Le pagelle del Napoli in napoletano: Ciruzzo Mertens cupuliaje assaje cu Insigne, Chiriches pigliaje ‘o posto ‘e Maksimoviccio e ffove a ll’aldezza d’’a situazziona.
Napoli-Empoli – ‘A VEDETTE ACCUSSÍ
A cciammiello, guagliú! Nichemata (vittoria) aveva ‘a essere ajeressera ô san Paolo e cchella fove pure si ‘nu poco cchiú ccumplicata ‘e chello ca m’aspettavo visto ca pe vencere êttem’ ‘aspettà ll’arrancua (ripresa) quanno finalmente ‘e cuane (azzurri) riuscetteno a ssuperà ‘a scuatra ‘e Martusciello scavalcanno ‘o Milànne ‘ncrassifica e turnanno ô terzo posto ancòra a quatto punte dâ vecchia zoccola aspettanno ‘o scontro ‘e faccia sapato ca vene a tTurino. Penzavo fósse stato ‘nu tarribbo (allenamento), mmece nun fove accussí e nn’ascette ‘na mubbara (partita)cumplicata pecché durante ô primmo ajone (tempo) e nuoste pure attaccanno’o ffacetteno senza raggiunà,cu ppoca pricisione, e ccercanno poco ‘a porta e cquanno ‘a truvajeno, ‘o purtiere lloro Scorupski ‘e ppigliaje tutte… menu male ca po a ll’arrancua (ripresa) s’avutaje ‘o Vangelo e se ne venette a ccapo!
Passammo ê ppaggelle:
Reina 7 – Meglio nunn’êsse pututo fistiggià ‘a centesima presenza soja cu ‘a maglia d’’o Napule; cu dduje granne tacculle (interventi) riuscette a mmantènere nchiusa ‘a porta cuana (azzurra) e ppe ddoje vote ce ‘a facette annuzzà ‘ncanna a mMaccarone, ca fove custretto a ffarese ‘e ccroce a mmana smerza e quanno ascette deva ‘e nummere! P’’o riesto Pepe se dimustraje sempe attiento e ppriciso.
Maggio 5,5 – Se vedette e ccomme ca è staggiunato e ppassato ‘e coveta. Nun fove crestiano ‘e dà ‘na mana a cCagliecònne e ppure areto avette cchiú ‘e ‘nu prubblema soprattutto contro a cCroce, tanto è vvero ca quanno ll’Empoli attaccaje , ‘o ffacette sulo dâ parta soja [dô 78’HYSAJ 6 Tutto n’ata cosa a ppietto ‘e Maggio.]
Chiriches [Vampiro] 7 – Pigliaje ‘o posto ‘e Maksimoviccio e ffove a ll’aldezza d’’a situazziona, dimustrannose sempe prisente quanno fove chiammato ‘ncausa e soprattutto pigliannose ‘o lusso [comme m’aspettavo] ‘e signà ll’adaffa (rete) d’’a sicurezza, mettenno dinto, sotto porta, ‘o pallone sfresato (sfiorato) ‘e capa da Marechiaro.
Koulibaly 6,5 – Fove ‘o muro d’’a zaca cuana (retroguardia azzurra) quanno ll’Empoli cacciaje ‘a capa ‘a fora ô sacco aizanno ‘o marcazzo (baricentro) pe ccercà ‘o pareggio e isso, mettennoce cegna (grinta) armaddia (fisico) e attenziona, riuscette a scanzarce guaje.
Ghoulam 6 – Meno priciso d’’o ssolito quanno iabbraje (crossò)i ‘o ffacette poco pure pecché ‘nnante ‘e nuoste scupaveno allerte sott’ô lietto,però fove d’’o pere mancino suojo ca a all’arrancua (ripresa) partette ‘a palla ca addeventaje sfresata (sfiorata) ‘e capa da Marechiaro e misa dinto dô Vampiro addeventaje ll’addaffa (rete) d’’a sicurtà (sicurezza); all’epata (fase) difenziva affannaje sulo contro a mMaccarone.
Allan 6,5 – ‘Nu demmonio.Ttetèttetè! I a ppasso ‘e carreca súbbeto se dètte da fà cu ‘na cunchiusiona larga e ccuntinuaje dànno ‘na mano a ll’epata (fase) ‘e tachettia (copertura) e risultanno dicisivo a recuerà palla comme a cchella ca purtaje a ll’ uno a zzero ‘e Ciruzzo
[dal 71′ Hamsik 6,5 Trasette a mmestiere ‘nfullè (nel macth), mettenno ordine e cupulianno (dialogando) comme sape fa isso cu Insigne e ccu gGhoulamme. Soja ‘a sfresata (spizzata) ca cunzentette ô Vampiro ‘o doje a zzero]
Jorginho 6 – Ajeressera nun sbagliaje, quase niente; nun cunzignaje palla a ll’avverzarie,arsiacaje (fraseggiò) cu ordine senza fà fessarie e addirittura cercaje ‘a porta cu ‘nu tiro putente e sistimato, ma purtroppo Skorupski fove cchiú bbravo d’isso! (dô 72′ DIAWARA s.v.)
Zielinski 6 – Se dette da fà, ma fove poco zincatejo (incisivo)e nun riuscette a ddà sujula (fluidità) â manovra cuana.
Callejon [Peppe ‘a ‘nguenta] 6,5 – Purtroppo lle mancajeno spazzio e ssafeneja (lucidità) pe ffà ‘a cosa justa ô lemmeto d’’a muntaca (area di rigore); ‘ncumpenso furnette ll’jusaida (assist) justa pe cCiruzzo.
Mertens [Ciruzzo] 7 – Cupuliaje (dialogò) assaje cu Insigne facenno ‘e pprove d’’o stuco (gol) ca arrivaje però cu ‘nu bbassurero (suggerimento) ‘e Peppe ‘a ‘nguenta.
Insigne 4,5 – Ô ssolito sujo: jucaje pe ffarese bbello e nno pe ccullabburà cu ‘a scuatra; è overo: se facette ‘nu mazzo tanto pe ttutt’’a mubbara ( partita)ca però risultaje senza sale e scarza ‘e cunnimma soprattutto durante ll’arrancua (ripresa) quanno vulette esaggerà perdenno paricchi ppalle e ppigliannose tanti sische tutte mmeretate!
All. Sarri 6 – Sibbacca (Gara) cchiú ttosta d’’o previsiunato (previsto), ca ‘o Napule riuscette a ppurtà â casa. Azzeccata ll’idea ‘e fà risciatà a mMarekiaro, ma êsse avuto fà ô stesso cu Insigne ca isso êsse piglià p’’e rrecchie e mmettere a dduvere!
Arbitro Mariani 5 – Scadente: siscaje ad capocchiam e nun vedette paricchi carí (falli) ‘ndanno d’’e cuane (azzurri), senza pe ffurtuna fà troppi fetenzie; ‘a sfarma (colpa) nun fove ‘a soja però, ma de chi mannaje n’arbitro rumano a arbitrà ‘o Napule!
E ccu cchesto ve saluto; fermammoce cca ddannoce appuntamento, si dDi’ vo’ a ddumeneca ca vene doppo d’’a nàcchela (trasferta) ô jummerdumstadiumme p’’a mamma ‘e tutt’’e bbattaglie controâ vecchia zoccola janca e nnera . E spero, pure si ‘a veco tosta, ca ve pozzo cuntà bbelli ccose! Staveti bbe’.
