Che antraffa (partita) ‘nzipeta chella d’ ajeressera contro ê mastammuoccele terische ca ‘na semmana primma êveno pigliato dê cuane quatto sfugliatelle e ca ajeressera se n’alluggiajeno n’ati ddoje, ca po però ce restituetteno. Che antraffa (partita) ‘nzipeta, guagliú! E a ddicere ca ll’antraffa ‘e ricresso (partita di ritorno) d’ajeressera êsse pututo essere ‘na passiata ‘e saluta si sulo ‘o Napule êsse fatto ‘o Napule jucanno pe nnuvanta minute comme sape e ppote jucà. ‘Mmece chi t’’o ddà! ‘E cuane scennetteno ‘ncampo senza ggenio e ssenza cegna (grinta) cundizziunate da ll’uno a cquatto ‘e ll’antraffa d’affarta (partita di andanta) cunvinte ca se fósse passato ‘o turno senza prubbleme e ssenza sudore.’Nzomma, comme jette e ccomme venette, ‘e cuane rijalajeno tutto ‘o primmo ajone (primo tempo) ê terische e se facetteno vedé dint’â camma (area) d’’e lupacchiotte sulo ô 43° cu ‘na ggirata d’’o Pipita e avettemo aspettà ll’intervallo (quanno ‘on Rafele pigliaje p’’e rrecchie e ccazziaje a uno a uno ê suoje) primma ‘e vedé ca pe ‘na mez’ora ‘o Napule facesse ‘o Napule e cunzignasse ê terische ‘nu paro ‘e sfugliatelle… Però, fatto ‘a guapparia, ‘e cuane s’assettajeno e cunzentetteno ê mastammuoccele terische ‘e ricuperà ‘o risultato pariggianno ll’antraffa ‘ncopp’ô doje a ddoje. Cunchiusione? Cunchiusione ‘o Napule nun vincette ll’antraffa casalinca e s’êtte cuntentà ‘e ‘nu pareggio ca sinamparco (comunque) ce avastaje pe cunquistà ‘a semifinale d’E.L. Ma tutto chesto nun me piacette pecché a mme me fósse piaciuto ‘e vencere e vvencere largo. Però ‘o Cielo nun vulette e sia fatta ‘a vuluntà ssoja.
Passammo ê ppaggelle: ANDUJAR 6,5 Sempe sicuro quanno fove chiammato ‘ncausa, soprattutto ‘ncuollo a Caligiuri e a cchella crapa Bendtner(re), ma ‘ncopp’ê stuche nun ce putette fà niente. Peccato!
MESTO 4,5 Serata no d’’o sustituto ‘e Maggio; nun ce mettette nè ‘sperienzia, nè attenziona addurmennose cchiú ‘e ‘na vota e nchiudenno tarde ‘ncopp’a Perisiccio,ca sotto a isso jette a ccarena e mmaccarune!
ALBIOL 5 ‘A carrura (stazza) i ‘a caprunaria ‘e ll’ècchese juventino Bendtnerro ‘o mettetteno ‘ndifficultà e cchiú ‘na vota fove ‘mpurrato (sovrastato) dô danese.Addó sbagliaje assaje fove però quanno se perdette a cKlose ‘ncopp’ô tiro ‘e squina (corner) d’’o doje a uno.Che nerv atura!
BRITOS 5,5 ‘Nu poco meglio d’’o cumpagno ‘e sezziona , ma pure isso quacche vvota fora pusizziona e spisso poco prisente comme quanno se facette surpassà ‘a Guilavogui ca però partette ‘nnurzo ‘e cose (fuorigioco).
Faouzi GHOULAM 5,5 Ce mettette troppu tiempo pe ppiglià ‘e mmesure ‘e Caligiurti ca dê pparte soje sfunnaje spisso; durante ô primmo ajone facette sulo quacche discesa; ‘nu poco meglio a ll’arrancua (ripresa), ma cumplessivamente nun me picette! Gokhan INLER 5,5 Serata senza ggenio e ssenza cegna (grinta) d’’o turco-napulitano ca jucaje, a ddoje a ll’ora, senza ‘mpignarse mentalmente e sbaglianno troppi pasiglie (passaggi)! David LOPEZ 6 Meglio d’’o cumpagno ‘e sezziona, nun facette cape d’angiulo, ma fove uno d’’e poche a gghiucà pe ttutta ll’antraffa (partita) e nun sultanto p’‘a primma mez’ora ‘e ll’arrancua (ripresa).
CALLEJON 6,5 Presenza custante e fruttifera a ddritta cu ‘o primmo stuco ‘nE.L., dudicesimo d’’a tempurata (stagione). Peppe ‘a ‘nguenta è tturnato! Tre stuche signate dinto a ll’urdemi quatto fullè (gare) jucate. E scusate si è ppoco.
HAMSIK 5,5 Nun fove ‘o Marekiaro visto dinto a ll’urdemi semmane; chillo d’ajeressera zampettaje p’’o campo senza custrutto arrepusannose e sparagnannose. è overo ca ‘o fullè (gare) d’ajeressera cuntava assaje poco doppo ‘o quatto a uno ‘e ll’affarta (andata), ma ‘o guaglione esaggeraje a nun fà niente!(Dô 60° INSIGNE 6,5 –Cunfermaje ‘o cumpleto ricupero fisico. Se dètte da fà e abbiaje ll’azziona d’’o doje a zzero.)
MERTENS 6,5 Pur’isso se sparagnaje jucanno sí e nno ‘nu quarto d’ora, ma facenno ‘a differenza; ddoje discese e ‘nu stuco. ‘O riesto mettímmoce ‘na preta ‘ncoppa. (Da ll’83° HENRIQUE sv)
HIGUAIN 7 – Nun signaje , ma facette signà i ‘e duje stuche luvarde (azzurri) pe mmità portajeno ‘a firma soja.Pure pe cchesto è ‘a curona d’’a capa mia; durante ô primmo ajone sulo ô 43° avette ‘nu pallone serio e sfresaje (sfiorò) ‘o stuco. A ll’arrancua (nella ripresa) ca ‘na magaria dètte a Cagliecònno ‘o pallone ‘e ll’unoi a zzero e facette ‘a sponna pe Mertenso ‘ncopp’ô doje a zzero e se chiammaje ll’applavuse d’’e trentamila d’’o san Paolo. (Dô 68° ZAPATA 6 – Pochi pallune, ma se dimustraje sempe all’ardezzae ppronto a llassà ‘o signo.)
ALL BENITEZ 6 Si ‘o Napule ajeressera riuscette a ffà sinamparco (comunque) allimmeno ‘nu pareggio fove cherna (merito) ‘e don Rafele e d’’a cazziata ca facette ê suoje durante a ll’intervallo.Pecché ô pprincipio ll’atteggiamento d’’e cuane nun era stato chillo justo! Menu male ca c’era stato chillu quatto a uno ‘e ll’affarta (andata).
arbitro: CAKIR (Tur) 5,5 Miezu punto mancante pe nun avé visto ca ‘ncopp’a ll’azzione d’ ‘o doje a ddoje Guilavogui partette ‘nnurzo ‘e cose (fuorigioco); p’’o riesto nun sbagliaje quase niente!
E ccu cchesto ve saluto e si dDi’ vo’ ce sentimmo lunnerí ca vène.
Staveti bbe’.
R. Bracale Brak
