Le pagelle in lingua di Fiorentina-Napoli: Mertens e Insigne promossi a pieni voti, Reina, Hysaj, Diawara e Maksimovic rimandati all’anno nuovo.
Fiorentina-Napoli 3-3, ‘a vedette accussì
Nun ce simmo, guagliú, nun ce simmo! Che nervatura e cche accasiona perza e ssi nun stessemo a nNatale, quanno âmm’’a essere tutte cchiù bbuone, sa’ che lletania ‘e maleparole lle cunzignasse a ttutte ‘e cuane p’’e duje punte jettate ajeressera ô Franchi quanno ce avettemo ‘accuntentà ‘e ‘nu punto ‘mmece d’’e tre ca fósse stato pussibbile e nnisciuno avesse pututo dicere niente.
Ma purtroppo nun ghiette accussì e ddoppo ‘nu primmo ajone (tempo) bbastantamente bbuono, arrivate a ll’arrancua (ripresa), ‘o Napule nun fove cchiù isso e soprattutto dimustraje ‘e nun tené tutt’’a cazzima i ‘a cattiveria ca s’à dda tené p’essere ‘na granna scuatra e ppe ddoje vote ‘nvantaggio nun sulo se facette arrivà, ma addirittura surpassà e mmenu male ca po ô 94’ Gabbiadini,trasuto da poco ô posto ‘e Diawara riuscette a mmettere dinto ‘o ricore prucuratose ‘a santu Ciruzzo e ca nemmeno chillu tagliaperucchie ‘e ll’arbitro ce putette nijà tanto fove chiaro…, si no ce fóssemo ‘ntussecate vermicielle a vvongole, capitone, vruoccole, mussillo fritto, ‘nzalata ‘e rinforzo,scioccéle, struffule,raffiuole a ccassata, pasta riala, mustacciuole e susamielle natalizzie.
Cheste però so’ mmalincunie; nun ce penzammo: meglio ‘nu punto ca ‘nu caucio dint’ê rine. Jette accussí e ppacienza, guardammo annanze e aspettanno ca torna Arcadio, sperammo ca Sarri lle ttira ‘e rrecchie ê cuane facennole addivintà cchiú scafate e ffiglie ‘e zoccole e lle fa capí, soprattutto ê mediane ca ‘ncopp’ê repartite (ripartenze) ‘e ll’avverzarie,si se vede i appena se vede ‘o fatto cumprumesso o ‘nzipeto s’à dda fà carí (fallo) , súbbeto, a ccentro campo, e nun s’à dda dà accasione a cchi porta palla ‘e avanzà facenno danno o crijanno pericule; ‘e figlie ‘e zoccola accussí ffanno!
Passammo ê ppaggelle:
Reina 5 – Serata no p’’o purtiere cuano ca prutestaje inutilmente e troppo, capenno ‘na cosa pe n’ato e facennose nutizzià (ammonire) quanno Kalinicccio ruciuliaje ‘nterra pe ccacchie d’’e suoje e isso penzaje ca Tagliaventi ll’avesse assignato ‘nu ricore contro,ma soprattutto pecché se facette fottere ‘ncopp’â primma addaffa (rete) ‘e Bernardeschi dâ deviazziona ‘e Peppe ‘a ‘nguenta e nun fósse succieso si aspettanno ‘o tiro ‘e timmuria (punizione)se fósse piazzato a ccentro ‘e porta e nno vicino ô palo ‘e mancina; piezzo e ppejo po quanno se menaje tarde ‘ncopp’ô tiro d’’a siconna addaffa (rete) ‘e Bernardeschi facennose fottere ‘a trenta metre! E cche saciccio!!
Hysaj 5,5 – Pruvaje sulo a mmantenere ‘a pusizzione, ma se facette vedé poco annte.
Albiol 5 – Nunn’erano passate trenta siconne e ffove nutizziato (ammonito) pe ssenza niente e gghiucaje pe tutt’’a mubbara (partita) cu ‘a paura d’essere jettato fora. Arrivato po ô 43’ rummanette orfano d’’o Vampiro e gghiette ‘int’ê chiavette e ppure isso arrivaje tarde pe nchiudere ‘ncuollo a Zzarate e nun farelo tirà!
Chiriches [O Vampiro] 6 – Quaranta minuti senza suffrí troppo mettenno ‘a musarola a cKaliniccio senza farse ‘mpressiunà. Po’ purtroppo se jurraje (infortunò) e avette’ascí. [Dô 43′ Maksimovic 5 – Nun me piacette:troppo muiccaddo (macchinoso); Zarate e cKaliniccio ‘o mettetteno ‘ncrise comme e cquanno vuletteno]
Ghoulam 6 – Meno d’ati vvote, ma tutto summato se dètte da fà ‘ncopp’â curzia mancina, riuscenno pure a ffarese vedé arreto.
