Zitte, zitte, zitte! Mo nun ce muntammo ‘a capa e nun ce sunnammo ‘o tramme elettrico. ‘O ssaccio bbuono ca ll’antraffa (partita) d’ajeressera fove sulo n’amichevole jucata contro a ‘na scuatra ‘e serie B fatta però ‘e zappature, masterasce e ffiglie ‘e coperativa ca pazziaveno a ffà male e ssi ‘e gguardave stuorte se menaveno ‘nterra sputanno sanco. Proprio pe cchesto ll’avé vinciuto sbrasanno e mantenenno ‘a porta acrata (intatta) nun po’ ca fà piacere, tenenno pure presente ca se trattaje ‘e ll’urdema antraffa (partita) primma ‘e accumincià ‘o campiunato. E ttutto summato, ‘a fora d’ ‘o Pipita me parette ca ‘e guagliune fosseno pronte, pure si êttem’ ‘aspettà ll’arrancua (ripresa) p’’e vedé ‘e vencere e avé raggiona ‘e ‘na banda ca se difennette pe tutt’ ‘o primmo ajone pure cu otto elemente uno cchiú rrugnuso ‘e n’ato. ‘Nzomma putimmo dicere ca ajere da Latina arrivajeno nutizzie bbone comme cunfermaje pure Sarri quanno fenette ll’antraffa (partita) i ‘e nnutizzie cchiú mmeglie pe mme foveno ca 1) ‘a difesa mantene cu Reina ‘mporta e cu Chirichèsso ch’ è ‘nu bbellu jucatore e ppirciò Cairo e ttutte ‘e ffemmene soje, ca fanno ‘e bucatine, a mMaksimoviccio s’’o ponno pure tené p’’a vetrina; 2) ca a El Kadduri nun ce ll’avimm’ ‘a levà pe nnisciunu mutivo; 3) ca Marekiaro nun s’è scurdato ‘e comme se segna; 4) ca ‘o centrocampo cu Allanno, Valdifiori e Mmarekiaro sta finalmente a pposto 5) ca putimmo cuntà ‘ncopp’ a Mertenso, Insigne e Ggabbiadini e ca âmm’ aspettà sulo ca ‘o Pipita accumencia a ffà ‘o Pipita.
A ‘stu punto i’ penzo ca ‘sta tempurata (stagione) ce putimmo divertí e, ccorna facenno, ppo’ ssuccedere uno ‘e tutto!” Passammo ê ppaggelle:
REINA 6,5: Ll’ avastaje accumpagnà cu ll’uocchie ‘e tire piazzate ll’ avverzarie, ma facette vedé ‘e che bbuoni panne veste ‘ncopp’a ll’unica cunchiusione d’Olivera,diggiuiata (sventata) cu ‘a ‘a ponta d’ ‘e ddete. (Dô 75° GABRIEL s.v. Quanno ‘o vedette ‘e trasí, penzaje: mo pecché âmm’ ‘a piglià ‘nu stuco? Ma pe ffurtuna nun succedette!)
HYSAJ 6: Finalmente preferito a mMaggio, dô lato suojo se jucaje poco a ll’epate ‘e puzamiento (fase di spinta), ma fove quase ‘mpussibbile superarlo visavví (uno contro uno). Idemme cu ppatane quanno Sarri ‘o spustaje a mmancina. (Dô 77° STRINIC s.v.: Niente ‘e che, ma me facette piacere vederlo ‘ncampo.)
ALBIOL 6: Già ‘nclima campiunato, ascette pulito, ‘nu paro ‘e vote centralmente ‘ncopp’ a ll’artigliero, ca, figlio ‘e coperativa, se menaje ‘nterra cartianno a ll’arbitro ca lle siscaje ddoje timmurie (punizioni) a ffavore facenno ‘ncazzà ô spagnuolo ca â siconna vota s’abbuscaje ‘nu cartellino jalizzo (giallo); p’’o riesto fove sempe attiento e risolutivo. (Dô 75° KOULIBALY s.v.)
CHIRICHES 7: Antraffa doppo antraffa (partita dopo partita) piace sempe ‘e cchiú dimustrannose sicuro ‘e se sia comme anticipo ca mettennoce ‘na pezza cu ‘na risabblona (scivolata). Spisso prisente pure annante ‘ncopp’ê ppalle fremme, ajere se facette apprezzà pe ‘na sfrubbiciata spettaculare ca fove salvata ‘ncopp’â linia. (Da ll’ 82° LUPERTO s.v.)
GHOULAM 6 : Dimustraje frischezza atletica, cercanno spisso ‘o funno, mettenno ‘mmiezo bboni ppalle e addirittura cercaje ‘a porta, ma cu ppoca furtuna pe bbia d’’a pusizziona ‘e squina (angolata) (Dô 45° MAGGIO 6: soprattutto p’’o ricore ca se prucuraje; p’’o riesto urdinaria amministrazziona ‘ncupertura e appresseranno (spingendo))
ALLAN 6: Durante ô primmo ajone (nel primo tempo) jucaje pochi pallune cuntentannose ‘e dà ‘na mana a Valdifiori. A ll’arrancua (nella ripresa) fove cchiú prisente dint’ ô juoico. (Dô 77° DEZI: s.v.)
