ilNapolista

5,5 a Benitez: p’’a primma vota ‘o Napule scennette ‘ncampo pe guardarse ‘a castagna

5,5 a Benitez: p’’a primma vota ‘o Napule scennette ‘ncampo pe guardarse ‘a castagna

E che saciccio! Tengo ‘o bbeleno nfi’ a ‘mpont’ô musso e mme stongo ancòra magnanno ‘e mmane, guagliú! I’ ancòra nun ce pozzo credere ca ajeressera a ssan Siro contro a ll’Intèrra ‘e wallerettino mazzarri… ‘o Napule perdette ‘na granna accasione ‘e metterese dint’â sacca ‘e tre ppunte e ddà finalmente n’adderezzata ‘a varca d’’o campiunato… Ma chi t’’o dà, chi t’’o ddà? Nun ce riuscette, addó ch’êssemo pututo fà unu muorzo d’’e profuche nireazzurre. ‘O fatt’è ca ajeressera a ssan Siro,’o Napule sbagliaje ll’accercamiento (approccio) ô fullè (incontro)jucanno ‘nu primmo ajone ‘a pigliarlo a ppacchere,tutto ‘ntanato dint’â mità ccampo soja, stanno sempe areto aspettanno a ll’Interra e tiranno ‘mporta meza vota senza però essere periculoso, e ssulo a ll’arrancua (ripresa) don Rafele se decidette a ffarle fà ‘o Napule e finalmente a ll’urdemu quarto d’ora pe ddoje vote ‘o Napule passaje ‘nvantaggio e ppe ddoje vote, mannaggia ô diavulo scartellato, se facette arrivà piglianno[pe sfarma (colpa) ‘na vota ‘e Inlerro e ‘na vota ‘e Ghoulàmmo]   dduje stuche (gol) uno cchiú ffesso ‘e ll’ato e dànno ‘na mano a wwallerettino mazzarri. No, no! Nun se ponno menà a mmare certi accasione! A ttre mminute dô prazzo (termine) staje vincenno pe ddoje a uno? Hê ‘aizà ‘na trancara (muraglione) ‘nnante â porta mettenno pure diece perzone ‘ncopp’â linia ‘e porta…, ma nun t’hê ‘a fà arrivà! E mmece chi t’’o dà, chi t’’o ddà? Tengo ‘o bbeleno nfi’ a ‘mpont’ô musso: chiste nun tèneno cazzimma! E accussí ajeressera menajemo a mmare n’ati dduje punte ‘mpurtante e mmo ‘nfra nuje e ‘o terzo posto nce stanno ‘a bbellezza ‘e quatto scuatre… nun saccio si mme spieco! Passammo ê ppaggelle:

RAFAEL 6 ‘O guaglione nun è attrezzato p’’e miracule e nun ce putette fà niente si Inlerro se perdette a gGuarínno ca signaje ‘a duje passe e ssiGhoulàmmo lassaje libbero e ffranco a Hhernanèsso ca cu ‘na cabbesera (colpo di testa) ce futtette p’’a siconna vota. .

ZUNIGA 5,5 Dê pparte soje se sufferette ‘e meno, ma tenette ‘ncopp’â cuscienza ‘o cruzzo ca cunzentette a Hhernanèsso ‘a cabbesera d’’o siconno stuco. Annante po se vedette poco.

Albiol 6 ‘E stima; jucaje però troppo preoccupato e cquacche vvota se facette cartià da Icardi; ‘ncumpenso, pure si a ffatica, riuscette a mmetterce quase sempe ‘na pezza.

KOULIBALY 6,5 ‘O cchiú ssicuro d’’a tràsera (retroguardia) risolvette ògne situazziona cumplicata e ddètte ‘na bbona mana ê cumpagne.

BRITOS 6 Arresecaje d’ascí súbbeto doppo ‘nu scontro cu Obi, ma resistette strignenno ‘e diente e nfi’ a cquanno ce stette isso ll’Interra nun facette danne. (dô 75° GHOULAM 5.5 ‘E pusitivo ‘o fatto ca riuscette a appressurà (spingere) cu sunessèia (continuità) e cchella rimessa longa ca surprennette ‘a tràsera (difesa) ‘e ll’Interra. ‘E necativo d’avé lassato libbero e ffranco a Hhernanèsso ‘ncopp’ô pareggio finale ‘nterista).

INLER 5 Assaje bbrutto ‘o primmo ajone quanno perdette cchiú ‘e ‘na palla cunzentenno quacche repartita (ripartenza) ‘nterista. ‘Nu poco meglio a ll’arrancua (ripresa) cunnita però ‘a tire strampalate e dâ fessaria fatta perdendose a gGuarínno ca signaje ‘a duje passe.

