Napoli-Torino, le pagelle in lingua: Mertens è il migliore, mezzo voto in meno a Callejon per il rigore procurato. Reina è insufficiente.
Napoli-Torino 5-3, ‘a vedette accussì
Canta Napoli, guagliú! Ajere, ‘mmerz’ê ttre ô san Paolo ‘nnante a scarze trentamila masciadde (spettatori) ‘a scuatra cuana cunzignaje cinche sfugliatelle ricce â scuatra d’’o zincaro ca veneva ggià ‘a doje mazziate e ssiccomme nun c’è ddoje senza tre, ajere pigliaje ‘a terza cu ‘nu punteggio ch’êsse pututo essere cchiú ccauzante d’’o cinche a ttre finale, si ‘e guagliune ‘e Sarri nunn’êsseno fatte tre ffessarie [ddoje cu pPepe Reina i ‘a terza cu pPeppe ‘a ‘nguenta ] ca ce custajeno ‘e ttre addaffe (reti) d’’e piamuntise. Pacienza! ‘O mmuimmo (importante) era ca s’êv’ ‘a vencere e sse vincette surpassanno ‘ncrassifica ‘o Milanno e ppiazzannose ô terzo posto a ‘nu punto dâ Roma siconna. I ‘o cchiú bbello fove ca ajere Ciruzzo d’’e ccinche sfugliatelle ne cunfezziunaje addirittura quatto: tre ggià ô primmo ajone (tempo) i ‘a quarta ô 79’ e ffove spettaculare overo visto ca se trattaje ‘e ‘nu pallunetto ca facette dicere pure ô Vampiro nuosto: “Mamma mia!”. Peccato, peccato pe cchelli ttre fessarie ca nun ce cunzentetteno ‘e nchiudere ‘a mubbara (partita) cu ‘a porta acrata (inviolata) comme ce stevemo abbituanno! Però ‘a suddisfazziona p’’a nichemata (vittoria) cunquistata fove ô stesso grossa assaje e vvoglio sperà ca pure ggiovedí ca vene cua ‘a nacchella (trasferta) a fFirenze ce mettimmo dint’â sacca ‘nu risultato pusitivo senza fà piglià collera a sSarri ca ajere se ‘ncazzaje assaje p’’e ttre ffessarie. E avette raggiona, pecché ‘na prattica misa a pposto ggià durante ô primmo ajone (tempo) cu ttre stuche (gol),nun s’à dda mettere ‘ndiscussione a ll’arrancua (ripresa cu ttre ffessarie! Passammo ‘e ppaggelle:
Reina 4.5 – Me dispiace d’’o ddicere, ma ‘e fatte chiste so’: ajere Pepe fove ‘o peggio d’’e cuane e nnun lle pozzo perdunà d’avé tenuto ‘ncopp’â cuscienza ddoje ggrossi fessarie, ‘a primma ‘e pere sbaglianno ‘nu pasiglio (passaggio) i ‘a siconna addirittura ‘e mano perdenno ‘na palla ggià cunquistata e pperza ‘a fesso. So’ ccose ca uno comme a isso nunn’ à dda fà!.
Hysaj 6 – Con Cu n’ uddú (calma) filusofica riuscette a ccuntené ll’aindaffe (affondi) ‘e ‘nu Liajiccio attrezzato. L’aspetta ‘a bbrica (duello) cu CR7 ma aggio ll’impressione ca nun lle mette paura!
Albiol 5.5 – Me dispiace pure pe isso, ma nun pozzo fà a mmeno ‘e rimannnarlo a ssettembre soprattutto p’’a fessaria fatta cu pPepe ‘ncopp’a cchillu pasiglio (passaggio) sciaurato; sbagliaje pure quaccosa quanno ascette.
Chiriches [Vampiro] 7 – Se facette tutt’ ‘o campo p’’o lluongo accummincianno e cunchiudenno ll’azziona d’’o quatto a uno. P’’o riesto nun sbagliaje niente risultanno ‘o meglio d’’o pacchetto arritrato.
