I’ nun ce pozzo credere, guagliú, ma ce aggi’’a credere pecché – purtroppo – accussí è: ‘o Napule nun sape vencere cchiú ! E ppure ajere a ll’ ora ‘e ll’apritivo ô san Paolo, ‘nnante a ppoca ggente, ‘o Napule upposto a ll’Empoli Palermo addizziunaje n’ atu scartellato pareggio ‘o terzo ‘e fila, anze ‘o quarto cu ‘o zzero a zzero ‘e Praga e mmanco se decidette a nn’apprufittà ca juve e rroma, pe pparta lloro nun erano riuscite a vvencere! Nun saccio che sta succedenno, ma ‘o fatto è ca‘o Napule nun sape vencere cchiú e tutto summato chillo d’ajere fove ‘nu punto guadagnato visto ca nfi’ ô 67° ‘o Napule steva abbuscanno pe ddoje a zzero e ssulo dinto a ll’urdemi vintottominute lle riuscette d’adderezzà ‘a varca;sí’nu punto guadagnato pure si servette a assaje poco cu ‘o Genoa ca – vattenno ‘o Milànno – ce surpassaje mettennose ‘nsulitaria, cu vintiseje punte, ô terzo posto ‘ncrassifica e lassanoce ô quarto, cu vintiquatto punte, tallunate dâ Lazzio a vvintitré ! E dummeneca ce aspetta ‘a trasferta a ssan Siro contr’ô Milànno, ca tène ‘o dente avvelenato. Che bbella pruspettiva!… Passammo ê ppaggelle:
RAFAEL 6: ‘Ncopp’ê duje stuche nun ce putette fà niente; pisciaje ‘nu rinvio, ma ‘a sfarma (colpa) nun fove soja, benzí d’’o tturreno sbeteco.
MAGGIO 4,5: Assaje scadente a ll’epata ‘e puzamiento (in fase di spinta) allimmeno nfi’ a cquanno ‘o Napule nun tenette cchiú nniente ‘a perdere; po finalmente se decidette a appressurà (spingere) ‘nu poco e riuscette a ddà a De Guzmànno ‘a suspirata palla d’’o pareggio; a ll’epata difenziva(in fase difensiva ),doppo d’esserse perduto a Vverdi ‘naccasione d’’o primmo stuco, dê pparte soje nun arrivajeno pericule ‘mpurtante.
ALBIOL 4,5: Senza varva, quase nun ‘o ricunuscette; jurnata no: restaje a gguardà, senza fà ‘na mossa, comme Rugani, sott’ô naso suojo, signava ‘o siconno stuco (gol).
HENRIQUE 4,5: ‘E primme tre ‘ntervente foveno a mmestiere, po chi sa’ pecché jette dint’ô pallone risultanno spisso ‘nritardo cu tTavano ca cuntinuamente lle scappaje ‘a dint’ê mmane.
GHOULAM 5: Accumminciaje bunariello jenno pure a ttirà ‘na vota; po però nun saccio che lle succedette giacché pure quanno dètte ‘na mana a Mertènso, nun riuscette maje a ‘ncarrà ‘nu cruzzo (cross) priciso.
DAVID LOPEZ 4,5: Êsse avut’ ‘a cumannà ‘a mediana cuana (azzurra), ma nun le riuscette ‘e fà chillu culaturo (filtro) ch’ êsse avut’ ‘a fà!
JORGINHO 4: Jurnata no pure d’’o guaglione brasiliano ca fove ‘nu reggista senza messa a ffuoco e ca sbagliaje ‘nu tummolo ‘e pallune favurenno ‘a costruzziona d’’o juoco ‘e ll’Empoli.
HAMSIK 4-:Piezzo e ppejo. Aizaje porvera pe ttutto ‘o campo cu ttroppi tocchi e tucchetti inutili e ssenza zuco; tiraje ‘nu paro ‘e vote, ma foveno tire braduse (lenti) e loffie (mosci). Maje ‘na vota ch’êsse pigliato ‘a scuatra p’’a mana. Dette ‘a ‘mpressione d’avé perduto cumpletamente ll’usciola (bussola) jenno a sbattere sistematicamente ‘ncuollo a ll’avverzarie o sbaglianno ‘o pasiglio (passaggio).
(Dô 61° HIGUAIN 5: Trasette quanno finalmente ‘o Napule scetannose dô suonno truvaje ‘o doje a ddoje, ma isso – ‘o Pipita nun tuccaje palla e spisso fenette ‘nnurzo’ecose [in fuorigioco]).
MERTENS 5,5: Turnaje titulare doppo d’’o bbruttu ‘mpiccio capitatele cu ‘o Belgio; partette bbunariello jenno pure a ttirà ‘nu paro ‘e vote e cercanno ‘e dà ‘nu poco ‘e vitezza (verve) ca mancava; però nun andivinaje maje ‘a jucata bbona e ppusitiva.
(dô 70° DE GUZMAN 7: Cunfermaje ‘o mumento pusitivo, cu ‘o stuco d’’o doje a ddoje e cu n’ajuda (assist) troppo bbella pe Cagliecònno ca però nun n’apprufittaje. Sfresaje (sfiorò) addirittura ‘o stuco d’’a nichessa (vittoria). Chi sa’ pecché don Rafele nun ‘o fa jucà dô primmo minuto ô posto ‘e Marekiaro ca nun se po’ gguardà cchiú!)
CALLEJON 5: Jucaje dànnose sí ‘a fà, ma senza zuco e ccunnimma; se scetaje ô finale partecipanno a ll’azziona ca purtaje ô pareggio, ma po mancaje ‘e mettere dinto ‘a palla d’’o tre a ddoje.
DUVAN 6,5: Avett’’a cumbattere sulo contro duje difenzure e ‘o ffacette bbunariello pure si spisso ‘e muvimente fatte ‘a ‘stu matarazzo ‘e sbreglie nun foveno chillo ‘e n’artigliero (prima punta).Putente e ppriciso però ‘o stacco ca lle dette ‘a joja d’’o stuco. (Da ll’83° GARGANO SV).
BENITEZ 5: Doppo Genova n’atu fullé (gara) assaje scadente cu ‘na scuatra senza ggenio, cu centrocampo e tràsera (difesa)cu ‘a capa dint’ê nnuvole tanto ca si, corna facenno, ll’Empoli avesse vinciuto nun avesse arrubbato niente.’O salvaje sulo ‘o finale ‘e carattere.
ARBITRO CERVELLERA 4,5 – E cchisto è n’ato d’ ‘a Pastafina!Scadente e ‘mpriparato siscaje sempe a senso unico contro ô Napule; lassaje correre troppi fetenzie d’’e tuscane (e nne sapette coccosa Cagliecònno) e pprimma ‘e lle tirà fora ‘nu cartellino jalizzo (giallo) contro ce penzaje ‘a coppa e ppo nun ‘o cacciaje. Nun êva maje arbitrato ‘o Napule e sperammo ca nun ce torna cchiú!E mettimmo punto cca. Ce sentimmo viernarí, a dDio piacenno doppo d’ ‘o fullè d’ E.L.. Staveti bbe’!
R. Bracale Brak
