Napoli-Sassuolo, le pagelle in lingua: bocciati Hysaj e Sarri, promossi Koulibaly e Insigne. Per l’arbitro Valeri, voto 4.
Napoli-Sassuolo, le pagelle in lingua
Mannaggia chello ca nun se po’ ddicere, guagliù! Ajeressera ô san Paolo, ‘nnante a cquarantamila spettature, ‘o Napule jettaje dint’â mmunnezza n’ati dduje punte e ‘mmece ‘e vencere comme fosse stato nicessario e era pussibbile c’ êttem’ ‘accuntentà ‘e ‘nu gramu punticiello e ffove acqua ca nun leva sete, visto ca ce ne fosseno servute tre pe sfruttà a mmestiere e pp’apprufittà d’’e ccarocchie pigliate dâ vecchia zoccola p’’e mmane d’’e crifune.
E cquanno ce ricapita n’ata accasiona e cheste? Quanno?! ‘O Napule êsse avuto scennere ‘ncampo cu ‘o sanco a ll’uocchie diciso e ccomme a ssutterrarla sotto a ‘na muntagna d’addaffe (gol)) i a ffarene purpette d’’a scuatra ‘e culo-‘e-chiummo, deciso a ffarla ascì chiagnenno dô campo a cchella scuatra assineja (satellite) d’’a vecchia zoccola, ‘mmece jette a ffernì ca a cchiagnere fovemo nujaute ‘ntribbuna divano, mentre ‘e gghiastemme saglieveno ê ciele vedenno ‘e nuoste ca ggiravano a vvacante aizanno porvere, tutte cu ‘e ccosce mosce, sbandanno senza teleje (idee), nun cercanno ‘a porta e nun truvannola maje allimmeno nsi’ ô 42’ quanno finalmente Insigne se ‘nventaje ‘nu bbellu tiro a ggiro ‘a fora e ffuttette a cConsigli! Però poo da chillu mummento a gghì ‘nnante ‘o Napule quase s’accuntentaje e nun cercaje ‘e nchiudere ‘a mubbara (partita) comme pure fosse stato nicessario, datose ca ‘o Sassuolo nun ce stette a pperderlo ‘o sibbacco ( match) e abbiaje a ccercà ‘o pareggio cu tutt’’e fforze jucanno ‘a mubbara (partita) d’’a vita [comme fanno tutt’’e scuatre ca jocano contro a nnuje] e cquanno Di Francesco se rennette cunto ca Matri, Missiroli e rRagusa sotto ô Vampiro i a Koulibalý steveno facenno palla corta, arrivate ô 70’ levaje a mMissiroli [ca pure era stato ‘o cchiú ppericuluso cuglienno ll’alafachía (traversa) cu ‘na cabbesera (colpo di testa) ‘a fora]e ffacette trasí a dDefrello; nun ll’avesse maje fatto! F
ove ‘a mossa justa pe lloro pecché, arrivate a ll’81’, dalle e ddalle ‘o cucuzziello addiventa tallo, fove proprio Defrello a ffarece chiagnere recuglienno ‘nu iabbro (cross) da dritta e ‘nfilannose ‘nfra ‘o Vampiro [‘mpignato a ccuntrullà Matri] i a Hysaj [ca ‘mmece durmeva cu ‘a zizza ‘mmocca e nnun ‘o jette a nchiudere] mettette palla ê spalle ‘e Reina ca nun avette manco ‘o tiempo ‘e dicere: “Maronna ajuteme!” e pputette sulo recogliere ‘a palla ‘nfunno ô sacco. Tutto chesto p’’a cunzulazzione d’ ‘e troppi cestarielle ca ce vonno male e ‘mprimmose ‘e ggiggino uocchie-stuorte e de ll’ armuillacco (telecronista) ‘e SKY ca ce tiraje ‘e piere pe tutt’’o sibbacco (match) e pp’’a cuntentezza ‘e ll’arbitro Valeri (4) e ppo ve dico. Passammo ê ppaggelle:
Reina 5 – Tenette poco o niente ‘a fà, fove salvato da ll’alafachía (traversa) ‘ncopp’â cabbesera (colpo di testa) ‘e Missoroli, ma nun riuscette manco a ttentà quaccosa ‘ncopp’a ll’ aristurgimmo (capolavoro) ‘e Defrello pe ll’unicu tiro arrivato dint’â murra (specchio) d’’a porta… E cche saciccio!
