ilNapolista

Strinic terzino muderno, tuosto, priparato e ccumpleto

Strinic terzino muderno, tuosto, priparato e ccumpleto

‘Assa fá ô Cielo! Missiona cumpiuta guagliú doppo d’avé rijalato ‘o primmo quarto d’ora â scuatra d’’o pappavallo ‘e Lotito facennola jucà, ma cuncedenno poco e nniente e aspettanno, surniona e cazzemmosa, ‘o mumento adatto pe culpí; cosa ca riuscette puntualmente e ppo ‘o Napule pigliaje ‘mmano ‘o pallino d’ ‘o juoco e doppo d’avé signato cu ‘o Pipita (ô 18°) ‘nu granne stuco (gol) nun cuncedette nient’ato ê lazziale purtannose â casa ‘e tre ppunte ca lle nicessitaveno pe superà ‘ncrassifica proprio ‘a Lazzio e pigliarese n’ata vota chillu terzo posto perduto cu ‘a scunfitta casalinca contr’â juve.

E cchesto succedette ajere all’ora ‘e ll’apritivo p’’a disperazziona d’’e tanti scieme gian-capocchie lazziale ca s’erano sfucate a ffá: Buh, bbuh soprattutto contro a zZapata…, e p’’a granna suddisfazziona d’’a tribbuna divano, cuntenta ‘e vedé turnà a vvencere ‘a scuatra cuana(azzurra)cu ttutto ca teneva ‘ncuollo chella jettatoria divisa ‘nu ginso e ‘na pugnetta e ccu ttutto ca se ll’êtt’ ‘a vedé nun sulo cu ‘a scuatra d’’o pappavallo ‘e Lotito, ma pure cu ll’arbitro Rizzoli ca primma ‘e siscà ‘na timmurría (punizione) a ffavore d’’o Napule s’’o fósse tagliato! E cumminfatte ne facette ‘o mmeno ‘e siscà contr’ê lazziale…Nun ce putette niente però: facette sulo ‘ncazzà ô Pipita, ma nun riuscette a ssalvà ‘a Lazzio dâ scunfitta! Passammo ê ppaggelle:

RAFAEL 7 Sempe attiento e ccuncentrato, se facette truvà piazzato, magnetizzanno (ipnotizzando) a cCavanda.Senza parlà ca ô 95° salvaje ‘o risultato facennose truvà pronto a ffermà ‘nu tiro â disperata ‘e Keità!
MAGGIO 6 Tenette a mmestiere ‘a pusizziona difenziva.
ALBIOL 6+ Doppo ‘nu sfregazzo (sbavatura) ô pprincipio, pigliaje ‘e mmesure e mmettette ‘a musarola a dDjordjeviccio.
KOULIBALY 7 Uno d’’e meglie, spicialmente lla ddereto prutagunista ‘e quacche salvataggio miraculuso.
STRINIC 6.5 Ll’aspettavo cu ccuriosità e mme piacette: terzino muderno, tuosto, priparato e ccumpleto.
GARGANO 6 Ce mettette chello ca ce vuleva: cegna (grinta) e arroca (irruenza) cumbattenno ‘mmiez’ô campo senza tirà ‘o pere arreto.
DAVID LOPEZ 6 Braduso(Lento), ma pe cchello ca sape e ppo’ ffá se facette sempe valé.
CALLEJON 6 Se vedette poco annante,mancanno pe sfurtuna ‘e ‘nu niente ‘o stuco (gol) d’’o dubblato (raddoppio) ma facette ‘o ssuojo a ll’epata ‘e cupertura (in fase di copertura.)
DE GUZMAN 6 Difennette o jette ‘mpressiona senza palla, se ‘nzerette o partette ‘mprecressiona muvennose a mmestiere ‘ncopp’ a tttutto ‘o fronte uffenzivo. (Da ll’83° JORGINHO s.v. – Trasette pe fá piglià sciato a ll’ulandese.)
MERTENS 6,5 Miezu voto ‘e cchiú pecché, si fove overo ca sciupaje quacche accasione ‘e signà, se muvette assaje periculosamente e ppo pecché fove suojo ‘o bassurero (suggerimento) ca ‘o Pipita trasfurmaje dint’ô stuco d’’a nichessa (vittoria).
(Dô 61° HAMŠÍK 5,5 Trasette a ll’arrancua (ripresa) ô posto d’’o bbelga assaje stracquo, ma nun se facette apprezzà facenno poco a ppietto ‘e chello ca putesse e êsse pututo fá).
HIGUAIN 8 Signaje ‘nu stuco (gol) overamente bbello e nne sfresaje (sfiorò) n’ato!’E difenzure lazziale ‘o vattetteno sistematicamente e rRizzoli ‘o facette ‘ncazzà pecché nchiudette ll’uocchie pe nun ‘e vvedé. (Da ll’86° ZAPATA s.v.)

ALLENATORE: BENITEZ 7 – Tre punte d’oro cunquistate cu cchillo ca fove ‘nu veru   spareggio p’’a Ciampionsa.

arbitro RIZZOLI 4 Vecchia scadente carta canusciuta: ‘na fetenzia ‘nternazziunale, anze mundiale, isso i ‘e cullabburature suoje. Siscaje sempe ‘ndanno d’ ‘e cuane (azzurri) caputianno falte (falli); nun assignaje ‘nu ricore sacrusato a Mertenso arrunzato appena trasuto dint’â camma ‘e ricore lazziale e anze ll’ammunette pe simulazziona; cose ‘e pazze! Pe gghionta ‘e ruotele fove sempe ‘e maneca larga cu ‘e lazziale ca mazzulajeno ‘ê guagliune ‘e don Rafele e soprattutto ô Pipita senza ca isso dicesse maje niente!

E mettimmo punto cca dicenno ca nchiudettemo ‘o ggirone a gghí cu trentatré ppunte e cu n’ati cinquantasette punte ancòra a ddisposizziona, po’ ssuccere qualunqua cosa e ssenza fá pruggette o pruclame, jucanno fullè (incontro) pe ffullè, nun sapimmo addó putimmo arrivà. Staveti bbe’!   Ce sentimmo, si dDi’ vo’, â prossima vota, ca – si nun me sbaglio – è viernarí ca vene doppo d’’o fullè (incontro) ‘e Coppa Itaglia contro a ll’Udinese.
R. Bracale Brak

ilnapolista © riproduzione riservata