N’ ata fijura ‘e seje sorde guagliú! Anze ‘a peggia da quanno accumminciaje ‘o campiunato! Ajeressera a ssan Siro contr’â scuatra ‘e chillu nnacchella d’Inzaghi ‘o Napule fove cacchio ‘e fà risuscità ‘e muorte facenno n’atu passo arreto, anze cchiú d’uno! Ajeressera ‘o fallimento, credíteme, fove tutale e ‘o Napule nun riuscette manco a mmustrà quacchuna ‘e cchelli ghiucate uffenzive ca êssen’’a essere chelle ca cuntraddistinguono ‘e scuatre ‘e don Rafele. Ma chi t’’o dà? Chi t’’o ddà? Che scuorno! Ajeressera tutto ‘o primmo ajone fove letteralmente jettato dint’â mmunnezza cu n’atteggiamento difenzivo ‘ncumprensibile e ssenza fà pressiona (pressing) auta, danno curaggio â scuadra ‘e chillu nnacchella d’Inzaghi e ô finale . ‘o Napule se pigliaje ddoje carocchie pesante e sacrusante, senza riuscí a dà, pe ttutta ll’arrancua, (ripresa) manco ‘na chianetta, ‘nu paccaro, ‘na sputazzata ‘nfaccia a ll’avverzarie. Niente! Che scuorno! ‘A cunchiusione fove ca mo ‘ncrassifica ‘a scuatra ‘e don Rafele ato ca terza e ssiconna pusizziona! Chi t’’o ddà? È sciuliata ô settimo posto arrivata, anze superata dô stesso Milànno… Ch’avvelimiento! Ch’avvelimiento!
E ppaggelle? E ccu ‘stu ttuosseco ca tengo ‘mpont’ô musso qua’ paggelle e ppaggelle? Mecco tre a ttutte quante e ppenzo ca ll’aggiu trattate! E ssiccomme so’ signore lle sparagno ‘a jastemma ca ll’ànn’ âccidere e nun ll’ànn’’a pavà!
E cu cchesto ve saluto e si ‘o Signore ‘o vvo’ ce sentimmo â prossima vota, ca mo nun saccio quann’è. Staveti bbe’!
R. Bracale Brak
