ilNapolista

‘Sta vota, me pare, ca a ddon Rafele nun se ponno tirà ‘e rrecchie pe ‘stu pareggio

‘Sta vota, me pare, ca a ddon Rafele nun se ponno tirà ‘e rrecchie pe ‘stu pareggio

Sto’ smarrezzato (avvilito) guagliú! ‘Ncazzato e smarrezzato! E nun ce pozzo credere e ‘mmece ce aggi’’a credere: ce ànnu cantato, ce ànnu menato ‘a favetta e cce ànnu cuovete! Ajeressera a bBergamo n’ati dduje punte perze e mmenate malamente a mmare addó vincenno se fósse pututo apprufittà d’’a scunfitta d’’a juve, d’’a sampedoria e dell’udinese e d’’o pareggio d’’o milanno pe metterce ô terzo posto ca mo comme a mmo è ‘o mmeglio ca putimmo fà… E ‘mmece chi t’’o ddà? Chi t’’o ddà? Pariggiaimo sulamente e nnun fovemo capace ‘e sfruttà ll’accasiona avuta cchiú o meno ô nuvantesimo cu ‘nu ricore sacrusanto guadagnato ‘a Zapata, ma sbagliato dô Pipita. Pe nun parlà d’ati stuche (gol) fallute dê nuoste. Sto’ smarrezzato (avvilito) guagliú! Cca, doppo d’’a sbrasata fatta cu ‘o Verona, ce ànnu cantato, ce ànnu menato ‘a favetta e ce ànnu cuovete! Nun se po’ spiecà ‘e n’ata manera! E sàpato ce ll’àmm’’a vedé cu ‘a Roma ca à vinciuto e s’è ppiazzata cu ‘a juve ‘ncimma â crassifica. Abbiàmmo a ffà ‘e ccorne!

Passammo ê ppaggelle:

RAFAEL 5,5 – Nun tenette quase niente ‘a fà, ma oramaje nun riesce a ddà tranquillità â tràsera (difesa), pecché nun è attrezzato p’’e miracule. ‘Ncopp’ô stuco (gol) ‘e Denísso ca ancòra êv’’a signà ‘ncampiunato, sfarme (colpe) particulare nun ne tenette, ma nun pozzo fà a mmeno ‘e arricurdà ‘nu paro asciute a scampule ‘e mele cotte, pe ffurtuna ca ll’Atalanta nun ce credette!

MAGGIO 5,5 – Cu Cagliecónno ca ajeressera nun fove a ll’arribba (top) pure isso faticaje a ttruvà ‘a pusizziona e cquanno appressuraje (spinse) nun trovanno umunía   (sintonia) cu ‘o spagnuolo abbiaje a cruzzà (crossare) a bbienetenne senza truvà mesura.

ALBIOL 4,5 – Ll’Atalanta nun trasette maje dint’â camma ‘e ricore cuana, ma una ‘e chelli grame vote ca succedette ‘o spagnuolo se perdette a Denísso ca nn’apprufittaje e cu ‘na cabbesera (colpo di testa) ‘ntuffo purtaje ‘nvantaggio ‘e padrune ‘e casa. Nun è ppussibbile: uno viecchio e scafato cierti ffessarie nun ll’à dda fà e nun s’à dda fà piglià da attacche ‘e cannavarite acuta.

KOULIBALY 6 – Avette poco ‘a fà, ma fove pruvvidenziale a anticipà a dDenísso quanno chisto servuto da Maxi Moralèzzo, êsse pututo fà ‘o dubblato (raddoppio) atalantese ‘ncopp’a ll’uno a zzero.

GHOULAM 6 – Se facette vedé raramente a ll’epata uffenziva (in fase offensiva) e ffove ‘nu peccato,pecché ògne vvota ca ll’algerino s’affacciaje annante ‘a tràsera (difesa) atalantese jette dint’ê chiavette; dô père suojo partette ‘o bbassurero (suggerimento) ca Cagliecònno sprecaje malamente!

(dô 90° Duván ZAPATA 6,5 Trasette e facette sentí súbbeto ‘o piso suojo cunquistannose ‘nu ricore, ca però ‘o Pipita se facette parà! ).

INLER 5,5 – Cu ‘a tràsera (difesa) atalantese nchiusa ‘o turco napulitano, braduso (lento) e cumplicato (macchinoso) faticaje a truvà ll’istiglia (verticalizzazione) justa.

David LÓPEZ 5,5 – Êsse avuto aiutà a Inlerro a ddà tassezza (velocità) a ll’azione, ma spisso fenette pe bluccarese cu ‘a palla ‘mmiez’ê piere frenanno ll’azziona uffenziva! (dô 75° JORGINHO 5, Piezzo e ppejo, scarte fruscio e ppiglie primiera: fósseno servute cchiú giometrie a ccentrocampo per ccercà ‘o stuco (gol), ma ‘o brasiliano non se vedette e nun se sentette.)