LOPEZ 6,5 Atalossa (prestazione) ‘e sustanza annante â tràsera (difesa)durante ô primmo ajone; a ll’arrancua (ripresa) se facette vedé a ll’epata enercetica (in fase propositiva) cunfeziunanno ‘nu granna ajuda(assist) p’’o siconno stuco (gol) ‘e Cagliecònno.

INSIGNE 5- Se sacrificaje assaje a ll’epata difenziva (in fase difensiva) dànno ‘na mano a Britòsso; ma annante se vedette poco o niente e cchelli ppochi vvote ca s’accentraje   sballaje ‘o tiro. A ttu ppe ttu cu ‘a porta spalancata centraje ‘o palo! Cose ‘e ll’atu munno! (dô 69° MERTENS 6 Trasuto troppo tarde, nun avette tanti pallune ‘a jucà uno contr’a uno, ma cercaje ‘e crià sinamparco (comunque) superiorità cu ‘a velocità ssoja.Nun se po’ pretennere ca uno adderizza ‘a varca ‘int’a ppochi minute!)

HAMSIK 5- Pe ttroppo tiempo fora dô fullé (match). ‘E pusitivo chill’unico tiro d’’o Napule durant’ô primmo ajone (nel primo tempo) e ppo ‘nu pasiglio (passaggio) p’ Insigne ca però centraje ‘o palo… e cchiú nient’ato; e pp’uno ca se chiamma Marekiaro è troppo, troppo poco! (dô 62° JORGINHO 6 Bbona ataslossa (prestazione) d’’o guaglione ca trasette súbbet ‘nfullè, dànno tassezza (velocità) â manovra e truvanno spisso ‘o bbassurero (suggerimento) centrale; peccato pe cchella garda (ammonizione)ca nun s’ammeretava e ca po ‘o cundizziunaje.)

CALLEJON 8 Se cunfermaje jucatore ‘mpurtante assaje e de cunsistenza: ll’otto meliune date ô Reaàlmadriddo pe ll’avé foveno n’arruobbo: macenaje chilometre e cchilometre   dànno granne aiuto a ll’epata difenziva (in fase difensiva) e sotto porta fove ‘nu pedrero arraíso (fromboliere spietato) signanno tutte e dduje ‘e stuche cuane (gol azzurri); assaje bbello ‘o siconno cu ‘nu tiro a vvolo a ‘ncrucià!Menu male ca joca cu nnuje!

HIGUAIN 5 Me dispiace, ma ‘e fatte stanno accussí: luntano ‘a chello ca sape e ppo’ ffà; troppo nervuso,rummanette ancòra a vvocca asciutta; lassato troppo sulo se ne lamentaje spisso cu ‘e cumpagne e fforze nun avette tutte ‘e tuorte;pe pparta soja però venette meno â qualità d’ommo-scuatra:nun fove ‘nserata e riuscette pessino a steccà ‘na palla ‘mpressiunante ô lemmeto d’’a camma (area).Êsse pututo dà ‘e cchiú. ‘O stammo aspettanno!

BENITEZ 5,5 P’’a primma vota ‘o Napule scennette ‘ncampo pe guardarse ‘a castagna senza fà juoco e sprecaje tutto ‘o primmo ajone e ssulamente a ll’arrancua (ripresa) don Rafele se decidette a ccagnà spartito e a ffà sunà ‘a musica canusciuta aizanno ‘o bbaricentro e scatenanno ‘a   qualità uffenziva d’’e cuane (azzurri), ma ll’urdema mez’ora nun avastaje pe ppurtarse â casa ‘e tre ppunte; ‘a mancanza ‘e cuncentrazione e de cazzimma ce custaje cara, ll’Interra pariggiaje e ppe nnuje fove acqua ca nun leva sete! E nun ce ‘a pozzo perdunà a ddon Rafele: certi accasione nun s’ànn’’a perdere!

Arbitro ORSATO 3,5 Chesta meza cazetta, carta canusciuta, teneva cchiú ‘e debbeto cu ‘o Napule e ajeressera mmece ‘e se ne levà quaccuno aumentaje ‘a ddosa siscanno sempe e ttutto a ffavore ‘e ll’Intèrra e ausanno dduje pise e ddoje mesure; da nun crerere ‘o fóte (fallo) nun siscato a ffavore d’’o Pipita a ll’arrancua (nella ripresa) ca facette abbuscà a ll’argentino ‘nu cartellino jalizzo (giallo) e ll’esazziona (espulsione) ‘e Pecchia tutto pe pruteste juste: se vedette chiaramente ca ‘o Pipita fove strattunato cchiú ‘e ‘na vota. Ora mo cunzigliateme vuje: ‘sta mmunnezza d’arbitro addó ll’aggi’’a mettere: dinto a ll’asciutto o dint’a ll’ummeto?

E ccu cchesto ve saluto e si dDi’ vo’ ce sentimmo viernarí ca vène doppo d’’o fullè d’ E.L.

Staveti bbe’.

R. Bracale Brak

ilnapolista © riproduzione riservata