ilNapolista

Milan-Napoli 0-4 / Tre brasciole e ‘na purpetta passe e ppignuole!

Milan-Napoli 0-4 / Tre brasciole e ‘na purpetta passe e ppignuole!

Mo me pozzo pure arricettà cuntento! Doppo d’avé vattuto ‘a juve ‘ncasa nosta, ajreressera ‘o Napule jette ô Meazza a ppaccherià ‘a scuatra d’’o zingaro sinisa cunzignannole tre brasciole e ‘na purpetta passe e ppignuole! Che suddisfazzione! Che bbella cosa a vvedé ‘o Napule dettà legge e essere padrone d’’o campo. Mo penzo ca quaccheduno parlanne d’’o Napule s’ à dda parà ‘o prozo! E vva’ ca no! Passammo ê ppaggelle:

REINA 6 Nun ce puteva fa mancà ‘a presenzia soja e ccumminfatte fove prisente cu ‘na spettaculara parata ‘ncopp’a ‘na cabbesera (testata) ‘e Rodrigo Ely.P’’o riesto nun tenette che fa.

HYSAJ 6,5 Se facette apprezzà pe ccomme difennette urdinatamente e tranquillamente, senza farese spaventà dô campo..

ALBIOL 6 Antraffa (partita) senza prubbleme; ‘na vota sgamato cu qua’ figlie ‘e coperativa aveva a cche ffà nun cadette dint’ â rezza d’’a pruvucazziona e s’’a vedette ‘e bbella mo cu bBacca, mo cu Antonelli,ma nun ‘o tuccaje nemmeno, guardannolo sulo stuorto quanno chisto se tuffaje cercanno ‘e cartià a rRizzoli,ca pe ffurtuna nun ammuccaje… Bravo ô spagnuolo!

KOULIBALY 7 ‘Nu gialante (gigante); anticipanno sia ‘e capa ca ‘e pere mettette ‘a musarola mo a bBacca, mo a Luizzo Adriano, a riprova ‘e ll’enorme putenziale tecnico ca tene; quanno capitaje spezzaje ‘e passe pure a bBonaventura.

GHOULAM 7 Oramaje ‘a fascia ‘e mancina è ‘a soja e ppenzo ch’è ddificile levarcela: difennette bbuono ‘ncopp’a bBonaventura,e ccomme De Sciglio le lassaje spazzio appressuraje (spinse) a mmestiere nfi’ a pprucurarese ll’utobbutto (autogol)d’ Ely p’’o quatto a zzero finale.

ALLAN 7,5 Dignificato (maestoso):currette, cuntrastaje, dette filo ‘a torcere a bBonaventura, a cKucka, a bBertolacci… e gghiette a ttruvà ‘o stuco (gol) ca sbluccaje ll’antraffa(partita). Calaje ‘nu poco a ll’arrancua (nella ripresa), ma avastaje chello fatto ô primmo ajone (primo tempo).

JORGIHNO 6,5 Repigliaje ‘e rretene d’’o centrocampo facennose truvà sempe ‘int’ô vivo d’’o juoco e nun sciupaje maje ‘na palla dimustrannose sempe ‘mpurtante comme dint’ a ll’azione d’’o doje a zzero ch’isso accumminciaje primma ‘e ll’uno-ddoje d’Insigne cu ‘o Pipita.

HAMSIK 6 Forze êsse pututo fa coccosa ‘e cchiú, ma s’accuntentaje d’esalepsà (sradicare) quacche ppallone dê piere russe e nnire e dde menarese dint’ê spazzie arapute da Insigne. (Dô 73° DAVID LOPEZ s.v.)

INSIGNE 8 Fove ll’antraffa (partita) soja: accumminciaje cu n’ajuda (assist) a Allanno; po sagliette ‘ncattedra e ffacette ‘nu ricamo cu ‘o stuco (gol) d’’o dubblato (raddoppio); a sseguí regalaje ‘nu pallone ca Cagliecònno sprecaje malamente; cumpletaje ll’opera cu ‘nu capolavoro ‘e timmurria (punizione)ca ‘o purtiere milanista putette tuccà sulo! Penzo proprio ca chesta è ‘a tempurata (stagione)d’’a cunzacrazziona soja. (Dô 73° MERTENS sv).

HIGUAIN 7,5 Bastaje ‘a presenza soja pe fa cacà sotto a ttutt’’a tràsera (difesa) rossa e nnera comme se vedette ‘nnaccasione ‘e ‘ll’utobbutto (autogol)d’ Ely. P’’o riesto dètte spettaculo ‘e qualità cu ‘nu paro ‘e stoppe eccezziunale, senza dicere d’’o tentativo ‘e signà, fatto ‘e calcagno (tacco); fove ‘nzomma ‘nu pericolo custante pe Ely, ridiculizzato, e ppe zZapata, can un ce capetteno niente; tutta n’ata cifra tecnica a ppietto ‘e tutte ll’ate comme dimustraje cu ll’uno-doje cu Insigne. (Da ll’80° GABBIADINI sv)

CALLEJON 6 Ma sulo ‘e stima pecché fove ‘nu peccato murtale, ca manco ‘o papa po’ assolvere, sciupà chillu bbassurero (suggerimento)d’ Insigne.P’’o riesto êsse avuto ‘a fa assaje ‘e cchiú. Sperammo ca se ll’è astipato p’’a fiorentina!

SARRI 7,5 – Ll’antraffa (partita) d’’e suonne: ‘ncarraje tutto e ttutte lle detteno ‘na mana; ‘a scuatra nun appena guadagnaje ‘nu pallone dint’ â mità ccampo avverzaria, ‘o mettette a ffrutto cu gghiusto ccunísemo (cinismo), lassanno ‘a scuatra ‘e sinisa middenistata (annichilita).

arbitro RIZZOLI 4 Quanno se vence fora casa pe quatto a zzero nun se po’ pparlà ‘e ll’arbitro, ma pe rrizzoli cunzentiteme ‘e fa n’eccezione pe ddedicarle ‘nu paro ‘e chit’èstramuorte e ‘nu vaffanculo cu ‘a nocca p’avé ammunito subbeto Allanno e avé sparagnati troppi ammunizzione ê milaniste.

E ccu cchesto ve saluto e vvisto ca dummeneca nun se joca, pe bbia d’’a nazziunala, ve dongo appuntamento, si dDi’ vo’ p’’e diciannove d’uttombre doppo ll’antraffa (partita) casalinca cu ‘a fiorentina ca sperammo ‘e fa ‘na vutata e ‘na ggirata azzuppannoce ‘o zuco dint’ô piatto! Staveti bbe’
R. Bracale Brak

ilnapolista © riproduzione riservata