziato (ammonito) e forze pure jettato fora a cchiú ‘e ‘nu delinquente cu ‘a maglia siciliana e soprattutto p’avé cunzentito troppi pperdite ‘e tiempo e troppi sceneggiate fatte pe ffarese curà ‘a malatia ‘e ndindò [a tte ssí i a mme nno!]stise ‘nterra a ccentro campo recuperanno sí e nno cinche minute addó pure ddurice minute nun êsseno apparato ‘o tiempo perzo!

E fermammoce cca. Jette comme jette; dàmmoce n’atu pizzeco ‘ncopp’â panza e gghiammo ‘nnanze. Pacienza!

Ve saluto e, ssi dDi’ vo’, ce sentimmo dummeneca ca vene   doppo d’’a nacchèlla (traferta) a bBulogna ‘e sapato a ssera. Staveti bbe’!