MERTENS 6 – Bbello a mmità.Ô primmo ajone (nel primo tempo) se capette a mmaraviglia cu mMarekiaro, crianno pure quacche ppericulo ‘a luntano pe Sportiello. A ll’arrancua (nella ripresa) però quanno s’êsse avuto ‘a mettere ‘o pero ‘ncopp’a ll’accelleratore ‘o bbelga se stutaje sbaglianno diverze pasiglie (passaggi) e cquacche ppusizziunamento. S’abbuscaje pure ‘nu cartellino jalizzo (giallo) pe simulazziona, ma nun s’’o mmeretaje pecché Stendardo overamente ll’êva tirato p’’a maglia e stiso addó ca Damato vedette o vulette vedé ‘na cosa pe n’ata; Aggiu ditto ca se stutaje però ô finale s’appicciaje n’ata vota e sfresaje (sfiorò) ‘o doje a uno.

HAMŠÍK 5,5 – Comme a mMertènso jucaje sulo ‘o primmo ajone ( primo tempo); a ll’arrancua (nella ripresa) nun se capette pecché rummanette fremmo e tuccaje sí o no tre pallune dint’ê primme vinte minute.(dô 65° INSIGNE 6,5 – Trasette e ppruvaje a ccagnà ‘a faccia d’’o fullè (della gara) dànno cchiú ttassezza (velocità) a ll’attacco d’’o Napule e rennennose periculuso cu cquacche cruzzo (cross) tagliato dâ trecquarte e cu cquacche cunchiusiona ‘a fora; ‘a cosa meglia fove chella ‘e custringere a cCigarini a ppigliarese ‘o siconno cartellino jalizzo [giallo]).

CALLEJÓN 5 – Che peccato! Serata no ‘e ll’ècchese Rialmadríddo ca fove svugliato e ‘mpriciso: avette subbeto ‘ncopp’ô pere a ccinquanta centimetre dâ linia ‘e porta sguarnita, ‘a palla ‘e ll’uno a uno e ffove crestiano, nun saccio comme, ‘e menarla ‘ncopp’ô travesagno (traversa) fallenno ‘na granna accasione;p’ ‘o riesto nun riuscette maje a ttruvà ‘a chésema justa (il varco giusto).

HIGUAÍN 6 Media ‘nfra otto e quatto: otto p’avé cu ‘na magaria miso dinto ‘o pallone d’’o pareggio e cquatto p’esserse fatto parà ‘o ricore ca ô nuvantesimo c’êsse pututo dà ‘e tre ppunte.

BENITEZ 6– ‘Sta vota, me pare, ca a ddon Rafele nun se ponno tirà ‘e rrecchie pe ‘stu pareggio: ‘o Napule facette ‘nu bbellu primmo ajone padrone d’’o campo e d’’a manovra, ma ll’ attaccante sbagliano pure ‘e ppalle-stuche (palle gol) cchiú ffesse. Pe gghionta ‘e ruotolo po Albiòllo cu ‘nu zzarro esaggerato cuncedette a ll’Atalanta l’unica accasiona e Denísso nun sbagliaje. ‘A riazione fove cratista (ottima) e ‘o Napule se fósse mmeretato ‘e vencere isso e ‘o ddio sujo, ma ‘o pareggio arrivaje troppo tarde e ‘o ‘o rigore prucurato ‘a Zapata ô finale e ca ce avesse pututo dà tre ppunte ‘mpurtante p’’o terzo posto, fove sciupato dô Pipita. Che se po’ ddicere a ddon Rafele? Niente! Forze sulo ca êsse avuto avé cchiú curaggio e sustituí a cCagliecònno ca nun fove ‘nserata, e êsse avuto lassà tirà ‘o ricore dicisivo a n’ato.

arbitro DAMATO 4,5 Vecchia carta canusciuta st’avvocato ‘e Barletta(e comme a ppugliese quase certamente tifoso juventino) è ‘nu chiafeo, fúceto e sciacqualattuca(incapace) e ati vvote addirittura vennuto!Turnato a diriggere ‘o   Napule doppo paricchiu tiempe dê ‘nguacchie fatte precedentemente ‘ndanno d’ ‘o Napule, tentaje ‘e tutto pe dà fastidio ê cuane mettennose pe ‘mmiez’ê piere d’ ‘e napulitane custrette a scartà primma a isso e ppo ê jucature atalantise e nun vedenno ‘o juoco viulento e pruvucatorio d’ ‘e delinquente ‘e Colantuono, ausaje dduje pise e ddoje mesure; pe gghionta ‘e ruotolo nun siscaje, comme aggiu ditto,  ‘nu ricore sacrusanto ‘ncuollo a Mertenso e addirittura ll’ammunette pe simulazziona… Dicimmo ca nun ‘o siscaje pe nun fà fà n’ata bbrutta fijura ô Pipita ca forze ll’êsse sbagliato.

E cu cchesto ve saluto e si dDi’ vo’ ve dongo appuntamento a ddummeneca ca vène. Staveti bbe’.
R. Bracale Brak

ilnapolista © riproduzione riservata