Zielinski 6 – Dimustraje ‘e sapé ggiustrà e ttraccià bbonni giumetrie; avette n’accasione duranrteô primmo ajone (primo tempo), ma venette murato ‘a Tatarusanu; peccato ca ajere nun lle riuscette ‘e truvà ‘a porta mettenno a ffrutto tutt’’e ‘nserzione i ‘e cupuliamiente (inserimenti e scambi)fatte. [Dô 70′ Allan 5 – Trasette e dètte ‘a ‘mpressione ‘e vulé spaccà ‘o munno, ma fove fuoco ‘e paglia;sbagliaje cchiú ‘e ‘nu pallone ‘mpurtante e soprattutto manch’isso avette ‘o cuorio ‘e fà carí (fallo) pe ffermà ô 74’ aBbernardeschi.]
Diawara 5,5 – Forze Sarri avette fatto meglio a ffarele risciatà dô pprincipio; ajere me piacette poco: troppo bbatì (lento), e ppoco faillo (efficace) ‘ntrancatura (interdizione). [Da ll’87’ Gabbiadini 7 – Assaje nun facette,ma – trasuto ‘a poco – ô 94’ fove curaggiuso a ppigliarese ‘a respunzabbilità ‘e tirà ‘o ricore ca trasfurmaje cu ffreddezza assicurannoce ‘o 3-3!]
Hamsik 5,5 – Facette meno ‘e quanto me fósse aspettato; si se ‘nzertaje (inserí) spisso, tentanno quacche ‘stiglia (verticalizzazione) cu ppasiglie (passaggi) ‘nteressante, ma se vedette poco ‘ncamma d’addaffa (zona gol), nè dètte ‘na mana ‘ntrancatura (interdizione).
Callejon[Peppe ‘a ‘nguenta] 5,5 – Fove uno d’’e meno periculuse lla ‘nnante nun riuscenno maje a cunchiudere cercanno ‘a porta; pe gghionta ‘e ruotolo cumbinaje ‘a frittata tavvillanno (deviando) ô 57’ cu ‘e spalle ‘a timmuria ‘e Bernardeschi e ffuttenno a rReina, addó – si fósse rummanuto ‘e faccia, senza girarse avesse pututo fermà ‘e pietto ‘io pallone
Mertens [Ciruzzo] 8 – Comme ne faje a mmeno? Ajere ce prucuraje ddoje ggioje: ‘a primma cu ll’addaffa (rete) d’’o doje a uno signata ‘e rapina e ppricisione, i ‘a siconna cu ‘o ricore procuratose ca, trasfurmato ‘a Gabbiadini, ce dètte ‘o punto d’’o russimmo.
Insigne [Lorenzigno] 7,5 – Accussí sí! Cercaje spisso ‘a jucata e spisso venette cercato dê cumpagne facennose sempe truvà pronto, pe ‘nun parlà ‘e ll’addaffa (rete) ca sbluccaje ‘o sibbacco (match) ca fove ‘nu capolavoro disignato cu ‘nu tiro ‘e dritto ca s’ajzaje e scennette ppe gghirese a ddeposità ê spalle ‘e Tatarusanu quase dint’ô sette! ‘Na delizzia!!
all. Sarri 5,5 – Miezu zifo (voto) mancante pecchè nun détte ‘a cazzimma i ‘a cattiveria nicessaria â scuatra soja; p’’o riesto ‘o Napule dâ mità ccampo a ssaglí jucaje comme ô ssolito facennose apprezzà e rispettà allimmeno p’’o primmo ajone, ma arrivate a ll’arrancua (ripresa) ‘a mediana abballaje e ‘a tràsera (retroguardia), asciuto ‘o Vampiro, spisso jette dint’ê chiavette sufferenno ll’ iummuddadde (contropiede) paunazzo. Pe bbona sciorta soja Ciruzzo se prucuraje ‘o ricore e gGabbiadini riuscette a ttrasfurmarlo.
Arb. Tagliavento 5 – D’’o tagliaperucchie nun ne voglio parlà,pe nnun ascí fora d’’a vuluntà d’’o Cielo visto ca è overo ca proprio nun ne putette fà a mmeno ‘e darece ‘o ricore d’’o russimmo (pareggio), ma cundizziunaje malamente a Albiollo nutizziannolo ad capocchiam e soprattutto ce jette a cchillu servizzio nun ghiettanno fora a cKaliciccio e sse facennose cartià dâ sceneggiata soja quanno tentaje ‘e ffarese assignà ‘nu ricore ca nun ce steva ma po dicette ch’era ruciuliato sparagnannose ‘a garda (ammonizione) e scanzannose d’essere jettato fora!
E ccu cchesto ve saluto e vve faccio tante e ttante avucurie p’’e ffeste ca stanno venenno; divertiteve e mmagnate forte pure pe mme ca nun ‘o ppozzo fà e si ‘o vvo’ ‘o Cielo ce sentimmo a ll’anno nuovo, doopo ll’antraffa (partita) casalinca cu ‘a Sampadoria. Staveti bbe’!
