N’atu bbuco dint’ a ll’acqua! E cche saciccio! Aggio paura ca ‘sta tempurata (stagione) ce à cacato ‘o cane niro! Manco ajere riuscettemo a vvencere e recugliettemo sulo ‘nu pareggio scartellato contro â Sampedoria… E ddicere ca stevemo vincenno pe ddoje a zzero… ma durajemo sulo ‘na cinquantina ‘e minute e ppo ce assettajemo e avettem’ ‘a ringrazzià a ssantu Reina ca cu ‘na granna parata ce mettette ‘na pezza e cce salvaje ‘o doje a ddoje si no mo stessemo a ppare cu ‘a juve a zzero punte ‘ncrassifica. ‘Mmece stammo a uno a pparo cu ‘o Verona e ggià tenimmo ‘a cuollo a nnuje tririci scuatre. E cche saciccio! E cche saciccio! E cche saciccio! Passammo ê ppaggelle:
REINA 7 – Dicisivo. Quanno fove chiammato ‘ncausa risponnette sempe prisente, soprattutto ‘ncopp’ô tiro ‘e Muriello ch’êsse pututo addivintà ‘o terzo stuco duriano; poco mancaje ca nun parasse ‘o ricore d’Ederro. ’Ncopp’ô stuco (gol) d’’o pareggio ce putette fà poco o niente pecché ‘o tiro d’Ederro fove particularmente squinato (angolato).
MAGGIO 5,5 Bbona ‘a cupertura d’ ‘a curzia ‘e dritta, ma êsse avut’ ‘accumpagnà meglio ll’avanzata d’’a scuatra andivinanno quacche cruzzo (cross)
ALBIOL 4,5 E ll’aggiu trattato! Durante ô primmo ajone riuscette a gghiucà d’ancerca (d’anticipo) riuscenno a ffermà ll’artigliere (attaccanti) duriane, ma a ll’arranc ua facette ‘nu paro ‘e frittate ca ce custajeno dduje punte e nun ce ‘o ppozzo perdunà: ‘mprimmese se facette piglià p’’o prozo ‘a chillu figlio ‘e coperativa ‘e Fernando ca facette credere a Ggervasoni d’essere stato stiso dô spagnuolo e a ll’arrancua (nella ripresa) ‘nnaccasione d’’o siconno stuco (gol) se facette piglià ‘ngiro da Ederro ca cu ‘na finta ‘o facettre accuvà ‘nterra e sse libberaje p’’o tiro d’’o doje a ddoje. E ccheste so’ ccose ca nun se ponno perdunà a ‘nu campione d’’o munno, a ‘nu jucatore ‘e sperienzia!
KOULIBALY 6.5 Accuminciaje preoccupato, ma po addeventaje ‘o pierno d’’a trasera (difesa) cumpurtannose assaje meglio d’ cumpagno ‘e sezziona (di reparto). Dimustraje d’ avé attenziona e ssicurtà (sicurezza) e s’’a vedette ‘e bbella contro a mMurièl(lo).
HYSAJ 6– Partette cuoncio cuoncio, ma po chianu chianu criscette pure si custretto a gghiucà ‘ncopp’â curzia ‘e mancina ca nun è ‘a soja.(dô 70′ GHOULAM 6 Trasette pe ccercà ‘e cagnà ll’antraffa (partita) aumentanno ‘o ‘mpurramiento (spinta) a mmancina e cce pruvaje facenno ‘o ssuojo).
VALDIFIORI 6.5 Tentaje sempe ‘e jucà ‘e primma arresecanno pure ‘e sbaglià, cosa ca però nun succedette;jucaje cu cunntinuità pe cquase sittanta minute e ascette pecché assaje stracquo e forze pe bbia ‘e quacche ‘mpiccio fisico. (dô 67′ JORGINHO – s.v.).
ALLAN 6.5 ‘O Napule jette dint’ê cchiavette quanno Sarri [chi sa’ pecché] ‘o sostituette. Nfi’ a cche stette ‘ncampo jucaje a mmestiere facenno chello ca sape fa e ffove assenziale riuscenno pessino ô mumento justo a ffà ‘a cosa justa, chella ‘e serví ô Pipita ‘a palla bbona p’’o doje a zzero. (dô 58′ David LOPEZ 4,5 Trasuto nun se sape pecché, se vedette poco e cquanno lle capitaje ‘na palla bbona ‘a sbagliaje cumpletamente).
HAMSIK 6.5 Antraffa (partita) urdinata ‘e Marekiaro ca ‘nchietta (in coppia) cu Insigne addereto a ll’artigliero (punta) truvaje bboni cumbinazzione. Jucatore ‘nteliggente ca se sape sacrificà po’ migliurà e ddà coccosa ‘e cchiú.
INSIGNE 7.5 Forze Sarri ll’êva ditto ca po’ ffà quacche stuco (gol) ‘e cchiú e ccumminfatte doppo ll’ajuda (assist) ô Pipita, cercaje ‘e ‘na manera o ‘e n’ata ‘e menarla dinto,ma ‘na vota ‘o palo, ‘na vota ‘a jella nun lle detteno ‘a joja ‘e farlo! A ll’arrancua (nel secondo tempo), comme a ttutte ‘e cumpagne, doppo ô pareggio duriano se ne scennette chianu chiano ‘e posa, ma cumplessivamente ll’atalossa (prestazione) soja fove pusitiva..
HIGUAIN 8 – Sotto porta ‘nu mostro: ‘nu stuco (gol) che ch’arapette ‘a strata ô Napule,n’ato ca ‘a mettette ‘ndiscesa, ma se facette apprezzà pure p’ ‘a cabbitta (capacità) ‘e fà jucà ‘a scuatra riuscenno a ttené palla pe ffà saglí ‘e cumpagne o servennole ‘e primma facenno sponna.
CALLEJON 6 – Nun tuccaje tanti pallune, ma ‘e muvimente suoje foveno funnamentale pe llibberà ‘e cumpagne; si po lle fósse riuscita chella sfurbiciata durante ô primmo ajone (nel primo tempo) ll’êsse miso pure tre ppunte ‘e cchiú!
SARRI 5 Ô primmo ajone (nel primo tempo) ’o Napule fove acàbato (perfetto) e ttutte ‘ntribbuna divano penzajemo: “Comme jucammo bbello!”.. Purtroppo però ce stette pure ll’arrancua (il secondo tempo), cu ‘e sustituzzione sbagliate, ll’amnesie difenzive, ‘a mancanza ‘e cegna (grinta) i ‘e duje stuche (gol) pigliate ca nun ponno fà durmí tranquille.
arbitro GERVASONI 4
‘Sta carta canusciuta, ca ce à quase sempe trattato ‘na chiaveca, pure ajere nun se smentette;lassammo perdere ‘e cartelline jalizze (giallo) ausate soprattutto cu ‘e cuane , mentre cu ‘e duriane fove ‘e maneca larga, e ricurdammoce d’’a fetenzia fàttace assignanno ê duriane ‘nu ricore ca vedette sul’isso addó ca avesse avuto ammuní, pe ssimulazziona, a cchillu figlio ‘e coperativa ‘e Fernando ca se menaje ‘nterra appena Albiollo ‘o guardaje stuorto !
Basta accussí, ve saluto e ssi dDi’ vo’ ce sentimmo chill’auto llunnerí doppo d’’a sosta pe ll’antraffa (partita) d’’a nazziunala, ca cu sti chiare ‘e luna a nnuje nun ce ne fotte proprio e speranno ca jenno a Empoli nun ce ‘ntussecammo.
Staveti bbe’!
R. Bracale Brak
