Cagliari-Napoli, le pagelle in lingua: Mertens migliore in campo, ma tutti sono stati promossi. Sarri si merita un volo alto, diciamo pure 7.5.
Cagliari-Napoli 0-5
‘O core dint’ô zzuccaro, guagliú! Sciala popolo! Ajere a ll’ora ‘e ll’apritivo ‘o Napule scennette ‘ncampo ô sant’Elia cu ‘a muntazzimma (divisa) ca porta bbuono, chella d’’a Maronna ‘e ll’Arco e sse nne vedette bbene ‘e chilli quatte profuche d’’e cagliaritane, addirittura sbrasanno e cunzignannole cinche sfugliatelle senza guantiera ch’êsseno pututo essere pure otto si pe ttre vvote jucature cuane (azzurri) libbere e ffranche a ttu ppe ttu dint’â camma (area) piccerella cu ll’urdemu jucatore ‘e Rastelli nun se fosseno magnate tre addaffe (reti)…., ma forze ‘o ffacetteno pe nnunn’esaggerà e rrennerse antipatiche, visto ca pe ttutto ‘o sibbacco (match) chilli povere profuche cagliaritane nun sapetteno che ppisce piglià pe ccuntrastà ‘o juoco urdinato e a mmemmoria d’’e cuane e cchiú dd’uno ‘e lloro se cacave sotto nunn’appena ‘o Napule aizava ‘o tase (ritmo) e s’accustava â muntaca (area di rigore).
‘Nzomma ‘o Napule s’accuntentaje ‘e vedersene bbene [e cchi se divertette ‘e cchiú fove Ciruzzo ca se purtaje ‘o pallone â casa ] ‘nchiudenno ‘a mubbara (partita) pe ccinche a zzero e ssignanno cu Ciruzzo ô 34’, ô 69’ i ô 72’, ô 45’ cu Marekiaro e ccu Zielinski ô 51’.
A ‘stu punto putesse mettere 8 a ttutte quante e sparagnarme ‘a fatica d’’e ppaggelle. Però ce sta chi ‘e vvo’ e nnun voglio deluderlo; ‘e ffaccio!
Reina 6,5 – Pe bbuone uttanta minute restaje a gguardà che succedeva e ssulo allora s’êtt’’a spurcà ‘e guante fermanno ‘na palla ‘e Fariasse; p’’o riesto se divertette a mmestiere cu ‘e piede pe ‘mpurrà (avviare) ll’azziona. HYSAJ 6,5 Bella atalossa (prestazione) ‘e ll’albanese cuntrullanno a sSau, nchiudenno sempe bbuono e sustentanno ll’azziona uffenziva ‘e Caglieconno. S’êsse avuta sparagnà ‘na paraínesa (ammonizione) abbuscatese a ll’arrancua (ripresa).
Chiriches 6,5 – S’appresentaje ‘ncampo a ssurpresa p’’o rutizzio (turnover) vuluto ‘a Sarri e gghiette a cciammiello nun sbaglianno niente pure a ddaimmo (sostegno) ‘e ll’azziona.Peccato ca Marekiaro nun apprufittaje ‘e ‘na bbela jusaida (assist) soja.
Koulibaly 6 – Fove ‘o solito muro pe quase tutto ‘o primmo ajone(tempo) allimmeno nsi’ ô 40’ quanno dint’ a ‘nu scontro ‘e juoco nce refunnette ‘e ppenne, se facette male e sse nn’êtt’’ascí. Peccato! [dô 42’Albiol 6,5 – Partecipaje, senza sbaglià niente, â festa proprio quanno steva p’accummincià i ‘e nassíe (attaccanti) isulane lle facetteno ‘nu bbaffo!]
Strinic 6,5 – Senza fà ‘e straurdinarie se facette valé ‘ncopp’â curzia soja,cupulianno (duettando) cu Insigne e ccumpurtannose a mmestiere pure quanno êtt’’a difennere.
Zielinski 7,5 – Doppo appena ‘nu quarto d’ora, cadenno malamente, ‘o denucchio ne risentette e ppoco mancaje ca nun ascesse, però se repigliaje, restaje ‘ncampo,rijalanno qualità a ll’ armidanno (centrocampo) cuano (azzurro) e addirittura signaje, cu ‘na pricisa cagliosa ‘a fora, ll’addaffa (rete) soja, siconda cunzecutiva ‘ncampionato [dô 70′ Rog 6 ‘E stima]
Jorginho 6,5 – Durante â primma parta d’’o sibbacco (gara) facette ‘e tutto pe nnun mme piacé sbaglianno quacche ppurzo (tocco) pure facile; però a ll’arrancua (ripresa) se repigliaje bbuono e sse mettette a ffà ‘o spezziale!
Hamsik 7,5 – N’ata atalossa (prestazione) ailla (monumentale) d’’o capitano ca fove sempe anàtrupo (devastante) quanno s’isaguggiaje (inserí) risultanno ‘na specie ‘e nassía (attaccante) spustato a ll’armidanno (centrocampo); partecipaje a quase tutte ll’azzione uffenzive cuane (azzurre), cercaje ‘o stuco (gol), se ne magnaje uno sotto porta, ma po ‘o truvaje e ffove chillo nummero 105 cu ‘a maglia d’’o Napule,uno cchiú ‘e Cavani! E ffove isso ca arapette ‘a strata pe ll’addaffa (rete) ‘e Zielinski, piscato cu ‘nu priciso bbassurero (suggerimento) urizzuntale
Callejon [Peppe ‘a ‘nguenta] 6,5 – Fove poco priciso ô mumento ‘e cunchiudere, ma no quanno servette ê cumpagne comme quanno pittaje ‘nu iabbro (cross) a zzuco ‘e caramella pe lLorenzigno.
Mertens [Ciruzzo] 9 – Ato ca favezu nove! A cCagliari, comme a lLisbona, ll’arillo bbergo fove ‘nu veru micidiale nassía (attaccante); ne facette addirittura tre mettennose dint’â sacca a cqualuncue avverzario e nnisciuno riuscette maje a ccuntrullarlo. [dô 75′ Giaccherini s.v.]
Insigne[Lorenzigno] 7 – Sempe tassuso (svelto)dètte ‘nu cuntribbuto sustanziuso â sbrasata d’’o Napule,cu pparicchi mubbadare (iniziative), cupulianno (duettando) cu ‘e cumpagne e sservenno n’jusaida (assist) d’oro a cCiruzzo ca trasfurmaje. Peccato pe cchella afachía (traversa) ca nun lle cuzentette ‘e signà!
All. Sarri 7,5 – Pure si ‘o juoco d’’o Napule oramaje tutte ll’ànnu scanagliato, ajere ‘o Cagliari nun sapette comme cacchio urganizzarse p’adderezzà ‘na varca ca affunnava. Ô Napule serveveno tre ppunte e ss’ ‘e gghiette a ppiglià sbrasanno. Bbuono pe nnuje e pp’’o mutarribbo (allenatore) nuosto ca avette bboni rrisposte pure ‘a chi joca poco o quase maje!
Arbitro Calvarese 6 – Facette ‘o duvere suojo.
E fermammoce cca ddannoce appuntamento, si dDi’ vo’ justo ‘nfra ‘na semmana doppo d’’o scontro casalinco contro ô Turino ca certamente dummeneca ca vène, scenne cca a ffà ‘a mubbara (partita) d’’a vita, pure pe ffà scurdà ‘a paccheriata pigliata ajere, ‘ncasa, dâ vecchia zoccola! E sperammo ca ve pozzo cuntà ati bboni ccose! Staveti bbe’.
R.Bracale Brak
