Canta Napule, guagliú! Ajeressera se sbluccaje pure ‘ntrasferta ‘o Napule ‘e Sarri e dint’â siconna jurnata d’ ‘o gruppo D d’ E.L., ‘e cuane (azzurri) cataiggidajeno (espugnarono) ‘o campo d’’o Legia Varsavia vincenno pe ddoje a zzero! 2-0.Tutte ‘e dduje ‘e stuche (gol), doppo ‘nu primmo ajone (tempo) passato a ppiglià ‘e mmesure, arrivajeno a ll’arrancua (ripresa). ‘O primmo ô 53° cu Mertenso ca mettette a ffrutto cu ‘na cabbesera (colpo di testa) ‘nu cruzzo (cross) a zzuco ‘e caramella ‘e Cagliecònno;ô 58° po poco mancaje ca Maggio nun facesse ‘na frittata cuglienno ‘e capa ‘o travesagno (traversa) nuosto ‘ncopp’a ‘nu tiro ‘e squina (angolo) e ttutto chesto primma ca Allanno se magnasse pe ddoje vote ‘o dubblato (raddoppio) cosicché êttem’aspettà ca trasesse ‘o Pipita e ca a ll’ 86° cu n’arristurgimo (capolavoro) se ‘mmentasse ‘o stuco (gol) d’’a sicuranza (sicurezza). ‘Nzomma nun ce fove storia; pure luntano dô san Paolo ‘o Napule sapette ‘ngranà ‘a marcia justa pe ccataiggidà (espugnare) ‘a Pepsi Arena ca si pure fósse stata Coca Cola Arena, sempe lla se jeva a fferní!
Passammo ê ppaggelle:
GABRIEL 6 – Chiamato ‘ncausa una vota rispunnette: Prisente!.
MAGGIO 5,5 Poca fatica; nun s’êtt’ ‘a preccupà d’appressurà (spingere), ma ‘e cuntrullà ‘a curzia soja ‘nnaccasiona ‘e quacche discesa d’ ‘o Liegia. ‘Ncopp’a ‘nu tiro ‘e squina (angolo) però arresecaje ‘e fà ‘a frittata comme aggiu ditto, cuglienno ‘e capa ‘o travesagno (traversa) nuosto.
KOULIBALY 6,5 – ‘Nu paro ‘e chiusure assaje ‘nteressante ca cunfermajeno comme ‘o guaglione sta attraversanno ‘nu bbuonu mumento ‘e criscenza (crescita) a ppietto d’ ‘a passata tempurata (stagione).
CHIRICHES 6,5 Nun fove assaje ‘mpignato, ma dimustraje ‘e saperce fà jucanno urdinatamente e mmantenenno bbuono ‘a linia a ffianco ‘e Koulibalý.
GHOULAM 5,5 Poca fatica pur’ isso e ssenza nisciunu sfregazzo (sbavatura), ma êsse avuto appressurà (spingere) ‘e cchiú.
LOPEZ 5,5 Se facette vedé ‘mmiez’ô campo e quacche vvota annante, ma ‘o cuntrollo ‘e palla, ‘o tiro ‘mporta i ‘o pasiglio (passaggio) priciso nun songo articule suoje; pe ffurtuna ca p’’o Napule d’ajeressera nun foveno ‘mpurtante.
ALLAN 5,5 Miezu zifo (voto) mancante p’’e ddoje accasione sciupate dinto a ‘nu minuto primma d’‘o stuco (gol) d’’a sicuranza (sicurezza) d’’o Pipita; ‘nnairopa cierti effairía (opportunità) nun s’ ànn’ ‘a sciupà, si no s’arriseca ‘e jettà antraffe (partite) duminate.
(Da ll’85°) CHALOBAH 6 ‘E ‘ncuraggiamento e de calusurisemo [benvenuto].
VALDIFIORI 6 ‘E ‘ncuraggiamento, pecché êsse pututo fà ‘e cchiú soprattutto durante ô primmo ajone (tempo) e ‘mmece facette vedé sulo appena appena quacche istiglia (verticalizzazione); troppo poco!
MERTENS 6,5 Bbello ‘e notte facette vedé tecnica e ttassezza (velocità) ca spaventajeno ‘a tràsera (difesa) pulacca ca s’ ‘o perdette ‘nnaccasione d’ ‘o stuco (gol) ‘e ll’uno a zzero. (Dô 73° EL KADDOURI – sv.)
CALLEJON 7 Miezu zifo (voto) ‘e cchiú p’ ‘a palla data a mMertenso ‘nnaccasione d’’o primmo stuco (gol); p’’o riesto calpasmaje (galoppò) pe ttutta ‘a serata a dritta i ê vvote a mmancina ufferenno cchiú vvote ‘a palla bbona ê cumpagne ca nun ‘a sfruttajeno.
(Dô 77° HIGUAIN 8 – Prutàlito (fuoriclasse). ‘Nu stuco(gol), ‘o sujo ca ‘o mettette ‘ncimma a ttutte quante; jucaje sulo ‘nu quarto d’ora, ma ll’avastajeno sette minute pe ffà vedé ‘e che ppanne veste e ppe mettere dint’ô sette ‘na cagliosa ‘a ‘ncurnicià, facenno ‘a cosa cchiú bbella ‘e tutta ll’antraffa [match]).
GABBIADINI 6– Tanta fatica – pure sporca – soprattutto durante ô primmo ajone (tempo) ma forze lle venette a mmancà ‘a saffenèja (lucidità) necessaria justo ô mumento ca fósse servuta; tutto summato nun ghiucaje malamente, ma pe mmetterese ô posto d’’o Pipita… aeh! nn’ à dda magnà furne ‘e pane! E ppenzo ca pure Sarri ‘o ssape!
SARRI 6,5 Andivinaje tutto; ‘o rutizzio (turnover) ch’isso vulette, senza cinche titulare ajere nun ce dètte brutti surprese, anze ce fruttaje chella nichemata (vittoria) esterna ca mancava da abbrile passato. P’ ‘o mumento ‘o cammino aiurupeo, viaggia a mmestiere cu ddoje nichemate (vittorie), sette stuche (gol) fatte e nnisciuno upufferito (subíto).Tutto summato ‘nu successo ‘mpurtante ca fove n’avviso ê marenare (naviganti) pure tagliane, [‘mprimmose ô Milanno] e ca servette p’’o murale d’’a priroma (ciurma) pure ‘e chi à jucato ‘e meno!
arbitro: KOUKOULAKIS (Grecia) 6 Nun parlo cchiú ‘e ll’arbitro.
E ccu cchesto ve saluto e ssi dDi’ vo’ ce sentimmo lunnerí ca vene doppo d’ ‘a trasferta a mMilano contro ô Milanno.
Staveti bbe’
Raffaele Bracale Brak