Hysaj 4,5 – Sí, nun appena accumminciato avette ‘nu paro ‘e cauciune [nun sanziunate ‘a Valeri] ca lle mettetteno paura i ‘o cundizziunajeno pe tutt’’o sibbacco (match) custringennolo a nnun appressurà (spingere) comme êsse saputo fà, ma arrivate a ll’87’ [proprio quanno avesse avuto stà cu ttante d’uocchie apierte] s’addurmette cu ‘a zizza ‘mmocca e nun nchiudette ‘ncuollo a Defrello cunzentennolo ‘e fà chello ca vuleva. E cchisto è ‘nu peccato murtale ca nun le pozzo perdunà!
Chiriches [‘o Vampiro] 6– -Nun pozzo metterle ‘o seje chino pecché si se cumpurtaje a mmestiere mettenno ‘a musarola a mMatri, ‘nnaccasiona ‘e ll’ addaffa (gol) ‘ncassato dô Napule, visto ca Hysaj steva durmenno, êsse avuto lassà perdere a ll’ècchese juventino pe gghí a nchiudere isso ‘nucollo ô nassía (attaccante) d’ armaria (scorta) verde e nniro.
Koulibaly 6.5 – ‘Nu muro ‘mpussibbile ‘a surpassà: cancellaje a cchi capitaje capitaje dê pparte soje e puggiaje (rilanciò) ll’azziona.
Strinic 5,5 – Se facette apprezzà quanno appressuraje (spinse) ‘ncopp’â curzia soja, ma a ll’epata diffaja (in fase difensiva) nun me piacette troppo.
Allan 6 – Uno d’’e poco a essere zéruso e mmuttano (dinamico e propositivo), tiraje ‘a carretta pe tutto ‘o siddaffo (match) e sfresaje (sfiorò) ll’ addaffa (gol) d’’o doje a uno cu ‘nu tiro-iabbro (tiro-cross) streuzo.Nun avastaje. Peccato!
Jorginho 6- – Nun pozzo metterle ‘o seje chino pecché détte sulo quacche ssignale ‘e nadda (ripresa), ma nun fove ancòra ‘o pierno d’armidanno (centrocampo) ca ce serve[dô 78’ Diawara sv]
Hamsik 6,5 – Ll’êsse miso pure ‘e cchiú si se fósse fatto vedé cchiú assaje sotto porta a ccercà ‘o stuco (rete), ma nun ‘o ffacette accuntentannose ‘e jucà a ttutto campo i a ddà quacche bbona palla longa comme a cchella p’ Insigne ‘nnaccasiona ‘e ll’ addaffa (gol)!
Callejon [Peppe ‘a ‘nguenta] 6,5 – ‘Nu rilorgio sguizzero priciso e ppuntuale; se dimustraje essere sustanziale servenno ‘na cifra ‘e pallune ‘mmitante p’’e cumpagne e ffove assaje sfurtunato quanno cu ‘na granna rasulata facette cacà sotto a cConsigli superannolo, ma po êtt’’a vedé ‘o pallone sbattere contr’ô palo e schizzà fora! Che peccato!
Gabbiadini 4 – E ll’aggiu trattato! Niente ‘a fà, nun è proprio ‘a tempurata (stagione) soja. Aizaje porvere pe tutt’’o sibbacco (macth), nun cupuliaje (dialogò) maje cu ‘e cumpagne estrajannose dô juoco comme si ‘o fatto nun fósse d’’o suojo,i ‘a primma vota ca cercaje ‘a porta fove addirittura ô cinquantunesimo e ‘int’a cchell’unica accasiona se nn’ascette cu ‘na cosa ca nun se po’ chiammà tiro, ma ca fove ‘na telefonata a cConsigli ca ‘a fermaje senza prubbleme.Seh, seh marcazzo (centravanti)! ‘E suocce se venneno a pporta Capuana a sseje sorde ô mazzo! [dô 65’ Mertens [Ciro] 5,5 – Miezu zifo (voto) mancante pecché fove fesso. Trasette e ssí cagnaje quase subbeto ‘a museca, ma po smarrunaje quanno facette ‘nu carí (fallo) ca si nun fove fetente, fove inutile e lle custaje d’essere nutizziato (ammonito) ‘a Valeri ca chello steva aspettanno, pe ffarele zumpà ‘a mubbara (partita) ca vene! Ciro, Ciro ‘nu scugnizzo ‘sti ccose nun ‘e ffa!]