Ghoulam 6 – Mubbara (partita) senza acute, ma pure senza sfregazze (sbavature). Cercaje pure ‘a porta ggià ô siconno minuto cu ‘na timmurria (punizione) ca se chiammaje ll’applavuse d’’e bbemate (spalti).
Jorginho 6.5 – Qualità e ppasso turnajeno finalmente a ddisposizziona d’’a scuatra facennoce vedé ‘o jucatore d’’a tempurata (stagione) passata.. [Dô. 69′ Diawara 6 – Facette ‘o ssuojo.]
Zielinski 6.5 – Assieme ê cumpagne suoje ‘e sezziona (reparto) vincette ‘a brica contro ê culleche ‘e ll’armidanno (centrocampo) piamuntese [Dô 73′ Allan 6 – Pur’isso se facette apprezzà]
Hamsik 7 – Solita mubbara (partita) praticamente matàla (perfetta) chella d’’o capitano cuano (azzurro) Ll’êsse miso pure ‘e cchiú si ô finale fósse stato cchú mascullo (lucido) e avesse miso dinto ‘o stuco (gol) d’’o seje a ttre!
Callejon [Peppe ‘a ‘nguenta] 6,5 – Miezu zifo (voto) mancante pe cchella fessaria fatta prucuranno ‘o ricore p’’o Turino pecché p’’o riesto l’atalossa (prestazione) soja fove bbona cunnita comme fove cu ‘nu pare d’jusaide (assist) ‘a primma pe cCiruzzo ca cu ‘nu tiro a vvolo sbluccaje ‘o sibbacco (match) i ‘a siconna p’’o mumentaneo quatto a ddoje d’’o Vampiro.
Mertens [Ciruzzo] 10 – Ato ca ‘o pipitai! Pe cCiruzzo sette stuche (gol) ‘int’a ddoje mubbare (partite) senza scurdarce ‘o ricore prucurato e trasfumato. Sbariaje ‘ncopp’a ttutta ‘a camma (zona) d’attacco nun sulo signanno, ma cupulianno (dialogando) cu cumpagne suoje ‘e sezziona (reparto) e muvennose comme a ‘nu vero mudirro (regista) avanzato. Ll’urdemu stuco (gol) po, signato cu cchillu pallunetto ca v’aggiu ditto, m’arricurdaje, nun voglio fareme piglià pe ppazzo, a uno ca chelli ccose ‘e ffaceva spisso e nno ‘na vota tanto. E ppenzo ca avite capito ‘e chi sto’ pparlanno!
Insigne [Lorenzigno] 6.5 – Mubbara (partita) assaje cummincente d’’o vintiquatto cuano cunnita ‘e zarfe (scambi), sumbrere,e ppasiglie (passaggi) a zzuco ‘e caramelle; Peppe ‘a ‘nguenta êss’ avut’ ‘a sfruttà allimmeno quacche pparabbula disignata apposta p’isso ‘a Lorenzigno.). [Da ll’ 81′ Giaccherini s.v.]
All. Sarri 6 – Aggiu sempe ditto ca quanno se vence ‘o primmo ca s’à dda ringrazzià è ‘o mutarribbo (allenatore), ma ogge ll’avimma sbattere ‘e mmane p’avé trasfurmato a cCiruzzo e averne fatto uno ca po’ tenerese dint’â sacca a cchillu sicchio ‘e lota d’’o pipita, a gGabbiadini, i a pPavoletti!
Arb. Doveri 6 – Niente ‘a dicere; ‘na vota tanto facette ‘o duvere suojo.
E ccu cchesto ve saluto; fermammoce cca ddannoce appuntamento, si dDi’ vo’!, a vviernarí ca vene doppo d’’o scontro ‘e nàcchela(trasferta) cu ‘a Fiorentina,p’’o turno ‘e miezo semmana , speranno ca ve pozzo cuntà ‘e ‘nu risultato pusitivo! Staveti bbe’.