VALDIFIORI 6.5 : Sempe smarcato pe riceve palla, spezzaje ‘o juoco avverzario cu pricise tocche ‘e primma sia ‘e dritta ca ‘e mancina sia pe fà rispirà ‘a manovra ca pe ll’urtizzà (verticalizzare). Tenette arteteca muvennose cuntinuamente a ppassettine p’’o campo. (Dô 45° JORGINHO 6,5: Se facette apprezzà soprattutto pe ccomme scavalcaje ‘a difesa mettenne a Mmertenso ‘ncundizzione ‘e furní ll’ajuda (assist) p’’o doje a zzero.Bbuonu signale chillo ‘e mettere dinto ‘o ricore d’’o cinche a zzero spiazzanno ‘o purtiere.
HAMSIK 6.5 : Cchiú tellecariello (dinamico) ‘e ll’urdeme asciute, suvrappunennose cu Ghoulàmmo rennette periculosa ‘a fascia mancina dimustrannose pronto a ‘nzerirse e a sfruttà ll’urtizze (verticalizzazioni) Dimustraje ‘e nun esserse scurdato comme se segna â manera soja accentrannose e truvanno ‘a porta rasoterra. (Dô 55° LOPEZ 6: Spezzaje ‘e ttissure (le trame) d’’o Latina e sfresaje ‘o stuco (sfiorò il gol).
INSIGNE 6.5 : Dimustraje ‘e stà ggià ‘nforma; e ssulo ‘o purtiereDe Gennaro lle levaje ‘o piacere ‘e signà fermannole ‘na bbella cunchiusiona putente ‘e dritta;dispenzaje pasiglie a cculaturo (passaggi filtranti), se spassaje scartanno ll’avverzarie e se muvette a mmestiere ‘nfra ê llinie forze esaggeranno cu quacche ghiucariello, ma fove proprio ‘a ‘nu colpo ‘e tacco suojo ca nascette ‘o stuco ‘e Marekiaro ca sbluccaje ‘a facenna. (Dô 63° EL KADDOURI 7: Doppo chello ca ‘o guaglione facette vedé ajere i’ dico ca sulo ‘nu spustato ‘e capa po’ penzà ‘e levarselo; che pruntezza e cche velocità! Ll’avastaje ‘nu minuto, ‘o muvimento justo e mettette ‘a palla ‘mporta; ddoje vote ‘int’ a ttre mminute! ‘Nu lampo! )
CALLEJON 5.5 : Se vedette poco. Stranamente venette meno ‘a ‘ntesa cu ‘o Pipita. Nun s’allargaje maje ‘ncopp’a ll’esterno perdennose dint’ô stritto d’’e mmaglie d’’e difenzure. (Dô 45° MERTENS 6.5: Chisto nn’ è n’ato ca sulo ‘nu spustato ‘e capa po’ penzà ‘e levarselo; che tecnica da alliccarse ‘e mustacce! Cercaje spisso ‘o funno crianno cchiú ‘e ‘nu prubblema â trasera (difesa) d’’o Latina i ‘o capolavoro fove quanno furnette ll’ajuda (assist) p’’o doje a zzero d’ El Kaddouri; p’’o riesto zumpaje comme a bbirille avverzarie dinto a ‘nu fazzuletto ‘e campo.
HIGUAIN 6- : E mme dispiace! Nun sta ancòra ô mmassimo d’’a cundizziona e se vedette visto ca tenette ‘nu passo diverzo dê cumpagne ‘e sezziona (reparto); ll’âmm’ ‘aspettà! (Dô 55° GABBIADINI 6.5: Micidiale cu ‘o pere ‘e mancina quase ‘a fremmo, nun capette pecché nun s’allegraje (esultò) p’’o stuco signato ca fove ‘nu capolavoro; p’’o riesto se mettette ‘mmostra faticanno p’ ‘a scuatra spalle â porta e gghiuco ‘e sponna.)
SARRI 6: ‘O juoco suojo: scuatra corta, pressiona auta (pressing alto); niscuna preoccupazione ‘ndifesa e ccinche sfugliatelle p’’o Latina.Pretennette ‘nu ggiro palla tassuso (veloce) pe ccupulià (dialogare) cu ‘o primmo artigliero (prima punta) e nsi’ a cche nun ll’avette cuntinuaje a rrichiamà ‘e suoje. ‘Ncunchiusione tutto summato signale cunfortanti ‘nvista de ‘ncignà ‘o campiunato! E ccu cchesto ve saluto e si dDi’ vo’ ve dongo appuntamento p’’a primma ‘e campiunato speranno ‘e cuntarve cose overo bbelle.
Staveti bbe’.
R. Bracale Brak