Insigne 6,5 – Nun lle pozzo mettere ‘e cchiú pecché è overo ca facette ‘nu bbuonu primmo ajone (tempo), cunfermannose doppo ‘a pareglia (doppietta) cunzignata a ll’Udinese, mettenno dinto ll’ addaffa (gol) ‘ e ll’illusione cu ‘na bbella ‘mmenzione a ggiro… è ttutto overo, ma po pe ttutta ll’arrancua (ripresa) lle mancajeno saffeneja (lucidità) e ttaca (energia) pe nchiudere ‘a prattica ‘nnantepíseto ( in contropiede). [da ll’86′ Giaccherini sv].
All. Maurizio Sarri 4,5 – Si nun se vence soprattutto ‘ncasa, ‘a sfarma (colpa) è ‘mprimmose d’’o mutarribbo (allenatore) ca nun se sape ‘mmentà niente ‘e nuovo pure ‘ncorzo ‘e mubbara (partita) e sse ‘nfessisce cu ‘o solito juoco ca tutte ànnu sgamato e nnun serve cchiú a nniente, comme nun serve a ffà ‘o juoco spettaculare ca nun quaglia pecché nun stammo ô zirco (circo equestre); ‘mmiez’ô campo ‘e juoco s’à dda difennere bbuono, custruí ‘o juoco e ssignà, si è ppussibbile, assaje servennose d’’e ppedine juste e ssi nun ce stanno ‘nu bbuonu mutarribbo (allenatore) à dda trasfurmà a cchelle ca tene sfruttannone ‘e caratteristiche d’armaddia (fisico) d’ognuno: te manca ‘nu marcazzo (centravanti), ma tiene cchiú ‘e ‘nu centromediano auto pussente e fforte ‘e cabbesera (testa)? E spuostane uno annante e mmiettolo a ffà spazzio a cchella bbanda ‘e bbassotti senza saluta ca tiene lla ‘nnante! Tutto chesto Sarri nun ‘o ffacette ajere e fforze nun ‘o ssape fà fissato cumm’è cu ‘e tteleje (idee) soje!
Arbitro Valeri 4 – E nun va cchiú ‘e tanto! Durante ô primmo ajone lassaje correre troppi carí (falli)’e ll’emiliane nun cecanno a vvedé tutte ‘e ffetenzie ca facevano i ‘e mmazzate ca menaveno tenennose dint’â sacca cchiú ‘e ‘nu cartellino jalizzo (giallo), caputiaje paricchi carí (falli) siscanno a ccapocchia contro ê cuane (azzurri) e ddànno ‘a ‘mpressione d’essere stato mannato, romano de Roma a rromperce ‘o pasticciotto i ‘o ttentaje ‘e fà cu ttutte ‘e mezze, peffino mettennose pe ‘mmiez’ê piede d’’e nuoste a ‘mpicciarle e cumpletaje ll’opera cu ‘na tuffa (capolavoro) chella ‘e nutizzià (ammonire), ô primmo carí íardo (veniale) ‘e Ciro sapenno ch’era ggià íattico (diffidato) pe ffarelo zumpà ‘a mubbara (partita) ca vene cu ll’Intèrre! Ca ll’ànn’accidere e nnun ll’ànn’ ‘a pavà a isso i a cchi ‘o mannaje cca!
E fermammoce cca ddannoce appuntamento, si dDi’ vo’ a sàpato ca vene doppo d’’o scontro casalinco contro a ll’interiste ca certamente viernarí veneno cca a ffà ‘a mubbara (partita) d’’a vita! E speranno ca ve pozzo cuntà bboni ccose! Staveti bbe’.
